പഹല്‍ഗാം ഭീകരാക്രമണത്തിന് പിന്നാലെ ഇന്ത്യ-പാക്ക് ബന്ധം വഷളായത് ഇന്ത്യ-യുഎഇ വിമാനസര്‍വീസുകളേയും ബാധിച്ചേക്കും.പാക്ക് വ്യോമാതിര്‍ത്തിയില്‍ ഇന്ത്യന്‍ എയര്‍ലൈനുകള്‍ക്ക് വിലക്ക് ഏര്‍പ്പെടുത്തിയത് ആണ് പ്രതിസന്ധി സൃഷ്ടിക്കുന്നത്.യാത്രാസമയവും നിരക്കുകളും കൂടിയേക്കും എന്നാണ് റിപ്പോര്‍ട്ട്.
യുഎഇയ്ക്കും ഇന്ത്യയ്ക്കും ഇടയില്‍ സര്‍വീസ് നടത്തുന്ന ഇന്ത്യന്‍ എയര്‍ലൈനുകളെ ആണ് പാക്കിസ്ഥാന്റെ നിരോധം ബാധിക്കുക.ദുബൈ അബുദബി ഷാര്‍ജ എന്നിവിടങ്ങളില്‍ നിന്നും ദില്ലിയും മുംബൈയും കൊല്‍ക്കത്തയും അഹമ്മദാബാദും അടക്കമുള്ള പ്രധാന ഇന്ത്യന്‍ നഗരങ്ങളിലേക്ക് നേരിട്ടുള്ള സര്‍വീസുകള്‍ക്ക് എയര്‍ലൈനുകള്‍ പാക്കിസ്ഥാന്റെ വ്യോമാതിര്‍ത്തി ഉപയോഗിക്കുന്നുണ്ട്.ഇന്ത്യന്‍ എയര്‍ലൈനുകളായ എയര്‍ഇന്ത്യ എക്‌സ്പ്രസ് ഇന്‍ഡിഗോ തുടങ്ങിയ ഇന്ത്യന്‍ എയര്‍ലൈനുകള്‍ക്ക് അറബിക്കടലില്‍ കൂടിയോ തെക്കന്‍ പാതകളിലൂടെയോ സര്‍വീസ് നടത്തേണ്ടിവരും.
പാക്കിസ്ഥാന്റെ വ്യോമപാത ഒഴിവാക്കുന്നതോടെ കൂടുതല്‍ ദൂരം പറക്കേണ്ടിവരും.യാത്രാസമത്തില്‍ രണ്ടുമണിക്കൂര്‍ വരെ വര്‍ദ്ധനക്ക് ഇത് കാരണമാകും.വിമാനങ്ങള്‍ക്ക് കൂടുതല്‍ ഇന്ധനവും ഉപയോഗിക്കേണ്ടിവരും.നിരോധനം ഏറെക്കാലത്തേക്ക് നീണ്ടുനിന്നാല്‍ ടിക്കറ്റ് നിരക്ക് വര്‍ദ്ധനയ്ക്ക് ഇത് കാരണമാകും.അതെസമയം ഇന്ത്യയിലേക്ക് സര്‍വീസ് നടത്തുന്ന യുഎഇ എയര്‍ലൈനുകള്‍ക്ക് പാക്കിസ്ഥാന്റെ വ്യോമാതിര്‍ത്തി ഉപയോഗിക്കുന്നതിന് വിലക്കില്ലാത്തതിനാല്‍ പ്രതിസന്ധിയുണ്ടാകില്ല.
