കോവിഡിന് ശേഷം സൗദി അറേബ്യയില്‍ എത്തുന്ന വിദേശികളുടെ എണ്ണത്തില്‍ വന്‍ വര്‍ദ്ധന. 2019-നെ അപേക്ഷിച്ച് 156 ശതമാനത്തിന്റെ വര്‍ദ്ധന ആണ് രേഖപ്പെടുത്തിയിരിക്കുന്നത്.
വേള്‍ഡ് ടൂറിസം ഓര്‍ഗനൈസേഷന്‍ പ്രസിദ്ധീകരിച്ച പുതിയ റിപ്പോര്‍ട്ടിലാണ് സൗദിയുടെ വിനോദസഞ്ചാര മേഖല അതിവേഗ വളര്‍ച്ച കൈവരിക്കുന്നുവെന്ന് വ്യക്തമാക്കുന്നത്.
കോവിഡ് മഹാമാരിക്കാലത്തിന് ശേഷം സൗദിയിലേക്കുള്ള സഞ്ചാരികളുടെ ഒഴുക്കിന് വേഗത കൂടിയെന്നാണ് റിപ്പോര്‍ട്ടില്‍ പറയുന്നത്.

കോവിഡ് അവസാനിച്ചപ്പോള്‍ സന്ദര്‍ശകരുടെ എണ്ണത്തില്‍ വന്‍ കുതിച്ചുചാട്ടമാണ് ദൃശ്യമായിരിക്കുന്നത്. സഞ്ചാരികളുടെ എണ്ണത്തില്‍ 150 ശതമാനത്തിന്റെ വര്‍ദ്ധനയാണ് രേഖപ്പെടുത്തിയിരിക്കുന്നത്. കോവിഡിന് മുന്‍പുള്ള കാലവുമായി താരതമ്യപ്പെടുത്തുമ്പോള്‍ ആഗോള വിനോദസഞ്ചാര രംഗത്ത് വളര്‍ച്ച എണ്‍പത്തിയെട്ട് ശതമാനം മാത്രമാണ്.മധ്യപൂര്‍വ്വേഷ്യയില്‍ ഏറ്റവും വലിയ വളര്‍ച്ച വിനോദസഞ്ചാരരംഗത്ത് സ്വന്തമാക്കിയിരിക്കുന്നതും സൗദി അറേബ്യ ആണെന്ന് റിപ്പോര്‍ട്ടില്‍ പറയുന്നു.

വിനോദസഞ്ചാര രംഗത്തെ പുതിയ പദ്ധതികളും വൈവിധ്യവത്കരണത്തിനുള്ള നടപടികളും ആണ് കൂടുതല്‍ സന്ദര്‍ശകരെ രാജ്യത്തേക്ക് ആകര്‍ഷിക്കുന്നത്.

2024-ല്‍ മഴയുടെ തോത് വര്‍ദ്ധിപ്പിക്കുന്നതിന് കൂടുതല്‍ ക്ലൗഡ് സീഡിംഗ് ദൗത്യങ്ങള്‍ക്ക് ഒരുങ്ങി യുഎഇ. മുന്നൂറോളം ക്ലൗഡ് സീഡിംഗ് ദൗത്യങ്ങള്‍ക്കാണ് ദേശീയകാലാവസ്ഥാ കേന്ദ്രം ഒരുങ്ങുന്നത്. ക്ലൗഡ് സീഡിംഗിലൂടെ പ്രതിവര്‍ഷം ലഭിക്കുന്ന മഴയില്‍ പതിനഞ്ച് ശതമാനത്തിന്റെ വര്‍ദ്ധനയാണ് വരുന്നത്.കഴിഞ്ഞ ഇരുപത് വര്‍ഷത്തിലധികമായി മഴയുടെ തോത് വര്‍ദ്ധിപ്പിക്കുന്നതിന് യുഎഇ ക്ലൗഡ് സീഡിംഗ് നടത്തുന്നുണ്ട്. പ്രതിവര്‍ഷം ശരാശരി തൊള്ളായിരം മണിക്കര്‍ ക്ലൗഡ് സീഡിംഗ് ദൗദ്യങ്ങളാണ് എന്‍.സി.എം വിമാനങ്ങള്‍ നടത്തുന്നത്.

2024-ലും കൂടുതല്‍ ക്ലൗഡ് സീഡിംഗ് ദൗത്യങ്ങള്‍ക്കാണ് യുഎഇയുടെ തയ്യാറെടുപ്പ്. പ്രതിവര്‍ഷം മുന്നൂറോളം ക്ലൗഡ് സീഡിംഹ് ദൗത്യങ്ങള്‍ ആണ് യുഎഇ നടത്തുന്നതെന്ന് ദേശീയകാലാവസ്ഥാ കേന്ദ്രം വ്യക്തമാക്കി. എന്നാല്‍ മഴമേഘങ്ങള്‍ രൂപപ്പെടുന്നതിന്റെയും കാലാവസ്ഥയുടെയും അടിസ്ഥാനത്തില്‍ ക്ലൗഡ് സീഡിംഗ് ദൗത്യങ്ങളുടെ എണ്ണത്തില്‍ വ്യത്യാസം വരാം എന്നും കാലാവസ്ഥാ കേന്ദ്രം വ്യക്തമാക്കുന്നു. 2024-ലും മുന്നൂറോളം ക്ലൗഡ് സീഡിംഗ് ദൗത്യങ്ങള്‍ നടത്താന്‍ കഴിയും എന്നാണ് പ്രതീക്ഷ. യുഎഇയുടെ വാര്‍ഷിക വര്‍ഷപാദത്തില്‍ കാര്യമായ വര്‍ദ്ധന വരുത്തുന്നതിന് ക്ലൗഡ് സീഡിംഗ് ദൗത്യങ്ങള്‍ക്ക് കഴിയുന്നുണ്ട്.

പതിനഞ്ച് ശതമാനത്തോളം വര്‍ദ്ധനയാണ് മഴയില്‍ പ്രതിവര്‍ഷം രേഖപ്പെടുത്തുന്നത്. ഇത് ഇരുപത്തിയഞ്ച് ശതമാനം വരെ വര്‍ദ്ധിപ്പിക്കുന്നതിനും സാധിക്കും എന്നും ഗവേഷകര്‍ പറയുന്നു. ക്ലൗഡ് സീഡിംഗ് നടത്തുന്നതിന് നിലവില്‍ ഉപയോഗിക്കുന്നതിനെക്കാള്‍ കാര്യക്ഷമത കൂടിയ മറ്റ് മാര്‍ഗ്ഗങ്ങളും യുഎഇ പരിക്ഷിക്കുന്നുണ്ട്. സെപ്റ്റംബറില്‍ ഒരുമാസം നീണ്ടുനില്‍ക്കുന്ന ക്ലൗഡ് സീഡിംഗ് പരീക്ഷ ദൗത്യം എന്‍.സി.എം നടപ്പാക്കിയിരുന്നു.

ഗാസയില്‍ ഒരു ആശുപത്രിക്ക് നേരെ കൂടി ഇസ്രയേല്‍ ആക്രമണം. ഗാസയില്‍ ശേഷിക്കുന്ന ആശുപത്രികള്‍ കൂടി ഇസ്രയേല്‍ സൈന്യം ഇല്ലാതാക്കാന്‍ ശ്രമിക്കുകയാണെന്നാണ് ആരോപണം. ഇതിനിടെ ഗാസ യുദ്ധവുമായി ബന്ധപ്പെട്ട് ബെന്യാമിന്‍ നെതന്യാഹു പറയുന്നത് കളവാണെന്ന വാദവുമായി ഇസ്രയേല്‍ യുദ്ധ ക്യാബിനറ്റ് മന്ത്രി തന്നെ രംഗത്ത് എത്തി.ഖാന്‍ യൂനിസിലെ അല്‍ അമാല്‍ ആശപുത്രിക്ക് നേരെ ഇസ്രയേല്‍ ഡ്രോണ്‍ ആക്രമണം നടത്തിയെന്നാണ് പലസ്തീനിയന്‍ റെഡ് ക്രെസന്റിന്റെ ആരോപണം. ആക്രമണത്തില്‍ നിരപരാധികളായ സാധാരണക്കാര്‍ക്ക് പരുക്കേല്‍ക്കുകയാണെന്നും റെഡ്‌ക്രെസന്റ് ആരോപിച്ചു.

ഖാന്‍ യൂനിസില്‍ തന്നെയുള്ള നാസര്‍ ആശുപത്രിക്ക് സമീപത്തും രൂക്ഷമായ ആക്രമണം നടക്കുന്നുണ്ട്. ഗാസയിലെ തന്നെ ഏറ്റവും വലിയ ആശുപത്രികളില്‍ ഒന്നാണ് നാസര്‍. ഖാന്‍ യൂനിസ് നഗരം പൂര്‍ണ്ണമായും ഹമാസില്‍ നിന്നും പിടിച്ചെടുക്കുന്നതിനുള്ള നീക്കങ്ങളാണ് ഇസ്രയേല്‍ സൈന്യം നടത്തുന്നത്. കഴിഞ്ഞ ഒരു ദിവസത്തിനിടയില്‍ മാത്രം 142 പലസ്തീനികള്‍ കൊല്ലപ്പെട്ടെന്ന് ഗാസയിലെ ആരോഗ്യമന്ത്രാലയം വ്യക്തമാക്കി.

ഇതിനിടെ ഗാസ യുദ്ധവുമായി ബന്ധപ്പെട്ട പ്രധാനമന്ത്രി ബെന്യാമിന്‍ നെതന്യാഹുവിന് എതിരെ യുദ്ധക്യാബിനറ്റ് മന്ത്രിയും മുന്‍ കരസേന മേധാവിയുമായ ഗാഡി ഐസന്‍കോട്ട് രംഗത്ത് എത്തി. നെതന്യാഹു യുദ്ധത്തിലെ വിജയം എന്ന പേരില്‍ പറയുന്നത് എല്ലാം നുണയാണെന്നാണ് ഐസന്‍കോട്ടിന്റെ ആരോപണം. ഹമാസിനെ പൂര്‍ണ്ണമായും ഇല്ലാതാക്കുമെന്ന് അവകാശപ്പെട്ട് ആരംഭിച്ച യുദ്ധം 105 ദിവസം കഴിഞ്ഞിട്ടും എങ്ങുമെത്തിയില്ല. ഹമാസിനെ ഒരിക്കലും പരാജയപ്പെടുത്താന്‍ കഴിയില്ലെന്നും ഇസ്രയേല്‍ പ്രതിരോധ സേനയുടെ മുന്‍ ചീഫ് ഓഫ് സ്റ്റാഫായിരുന്ന ഐസന്‍കോട്ട് പറഞ്ഞു. ഗസ്സയില്‍ കൊല്ലപ്പെടുന്ന സൈനികരുടെ എണ്ണം വര്‍ദ്ധിക്കുകയാണെന്നും ഐസന്‍കോട്ട് പറഞ്ഞു.

യുഎഇയിലെ ആദ്യ വെര്‍ട്ടിക്കല്‍ റിസോര്‍ട്ട് ദുബൈയില്‍ പ്രവര്‍ത്തനം തുടങ്ങി. റിസോര്‍ട്ടില്‍ യുഎഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍മക്തും സന്ദര്‍ശനം നടത്തി.വണ്‍ ആന്റ് ഒണ്‍ലി വണ്‍ സബില്‍ വെര്‍ട്ടിക്കല്‍ റിസോര്‍ട്ടാണ് ദുബൈയില്‍ പ്രവര്‍ത്തനം ആരംഭിച്ചത്.പതിനഞ്ച് നിലകളിലായി 229 അത്യാഢംബര മുറികള്‍ ആണ് വെര്‍ട്ടിക്കല്‍ റിസോര്‍ട്ടില്‍ ഉള്ളത്.

ലോകോത്തര ഷെഫുമാര്‍ ഒരുക്കുന്ന രുചിവൈവിധ്യവും അറബന്‍ വെര്‍ട്ടിക്കല്‍ റിസോര്‍ട്ടില്‍ ആസ്വദിക്കാം. റിസോര്‍ട്ടിന്റെ വിവിധ ഭാഗങ്ങളില്‍ യുഎഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ഷെയ്ഖ് മുഹമ്മ്ദ് ബിന്‍ റാഷിദ് അല്‍ മക്തും നടന്നു കണ്ടു. ദുബൈയുടെ സാമ്പിത്തക വളര്‍ച്ചില്‍ ടൂറിസ്സം മേഖലയുടെ പങ്ക് നിര്‍ണ്ണായകമാണെന്ന് ഷെയ്ഖ് മുഹമ്മദ് ബിന്‍ റാഷിദ് അല്‍ മക്തും പറഞ്ഞു. സമീപകാലത്ത് വിനോദസഞ്ചാരികളുടെ എണ്ണത്തില്‍ വര്‍ദ്ധന രേഖപ്പെടുത്തിയിട്ടുണ്ടെന്നും ഷെയ്ഖ് മുഹമ്മദ് ബിന്‍ റാഷിദ് അല്‍മക്തും പറഞ്ഞു.

ദുബൈ കിരീടവകാശിയും എക്‌സിക്യൂട്ടീവ് കൗണ്‍സില്‍ ചെയര്‍മാനുമായ ഷെയ്ഖ് ഹംദാന്‍ ബിന്‍ മുഹമ്മദ് ബിന്‍ റാഷിദ് അല്‍ മക്തും തുടങ്ങിയവരും ഷെയ്ഖ് മുഹമ്മദിന് ഒപ്പം വെര്‍ട്ടിക്കല്‍ റിസോര്‍ട്ടില്‍ സന്ദര്‍ശനം നടത്തി. ദുബൈയിലെ ഹോട്ടല്‍ മുറികളില്‍ അതിവേഗത്തിലാണ് വര്‍ദ്ധന വരുന്നത്.2023 നവംബറിലെ കണക്കുകള്‍ പ്രകാരം ദുബൈയില്‍ 149680 ഹോട്ടല്‍ മുറികളാണ് ഉള്ളത്.

അടിസ്ഥാനസൗകര്യം വികസിപ്പിച്ചും ഗതാഗതസംവിധാനങ്ങള്‍ നവീകരിച്ചും 2006-2023 കാലയവളില്‍ ദുബൈ ലാഭിച്ചത് ഇരുപത്തിയാറായിരം കോടി ദിര്‍ഹം എന്ന് ആര്‍ടിഎ. കഴിഞ്ഞ വര്‍ഷം മാത്രം ആര്‍ടിഎയുടെ വരുമാനം 890 കോടി ദിര്‍ഹമായിരുന്നുവെന്ന് ഡയറക്ടടര്‍ ജനറല്‍ മാത്തര്‍ അല്‍ തായര്‍ അറിയിച്ചു.ദുബൈയില്‍ നടന്ന രാജാന്തര പ്രോജക്ട് മാനേജ്‌മെന്റ് ഫോറത്തില്‍ ആണ് എമിറേറ്റില്‍ നടപ്പാക്കിയ പശ്ചാത്തലസൗകര്യവികസനവും അതുവഴിയുണ്ടായ നേട്ടങ്ങളും ആര്‍ടിഎ ഡയറക്ടര്‍ ജനറല്‍ വിശദീകരിച്ചത്.

ഗതാഗത സൗകര്യങ്ങളുടെ വികസനത്തിനായി ദുബൈ ഭരണകൂടം പതിനാലായിരം കോടി ദിര്‍ഹം ആണ് ചെലവഴിച്ചതെന്ന് മാത്തര്‍ അല്‍ തായര്‍ പറഞ്ഞു. പൊതുഗതാഗത ഉപയോക്താക്കളുടെ എണ്ണത്തില്‍ വന്‍ വര്‍ദ്ധനയാണ് രേഖപ്പെടുത്തിയിരിക്കുന്നത്. 2006-ല്‍ ദുബൈയില്‍ പൊതുഗതാഗതം ഉപയോഗിച്ചിരുന്നത് പ്രതിവര്‍ഷം 9.5 കോടി യാത്രക്കാരായിരുന്നു. 2022-ല്‍ ഇത് അന്‍പത് കോടിയായി വര്‍ദ്ധിച്ചു.

റോഡ് അപകടങ്ങളും മരണനിരക്കും വന്‍തോതില്‍ കുറയ്ക്കാനും ഈ കാലയളവില്‍ കഴിഞ്ഞു. റോഡഅപകട മരണനിരക്കില്‍ തൊണ്ണൂറ് ശതമാനത്തിന്റെ കുറവാണ് വരുത്തിയത്. സാലിക്ക് കമ്പനിയില്‍ നിന്നും 2400 കോടിയുടെ ലാഭമാണ് ഉണ്ടായതെന്നും മാത്തര്‍ അല്‍ തായര്‍ അറിയിച്ചു.