ആര്യാടന്‍ ഷൗക്കത്തിലൂടെ നിലമ്പൂര്‍ മണ്ഡലം തിരിച്ചുപിടിച്ച് യു.ഡി.എഫ്.11077 വോട്ടുകള്‍ക്കാണ് ഉപതെരഞ്ഞെടുപ്പില്‍ ഷൗക്കത്തിന്റെ മിന്നും ജയം.ഇടതുമുന്നണി സ്ഥാനാര്‍ത്ഥി എം സ്വരാജ് ആണ് രണ്ടാംസ്ഥാനത്ത്.സ്വതന്ത്രനായി മത്സരിച്ച പി.വി അന്‍വര്‍ പത്തൊന്‍പതിനായിരത്തിലധികം വോട്ടുകള്‍ നേടി.പത്ത് വര്‍ഷങ്ങളുടെ ഇടവേളക്ക് ശേഷം ആണ് യുഡിഎഫ് നിലമ്പൂര്‍ മണ്ഡലം തിരിച്ചുപിടിക്കുന്നത്.77737 വോട്ടുകള്‍ ആണ് ആര്യാടന്‍ ഷൗക്കത്തിന് ലഭിച്ചത്.സ്വരാജിന് 66660 വോട്ടുകളും.സ്വതന്ത്രസ്ഥാനാര്‍ത്ഥിയും മുന്‍ എംഎല്‍എയുമായ പി.വി അന്‍വര്‍ 19760 വോട്ടുകള്‍ ആണ് ലഭിച്ചത്. ബിജെപി സ്ഥാനാര്‍ത്ഥി മോഹന്‍ ജോര്‍ജിന് 8648 വോട്ടുകളും ലഭിച്ചു.വോട്ടെണ്ണലിന്റെ തുടക്കം മുതല്‍ തന്നെ ആര്യാടന്‍ ഷൗക്കത്തിനായിരുന്നു മുന്‍തൂക്കം.
മൂത്തേടം,വഴിക്കടവ്,എടക്കര,പോത്തുകല്ല്,ചുങ്കത്തറ,കരുളായി,അമരമ്പലം പഞ്ചായത്തുകളിലും നിലമ്പൂര്‍ നഗരസഭയിലും യുഡിഎഫിന് ആണ് ലീഡ്.എം സ്വരാജ് സ്വന്തം പഞ്ചായത്തായ പോത്തുകല്ലില്‍ പോലും പുറകില്‍ പോയി.സ്വന്തംബുത്തില്‍ പോലും മുന്നിലെത്താന്‍ സ്വരാജിന് കഴിഞ്ഞില്ല.
എം സ്വരാജിന്റെ തുടര്‍ച്ചയായ രണ്ടാം നിയമസഭാ തെരഞ്ഞെടുപ്പ് തോല്‍വിയാണ് ഇത്. കഴിഞ്ഞ തവണ തൃപ്പൂണിത്തുറയില്‍ കോണ്‍ഗ്രസ് നേതാവ് കെ.ബാബുവിനോട് ആണ് സ്വരാജ് പരാജയപ്പെട്ടത്.എട്ട് തവണ പിതാവ് ആര്യാടന്‍ മുഹമ്മദ് വിജയിച്ച മണ്ഡലത്തില്‍ നിന്നും ആണ് മകന്‍ ആര്യാടന്‍ ഷൗക്കത്തിന്റെ നിയമസഭാ പ്രവേശനം.നിയമസഭാ തെരഞ്ഞെടുപ്പ് പടിവാതില്‍ക്കല്‍ എത്തിനില്‍ക്കെ യുഡിഎഫിന് ഏറം ആത്മവിശ്വാസം പകരുന്നതാണ് നിലമ്പൂരിലെ ഈ വിജയം.
