അബുദബി അല്‍ ഐന്‍ റോഡില്‍ ഇന്ന് മുതല്‍ ഗതാഗതനിയന്ത്രണം. അല്‍ ഐനിലേക്കുള്ള വശത്താണ് നിയന്ത്രണം ഏര്‍പ്പെടുത്തിയിരിക്കുന്നത്. വാഹനയാത്രികര്‍ നിയന്ത്രങ്ങള്‍ ശ്രദ്ധിക്കണം എന്ന് സംയോജിത ഗതാഗതകേന്ദ്രം ആവശ്യപ്പെട്ടു.
ഇ-22 അലൈന്‍ റോഡില്‍ ആണ് ഇന്ന് മുതല്‍ ഞായറാഴ്ച വരെ ഭാഗിക ഗതാഗതനിയന്ത്രണം ഏര്‍പ്പെടുത്തിയിരിക്കുന്നത്. അല്‍ഐനിലേക്കുള്ള പാതയില്‍ ഇടതുവശത്തുള്ള രണ്ട് ലെയ്‌നുകള്‍ ആണ് ഇന്ന് മുതല്‍ അടച്ചിടുക. ഇന്ന് രാത്രി പത്ത് മുതല്‍ ഞായറാഴ്ച ഉച്ചക്ക് പന്ത്രണ്ട് മണി വരെയാണ് ഇരുലെയ്‌നുകളും അടച്ചിടുക.

അബുദബി അല്‍ഐന്‍ റോഡില്‍ ഇരുവശങ്ങളിലും മറ്റ് ലെയ്‌നുകളില്‍ ഈ ദിവസങ്ങളിലും ഗഗതാഗതം തുടരും. വാഹനം ഓടിക്കുന്നവര്‍ ഗതാഗതനിയമങ്ങള്‍ കര്‍ശനമായി പാലിക്കണം എന്നും സൈന്‍ ബോര്‍ഡുകളിലെ നിര്‍ദ്ദേശം ശ്രദ്ധിക്കണം എന്ന് അബുദബി സംയോജിത ഗതാഗത കേന്ദ്രം ആവശ്യപ്പെട്ടു.

ഞായറാഴ്ച മുതല്‍ യുഎഇ അടക്കം അഞ്ച് ജിസിസി രാജ്യങ്ങളില്‍ നിന്നുള്ളവര്‍ക്ക് വീസയില്ലാതെ ഇറാന്‍ സന്ദര്‍ശിക്കാം. വിനോദസഞ്ചാരം ശക്തിപ്പെടുത്തുന്നതിന്റെ ഭാഗമായിട്ടാണ് തീരുമാനം. ഇന്ത്യക്കാര്‍ക്കും ഫെബ്രവരി നാല് മുതല്‍ ഇറാന്‍ വീസരഹിത പ്രവേശനം നല്‍കും എന്ന് ഔദ്യോഗിക വാര്‍ത്താ ഏജന്‍സി അറിയിച്ചു.അഞ്ച് ജിസിസി രാജ്യങ്ങളിലെ പൗരന്‍മാര്‍ അടക്കം ഇരുപത്തിയെട്ട് രാജ്യക്കാര്‍ക്കാണ് ഇറാന്‍, വീസയില്ലാതെ രാജ്യത്തേക്ക് പ്രവേശനം അനുവദിക്കുന്നത്. യുഎഇ, സൗദി അറേബ്യ, ബഹ്‌റൈന്‍, കുവൈത്ത്,ഖത്തര്‍ എന്നി ജിസിസി രാജ്യങ്ങളിലെ പൗരന്‍മാര്‍ക്കാണ് ഇറാന്‍ വീസ രഹിത പ്രവേശനം പ്രഖ്യാപിച്ചിരിക്കുന്നത്.

ഒമാന്‍ പൗരന്‍മാര്‍ക്ക് നേരത്തെയും വീസയില്ലാതെ ഇറാനിലേക്ക് സഞ്ചരിക്കാം. രാജ്യത്ത് പ്രവേശിക്കുന്നവര്‍ക്ക് പതിനഞ്ച് ദിവസം ആണ് അനുമതി നല്‍കുന്നത്. ഈ രാജ്യങ്ങളില്‍ നിന്നുള്ളവര്‍ക്ക് വീസ രഹിതമ പ്രവേശനം നടപ്പാക്കുന്നതിനായി ബന്ധപ്പെട്ട സ്ഥാപനങ്ങള്‍ക്ക് മന്ത്രിസഭാ നിര്‍ദ്ദേശം ലഭിച്ചിട്ടുണ്ടെന്ന് ഇറാന്‍ വിദേശകാര്യമന്ത്രാലയം അറിയിച്ചു. വ്യോമമാര്‍ഗ്ഗം രാജ്യത്ത് പ്രവേശിക്കുന്ന ഇന്ത്യക്കാര്‍ക്കാണ് വീസ ഒഴിവാക്കിയത്. എന്നാല്‍ കര-കടല്‍ മാര്‍ഗ്ഗങ്ങളിലൂടെ എത്തുന്നവര്‍ക്ക് വീസ നിര്‍ബന്ധമാണ്.

സൗദി അടക്കമുള്ള ജിസിസി രാജ്യങ്ങളുമായുള്ള അസ്വാരസ്യങ്ങള്‍ പരിഹരിച്ച് അടുത്ത കാലത്താണ് ഇറാന്‍ നയതന്ത്രം പുനസ്ഥാപിച്ചത്. യുഎഇയ്ക്കും ഇറാനും ഇടയിലുള്ള വ്യോമഗതാഗതവും പുനസ്ഥാപിച്ചിട്ടുണ്ട്. ലോകത്തിന്റെ ഇറാനോഫോബിയ മാറ്റി കൂടുതല്‍ സന്ദര്‍ശകരെ രാജ്യത്തേക്ക് എത്തിക്കുകയാണ് ലക്ഷ്യം എന്ന് വിദേശകാര്യമന്ത്രാലയം അറിയിച്ചു.

യുഎഇയില്‍ വാരാന്ത്യം വരെ മഴ തുടരുമെന്ന് ദേശീയ കാലാവസ്ഥാ കേന്ദ്രം. ഇന്ന് പുലര്‍ച്ചെ മുതല്‍ രാജ്യത്തിന്റെ വിവിധയിടങ്ങളില്‍ മഴ അനുഭവപ്പെടുന്നുണ്ട്. ഏഴ് എമിറേറ്റുകളിലും ജാഗ്രതാ നിര്‍ദ്ദേശം പുറപ്പെടുവിച്ചു.ശനിയാഴ്ച വരെ മഴ തുടരുമെന്നാണ് കാലാവസ്ഥാ കേന്ദ്രത്തിന്റെ പ്രവചനം. ഇന്ന് പുലര്‍ച്ചെ ലഭിച്ച മഴ വിവിധ എമിറേറ്റുകളിലായി പെയ്തിറങ്ങുകയാണ്. റാസല്‍ഖൈമയിലാണ് പുലര്‍ച്ചെ മഴ ആരംഭിച്ചത്. ഷവ്ക്ക, ദയ, റാസല്‍ഖൈമ വിമാനത്താവളം എന്നിവിടങ്ങളിവും വിവിധ ഉള്‍പ്രദേശങ്ങളിലും മഴ അനുഭവപ്പെട്ടു. അബുദബിയില്‍ ഖലീഫ സിറ്റി ശക്തമായ മഴ ലഭിച്ചു.

മുസഫ, അല്‍ മിര്‍ഫ, ഹബ്ഷാന്‍, അല്‍ അബിയാദ് ഐലന്റ്, അല്‍ ദഫ്ര, ഷെയ്ഖ് ഖലീഫ ബിന്‍ ഇന്റര്‍നാഷണല്‍ റോഡ്, മുഹമ്മദ് ബിന്‍ സായിദ് സിറ്റി, എന്നിവിടങ്ങളില്‍ മഴ പെയ്തിറങ്ങി. ഫുജൈറയില്‍ അല്‍ ബാഹ്, വിമാനത്താവളം, ഷാര്‍ജയില്‍ വിമാനത്താവളം, ദെയ്ദ്, അല്‍ ഷീസ്, എന്നിവിടങ്ങളില്‍ ഇന്ന് മഴ ലഭിച്ചു. ദുബൈ, അല്‍ ഐന്‍ എന്നിവിടങ്ങളില്‍ മിതമായ മഴ ലഭിച്ചു. ഉംഅല്‍ഖുവൈനില്‍ ഫലാജ് അല്‍ മുഅല്ല, യാബ്‌സ, ദിബ്ബ, അല്‍ ഹന്യഹ് എന്നിവിടങ്ങളാണ് ഇന്ന് മഴ പെയ്തത്. പുലര്‍ച്ച അറേബ്യന്‍ കടലില്‍ അനുഭവപ്പെട്ട ന്യൂനമര്‍ദ്ദത്തെ തുടര്‍ന്നാണ് വിവിധ എമിറേറ്റുകളില്‍ മഴ ലഭിച്ചതെന്ന് ദേശീയ കാലാവസ്ഥാ കേന്ദ്രം അറിയിച്ചു.

മഴയുടെ പശ്ചാത്തലത്തില്‍ ഏഴ് എമിറേറ്റുകളിലും യെല്ലോ അലര്‍ട്ട് പുറപ്പെടുവിച്ചു. അബുദബി, ഫുജൈറ എമിറേറ്റുകളുടെ ചില മേഖലകളില്‍ ഓറഞ്ച് അലര്‍ട്ടും പുറപ്പെടുവിച്ചിട്ടുണ്ട്. മഴയെ തുടര്‍ന്ന് രാജ്യത്ത് താപനില വീണ്ടും കുറഞ്ഞു. 11.1 ഡിഗ്രി സെല്‍ഷ്യസാണ് കുറഞ്ഞ താപനില രേഖപ്പെടുത്തിയിരിക്കുന്നത്

അബുദബിയില്‍ ഫെബ്രുവരി പതിനാലിന് തുറക്കുന്ന ഹിന്ദു ക്ഷേത്രം സന്ദര്‍ശിക്കാന്‍ രാജ്യത്തിന് പുറത്ത് നിന്നും ആയിരങ്ങള്‍ എത്തുമെന്ന് ബാപ്‌സ് സ്വാമി നാരായണ്‍ സന്‍സ്ത. ക്ഷേത്രസന്ദര്‍ശനത്തിനായി യുഎഇയ്ക്ക് പുറത്ത് നിന്നും വന്‍ ഡിമാന്‍ഡ് ആണ് അനുഭവപ്പെടുന്നത്. അതുകൊണ്ട് തന്നെ യുഎഇയില്‍ ഉള്ളവര്‍ മാര്‍ച്ച് ഒന്നിന് ശേഷം ക്ഷേത്ര ദര്‍ശനത്തിന് നടത്തണം എന്നാണ് ബാപ്‌സിന്റെ അഭ്യര്‍ത്ഥന

മധ്യപൂര്‍വ്വദേശത്തെ ആദ്യ പരമ്പരാഗത ശിലാക്ഷേത്രത്തിലേക്ക് സന്ദര്‍ശകരുടെ വന്‍ തിരക്ക് അനുഭവപ്പെടും എന്ന് ചുമതലക്കാരായ ബാപ്‌സ് സ്വാമിനാരായണന്‍ സന്‍സ്ത നേരത്തെ തന്നെ കണക്കുകൂട്ടിയിരുന്നു. ഇതിന്റെ അടിസ്ഥാനത്തില്‍ കഴിഞ്ഞ വര്‍ഷം തന്നെ ക്ഷേത്രസന്ദര്‍ശനത്തിന് ബാപ്‌സ് ഓണ്‍ലൈന്‍ രജിസ്‌ട്രേഷന്‍ ആരംഭിച്ചിരുന്നു. രാജ്യത്തിന് പുറത്ത് നിന്നും വലിയ പ്രതികരണം ആണ് ഓണ്‍ലൈന്‍ രജിസ്‌ട്രേഷനില്‍ ദൃശ്യമായത്. യുഎഇയില്‍ നിന്ന് എന്ന പോലെ തന്നെ രാജ്യത്തിന് പുറത്ത് നിന്നും വന്‍തോതില്‍ സന്ദര്‍ശകര്‍ ക്ഷേത്ര ദര്‍ശനത്തിനായി എത്തും എന്നാണ് ബാപ്‌സ് പ്രതീക്ഷിക്കുന്നത്. ഈ സാഹചര്യത്തില്‍ ആണ് യുഎഇയില്‍ ഉള്ളവര്‍ മാര്‍ച്ച് ഒന്നിന് ശേഷം ക്ഷേത്രദര്‍ശനത്തിന് ശ്രമിക്കണം എന്ന് ബാപ്‌സ് അഭ്യര്‍ത്ഥിക്കുന്നത്. ഇനിയും രജിസ്ട്രര്‍ ചെയ്യാനുള്ളവരോട് ആണ് ഈ അഭ്യര്‍ത്ഥന.

തിക്കുംതിരക്കും ഒഴിവാക്കുന്നതിനായിട്ടാണ് ഈ അഭ്യാര്‍ത്ഥന എന്ന് ബാപ്‌സ് ഹിന്ദുക്ഷേത്ര മേധാവി സ്വാമി ബ്രഹ്മവിഹാരി ദാസ് വ്യക്തമാക്കി. ഫെബ്രുവരി പതിനാലിന് ഉദ്ഘാടനം ചെയ്യുന്ന ക്ഷേത്രത്തില്‍ പതിനെട്ട് മുതല്‍ ആണ് സന്ദര്‍ശകര്‍ക്ക് പ്രവേശനം അനുവദിക്കുന്നത്.

ലോകത്തിലെ ഏറ്റവും വലിയ കുപ്പിവെള്ള ഉപഭോക്താക്കള്‍ യുഎഇ താമസക്കാര്‍ എന്ന് ഊര്‍ജ്ജമന്ത്രാലയ റിപ്പോര്‍ട്ട്. പ്രതിവര്‍ഷം ശരാശരി അഞ്ചൂറ് ലീറ്റര്‍ കുപ്പിവെള്ളം ആണ് ഒരാള്‍ കുടിക്കുന്നതെന്നും റിപ്പോര്‍ട്ടില്‍ പറയുന്നു. ജലം പാഴാക്കുന്നതിനായി ദേശീയ കാമ്പയിന്‍ നടപ്പാക്കുകായണ് യുഎഇ ഊര്‍ജ്ജ-പശ്ചാത്തല സൗകര്യമന്ത്രാലയം.വലിയ ബോട്ടിലുകളിലും കുപ്പികളിലും ഉള്ള ജല ഉപയോഗത്തിലാണ് ആഗോളതലത്തില്‍ തന്നെ യുഎഇ ഒന്നാം സ്ഥാനത്ത് നില്‍ക്കുന്നതെന്ന് ഊര്‍ജ്ജമന്ത്രാലയത്തിന്റെ റിപ്പോര്‍ട്ടില്‍ പറയുന്നു.

പ്രതിവര്‍ഷം ബോട്ടിലുകളില്‍ ലഭിക്കുന്ന 497.3 ലീറ്റര്‍ ജലം ആണ് ഒരു യുഎഇ താമസക്കാരന്‍ ഉപയോഗിക്കുന്നത്. ആഗോളതലത്തില്‍ ഇത് നൂറ്റിയമ്പത് മുതല്‍ മുന്നൂറ് ലീറ്റര്‍ വരെ മാത്രാമാണ്. ഉപ്പുവെള്ള ശുദ്ധീകരിച്ചെത്തുന്നതാണ് ഭൂരിഭാഗം കുപ്പിവെള്ളവും എന്നും റിപ്പോര്‍ട്ടില്‍ പറയുന്നുണ്ട്. ജലശുദ്ധീകരണത്തിനായി യുഎഇയില്‍ പ്രതിവര്‍ഷം 1180 കോടി ദിര്‍ഹം ആണ് ചിലവാകുന്നത്. രാജ്യത്തെ മൊത്തം ജല ഉപയോഗത്തില്‍ ഒന്‍പത് ശതമാനം മാത്രമാണ് വ്യവസായ മേഖലയില്‍ എന്നും റിപ്പോര്‍ട്ടില്‍ പറയുന്നു.

വീടുകളില്‍ വ്യക്തികള്‍ പാഴാക്ക്ി കളയുന്ന ജലത്തിന്റെ അളവ് സംബന്ധിച്ച മുന്നറിയിപ്പും റിപ്പോര്‍ട്ട് നല്‍കുന്നുണ്ട്. ജലം പാഴാക്കുന്നത് ഒഴിവാക്കുന്നതിനായി വിവിധ വകുപ്പുകള്‍ ചേര്‍ന്ന് പദ്ധതികള്‍ നടപ്പാക്കണം.

ചെങ്കടലില്‍ ചരക്കുകപ്പലുകള്‍ ആക്രമിക്കുന്ന ഹൂത്തികള്‍ക്ക് എതിരായ യു.എസ്-യു.കെ പ്രതിരോധം പാളുന്നു. അമേരിക്കന്‍ സഖ്യം തിരിച്ചടി ആരംഭിച്ചതിന് ശേഷം ആക്രമിക്കപ്പെടുന്ന കപ്പലുകളുടെ എണ്ണം കൂടിയെന്നാണ് കണക്കുകള്‍. അതെസമയം ഇറാഖിനേയും സിറിയയിലെയേും ഇറാനിയന്‍ സൈനിക സംവിധാനങ്ങള്‍ക്ക് നേരെ ആക്രമണം നടത്താന്‍ സൈന്യത്തിന് അമേരിക്ക അനുമതി നല്‍കി.ഗാസ യുദ്ധത്തില്‍ ഹമാസിന് പിന്തുണ പ്രഖ്യാപിച്ച് കഴിഞ്ഞ നവംബറില്‍ ആണ് യെമനിലെ ഹൂത്തി സായുധസേന ചെങ്കടലില്‍ ചരക്ക് കപ്പലുകള്‍ക്ക് നേരെ ആക്രമണം ആരംഭിച്ചത്.

ഇസ്രയേല്‍ ബന്ധമുള്ള കപ്പലുകള്‍ ആക്രമിക്കും എന്നായിരുന്നു ഹൂത്തികളുടെ ഭീഷണി എങ്കിലും ചെങ്കടല്‍ വഴി സഞ്ചരിച്ച പല കപ്പലുകളും ആക്രമണത്തിന് ഇരയായി. ഇതോടെ ഏഷ്യയ്ക്കും യുറോപ്പിനും ഇടയില്‍ ചെങ്കടല്‍ വഴിയുള്ള ചരക്ക് നീക്കം പ്രതിസന്ധിയിലായി. ഇതിന് പിന്നാലെയാണ് അമേരിക്ക നേതൃത്വം നല്‍കുന്ന പാശ്ചാത്ത്യരാജ്യങ്ങളുടെ സംഖ്യം ഹൂത്തികള്‍ക്ക് എതിരെ പ്രത്യാക്രമണം പ്രഖ്യാപിച്ചത്. ജനുവരി പതിനൊന്നിന് ആണ് മെയനിലെ ഹൂത്തി കേന്ദ്രങ്ങള്‍ക്ക് നേരെ അമേരിക്കന്‍ സംഖ്യം ആക്രമണം നടത്തിയത്. പിന്നീട് പലതവണ ഹൂത്തികളുടെ ആയുധകേന്ദ്രങ്ങള്‍ ആക്രമിക്കപ്പെട്ടു. ഇന്നലെ മാത്രം പത്തോളം ഹൂത്തി ഡ്രോണുകള്‍ ആണ് അമേരിക്കയുടെ വ്യോമാക്രമണത്തില്‍ തകര്‍ത്തത്. പക്ഷെ അമേരിക്കന്‍ സഖ്യത്തിന്റെ പ്രത്യാക്രമണം ഹൂത്തികളെ പിന്തിരിപ്പിച്ചില്ലെന്ന് മാത്രമല്ല ആക്രമിക്കപ്പെടുന്ന കപ്പലുകളുടെ എണ്ണം വര്‍ദ്ധിപ്പിക്കുകയും ചെയ്തു.കഴിഞ്ഞ മൂന്ന് ആഴ്ച്ചകള്‍ക്കിടയില്‍ ഒന്‍പത് കപ്പലുകള്‍ ആണ് ഹുത്തികള്‍ ആക്രമിച്ചത്.

അമേരിക്കന്‍ സംഖ്യം തിരിച്ചടി ആരംഭിക്കുന്നതിന് മുന്‍പുള്ള മൂന്നാഴ്ചകളില്‍ ഹൂത്തികള്‍ ആറ് കപ്പലുകള്‍ ആണ് ആക്രമിച്ചത്. അമേരിക്കന്‍ സംഖ്യം പ്രത്യാക്രമണം ആരംഭിച്ചതിന് ശേഷം ചെങ്കടല്‍ വഴിയുള്ള ചരക്ക് നീക്കത്തില്‍ മുപ്പത് ശതമാനത്തോളം കുറവും വന്നു. മാത്രമല്ല അമേരിക്കന്‍ ബ്രിട്ടീഷ് കപ്പലുകളും ഹൂത്തികള്‍ ആക്രമിക്കാന്‍ തുടങ്ങി. ഇതുവരെ ഇരുപത്തിയെട്ട് കപ്പലുകള്‍ ആണ് ഹൂത്തികള്‍ ചെങ്കടലില്‍ ആക്രമിച്ചത്. ഇതില്‍ ഏഴെണ്ണത്തിന് മാത്രമാണ് ഇസ്രയേല്‍ ബന്ധമുള്ളത്.