വന്‍ തൊഴിലവസരങ്ങളുമായി യുഎഇയുടെ ദേശീയ വിമാന കമ്പനിയായ ഇത്തിഹാദ് എയര്‍വേയ്‌സ്. വിവിധ തസ്തികകളിലേയ്ക്കായി ആയിരത്തിയഞ്ഞൂറിലധികം ആളുകള്‍ക്കാണ് നിയമനം നല്‍കുക. സര്‍വ്വീസുകള്‍ കൂടുതല്‍ വ്യാപിപിക്കുന്നതിന്റെ ഭാഗമായാണ് തീരുമാനം.
വിവിധ രാജ്യങ്ങളിലേക്ക് എയര്‍കണക്ടിവിറ്റി വര്‍ദ്ധിപ്പിക്കുന്നതിനാണ് ഇത്തിഹാദ് എയര്‍വേയ്‌സ് ഒരുങ്ങുന്നത്. 2025 അവസാനത്തോടെ 1500ല്‍ അധികം ജീവനക്കാരെ വിവിധ തസ്തികകളില്‍ നിയമിക്കും. പൈലറ്റ്, കാബിന്‍ ക്രൂ, എഞ്ചിനീയര്‍മാര്‍ എന്നിങ്ങനെ മേഖലകളില്‍ കൂടുതല്‍ ആളുകളെ നിയമിക്കും. ഈ വര്‍ഷം ആദ്യം 1685 ജീവനക്കാരെയാണ് പുതിയതായി നിയമിച്ചത്. നിലവില്‍ ഇത്തിഹാദ് എയര്‍വേയ്‌സില്‍ 12,000 ജീവനക്കാരാണ് ഉള്ളത്.
2030ഓടെ ഇത് ഇരട്ടിയാക്കാനാണ് കമ്പനി ലക്ഷ്യമിടുന്നതെന്ന് എയര്ലൈന് ചീഫ് ഹ്യൂമന്‍ റിസോഴ്‌സസ് ഓര്‍ഗനൈസേഷണല്‍ ഡെവലപ്‌മൈന്‌റ് ആന്‍ഡ് അസ്സെറ്റ് മാനേജ്‌മെന്‌റ് ഓഫീസര്‍ ഡോ നാദിയ ബസ്തകി അറിയിച്ചു. നിലവില്‍ 147 രാജ്യക്കാരാണ് എയര്ലൈന് കീഴില്‍ പ്രവര്‍ത്തിക്കുന്നത്. കഴിഞ്ഞ മൂന്ന് വര്‍ഷത്തില്‍ 4,000ത്തിലധികം ജീവനക്കാരെ പുതിയതായി നിയമിച്ചു. കൂടുതല്‍ സര്‍വീസുകള്‍ ആരംഭിക്കുന്നതിന്റെ ഭാഗമായാണ് ജീവനക്കാരുടെ എണ്ണം വര്‍ദ്ധിപ്പിക്കുന്നത്.
