യുഎഇ ദേശീയ ദിനത്തിന് പൊതു-സ്വകാര്യമേഖലകള്‍ക്കുള്ള അവധി പ്രഖ്യാപിച്ചു.ഡിസംബര്‍ രണ്ട് മൂന്ന് തീയതികളില്‍ ആണ് അവധി.തിങ്കളാഴ്ച്ചയും ചൊവ്വാഴ്ചയും ആണ് അവധി ദിവസങ്ങള്‍.യുഎഇ മാനവവിഭവശേഷി സ്വദേശിവത്കരണ മന്ത്രാലയം ആണ് സ്വകാര്യമേഖലയ്ക്കുളള അവധികള്‍ പ്രഖ്യാപിച്ചത്.

സര്‍ക്കാര്‍ മേഖലയ്ക്ക് വാരാന്ത്യ അവധികളും ചേര്‍ത്ത് നാല് ദിവസത്തെ അവധിയാണ് ലഭിക്കുക.ഷാര്‍ജയില്‍ അഞ്ച് ദിവസത്തെ അവധിയും ലഭിക്കും.ശനിയും ഞായറും വാരാന്ത്യ അവധി ലഭിക്കുന്ന സ്വകാര്യമേഖല ജീവനക്കാര്‍ക്ക് ദേശീയ ദിനത്തോട് അനുബന്ധിച്ച് നാല് ദിവസത്തെ അവധി ആകെ ലഭിക്കും.രാജ്യം ദേശീയ ദിന ആഘോഷങ്ങളിലേക്ക് കടക്കുകയാണ്. ഇത്തവണ അലൈനില്‍ ആണ് ഔദ്യോഗിക ദേശീയ ദിനാഘോഷപരിപാടി.

ഇത്തവണയും പുതുവര്‍ഷാഘോഷം വിപുലമാക്കാനൊരുങ്ങി റാസല്‍ഖൈമ. അല്‍മര്‍ജാന്‍ ദ്വീപില്‍ ഗിന്നസ് റെക്കോര്‍ഡ് കരിമരുന്ന് പ്രദര്‍ശനം നടക്കും. പുതുവര്‍ഷതലേന്ന് അറബിക്-ബോളിവുഡ് സംഗീത വിരുന്നും സന്ദര്‍ശകര്‍ക്കായി ഒരുക്കും.
പുതുവര്‍ഷ ആഘോഷങ്ങളില്‍ റെക്കോര്‍ഡ് സൃഷ്ടിക്കാന്‍ വിപുലമായ ഒരുക്കത്തിലാണ് റാസല്‍ഖൈമ. പൈറോഡ്രോണുകള്‍, നാനോ ലൈറ്റുകള്‍, ഇലക്ട്രോണിക് ബീറ്റുകളില്‍ കോറിയോഗ്രാഫ് ചെയ്ത നിറങ്ങളും ആകൃതിയും ഉള്‍ക്കൊള്ളുന്ന ഗിന്നസ് റെക്കോര്‍ഡ് പൈറോടെക്‌നിക് വെടിക്കെട്ട് പ്രകടനത്തോടെയാകും ഇത്തവണയും റാസല്‍ഖൈ പുതുവര്‍ഷത്തെ വരവേല്‍ക്കുക.

മുന്‍ വര്‍ഷത്തെ വരവേല്‍ക്കുന്ന പ്രകടനത്തോടെയാകും റാസല്‍ഖൈമ 2025 നെ വരവേല്‍ക്കുകയെന്ന് ടൂറിസം വകുപ്പ് അറിയിച്ചു. അല്‍മര്‍ജാന്‍ ദ്വീപിനും അല്‍ഹംറ വില്ലേജിനുമിടയില്‍ തീരപ്രദേശത്ത് കരിമരുന്ന് പ്രകടനം കാണുന്നതിനുള്ള സൗകര്യമൊരുക്കും. ഫെസ്റ്റിവല്‍ ഗ്രൗണ്ടുകള്‍, ധായ, ജെയ്‌സ്, യാനാസ്, റംസ് എന്നിവിടങ്ങളിലെ പാര്‍ക്കിങ് സോണുകളിലിരുന്നും പ്രദര്‍ശനം കാണാന്‍ കഴിയും. മുക്താര്‍, ഫഹ്മില്‍ ഖാന്‍ തുടങ്ങി പ്രശസ്തരുടെ നേതൃത്വത്തില്‍ അറബിക് ബോളിവുഡ് സംഗീത വിരുന്നാണ് പുതുവര്‍ഷ തലേന്ന് സന്ദര്‍ശകര്‍ക്കായി ഒരുക്കുന്നത്. കുടുംബങ്ങള്‍ക്ക് മാത്രമായി നിശ്ചിത സ്ഥലത്ത് പ്രവേശനം അനുവദിക്കും. ഇവിടെ ബാര്‍ബിക്യുവിനും, തീ കത്തിക്കുന്നതിനും അനുമതി നല്‍കും.

മുന്‍കൂട്ടി വാഹനം ഓണ്‍ലൈനില്‍ രജിസ്റ്റര്‍ ചെയ്യുന്നവര്‍ക്ക് മാത്രമായിരിക്കും പ്രവേശനം. കാരവാനുകള്‍ക്കായും പ്രത്യേക പാര്‍ക്കിങ് സോണും അനുവദിക്കും. എല്ലാ സോണുകളില്‍ നിന്നും ഇവന്റിലേക്ക് പ്രത്യേക പ്രവേശന മാര്‍ഗ്ഗവും ഒരുക്കും.

ദുബൈയില്‍ നിര്‍മ്മിക്കുന്ന പുതിയ വിമാനത്താവളത്തില്‍ യാത്രക്കാര്‍ക്ക് ലഗേജിനായി കാത്തുനില്‍ക്കേണ്ടവരില്ല ദനാത്ത.വിമാനമിറങ്ങി ടെര്‍മിനലില്‍ എത്തുമ്പോള്‍ തന്നെ ലഗേജും ലഭിക്കും.ദുബൈ അല്‍മക്തും വിമാനത്താവളത്തില്‍ പുതിയ ടെര്‍മിനല്‍ പൂര്‍ത്തിയാകുമ്പോള്‍ യാത്രക്കാര്‍ക്ക് ഏറ്റവും മികച്ച സേവനങ്ങള്‍ നല്‍കുമെന്നാണ് എയര്‍പോര്‍ട്‌സ് സര്‍വീസ് കമ്പനിയായ ദനാത്ത പറയുന്നത്.യാത്രകഴിഞ്ഞെത്തുന്നവര്‍ക്ക് ലഗേജിനായി മിനുട്ടുകളോളം കാത്തുനില്‍ക്കേണ്ടിവരില്ല.

വിമാനമിറങ്ങി ടെര്‍മിനലില്‍ എത്തുമ്പോള്‍ തന്നെ ലഗേജും തയ്യാറായിരിക്കും എന്ന് ദനാത്ത സി.ഇ.ഒ സ്റ്റീവ് അല്ലെന്‍ പറഞ്ഞു. ലഗേജ് യാത്രക്കാരുടെ വീടുകളിലോ ഹോട്ടലുകളിലോ എത്തിച്ച് നല്‍കുന്നതിനുള്ള സൗകര്യവും ഒരുക്കും.യാത്രക്കാര്‍ക്കുള്ള വിവിധ സേവനങ്ങള്‍ക്കായി പൂര്‍ണ്ണമായും ഓട്ടോമേറ്റഡ് ആയിട്ടുള്ള സംവിധാനങ്ങള്‍ ആണ് ഒരുക്കുന്നത്.പേപ്പറിന് പൂര്‍ണ്ണമായും ഒഴിവാക്കി പകരം ബയോമെട്രിക് ഉപയോഗിക്കും.

3500 കോടി ഡോളര്‍ ചിലവഴിച്ചാണ് അല്‍മക്തും വിമാനത്താവളത്തില്‍ പുതിയ ടെര്‍മിനല്‍ നിര്‍മ്മിക്കുന്നത്.പുതിയ ടെര്‍മിനലില്‍ ഇമിഗ്രേഷന്‍ കൗണ്ടറുകള്‍ തന്നെ ഉണ്ടാകില്ലെന്ന് ദുബൈ എയര്‍പോര്‍ട്‌സ് വ്യക്തമാക്കിയിട്ടുണ്ട്.സെക്കന്‍ഡുകള്‍ക്കുള്ളില്‍ ഇമിഗ്രേഷന്‍ പൂര്‍ത്തിയാക്കാന്‍ കഴിയുന്ന അത്യാധുനിക ബയോമെട്രിക് സംവിധാനങ്ങള്‍ ആയിരിക്കും പുതിയ ടെര്‍മിനലില്‍ ഉണ്ടാവുക.

അന്തരീക്ഷ ഈര്‍പ്പം ഉപയോഗിച്ച് മഴപെയ്യിക്കുന്നതിന് യുഎഇയുടെയും യു.എസിന്റെയും നേതൃത്വത്തില്‍ പഠനം നടത്തുന്നു.വരണ്ട കാലാവസ്ഥയില്‍ കര്‍ഷകര്‍ക്ക് ആവശ്യമായ മഴ ലഭ്യമാക്കുന്നതിന് ആണ് ശ്രമം.അസര്‍ബൈജാനില്‍ നടന്ന യു.എന്‍ കാലാവസ്ഥാ ഉച്ചകോടിയില്‍ ആണ് ഇത് സംബന്ധിച്ച പ്രഖ്യാപനം.

യുഎഇയും അമേരിക്കയും ചേര്‍ന്ന് രൂപീകരിച്ച അഗ്രികള്‍ച്ചര്‍ ഇന്നവേഷന്‍ മിഷന്‍ ഫോര്‍ ക്ലൈമറ്റ് അഥവാ എയിം ആണ് മഴ വര്‍ദ്ധിപ്പിക്കുന്നതിന് പുതിയ വഴികള്‍ തേടുന്നത്.അമേരിക്ക കമ്പനിയായ ഹെക ക്ലൗഡ് തയ്യാറാക്കിയ പദ്ധതിക്ക് എയിം സാമ്പത്തിക പിന്തുണ നല്‍കും.അന്തരീക്ഷ ഈര്‍പ്പം ഉപയോഗിച്ച് കര്‍ഷകര്‍ക്ക് ആവശ്യമുള്ള സ്ഥലങ്ങളില്‍ രണ്ട് മില്ലിമീറ്റര്‍ വരെ മഴ പെയ്യിക്കുന്നതിന് തങ്ങളുടെ സാങ്കേതികവിദ്യയ്ക്ക് കഴിയും എന്നാണ് ഹെക ക്ലൗഡ് പറയുന്നത്.ആര്‍ട്ടിഫിഷ്യല്‍ ഇന്റലിജന്‍സും ഇതിനായി പ്രയോജനപ്പെടുത്തുന്നുണ്ട്.

യുഎഇയുടെ തൊണ്ണൂറ് ശതമാനം പ്രദേശങ്ങളിലും ഈ സാങ്കേതിക വിദ്യ ഉപയോഗിച്ച് മഴ പെയ്യിക്കുന്നതിന് സാധിക്കും.പരീക്ഷണഘട്ടത്തില്‍ തന്നെ ഫലപ്രദമായി മഴപെയിക്കാന്‍ കഴിയുന്നുണ്ടെന്നും ഹെക ക്ലൗഡ് വ്യ്ക്തമാക്കി.2020-ല്‍ ആണ് കാര്‍ഷികമേഖലയുടെ അഭിവൃദ്ധിക്കായി യുഎഇയും യുഎസും ചേര്‍ന്ന് എയിം എന്ന പദ്ധതി ആരംഭിച്ചത്.പൊതു സ്വകാര്യമേഖലകളില്‍ നിന്നും പണം സമാഹരിച്ചാണ് പദ്ധതി നടപ്പാക്കുന്നത്. ഇതുവരെ 2920 കോടി ഡോളര്‍ ആണ് സമാഹരിച്ചത്.ലോകത്തിന്റെ വിവിധ ഭാഗങ്ങളില്‍ നിന്നായി എണ്ണൂറോളം പങ്കാളികളും ഇപ്പോള്‍ ഈ പദ്ധതിയുടെ ഭാഗമാണ്.