Tuesday, May 21, 2024
HomeNewsInternationalഇസ്രയേല്‍-ഹമാസ് യുദ്ധം: ഖത്തറിന്റെ മധ്യസ്ഥ ശ്രമങ്ങള്‍ വിജയത്തിലേക്ക് : വെടിനിര്‍ത്തലിന്സാധ്യത

ഇസ്രയേല്‍-ഹമാസ് യുദ്ധം: ഖത്തറിന്റെ മധ്യസ്ഥ ശ്രമങ്ങള്‍ വിജയത്തിലേക്ക് : വെടിനിര്‍ത്തലിന്സാധ്യത

ഗാസയില്‍ താല്‍ക്കാലിക വെടിനിര്‍ത്തലിന് സാധ്യതയെന്ന് റിപ്പോര്‍ട്ടുകള്‍. ഖത്തറിന്റെ മധ്യസ്ഥതയില്‍ ഹമാസും ഇസ്രയേലും തമ്മില്‍ നടത്തിയ ചര്‍ച്ചയിലാണ് വെടിനിര്‍ത്തല്‍ സാധ്യതകള്‍ ഉയര്‍ന്നതെന്നാണ് അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്തത്. എന്നാല്‍ പ്രതിരോധ സേന വെടിനിര്‍ത്തല്‍ അനുവദിക്കില്ലെന്ന നിലപാട് തുടരുകയാണ്. ഗാസയില്‍ മരണസംഖ്യ 13,300 ആയി.

തെക്കന്‍ ഗാസയില്‍ ഇസ്രായേല്‍ പ്രതിരോധ സേന ആക്രമണം തുടരുന്നതിന് ഇടയിലാണ് വെടിനിര്‍ത്തലിന് സാധ്യതയെന്ന റിപ്പോര്‍ട്ട് പുറത്ത് വരുന്നത്. ഹമാസും ഇസ്രായേലും തമ്മില്‍ ഖത്തറിന്റെ മധ്യസ്ഥതയില്‍ നടത്തിയ ചര്‍ച്ചയിലാണ് വെടിനിര്‍ത്തല്‍ സാധ്യതകള്‍ ഉയര്‍ന്നത്. അന്താരാഷ്ട്ര മാധ്യമങ്ങളാണ് ഇത് സംബന്ധിച്ച് റിപ്പോര്‍ട്ട് ചെയ്യുന്നത്. എന്നാല്‍ ഇസ്രായേലോ ഹമാസോ ഔദ്യോഗിക പ്രസ്താവന നടത്തിയിട്ടില്ല. ഇസ്രയേലുമായുള്ള താല്‍കാലിക യുദ്ധവിരാമ കരാറിന് അരികിലാണ് തങ്ങളെന്ന് ഹമാസ് തലവന്‍ ഇസ്മയില്‍ ഹനിയ്യ പറഞ്ഞതായാണ് റിപ്പോര്‍ട്ട്.

ഇസ്രയേലും ഹമാസും തമ്മില്‍ കരാറിലെത്തുന്ന പക്ഷം ഹമാസ് തടവിലാക്കിയവരുടെ മോചനത്തിന്റെ കാര്യത്തിലും തീരുമാനമാകും. ഒന്നര മാസത്തോളമായി തുടരുന്ന ആക്രമണങ്ങളില്‍ ഗാസയില്‍ 13,300 പേരാണ് കൊല്ലപ്പെട്ടത്. സൈനികരടക്കം ആയിരത്തി അഞ്ഞൂറോളം ഇസ്രയേല്‍ പൗരന്‍മാരും കൊല്ലപ്പെട്ടു. ബന്ദികളെ മോചിപ്പിക്കുന്ന കാര്യവുമായി ബന്ധപ്പെട്ട് ഇസ്രയേലും ഹമാസും തമ്മില്‍ കരാറിലെത്തിയേക്കുമെന്ന സൂചന അമേരിക്കന്‍ പ്രസിഡന്റ് ജോ ബൈഡനും നല്‍കിയിരുന്നു.

അഞ്ച് ദിവസത്തെ വെടിനിര്‍ത്തലിനാണ് ധാരണയെന്നും ഹമാസ് ബന്ദിയാക്കിയ സ്ത്രീകളെയും കുട്ടികളെയും വിട്ടുനല്‍കുമെന്നും ഇസ്രയേലി മാധ്യമങ്ങള്‍ റിപ്പോര്‍ട്ട് ചെയ്യുന്നുണ്ട്. പകരമായി ഇസ്രയേല്‍ തടവറയിലുള്ള സ്ത്രീകളെയും കുട്ടികളെയും മോചിപ്പിക്കും. യുദ്ധം തുടങ്ങി ഒന്നര മാസത്തോളമായിട്ടും ബന്ദികളുടെ മോചന കാര്യത്തില്‍ തീരുമാനമാകാത്തത് ഇസ്രയേലില്‍ വലിയ പ്രതിഷേധത്തിന് ഇടയാക്കിയിട്ടുണ്ട്. എന്നാല്‍ ഇസ്രയേല്‍ പ്രതിരോധ മന്ത്രി യോവ് ഗാലന്റും മുതിര്‍ന്ന സൈനിക, രഹസ്യാന്വേഷണ ഉദ്യോഗസ്ഥരും വെടിനിര്‍ത്തല്‍ അനുവദിക്കില്ലെന്ന നിലപാട് തുടരുകയാണ്.

RELATED ARTICLES

LEAVE A REPLY

Please enter your comment!
Please enter your name here

- Advertisment -
Google search engine

Most Popular

Recent Comments