ബലിപെരുന്നാള്‍ അവധി ദിനങ്ങളില്‍ ദുബൈയില്‍ പൊതുഗതാഗതം ഉപയോഗിച്ചത് 7.6 ദശലക്ഷത്തോളം യാത്രക്കാര്‍. ദുബൈ മെട്രോയിലാണ് ഏറ്റവുമധികം യാത്രക്കാര്‍. മുന്‍ വര്‍ഷത്തേക്കാള്‍ യാത്രക്കാരുടെ എണ്ണത്തില്‍ പതിനാല് ശതമാനമാണ് വര്‍ദ്ധന.
ജൂണ്‍ അഞ്ച് മുതല്‍ എട്ട് വരെയുള്ള പൊതുഅവധി ദിനങ്ങളിലാണ് ദുബൈ ആര്‍ടിഎയുടെ പൊതുഗതാഗത സേവനങ്ങളില്‍ യാത്രക്കാരുടെ എണ്ണത്തിലെ വര്‍ദ്ധന. മെട്രോയുടെ റെഡ്, ഗ്രീന്‍ ലൈനുകളിലായി 2.78 ദശലക്ഷം യാത്രക്കാരാണ് സഞ്ചരിച്ചത്. 2.19 ദശലക്ഷം ആളുകള്‍ ടാക്‌സി സേവനം ഉപയോഗിച്ചു. പൊതു ബസുകളില്‍ യാത്ര ചെയ്തത് 1.66 ദശലക്ഷം ആളുകളാണ്. 5,04,159 ആളുകളാണ് ഷെയര്‍ ടാക്‌സി സേവനം ഉപയോഗിച്ചത്. ആര്‍ടിഎ സമുദ്ര ഗതാഗത സേവനങ്ങളില്‍ 3,07,684 ലക്ഷം യാത്രക്കാര്‍ സഞ്ചരിച്ചു. 1,19,917 ലക്ഷം യാത്രക്കാരാണ് ട്രാം സേവനം ഉപയോഗിച്ചത്.
തിരക്കേറിയ അവധി ദിനങ്ങളില്‍ യാത്രക്കാര്‍ക്കായി മെട്രോ അധിക സമയം സര്‍വ്വീസ് നടത്തിയിരുന്നു. പൊതുബസുകളും ടാക്‌സികളും അധിക റൂട്ടികളില്‍ സര്‍വ്വീസ് നടത്തി. എമിറേറ്റില്‍ പരമാവധി യാത്രക്കാര്‍ക്ക് സേവനം എത്തിക്കുന്നതിനായി വിപുലമായ യാത്രാ സൗകര്യങ്ങളാണ് ആര്‍ടിഎ ഏര്‍പ്പെടുത്തിയിരുന്നത്.
