എമിറേറ്റില്‍ രണ്ട് ടോള്‍ ഗെയ്റ്റുകള്‍ കൂടി വരുന്നുവെന്ന പ്രഖ്യാപനത്തിന് പിന്നാലെ ദുബൈ സാലിക്കിന്റെ ഓഹരി മൂല്യം ഉയര്‍ന്നു. പതിനൊന്ന് ശതമാനത്തിന്റെ വര്‍ദ്ധനയാണ് ഓഹരി മൂല്യത്തില്‍ രേഖപ്പെടുത്തിയത്. ദുബൈ ഓഹരി വിപണിയില്‍ ലിസ്റ്റ് ചെയതതിന് ശേഷം ഇതുവരെ എഴുപത്തിയഞ്ച് ശതമാനത്തോളം ആണ് സാലിക്ക് ഓഹരിയുടെ മൂല്യം ഉയര്‍ന്നത്.
ദുബൈയില്‍ രണ്ട് സാലിക്ക് ഗെയ്റ്റുകള്‍ കൂടി സ്ഥാപിക്കുന്നുവെന്ന് റോഡ്‌സ് ആന്റ് ട്രാന്‍സ്‌പോര്‍ട്ട് അഥോറിട്ടിയും സാലിക്ക് കമ്പനിയും ജനുവരി പത്തൊന്‍പതിന് ആണ് പ്രഖ്യാപിച്ചത്. ഇതിന് പിന്നാലെയാണ് സാലിക്ക് ഓഹരി മൂല്യത്തില്‍ പതിനൊന്ന് ശതമാനത്തോളം വര്‍ദ്ധന രേഖപ്പെടുത്തിയത്.

കഴിഞ്ഞ മൂന്ന് മാസത്തിനിടയിലെ ഏറ്റവും ഉയര്‍ന്ന മൂല്യം ആണ് സാലിക്ക് ഓഹരികള്‍ക്ക് രേഖപ്പെടുത്തിയിരിക്കുന്നത്. കഴിഞ്ഞ മൂന്ന് മാസത്തിനിടയില്‍ മാത്രം സാലിക്ക് ഓഹരികള്‍ക്ക് മുപ്പത്തിയഞ്ച് ശതമാനത്തോളം മൂല്യം ഉയര്‍ന്നു. ഒരു ഓഹരിയുടെ മൂല്യത്തില്‍ ഒരു ദിര്‍ഹത്തിന്റെ വര്‍ദ്ധന രേഖപ്പെടുത്തി വില 3.72 ദിര്‍ഹമായി മാറി. 2022 സെപ്റ്റംബര്‍ ഇരുപത്തിയൊന്‍പതിനാണ് സാലിക്ക് കമ്പനി ദുബൈ ഫിനാന്‍ഷ്യല്‍ മാര്‍ക്കറ്റില്‍ ലിസ്റ്റ് ചെയ്തത്. അതിന് ശേഷം ഇതുവരെയായി എഴുപത്തിയഞ്ച് ശതമാനത്തോളം ആണ് സാലിക്ക് ഓഹരികളുടെ മൂല്യം ഉയര്‍ന്നത്. കൂടുതല്‍ നിക്ഷേപകര്‍ സാലിക്ക് ഓഹരികളിലേക്ക് ആകൃഷ്ടരായി എത്തുന്നുണ്ട്.

സാലിക്കിന്റെ വികസനകൂടി പ്രഖ്യാപിച്ചതോടെ ഇതില്‍ വീണ്ടും വര്‍ദ്ധന രേഖപ്പെടുത്തി. ഈ വര്‍ഷം നവംബറോട് കൂടി ദുബൈയില്‍ രണ്ടിടത്ത് കൂടി സാലിക്ക് ഗെയ്റ്റ് പ്രവര്‍ത്തിച്ച് തുടങ്ങും എന്നാണ് പ്രഖ്യാപനം. ഇതോടെ എമിറേറ്റിലെ ടോള്‍ ഗെയ്റ്റുകളുടെ എണ്ണം പത്തായി വര്‍ദ്ധിക്കും. സാലിക്കിന് വ്യത്യസ്ഥ നിരക്ക് ഈടാക്കുന്നത് പരിഗണനയില്‍ ഉണ്ടെന്നും ആര്‍ടിഎ വ്യക്തമാക്കിയിട്ടുണ്ട്. തിരക്കേറുന്ന സമയങ്ങളില്‍ കൂടുതല്‍ നിരക്ക് ഈടാക്കുന്നതിന് ആണ് ആലോചന.

യുഎഇയുടെ ബഹിരാകാശഗവേഷണ രംഗത്തെ നിര്‍ണ്ണായക ചുവടുവെയ്പ്പായ ലൂണാര്‍ ഗെയ്റ്റ്‌വേ എയര്‍ലോക്കിനുള്ള പ്രവര്‍ത്തനങ്ങള്‍ ആരംഭിച്ചു. ചന്ദ്രനെ വലം വെയ്ക്കുന്ന ബഹിരാകാശ നിലയത്തിന്റെ നിര്‍ണ്ണായക ഘടകം ആണ് യുഎഇ നിര്‍മ്മിക്കുന്നത്. നാസ അടക്കമുള്ള രാജ്യാന്തര ബഹിരാകാശ ഏജന്‍സികളുമായി ചേര്‍ന്നാണ് പദ്ധതിക്കുള്ള പ്രവര്‍ത്തനങ്ങള്‍ യുഎഇ ആരംഭിച്ചിരിക്കുന്നത്. ചന്ദ്രനില്‍ വീണ്ടും മനുഷ്യനെ എത്തിക്കുന്നതിനുള്ള നാസയുടെ ആര്‍ട്ടെമിസ് പദ്ധതിയുടെ ഭാഗമായുള്ള ബഹിരാകാശ നിലയത്തിന്റെ ഒരു ഭാഗം ആണ് യുഎഇ നിര്‍മ്മിക്കുന്നത്. ചന്ദ്രനെ വലംവെയ്ക്കാന്‍ പോകുന്ന ഈ പേടകത്തിന്റെ ഏകപ്രവേശന കവാടമാണ് ദുബൈ മുഹമ്മദ് ബിന്‍ റാഷിദ് സ്‌പെയ്‌സ് സെന്റര്‍ നിര്‍മ്മിക്കുന്ന എയര്‍ലോക്.

ലൂണാര്‍ ഗെയ്റ്റ്‌വേ എയര്‍ലോക്കിന്റെ നിര്‍മ്മാണത്തിനുള്ള പ്രവര്‍ത്തികള്‍ ഈ ആഴ്ച്ച ആരംഭിച്ചെന്ന് എം.ബി.ആര്‍.സി ഡയറക്ടര്‍ ജനറല്‍ സലേം അല്‍ മര്‍റി അറിയിച്ചു. പദ്ധതിക്ക് നേതൃത്വം നല്‍കുന്ന നാസയുടെ ജോണ്‍സണ്‍ സ്‌പെയ്‌സ് സെന്ററിലെ ലൂണാര്‍ ഗെയ്റ്റ്‌വേ സംഘവുമായി എം.ബി.ആര്‍.എസ്.സി സംഘം നിരവധി തവണ ഇതിനകം ചര്‍ച്ചകള്‍ നടത്തിയെന്നും സലേം അല്‍ മര്‍റി അറിയിച്ചു.പദ്ധതിയുടെ തുടക്കം മാത്രമേ ആയിട്ടുള്ളുവെന്നും അത് വിജയത്തില്‍ എത്തുമെന്ന് ഉറപ്പാണെന്നും സലേം അല്‍ മര്‍റി വ്യക്തമാക്കി. ലൂണാര്‍ ഗെയ്റ്റ്‌വേ മാതൃകയുടെ ചിത്രങ്ങളും എം.ബി.ആര്‍.സി പുറത്തുവിട്ടിട്ടുണ്ട്. ലൂണാര്‍ ഗെയ്റ്റ്‌വേയുടെ പത്ത് ടണ്‍ ഭാരമുള്ള എയര്‍ലോക്ക് ആണ് യുഎഇ നിര്‍മ്മിക്കുക.

പത്ത് മീറ്റര്‍ നീളവും നാല് മീറ്റര്‍ വീതിയുമാണ് എയര്‍ലോക്കിന് ഉണ്ടാവുക. നാസയും യൂറോപ്യന്‍ കനേഡിയന്‍ സ്‌പെയ്‌സ് എജന്‍സിയും ജപ്പാനും ചേര്‍ന്നാണ് ചന്ദ്രനെ വലംവെയ്ക്കുന്ന നിലയം നിര്‍മ്മിക്കുന്നത്. 2025-ല്‍ ലൂണാര്‍ ഗെയ്റ്റ്‌വേയുടെ ആദ്യഘടകങ്ങള്‍ ഭ്രമണപഥത്തില്‍ എത്തിക്കുന്നതിന് ആണ് പദ്ധതി. 2030-ല്‍ ആയിരിക്കും യുഎഇ നിര്‍മ്മിക്കുന്ന എയര്‍ലോക് ബഹിരാകാശത്ത് എത്തിക്കുക.

ദുബൈയില്‍ റിയല്‍എസ്റ്റേറ്റ് മേഖലയില്‍ നിക്ഷേപം നടത്തുന്നവരില്‍ ഇന്ത്യക്കാര്‍ ഒന്നാം സ്ഥാനത്ത്. റഷ്യന്‍ നിക്ഷേപകരെ പിന്തള്ളിയാണ് ഇന്ത്യക്കാര്‍ ഒന്നാം സ്ഥാനം സ്വന്തമാക്കിയത്. ദുബൈയില്‍ വസ്തുവിലയില്‍ കഴിഞ്ഞ രണ്ട് വര്‍ഷങ്ങളില്‍ വന്‍വില വര്‍ദ്ധനയുണ്ടായെന്നും റിപ്പോര്‍ട്ടില്‍ പറയുന്നത്.ബെറ്റര്‍ഹോംസ് പുറത്തുവിട്ട റിപ്പോര്‍ട്ടില്‍ ആണ് ഇന്ത്യക്കാര്‍ ദുബൈയില്‍ വന്‍തോതില്‍ വില്ലകളും അപ്പാര്‍ട്ട്‌മെന്റുകളും വാങ്ങിക്കൂട്ടുവെന്ന് ചൂണ്ടിക്കാട്ടുന്നത്. ബെറ്റര്‍ഹോംസിന്റെ പട്ടികയില്‍ ഒന്നാം സ്ഥാനത്താണ് ഇന്ത്യന്‍ നിക്ഷേപകര്‍, രണ്ടും മൂന്നും സ്ഥാനങ്ങളില്‍ ബ്രിട്ടീഷ് റഷ്യന്‍ നിക്ഷേപകരാണ്. മുന്‍വര്‍ഷങ്ങളില്‍ ഒന്നാം സ്ഥാനത്തായിരുന്ന റഷ്യന്‍ നിക്ഷേപകര്‍ മൂന്നാം സ്ഥാനത്തേക്ക് പിന്തള്ളപ്പെട്ടു.

2022-ല്‍ മൂന്നാം സ്ഥാത്തായിരുന്ന ഇന്ത്യന്‍ നിക്ഷേപകര്‍ 2023-ല്‍ ഒന്നാം സ്ഥാനത്തേക്കും എത്തി. 2022-ലും 2022-ലും ദുബൈയില്‍ വില്ലകള്‍ക്കും അപ്പാര്‍ട്ട്‌മെന്റുകള്‍ക്കും അഭൂതപൂര്‍വ്വമായ ഡിമാന്‍ഡ് ആണ് അനുഭവപ്പെട്ടത്. ഇത് വസ്തുവില ഉയരുന്നതിന് കാരണമായി. എമിറേറ്റില്‍ പ്രവാസികളുടെ എണ്ണത്തിലുണ്ടായ വര്‍ദ്ധനയും വില ഉയരുന്നതിന് കാരണമായി. വേഗത്തില്‍ മുടക്കുമുതലും വന്‍ലാഭവും തിരികെ ലഭിക്കുന്നു എന്നത് ദുബൈയുടെ റിയല്‍ എസ്റ്റേറ്റിലേക്ക് ശതകോടികളുടെ വിദേശനിക്ഷേപം എത്തിച്ചു. ഒരുലക്ഷത്തിലധികം പുതിയ പാര്‍പ്പിടങ്ങളാണ് ദുബൈയില്‍ 2023-ല്‍ ഉയര്‍ന്നത്.

നേരിട്ടുള്ള വിദേശനിക്ഷേപത്തില്‍ വന്‍ മുന്നേറ്റം കുറിച്ച് യുഎഇ. 2023-ല്‍ യുഎഇയിലേക്ക് എത്തിയ വിദേശനിക്ഷേപത്തില്‍ ഇരുപത്തിയെട്ട് ശതമാനം വര്‍ദ്ദനരേഖപ്പെടുത്തിയെന്ന് ഐക്യരാഷ്ട്രഭാ റിപ്പോര്‍ട്ട്. ഇരുനൂറോളം രാജ്യങ്ങളുടെ പട്ടികയില്‍ രണ്ടാം സ്ഥാനത്താണ് യുഎഇ.

യുണൈറ്റഡ് നേഷന്‍സ് കോണ്‍ഫറന്‍സ് ഓണ്‍ ട്രേയ്ഡ് ആന്റ് ഡെവലപ്‌മെന്റ് പുറത്തിറക്കിയ റിപ്പോര്‍ട്ടില്‍ ആണ് നേരിട്ടുള്ള വിദേശനിക്ഷപത്തില്‍ പോയവര്‍ഷം യുഎഇ വന്‍ കുതിപ്പ് നടത്തിയെന്ന് വ്യക്തമാക്കുന്നത്. യു.എന്‍.സി.റ്റി.എ.ഡിയുടെ പട്ടികയില്‍ ആഗോളതലത്തില്‍ അമേരിക്കയ്ക്ക് തൊട്ടുപിന്നില്‍ രണ്ടാം സ്ഥാനത്താണ് യുഎഇ. ആഗോളതലത്തില്‍ നേരിട്ടുള്ള വിദേശനിക്ഷേപത്തിലെ വളര്‍ച്ചയില്‍ പതിനെട്ട് ശതമാനത്തിന്റെ ഇടിവ് നേരിട്ടപ്പോള്‍ ആണ് യുഎഇയിലേക്ക് ഇരുപത്തിയെട്ട് ശതമാനം അധികം നിക്ഷേപം എത്തിയത്.

യുഎഇയുടെ നിക്ഷേപസൗഹദാന്തരീക്ഷവും മത്സരക്ഷമതയും ആശയങ്ങളും ആണ് രാജ്യത്തേക്ക് കൂടുതല്‍ നിക്ഷേപം എത്തിച്ചതെന്ന് വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തും അറിയിച്ചു. ശുഭാപ്തിവിശ്വാസത്തിന്റെ പുതിയൊരു വര്‍ഷത്തിലേക്ക് യുഎഇ കടന്നിരിക്കുകയാണ്. യുഎഇയുടെ ഭാവി കൂടുതല്‍ ശോഭനമായിരിക്കും എന്നും ഷെയ്ഖ് മുഹമ്മദ് ബിന്‍ റാഷിദ് അല്‍ മക്തും പറഞ്ഞു. ജിസിസി രാജ്യങ്ങളില്‍ സൗദി അറേബ്യയും പോയവര്‍ഷം മികച്ച നിലയില്‍ വിദേശനിക്ഷേപം ആകര്‍ഷിച്ചുവെന്നാണ് കണക്കുകള്‍ വ്യക്തമാക്കുന്നത്.