ഓണാശംസകള്‍ നേര്‍ന്ന് ഇംഗ്ലീഷ് പ്രീമിയര്‍ ലീഗ് വമ്പന്‍മാരായ മാഞ്ചസ്റ്റര്‍ സിറ്റി. സൂപ്പര്‍താരം ഏര്‍ലിംഗ് ഹാളന്‍ഡ് പപ്പടം കടിച്ചു നില്‍ക്കുന്ന ചിത്രത്തോടൊപ്പം ഹാപ്പി ഓണം എന്ന കുറിപ്പും ക്ലബ്ബിന്റെ നീല നിറത്തിലുള്ള ലൗ ഇമോജിയുമാണ് സിറ്റി സാമൂഹ്യ മാധ്യമങ്ങളില്‍ പങ്കുവെച്ചിരിക്കുന്നത്. നീല ജേഴ്സി ധരിച്ചു നിൽക്കുന്ന ഹാലൻഡിന്‍റെ പശ്ചാത്തലത്തിൽ ഹൗസ് ബോട്ടുകളും കായലുമൊക്കെ കാണാം.
മലയാളത്തിൽ ഓണാശംസകൾ നേർന്ന് ക്ലബ് പങ്കുവെച്ച ചിത്രം നിമിഷ നേരം കൊണ്ട് വൈറലായി. പോസ്റ്റിന് താഴെ മലയാളികളുടെ അഭിനന്ദന പ്രവാഹമാണ്. മുമ്പും ക്ലബ് സമൂഹമാധ്യമങ്ങൾ വഴി ഓണാശംസകൾ നേർന്നിട്ടുണ്ട്. പ്രീമിയർ ലീഗ് ചാമ്പ്യന്മാരായ സിറ്റിക്ക് കേരളത്തിൽ ഒരുപാട് ആരാധകരാണുള്ളത്. കഴിഞ്ഞദിവസം നടന്ന എവേ മത്സരത്തിൽ ഷെഫീൽഡ് യുനൈറ്റഡിനെ ഒന്നിനെതിരെ രണ്ടു ഗോളിനാണ് സിറ്റി തോൽപ്പിച്ച് ജയം സ്വന്തമാക്കിയത്.
