ഒമാന്‍ കടലില്‍ കപ്പലുകള്‍ കൂട്ടിയിടിച്ചുണ്ടായ അപകടത്തിന് കാരണം നാവിഗേഷന്‍ സംവിധാനത്തിലെ തകരാര്‍ എന്ന് യുഎഇ ഊര്‍ജ്ജ പശ്ചാത്തല സൗകര്യ വികസന മന്ത്രാലയം. യുഎഇ തീരത്തു നിന്നും 24 നോട്ടിക്കല്‍ മൈല്‍ അകലയാണ് അപകടമുണ്ടായത്.അമേരിക്കന്‍ എണ്ണക്കപ്പലായ ഫ്രണ്ട് ഈഗള്‍, മറ്റൊരു ടാങ്കറായ അഡലിനുമായി കൂട്ടിയിടിച്ചാണ് അപകടമുണ്ടായത്. പ്രാഥമിക വിവരങ്ങള്‍ പ്രകാരം ഒരു കപ്പലിലെ നാവിഗേഷന്‍ സംവിധാനത്തിലുണ്ടായ തകരാറാണ് അപകടകാരണമെന്ന് യുഎഇ ഉര്‍ജ്ജ പശ്ചാത്തല സൗകര്യ വികസന മന്ത്രാലയം അറിയിച്ചു.
യുഎഇ തീരത്ത് നിന്നും ഇരുപത്തിനാല് നോട്ടില്‍ മൈല്‍ അകലെയാണ് അപകടം നടന്നത്.ഒരു കപ്പലില്‍ നിന്നും നേരിയ തോതില്‍ എണ്ണചോര്‍ച്ച ഉണ്ടായി.പിന്നാലെ ഇന്ധന ടാങ്കിന് തീപിടിക്കുകയായിരുന്നു.തീ നിയന്ത്രണവിധേയമാക്കിയെന്നും ആര്‍ക്കും പരുക്കേറ്റില്ലെന്നും മന്ത്രാലയം അറിയിച്ചു. അന്താരാഷ്ട്ര സ്ഥാപനങ്ങളുമായി ഏകോപിപ്പിച്ച് അന്വേഷണം നടത്തുന്നതായും മന്ത്രാലയം അറിയിച്ചു. സമുദ്ര സംരക്ഷണവും സുരക്ഷയും ഉറപ്പാക്കുന്നതിനായി സ്ഥിതിഗതികള്‍ 24 മണിക്കൂറും നിരീക്ഷിച്ചു വരികയാണ്. അഡലിന്‍ കപ്പലില്‍ നിന്നും ഇരുപത്തിനാല് നാവികരെ യുഎഇ കോസ്റ്റ് ഗാര്‍ഡ് രക്ഷപെടുത്തിയിരുന്നു. യുഎഇയിലെ ഖോര്‍ഫക്കാനില്‍ നിന്നും സൂയസ് കനാല്‍ ലക്ഷ്യമിട്ടാണ് അഡലിന്‍ എന്ന എണ്ണകപ്പല്‍ പുറപ്പെട്ടത്.
