രണ്ട് ദിവസത്തെ യുഎഇ സന്ദര്‍ശനത്തിനായി പ്രധാനമന്ത്രി നരേന്ദ്ര മോദിഅബുദബിയില്‍ എത്തി. അല്‍ബത്തിന്‍ വിമാനത്താവളത്തില്‍ യുഎഇ പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്‍ മോദിയെ സ്വീകരിച്ചു. തുടര്‍ന്ന് യുഎഇ പ്രസിഡന്റുമായി മോദി ഔദ്യോഗിക കൂടിക്കാഴ്ച നടത്തി. ഇരുരാജ്യങ്ങളുടെയും ഉന്നതപ്രതിനിധി സംഘവും കൂടിക്കാഴ്ച്ചയില്‍ പങ്കെടുത്തു. ഇന്ന് വൈകിട് ആറ് മണിക്കാണ് മോദിക്ക് സ്വീകരണം നല്‍കുന്ന അഹ്ലന് മോദി അബുദബിയില്‍ നടക്കുക. പരിപാടിയില്‍ പങ്കെടുക്കുന്നതിന് അറുപത്തിയയ്യായിരത്തിലധികം ആളുകളാണ് രജിസ്റ്റര്‍ ചെയ്തിരിക്കുന്നത്.
അബുദബി സായിദ് സ്‌പോര്‍ട്‌സ് സ്റ്റി സ്‌റ്റേഡിയത്തില്‍ വിപുലമായ ഒരുക്കങ്ങളാണ് പ്രധാനമന്ത്രിയെ സ്വീകരിക്കുന്നതിനായി ഒരുക്കിയിരിക്കുന്നത്. 12 മണി മുതല്‍ സ്‌റ്റേഡിയത്തില്‍ സന്ദര്‍ശകര്‍ക്ക് പ്രവേശനം അനുവതിച്ചു തുടങ്ങി. ഇന്ത്യന്‍ എംബസിയുടെ മേല്‍നോട്ടത്തിലാണ് അഹ്ലന് മോദി നടക്കുന്നത്. നാളെയാണ് മിഡില്‍ ഈസ്റ്റിലെ ആദ്യഹിന്ദു ശിലാക്ഷേത്ര സമര്‍പ്പണം നടക്കുന്നത്. അബുദബിയിലെ അബുമുറൈഖയില്‍ നിര്‍മ്മിച്ചിരിക്കുന്ന ബാപ്‌സ് ഹിന്ദു ക്ഷേത്രത്തിന്റെ ഉദ്ഘാടനം വൈകിട്ട് പ്രധാനമന്ത്രി നിര്‍വ്വഹിക്കും.
പ്രധാനമന്ത്രിയായ ശേഷമുള്ള നരേന്ദ്രമോദിയുടെ ഏഴാമത് യുഎഇ സന്ദര്‍ശനമാണിത്. ദുബൈയില്‍ നടക്കുന്ന ലോക സര്‍ക്കാര്‍ ഉച്ചകോടിയില്‍ നരേന്ദ്ര മോദി അതിഥിയായി പങ്കെടുക്കും. യുഎഇ സന്ദര്‍ശനത്തിന് ശേഷം പ്രധാനമന്ത്രി ഖത്തറിലേക്ക് എത്തും.
