കാർഷിക വികസന ബാങ്ക് തെരഞ്ഞെടുപ്പിനിടയിൽ സംഘർഷം. പൊലീസ് ലാത്തി വീശി. വോട്ട് ചെയ്യാനെത്തിയ യുവാക്കളോടു തിരിച്ചറിൽ കാർഡ് ചോദിച്ചപ്പോൾ വോട്ടിങ് സ്ലിപ്പിനൊപ്പം കഞ്ചാവ് പൊതിയും പോക്കറ്റിൽ നിന്നും വീണു. കൊടുമൺ സ്വദേശികളായ രണ്ടുപേരിൽനിന്നാണ് കഞ്ചാവ് പൊതികൾ പിടിച്ചത്. ഇവരിൽനിന്ന് യുഡിഎഫ് വോട്ടിങ് സ്ലിപ്പും കണ്ടെടുത്തിട്ടുണ്ട്.
തെരഞ്ഞെടുപ്പിൽ കള്ളവോട്ട് നടക്കുന്നുവെന്ന് യുഡിഎഫും എൽഡിഎഫും ആരോപിച്ചിരുന്നു. ഇതുസംബന്ധിച്ച തർക്കം സംഘർഷത്തിലേക്കും എത്തി. പോലീസ് ലാത്തിവീശിയാണ് രംഗം ശാന്തമാക്കിയത്. ഇതിനിടെയാണ് വോട്ട് ചെയ്യാനെത്തിയ രണ്ടുപേരോട് പോലീസ് തിരിച്ചറിയൽ കാർഡ് ചോദിച്ചത്. ഇവർ തിരിച്ചറിയൽ കാർഡ് എടുക്കുന്നതിനിടെ പോക്കറ്റിലുണ്ടായിരുന്ന കഞ്ചാവ് പൊതികളും നിലത്തുവീഴുകയായിരുന്നു. ഇതോടെ രണ്ടുപേരെയും പോലീസ് കസ്റ്റഡിയിലെടുത്തു. ഇരുവരും കള്ളവോട്ട് ചെയ്യാനെത്തിയവരാണെന്നാണ് ഇടതുപക്ഷം ആരോപിക്കുന്നത്.
