മധ്യപ്രദേശിലെ സാഗർ ജില്ലയിൽ ദളിത് യുവാവിനെ ആൾകൂട്ടം തല്ലിക്കൊന്ന സംഭവത്തിൽ എട്ട് പേർ അറസ്റ്റിൽ. മുഖ്യപ്രതിയായ വിക്രം സിംഗ് താക്കൂറടക്കം എട്ട് പേരാണ് അറസ്റ്റിലായത്. പത്തൊന്‍പതുകാരനായ നിതിൻ അഹിർവാരിനെയാണ് ആള്‍ക്കൂട്ടം മര്‍ദിച്ചു കൊലപ്പെടുത്തിയത്. അക്രമികളില്‍ നിന്ന് മകനെ രക്ഷിക്കാന്‍ ശ്രമിച്ച അമ്മയെ നഗ്നയാക്കി മര്‍ദിക്കുകയും ചെയ്തു.

പ്രതികൾക്കെതിരെ കൊലക്കുറ്റത്തിന് കേസ് എടു‍ത്തു. മുഖ്യപ്രതിയുൾപ്പെടെ ഒമ്പത് പേർക്കെതിരെ സെക്ഷൻ 307 പ്രകാരം കേസ് ഫയൽ ചെയ്തിട്ടുണ്ട്. സെക്ഷൻ 302 എസ്സി, എസ്ടി ആക്ട് പ്രകാരവും കേസ് എടുത്തിട്ടുണ്ടെന്നും എസ് പി സഞ്ജീവ് ഉയ്ക് പറഞ്ഞു.

2019ൽ നിതിൻ അഹിർവാറിന്റെ സഹോദരി നൽകിയ ലൈംഗിക പീഡന കേസ് പിൻവലിക്കാത്തതിനെ തുട‌ർന്നാണ് ആക്രമണമുണ്ടായത്. ഇതുമായി ബന്ധപ്പെ‌ട്ട് നിതിൻ അഹിർവാറും വിക്രം സിംഗ് താക്കൂറും തമ്മിൽ വാക്ക് തർക്കമുണ്ടായിരുന്നു. പിന്നാലെയാണ് യുവാവിനെ വീട്ടിൽകയറി തല്ലിക്കൊന്നത്. നിതിൻ അഹിർവാറിന്റെ വീട്ടിൽ കയറിയ വിക്രം സിംഗ് യുവാവിനെ തല്ലിക്കൊലപ്പെടുത്തുകയായിരുന്നു.

ബംഗളൂരുവില്‍ മലയാളി യുവതിയെ പങ്കാളി തലയ്ക്കടിച്ച് കൊന്നു. 24 കാരിയായ തിരുവനന്തപുരം ആറ്റിങ്ങള്‍ സ്വദേശിനി ദേവയാണ് കൊല്ലപ്പെട്ടത്. യുവതിക്കൊപ്പം താമസിച്ചിരുന്ന കൊല്ലം സ്വദേശി വൈഷണവിനെ അറസ്റ്റ് ചെയ്തു. ശനിയാഴ്ച വൈകിട്ടായിരുന്നു സംഭവം.

ലിവിങ് ടുഗദര്‍ പങ്കാളിയായ ദേവയ്ക്ക് മറ്റൊരാളുമായി ബന്ധമുണ്ടെന്ന സംശയമാണ് കൊലപാതകത്തിന് കാരണമായതെന്ന് പ്രതി മൊഴി നല്‍കി. ദേവ സ്ഥിരമായി മൊബൈലിൽ സമയം ചിലവഴിക്കുന്നതും ചിലര്‍ക്ക് മെസേജ് അയക്കുന്നതും സംശയത്തിന് കാരണമായി. സംഭവദിവസം ഇരുവരും ബെംഗളൂരുവില്‍ തന്നെ താമസിക്കുന്ന ദേവയുടെ സഹോദരി കൃഷ്ണയുടെ വീട്ടിലെത്തിയിരുന്നു. ഇവിടെവെച്ച് രണ്ടു പേരും തമ്മില്‍ വഴക്കിട്ടിരുന്നതായി കൃഷ്ണ മൊഴി നൽകി. ഇരുവരെയും അനുനയിപ്പിക്കാന്‍ ശ്രമിക്കുകയും ഉച്ചയ്ക്ക് ഒരു മണിയോടെ രണ്ടു പേരും വാടകവീട്ടിലേക്ക് മടങ്ങിപ്പോവുകയും ചെയ്തു. ഇതിനു പിന്നാലെയാണ് ദേവയെ വൈഷ്ണവ് കൊലപ്പെടുത്തിയത്.

കുക്കറുമായി കിടപ്പുമുറിയിലെത്തിയ പ്രതി വൈകിട്ട് നാലിനും നാലരയ്ക്കും ഇടയില്‍ മൂന്നു തവണ യുവതിയുടെ തലയ്ക്കടിച്ചു. ഗുരുതര പരുക്കേറ്റ യുവതി തൽക്ഷണം മരിച്ചുവെന്ന് പോലീസ് അറിയിച്ചു. ദേവയെ ഫോണില്‍വിളിച്ചിട്ട് കിട്ടാതായതോടെ സഹോദരി കൃഷ്ണ അയല്‍ക്കാരെ വിവരമറിയിച്ചിരുന്നു. തുടര്‍ന്ന് ഇവര്‍ വീട്ടിലെത്തി പരിശോധിച്ചതോടെയാണ് കൊലപാതകവിവരം അറിഞ്ഞത്.