കുവൈത്ത്- കേരള സെക്ടറില്‍ കൂടുതല്‍ സര്‍വസുമായി എയര്‍ഇന്ത്യ എക്‌സ്പ്രസ്സ്. ഈ മാസം 30 മുതല്‍ എയര്‍ഇന്ത്യ എക്‌സ്പ്രസ്സ് ആഴ്ചയില്‍ അധിക സര്‍വീസ് നടത്തും. അധിക ബാഗേജ് നിരക്കില്‍ നിരക്കിളവും പ്രഖ്യാപിച്ചിട്ടുണ്ട്.

കുവൈത്ത്- കണ്ണൂര്‍ റൂട്ടില്‍ നിലവിലുള്ള സര്‍വീസിന് പുറമേയാണ് പുതിയ സര്‍വീസ്. ആഴ്ചയില്‍ രണ്ട് സര്‍വീസുകള്‍ ആരംഭിക്കുന്നത് കുവൈത്ത്- കണ്ണൂര്‍ യാത്രക്കാര്‍ക്ക് ഏറെ ആശ്വാസകരമായിരിക്കും. തിങ്കളാഴ്ചകളില്‍ പുലര്‍ച്ചെ 4.40ന് കണ്ണൂരില്‍ നിന്ന് പുറപ്പെടുന്ന വിമാനം 7.40ന് എത്തിച്ചേരും. നവംബര്‍ മുതല്‍ കുവൈത്ത്- കരിപ്പൂര്‍ സര്‍വീസില്‍ മാറ്റം ഉണ്ടാകുമെും എയര്‍ലൈന്‍ അറിയിച്ചു.

ചൊവ്വ, വെള്ളി ദിവസങ്ങളില്‍ എയര്‍ഇന്ത്യ എക്‌സ്പ്രസ് സര്‍വീസ് ഉണ്ടായിരിക്കില്ലെന്നാണ് അറിയിപ്പ്. അതേസമയം ഓഫ് സീസണില്‍ അധിക ബാഗേജിന് നിരക്കിളവും പ്രഖ്യാപിച്ചിട്ടുണ്ട്. കുവൈത്തില്‍ നിന്ന് നാട്ടിലേയ്ക്കുള്ള 10 കിലോ അധിക ബാഗേജിന് ഒരു ദിനാറായിരിക്കും ഈടാക്കുക. 15 കിലോ അധിക ബാഗേജിന് പത്ത് ദിനാറാണ് ഈടാക്കുക. ഡിസംബര്‍ 11 വരെ യാത്ര ചെയ്യുന്നവര്‍ക്കും ടിക്കറ്റ് എടുക്കുന്നവര്‍ക്കും മാത്രമായിരിക്കും നിരക്കിളവ് ലഭിക്കുക. കഴിഞ്ഞ ജൂലൈയിലും ഇളവ് പ്രഖ്യാപിച്ചിരുന്നു

തേജ് ചുഴലിക്കാറ്റ് ഒമാന്‍ തീരത്തേക്ക് അടുക്കുന്നു. ദോഫാര്‍-അല്‍വുസ്ത ഗവര്‍ണ്ണറേറ്റുകളില്‍ ശക്തമായ മഴയാണ് അനുഭവപ്പെടുന്നത്. ദോഫാര്‍ മേഖലയില്‍ ഇന്നും നാളെയും പൊതു അവധിയാണ്.

നിലവില്‍ സലാല നഗരത്തിന് 250 കിലോമീറ്റര്‍ അകലെയാണ് തേജ് ചുഴലിക്കാറ്റ്. അടുത്ത ഇരുപത്തിനാല് മണിക്കൂറുകള്‍ക്കുള്ളില്‍ കാറ്റ് കരയില്‍ പ്രവേശിക്കും എന്നാണ് കാലാവസ്ഥ കേന്ദ്രം വ്യക്തമാക്കിയിട്ടുള്ളത്. കാറ്റ് തീരത്തോട് അടുത്തതോടെ ദോഫാര്‍ ഗവര്‍ണറേറ്റിലും അല്‍വുസ്ത ഗവര്‍ണറേറ്റിലെ വിലായത്ത് അല്‍ ജസീറിലും ശക്തമായ മഴയാണ് അനുഭവപ്പെടുന്നത്. മേഖലയില്‍ കാറ്റും മഴയും കൂടുതല്‍ ശക്തിപ്പെടും എന്നാണ് ഒമാന്‍ കാലാവസ്ഥാ കേന്ദ്രം മുന്നറിയിപ്പ് നല്‍കിയിരിക്കുന്നത്.ദോഫാര്‍ ഗവര്‍ണറേറ്റിനും യെമനും ഇടയിലായിട്ടായിരിക്കും കാറ്റ് കരയില്‍ പ്രവേശിക്കുക. ദോഫാര്‍ ഗവര്‍ണറേറ്റിലും അല്‍വുസ്ത ഗവര്‍ണറേറ്റിന്റെ ചില ഭാഗങ്ങളിലുമായി അന്‍പത് മുതല്‍ മുന്നൂറ് മില്ലിമീറ്റര്‍ വരെ മമഴ ലഭിച്ചേക്കാം എന്നാണ് കാലാവസ്ഥാ കേന്ദ്രത്തിന്റെ പ്രവചനം.

രണ്ടിടത്തും പൊതു-സ്വകാര്യമേഖലകള്‍ക്ക് ഇന്നും നാളെയും അവധി നല്‍കിയിരിക്കുകയാണ്. തീരപ്രദേശങ്ങളില്‍ നിന്നും നിരവധി പേരെ മാറ്റിപ്പാര്‍പ്പിച്ചിട്ടുണ്ട്. ഇതിനകം പതിനയ്യായിരത്തിലധികം ആളുകളെ സുരക്ഷിത കേന്ദ്രങ്ങളിലേക്ക് മാറ്റി. സലാല തുറമുഖം ഇന്നലെ വൈകിട്ട് അഞ്ച് മണിക്ക് അടച്ചു.ദോഫാര്‍ മേഖലയില്‍ പൊതുജനങ്ങള്‍ താഴ്ന്ന പ്രദേശങ്ങളിലേക്കും താഴ് വാരങ്ങളിലേക്കും പോകരുതെന്നും മുന്നറിയിപ്പ് നല്‍കിയിട്ടുണ്ട്.

അറബിക്കടലില്‍ രൂപം കൊണ്ട തേജ് തുഴലിക്കാറ്റിനെ തുടര്‍ന്ന് ഒമാനിലെ ദോഫാര്‍ മേഖലയില്‍ രണ്ട് ദിവസം പൊതുഅവധി പ്രഖ്യാപിച്ചു. നാളെയും മറ്റന്നാളും ആണ് അവധി. ദോഫാര്‍, അല്‍വുസ്ത ഗവര്‍ണറേറ്റുകളില്‍ ചുഴലിക്കാറ്റിന്റെ നേരിട്ടുള്ള ആഘാതം അനുഭവപ്പെടും എന്നാണ് മുന്നറിപ്പ്.

ദോഫാര്‍ ഗവര്‍ണ്ണറേറ്റില്‍ പൂര്‍ണ്ണമായും അല്‍വുസ്ത ഗവര്‍ണറേറ്റിലെ അല്‍ ജസാര്‍ വിലായത്തിലും ആണ് നാളെയും മറ്റന്നാളും പൊതു അവധി പ്രഖ്യാപിച്ചിരിക്കുന്നത്. പൊതു സ്വകാര്യമേഖലകള്‍ക്ക് ഒരു പോലെ അവധി ബാധകമായിരിക്കും. ചുഴലിക്കാറ്റിന്റെ പ്രത്യാഘാതങ്ങളെ നേരിടുന്നതിനുള്ള തയ്യാറെടുപ്പിലാണ് ഒമാന്‍ ഭരണകൂടം. നിലവില്‍ ഒമാന്‍ തീരത്തുനിന്നും നാനൂറ് കിലോമീറ്റര്‍ അകലെയാണ് ചുഴലിക്കാറ്റ്. നാളെയും മറ്റന്നാളും ആയിരിക്കും കാറ്റിന്റെ പ്രത്യാഘാതങ്ങള്‍ ഒമാനില്‍ അനുഭവപ്പെടുക. ശക്തമായ മഴയ്‌ക്കൊപ്പം കാറ്റും വീശും എന്നാണ് മുന്നറിയിപ്പ്.

ചുഴലിക്കാറ്റ് ദോഷകരമായി ബാധിക്കാന്‍ സാധ്യതയുള്ള സലാലയുടെ തീരപ്രദേശങ്ങളില്‍ നിന്നടക്കം ആളുകളെ മാറ്റിപ്പാര്‍പ്പിക്കുകയാണ് ഒമാന്‍ ദുരന്തനിവാരണ ദേശീയ സമിതി. സലാല തുറമുഖം അടച്ചു. ആരോഗ്യമന്ത്രാലയം ഇരുപത്തിനാല് മണിക്കൂറും പ്രവര്‍ത്തിക്കുന്ന കോള്‍ സെന്റര്‍ തുറന്നിട്ടുണ്ട്. പൊതുജനങ്ങള്‍ ജാഗ്രത പുലര്‍ത്തണം എന്നും താഴ്‌വാരങ്ങളിലും മലവെള്ളപ്പാച്ചില്‍ ഉണ്ടാകാന്‍ സാധ്യതയുള്ള പ്രദേശങ്ങളിലും പോകരുതെന്നും ദുരന്തനിവാരണ സിമിത മുന്നറിയിപ്പ് നല്‍കി. ചൊവ്വാഴ്ച ഉച്ചയോട് കൂടി സലാലയ്ക്കും യെമനിലെ അല്‍ ഗെയ്ദക്കും ഇടയില്‍ കാറ്റ് തീരം തൊടും എന്നാണ് ഇന്ത്യന്‍ കാലാവസഥാ നിരീക്ഷണ കേന്ദ്രം മുന്നറിയിപ്പ് നല്‍കിയിരിക്കുന്നത്.

അറബിക്കടലില്‍ രൂപമെടുത്ത തേജ് ചുഴലിക്കാറ്റ് യുഎഇയില്‍ മഴയ്ക്ക് കാരണാകുമെന്ന് ദേശീയ കാലാവസ്ഥാ കേന്ദ്രം. അടുത്ത രണ്ട് ദിവസത്തേക്കാണ് മഴയ്ക്ക് സാധ്യത. സ്ഥിതിഗതികള്‍ നിരീക്ഷിച്ച് വരികയാണെന്നും ദേശീയകാലാവാസ്ഥാ കേന്ദ്രം അറിയിച്ചു.

അറബിക്കടലില്‍ രൂപമെടുത്ത തേജ് ചുഴലിക്കാറ്റ് നിലവില്‍ ക്യാറ്റഗറി രണ്ട് ചുഴലിക്കാറ്റാണെന്നും 165-മുതല്‍ 175 വരെ കിലോമീറ്റര്‍ വേഗതയുണ്ടെന്നും യുഎഇ ദേശീയകാലാവസ്ഥാ കേന്ദ്രം അറിയിച്ചു. അടുത്ത ഇരുപത്തിനാല് മണിക്കൂറുകള്‍ക്കുള്ളില്‍ കാറ്റിന്റെ വേഗത മണിക്കൂറില്‍ 190 കിലോമീറ്റര്‍ വരെ വര്‍ദ്ധിച്ച് ക്യാറ്റഗറി മൂന്ന് ചുഴലിക്കാറ്റായി മാറും. തേജ് ചുഴലിക്കാറ്റ് യുഎഇയെ നേരിട്ട് ബാധിക്കില്ല.പക്ഷെ അറബിക്കടലില്‍ നിന്നുള്ള ഈര്‍പ്പം, രാജ്യത്തിന്റെ കഴിക്കന്‍ മേഖലയിലേക്കും തെക്കന്‍ ഭാഗത്തേക്കും എത്തും. ഇത് മേഘങ്ങള്‍ രൂപപ്പെടുന്നതിനും മഴ അനുഭവപ്പെടുന്നതിനും കാരണമാകും എന്നും കാലാവസ്ഥാ കേന്ദ്രം അറിയിച്ചു.

ചുഴലിക്കാറ്റുമായി ബന്ധപ്പെട്ട സാഹചര്യം സൂക്ഷമമായി നിരീക്ഷിച്ച് വരികയാണെന്നും കാലവസ്ഥാ റിപ്പോര്‍ട്ടുകള്‍ ശ്രദ്ധിക്കണം എന്നും കിംവദന്തികള്‍ പ്രചരിപ്പിക്കരുതെന്നും ദേശീയകാലാവസ്ഥാ കേന്ദ്രം അറിയിച്ചു. യുഎഇയില്‍ കഴിഞ്ഞ ഏതാനും ദിവസങ്ങളായി വിവിധയിടങ്ങളില്‍ മഴ അനുഭവപ്പെടുന്നുണ്ട്. ഇന്നലെ റാസല്‍ഖൈമ അടക്കം വിവിധ പ്രദേശങ്ങളില്‍ ശക്തമായ മഴ അനുഭവപ്പെട്ടിരുന്നു.
…