പശ്ചിമേഷ്യയിലെ സംഘര്‍ഷസാഹചര്യം വര്‍ദ്ധിപ്പിച്ച് ഇറാഖിലും സിറിയയിലും യെമനിലും അമേരിക്കന്‍ ആക്രമണം. ഇറാഖിലും സിറിയയിലുമായി ആക്രമണങ്ങളില്‍ നാല്‍പത് പേര്‍ കൊല്ലപ്പെട്ടു.അമേരിക്കയുടെത് തന്ത്രപരമായ പിശക് എന്ന് വിശേഷിപ്പിച്ച ഇറാന്‍ നടപടി മേഖലയിലെ സംഘര്‍ഷസാഹചര്യം വര്‍ദ്ധിപ്പിക്കും എന്നും പ്രതികരിച്ചു.ജോര്‍ദാനിലെ അമേരിക്കന്‍ സൈനിക താവളത്തിന് നേരെ ഉണ്ടായ ആക്രണത്തിന് തിരിച്ചടിയായിട്ടാണ് ഇറാഖിലും സിറിയയിലും ആക്രമണം ആരംഭിച്ചത്. മൂന്ന് പേരുടെ മരണത്തിന് ഇടയാക്കിയ ആക്രമണത്തിന് പിന്നില്‍ ഇറാന്‍ പിന്തുണ നല്‍കുന്ന സായുധ സംഘങ്ങള്‍ ആണെന്നാണ് അമേരിക്കയുടെ ആരോപണം.
ഇറാനിയന്‍ റെവല്യൂഷണറി ഗാര്‍ഡുമായി ബന്ധമുള്ള എണ്‍പത്തിയഞ്ച് കേന്ദ്രങ്ങള്‍ക്ക് നേരെ ആണ് അമേരിക്ക പ്രത്യാക്രമണം പ്രഖ്യാപിച്ചത്. ഇതില്‍ സിറിയയില്‍ 4 കേന്ദ്രങ്ങളിലും ഇറാഖില്‍ മൂന്ന് കേന്ദ്രങ്ങളിലും ആണ് അമേരിക്കന്‍ സൈന്യം ഇതുവരെ ആക്രമണം നടത്തിയത്.അമേരിക്കന്‍ ആക്രമണം ആരംഭിച്ചതിന് ശേഷം ഇതുവരെ നാല്‍പത് പേര്‍ കൊല്ലപ്പെട്ടെന്നാണ് റിപ്പോര്‍ട്ട്. അമേരിക്കയുടെ പ്രത്യാക്രമണ നടപടി പശ്ചിമേഷ്യയിലെ സംഘര്‍ഷാവസ്ഥയ്ക്ക് ആക്കം കൂട്ടിയിരിക്കുകയാണ്. ഇറാഖിലേയും സിറിയയിലേയും ആക്രമണം കൊണ്ട് അമേരിക്ക ഒന്നും നേടാന്‍ പോകുന്നില്ലെന്നും മേഖലയുടെ അസ്ഥിരതയ്ക്ക് യു.എസ് നടപടി കാരണമാകുമെന്നും ഇറാന്‍ വിദേശകാര്യമന്ത്രാലയം അറിയിച്ചു. അമേരിക്കയുടെ നടപടിയ്ക്ക് എതിരെ ഇറാഖ് ശക്തമായ പ്രതിഷേധവുമായി രംഗത്ത് എത്തിയിട്ടുണ്ട്.
ഇറാഖിന്റെ പരമാധികാരത്തെ ലംഘിക്കുന്നതാണ് അമേരിക്കന്‍ നടപടി എന്ന് പ്രധാനമന്ത്രിയുടെ ഓഫീസ് പ്രതികരിച്ചു. ഇതിനിടെ യെമനിലെ ഹൂത്തി കേന്ദ്രങ്ങള്‍ക്ക് നേരെ അമേരിക്ക-യുകെ സംഖ്യം വീണ്ടും ആക്രമണം നടത്തി. യെമിലെ പതിമൂന്ന് കേന്ദ്രങ്ങള്‍ക്ക് നേരെ ആയിരുന്നു ആക്രമണം. ചെങ്കടലില്‍ ഹൂത്തികള്‍ കപ്പലുകള്‍ക്ക് നേരെ ആക്രമണം നടത്തുന്നതിന് മറുപടിയായിട്ടാണ് യെമനിലെ യു.സ്-യുകെ പ്രത്യാക്രമണം. കപ്പലുകള്‍ ആക്രമിക്കുന്നതിനായി ഹൂത്തകള്‍ ഉപയോഗിക്കുന്ന ആയുധങ്ങള്‍ തകര്‍ത്തു എന്നാണ് സംഖ്യസേനയുടെ അവകാശവാദം
