അബുദബി: വടക്കേ ആഫ്രിക്കന്‍ രാജ്യമായ ലിബിയയില്‍ പ്രളയക്കെടുതിയില്‍ നാശനഷ്ടം സംഭവിച്ച മേഖലയില്‍ അടിയന്തര സഹായമെത്തിക്കാന്‍ നിര്‍ദ്ദേശം നല്‍കി യുഎഇ പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്‍. ദുരിതാശ്വസ സഹായങ്ങളും തിരച്ചില്‍ രക്ഷാ സംഘങ്ങളെയും അയക്കും. ഡാനിയല്‍ കൊടുങ്കാറ്റിനെ തുടര്‍ന്നുണ്ടായ പ്രളയത്തില്‍ രണ്ടായിരത്തിലധികം പേരാണ് മരിച്ചത്. ഡാനിയല്‍ ചുഴലികൊടുങ്കാറ്റിനെ തുടര്‍ന്ന് ഉണ്ടായ കനത്ത മഴയില്‍ രാജ്യം ദുരിതത്തിലാണ്. പ്രളയത്തില്‍ രണ്ടായിരത്തിലധികം ആളുകളാണ് മരിച്ചത്. പ്രളയക്കെടുതില്‍ ദുരിതമനുഭവിക്കുന്നവര്‍ക്ക് സഹയാത്തിക്കാന്‍ യുഎഇ പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്‍ നിര്‍ദ്ദേശം നല്‍കി. വെള്ളപ്പൊക്കത്തില്‍ ദുരിതമനുഭവിക്കുവരെ സഹായിക്കാന്‍ രക്ഷാപ്രവര്‍ത്തകരെയും സന്നദ്ദ സേനാ അംഗങ്ങളെയും, അടിയന്തര സഹായങ്ങളും എത്തിച്ചു നല്‍കും. ചുഴലിക്കാറ്റിനെ തുടര്‍ന്ന് നിരവധി ആളുകളെയാണ് കണാതായത്.

ലിബിയ ഭരണകൂടത്തോടും, അതിലെ ജനങ്ങളോടും ദുരന്തത്തിന് ഇരയായവരുടെ കുടുംബങ്ങളോടും ആത്മാര്‍ത്ഥമായ അനുശോചനവും സഹതാപവും അറിയിക്കുന്നതായി ഷെയ്ഖ് മുഹമ്മദ് പറഞ്ഞു. കിഴക്കന്‍ നഗരമായ ഡെര്‍ണയില്‍ രണ്ടായിരത്തിലധികം ആളുകള്‍ മരിച്ചതായാണ് കണക്കുകള്‍. കാണാതായവര്‍ക്കായുള്ള തിരച്ചില്‍ തുടരുകയാണെന്ന് പ്രധാമന്ത്രി ഒസാമ ഹമദ് പറഞ്ഞു. മെഡിറ്ററേനിയന്‍ ചുഴലിക്കാറ്റ് രാജ്യത്തെ ബാധിച്ചതിനെത്തുടര്‍ന്ന് ഡെര്‍ണ പ്രദേശം ദുരന്ത മേഖലയായി പ്രഖ്യാപിച്ചു. വിവിധ രാഷ്ട്രങ്ങള്‍ ലിബിയയ്ക്ക് സഹായ ഹസ്തം എത്തിച്ചു നല്‍കിയിട്ടുണ്ട്.

അബുദബി: യുഎഇയില്‍ വാണിജ്യ ഏജന്‍സി നിയമം ലംഘിച്ചാല്‍ കനത്ത പിഴ ചുമത്തുമെന്ന് വാണിജ്യ മന്ത്രാലയം. ഒരു ലക്ഷം മുതല്‍ നാല് ലക്ഷം ദിര്‍ഹം വരെ പിഴ ചുമത്തുകയും കസ്റ്റംസ് ചരക്കുകള്‍ പിടിച്ചെടുക്കുകയും ചെയ്യും. മന്ത്രിസഭയും അംഗീകാരം നേടിയ നിയമം ജൂണില്‍ പ്രാബല്യത്തില്‍ വന്നിരുന്നു. പരിഷ്‌കരിച്ച വാണിജ്യ ഏജന്‍സി നിയമമാണ് വാണിജ്യ മന്ത്രാലയം പുറത്തിറക്കിയത്. മുമ്പുണ്ടായിരുന്ന നിയമത്തില്‍ നിന്നും സുപ്രധാനമായ മാറ്റമാണ് പുതിയതായി ഉണ്ടായിരിക്കുന്നത്. പുതിയ നിയമത്തില്‍ രണ്ടു തരത്തില്‍ പിഴ ചുമത്തുന്നതിനാണ് വകുപ്പുള്ളത്. നിയമലംഘനത്തിന് ആദ്യം വാണിങ് നല്‍കും. ആവര്‍ത്തിച്ചാല്‍ ഒരു ലക്ഷം മുതല്‍ രണ്ടു ലക്ഷം വരെ പിഴ ചുമത്തുകയും ചരക്ക് പിടിച്ചെടുക്കുകയും ചെയ്യും. വീണ്ടും തെറ്റ് ആവര്‍ത്തിച്ചാല്‍ നാല് ലക്ഷം ദിര്‍ഹം വരെയാണ് പിഴ ചുമത്തുക. അന്താരാഷ്ട്ര ബിസിനസ് കരാറില്‍ ഏര്‍പ്പെട്ടിരിക്കുന്ന ഏജന്റിനല്ലാതെ, സ്ഥാപനങ്ങള്‍ക്കോ വ്യക്തികള്‍ക്കോ ഉത്പന്നങ്ങള്‍ വില്‍പന നടത്തിയാല്‍ പിഴ ചുമത്തും.

പുതിയ നിയമത്തിലൂടെ, കരാര്‍ ലംഘനങ്ങള്‍ കുറ്റകൃത്യമായി പരിഗണിക്കുമെന്ന സന്ദേശം അന്താരാഷ്ട്ര സ്ഥാപനങ്ങള്‍ക്ക് നല്‍കുകയാണ്. നിയമം പ്രാബല്യത്തില്‍ വരുന്നതിനു മുമ്പ് നിലവില്‍ വന്ന കരാറുകള്‍ക്കും പുതിയ നിയമം ബാധകമാണ്. നിലവിലുള്ള എല്ലാ കരാറുകളും ഇതോടെ പുതിയ നിയമത്തിന് കീഴില്‍വരും. എന്നാല്‍ കരാര്‍ പുതുക്കാതിരിക്കുകയോ ഒഴിവാക്കുകയോ ചെയ്താല്‍ ബാധകമായിരിക്കില്ല. പുതിയ നിയമ പ്രകാരം 51 ശതമാനം യുഎഇ പൗരന് അവകാശമുള്ള പൊതു ഓഹരി ഉടമകളുടെ കമ്പനികള്‍ക്ക് വാണിജ്യ ഏജന്‍സി പ്രവര്‍ത്തനങ്ങളില്‍ ഏര്‍പ്പെടാം.

ദുബൈ: ഹത്ത ജലവൈദ്യുത പദ്ധതിയുടെ നിര്‍മ്മാണം അവസാനഘട്ടത്തിലേക്ക്. പദ്ധതിയുടെ നിര്‍മ്മാണം 75 ശതമാനത്തിലേക്ക് അടക്കുന്നുവെന്ന് ദീവ അറിയിച്ചു. ഗള്‍ഫ് മേഖലയിലെ ആദ്യ ജലവൈദ്യുതി പദ്ധതിയാണ് ഹത്ത ഹൈഡ്രോ ഇലക്ട്രിക് പ്രോജക്ട്. 2050 ഓടെ വൈദ്യുതി ഉത്പാദനം നൂറ് ശതമാനവും ശുദ്ധമായ സ്രോതസ്സുകളില്‍ നിന്നും ലഭ്യമാക്കുന്നതിനുള്ള പദ്ധതിയാണ് ദുബൈ നടപ്പിലാക്കുന്നത്. ഇതില്‍ ദുബൈയുടെ സ്വപ്ന പദ്ധതിയാണ് ഹത്തയിലേത്. ദുബൈ ഇലക്ട്രിസിറ്റി ആന്റ് വാട്ടര്‍ അതോരിറ്റിയാണ് പദ്ധതി നടപ്പിലാക്കുന്നത്. ഹത്ത ജലവൈദ്യുത പദ്ധതിയുടെ നിര്‍മ്മാണം അവസാന ഘട്ടത്തിലാണ്. 250 മെഗാവാട്ട് വൈദ്യുതി ഉത്പാദിപ്പിക്കാന്‍ ശേഷിയുള്ള പദ്ധതിയക്ക് 142 കോടി ദിര്‍ഹമാണ് ചിലവ് പ്രതീക്ഷിക്കുന്നത്. 2025 ഓടെ വൈദ്യുതി ഉപയോഗിക്കാന്‍ കഴിയുമെന്ന് ദീവ അറിയിച്ചു. 80 വര്‍ഷം വരെ പദ്ധതി പ്രവര്‍ത്തിപ്പിക്കാന്‍ കഴിയും. 1500 മെഗാവാട്ട് വരെയാണ് സംഭരണ ശേഷി. ദുബൈ ഇലക്ട്രിസിറ്റി ആന്റ് വാട്ടര്‍ അതോറിറ്റി മാനേജിംഗ് ഡയറക്ടറും, ചീഫ് എക്‌സിക്യൂട്ടീവുമായ, സയീദ് മുഹമ്മദ് അല്‍ തായര്‍, പ്ലാന്റ് സന്ദര്‍ശിച്ച് പുരോഗതി വിലയിരുത്തി.

മുകളിലത്തെ അണക്കെട്ട് നിറയ്ക്കാനുള്ള പ്രാരംഭ നടപടികള്‍ വര്‍ഷാവസാനത്തോടെ നടക്കുമെന്ന് അധികൃതര്‍ അറിയിച്ചു. പവര്‍ ജനറേറ്ററുകളുമായി ബന്ധിപ്പിക്കുന്ന 1.2 കിലോമീറ്റര്‍ വാട്ടര്‍ ടണലിന്റെ പുരോഗതിയും വിലയിരുത്തി. അപ്പര്‍ ഡാമിന്റെ പാലത്തിന്റെ നിര്‍മ്മാണവും 72 മീറ്റര്‍ മതിലിന്റെ നിര്‍മ്മാണവും പൂര്‍ത്തിയായി. ഹത്തയുടെ പ്രധാന അണക്കെട്ടില്‍ നിന്ന് 150 മീറ്റര്‍ അകലെയുള്ള അപ്പര്‍ ഡാമില്‍ ജലം സംഭരിക്കും. ഇവിടെ നിന്നും ജലം ഭൂഗര്‍ഭ ടണിലിലൂടെ ഒഴുക്കി ടര്‍ബൈന്‍ പ്രവര്‍ത്തിപ്പിച്ചാണ് വൈദ്യുതി ഉത്പാദിപ്പിക്കുന്നത്. വെള്ളം വീണ്ടും ടണലിലൂടെ പമ്പ് ചെയ്ത് മുകളിലെത്തിച്ച് സംഭരിക്കുന്ന രീതിയിലാണ് നിര്‍മ്മാണം. പദ്ധതി പൂര്‍ത്തിയാകുന്നതോടെ ഹത്തയിലെ ഇമറാത്തി പൗരന്മാര്‍ക്ക് തൊഴിലവസരവും സൃഷ്ടിക്കപ്പെടും. ഹത്ത വികസനവും ടൂരിസം പദ്ധതികളും ഹത്ത ജലവൈദ്യുത പദ്ധതിയുടെ ഭാഗമാണ്. സംഭരിക്കുന്ന വൈദ്യുതി ദീവയുടെ ഗ്രിഡ് വഴിയാകും വിതരണത്തിനായി എത്തിക്കുക.

അബുദബി: നിരവധി മാറ്റങ്ങളോടെയാണ് അല്‍ഹോസന്‍ ആപ്ലിക്കേഷന്റെ പരിഷ്‌ക്കരിച്ച പതിപ്പ് ആരോഗ്യ മന്ത്രാലയം പുറത്തിറക്കിയത്. കൊവിഡുമായി ബന്ധപ്പെട്ട പരിശോധനകള്‍ക്കും സമ്പര്‍ക്ക പട്ടികയിലുള്ളവരെ കണ്ടെത്തുന്നതിനും വേണ്ടിയായിരുന്നു ആരോഗ്യ മന്ത്രാലയം ആപ്പിന് രൂപം നല്‍കിയത്. നിലവില്‍ ഇത് വാക്‌സിനേഷനുകള്‍ക്ക് വേണ്ടിയുളള പ്ലാറ്റ്‌ഫോം ആയാണ് ഉപയോഗിക്കുന്നത്. കുട്ടികള്‍ ജനിക്കുന്നത് മുതല്‍ പതിനെട്ട് വയസ് വരെയുളള കാലഘട്ടത്തിലെ വാക്‌സിനേഷന്റെ സമഗ്രമായ വിവരങ്ങള്‍ ഇതില്‍ ലഭ്യമാണ്. വാക്‌സിനേഷന്‍ സ്റ്റാറ്റസ് കൃത്യമായി നിരീക്ഷിക്കാന്‍ മാതാപിതാക്കളെ സഹായിക്കുന്ന ഡിജിറ്റല്‍ സാങ്കേതിക വിദ്യയും ഇതിന്റെ പ്രത്യേകതയാണ്. വാക്‌സിനേഷന്‍ ശതമാനം ഉയര്‍ത്തുന്നതിനും ഇത് സഹായകരമാണ്. കൊവിഡ് പിടിമുറുക്കിയ രണ്ട് വര്‍ഷത്തോളം അബുദബിയില്‍ പിസിആര്‍ പരിശോധന നടത്തി അല്‍ഹോസന്‍ ആപ്ലിക്കേഷനില്‍ ഗ്രീന്‍ പാസ് നിര്‍ബന്ധമായിരുു. കൊവിഡ് നിയന്ത്രണങ്ങളില്‍ ഇളവ് നല്‍കിയിരുന്നെങ്കിലും ഗ്രീന്‍ പാസ് നിലനിന്നിരുന്നു. ഒരു വര്‍ഷം മുന്‍പാണ് പൊതു സ്ഥലങ്ങളില്‍ പ്രവേശിക്കാനായി ഗ്രീന്‍ പാസ് വേണമെന്ന നിബന്ധന നീക്കിയത്.

നൈജീരിയയുമായി ഉഭയകക്ഷി ബന്ധം മെച്ചപ്പെടുത്താനൊരുങ്ങി യുഎഇ. നൈജീരിയന്‍ പ്രസിഡന്റ് ബോല അഹമ്മദ് ടിനുബുവുമായി യുഎഇ പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്‍ കൂടിക്കാഴ്ച നടത്തി. നൈജീരിയന്‍ പ്രസിഡന്റായി ചുമതലയേറ്റ ശേഷം ആദ്യമായി യുഎഇയിലെത്തിയ ബോല അഹമ്മദ് ടിനുബുവിന് ഊഷ്മള സ്വീകരണമാണ് യുഎഇ നല്‍കിയത്. തുടര്‍ന്ന് യുഎഇ പ്രസിഡന്റിന് പുറമേ, യുഎഇ ഉപപ്രധാനമന്ത്രിയും വൈസ് പ്രസിഡന്റുമായ ഷെയ്ഖ് മന്‍സൂര്‍ ബിന്‍ സായിദ് അല്‍ നഹ്യാന്‍, വിവിധ വകുപ്പുകളിലെ ഉന്നത ഉദ്യോഗസ്ഥര്‍ എന്നിവരുമായി കൂടിക്കാഴ്ച നടത്തി. പ്രസിഡന്റ് സ്ഥാനത്ത് ശോഭിക്കാന്‍ കഴിയട്ടെയെന്നും രാജ്യത്തിന് എല്ലാ സമൃദ്ധിയും ഉണ്ടാവട്ടെയെന്നും ഷെയ്ഖ് മുഹമ്മദ് കൂടിക്കാഴ്ചയില്‍ ആശംസ അറിയിച്ചു. ഇരു രാജ്യങ്ങളും തമ്മിലുള്ള ബന്ധം ശക്തിപ്പെടുത്തുമെന്നും സാമ്പത്തികം, ഊര്‍ജ്ജം, കാലാവസ്ഥ എന്നീ മേഖലകളില്‍ ഉഭയകക്ഷി ബന്ധം ദൃഢമാക്കുമെന്നും ഷെയ്ഖ് മുഹമ്മദ് പ്രതീക്ഷ പ്രകടിപ്പിച്ചു. ദുബൈയില്‍ നടക്കാനിരിക്കുന്ന കോപ് 28 കാലാവസ്ഥ ഉച്ചകോടിയും കൂടിക്കാഴ്ചയില്‍ ചര്‍ച്ചാ വിഷയമായി.