ഗാസ-ഈജിപ്ത് അതിര്‍ത്തിയില്‍ സ്ഥിതി ചെയ്യുന്ന റഫാ പിടിച്ചെടുത്ത് ഇസ്രയേല്‍ സൈന്യം.ഇവിടെ നിന്നും പതിനായിരങ്ങളാണ് പലായനം ചെയ്യുന്നത്.പിടിച്ചെടുക്കുന്ന പ്രദേശം സുരക്ഷാ മേഖലയാക്കും എന്നാണ് ഇസ്രയേലിന്റെ പ്രസ്താവന.
ഗാസയുടെ വീശാലമായ പ്രദേശങ്ങള്‍ പിടിച്ചെടുക്കും എന്നാണ് ഇസ്രയേലിന്റെ അറിയിപ്പ്.റഫായുടെ കൂടുതല്‍ ഭാഗത്തേക്ക് പ്രവേശിച്ച് ആക്രമണം നടത്തുകയാണ് സൈന്യം.ജനങ്ങളോട് ഒഴിഞ്ഞുപോകാന്‍ നിര്‍ദ്ദേശം നല്‍കിയ ശേഷം ആണ് സൈനിക നീക്കം.ഗാസ യുദ്ധത്തിലെ തന്നെ ഏറ്റവും വലിയ കൂട്ടപലായനം ആണ് ഇപ്പോള്‍ നടക്കുന്നത്.ഗാസയുടെ വിവിധ ഭാഗങ്ങളില്‍ നിന്നും ഒരിക്കല്‍ വീടുവിട്ടോടി റഫായില്‍ അഭയംതേടിയവരേയാണ് വീണ്ടും ഒഴിപ്പിക്കുന്നത്.റഫായില്‍ നിന്നും ഖാന്‍ യൂനിസിലേക്കാണ് ലക്ഷക്കണക്കിന് പലസ്തീനികള്‍ നീങ്ങുന്നത്.വെടിനിര്‍ത്തലിനെ തുടര്‍ന്ന് ഗാസമുനമ്പിന്റെ വടക്കന്‍ ഭാഗത്തേക്ക് തിരികെ എത്തിയ പലസ്തീനികളേയും ഇസ്രയേല്‍ വീണ്ടും ഒഴിപ്പിക്കുകയാണ്.
ഗാസമുനമ്പിന്റെ വിവിധ ഭാഗങ്ങളില്‍ ശക്തമായ ആക്രമണവും ഇസ്രയേല്‍ സൈന്യം തുടരുന്നുണ്ട്.ഖാന്‍യൂനിസില്‍ ഇന്ന് രാവിലെ ഒരു അഭയാര്‍ത്ഥി കേന്ദ്രത്തില്‍ ഇസ്രയേല്‍ നടത്തിയ ആക്രമണത്തില്‍ ഇരുപത്തിയാറ് പേര്‍ കൊല്ലപ്പെട്ടു.മാനുഷികകേന്ദ്രങ്ങളായി ഇസ്രയേല്‍ പ്രഖ്യാപിച്ച സ്ഥലത്തായിരുന്നു ആക്രമണം.ഇരുപത്തിനാല് മണിക്കൂറുകള്‍ക്കിടയില്‍ 96 പേര്‍ ഇസ്രയേല്‍ ആക്രമണത്തില്‍ കൊല്ലപ്പെട്ടു.വെടിനിര്‍ത്തലിന് ശേഷം ആരംഭിച്ച ആക്രമണത്തില്‍ മാത്രം ഗാസയില്‍ 1100 മരണങ്ങളാണ് റിപ്പോര്‍ട്ട് ചെയ്തിരിക്കുന്നത്.
