സംസ്ഥാനത്ത് രണ്ട് ദിവസമായി ശമിച്ചിരുന്ന മഴ വീണ്ടും ശക്തമായി. പല പ്രദേശങ്ങളിലും ശക്തമായ മഴയ്ക്ക് കാലാവസ്‌ഥ നിരീക്ഷണ കേന്ദ്രത്തിന്റെ മുന്നറിയിപ്പ്. 10 ജില്ലകളിൽ യെല്ലോ അലേർട്ട് പ്രഖ്യാപിച്ചു. തിരുവനന്തപുരം, കൊല്ലം, പാലക്കാട്, വയനാട് ഒഴികെയുള്ള ജില്ലകളിൽ ആണ് യെല്ലോ അലർട്ട് നിലവിലുള്ളത്. പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂർ, മലപ്പുറം, കോഴിക്കോട്, കണ്ണൂർ, കാസർഗോഡ് ജില്ലകളിലാണ് യെലോ അലർട്ട്.
ആലപ്പുഴ, കോഴിക്കോട്, കണ്ണൂർ ജില്ലകളിൽ ഒറ്റപ്പെട്ടയിടങ്ങളിൽ ഇടിമിന്നലോടു കൂടിയ നേരിയ മഴയ്ക്കു സാധ്യതയുണ്ട്. അറബിക്കടലിലും ബംഗാൾ ഉൾക്കടലിലും ന്യൂനമർദ്ദം രൂപപ്പെട്ടതിന്‍റെ ഭാഗമായി സംസ്ഥാനത്ത് കനത്ത മഴ അടുത്ത തിങ്കളാഴ്ച വരെ തുടരും.
അറബിക്കടലിൽ കൊങ്കൺ- ഗോവ തീരത്തും വടക്ക് കിഴക്കൻ ബംഗാൾ ഉൾക്കടലിലുമാണ് ന്യുന മർദ്ദം രൂപപ്പെട്ടത്. അറബിക്കടലിൽ കേരള തീരത്ത് പടിഞ്ഞാറൻ കാറ്റ് ശക്തി പ്രാപിച്ചു. മലയോര മേഖലയിൽ ജാഗ്രതാനിർദേശം നൽകിയിട്ടുണ്ട്.
