ഒരു വര്‍ഷം മൂവായിരം കുട്ടികള്‍ക്ക് സൗജന്യ ചികിത്സ നല്‍കുന്ന പദ്ധതി പ്രഖ്യാപിച്ച് ദുബൈ ആരോഗ്യ വകുപ്പ്. 50 ദശലക്ഷം ദിര്‍ഹം ഇതിനായി ചെലവഴിക്കും. അല്‍ ജലീല ചില്‍ഡ്രല്‍സ് ആശുപത്രിയിലാണ് ചികിത്സ നല്‍കുക.
………………………..
സാമ്പത്തികമായി പിന്നോക്കം നില്‍ക്കുന്ന കുടുംബങ്ങളിലെ കുട്ടികള്‍ക്കാണ് സൗജന്യ ചികിത്സ നല്‍കുക. ഇതിനായി അല്‍ ജലീല ഫൗണ്ടേഷന്‍ ചൈല്‍ഡ് ഫണ്ട് എന്ന പേരില്‍ സംരംഭം ആരംഭിച്ചെന്ന് ദുബൈ ആരോഗ്യ വകുപ്പ് അറിയിച്ചു. ഓരോ വര്‍ഷവും മൂവായിരം കുട്ടികള്‍ക്ക് 50 ദശലക്ഷം ദിര്‍ഹത്തിന്റെ ചികിത്സയാണ് ലഭ്യമാക്കുക. നിര്‍ദ്ധനരായ കുട്ടികള്‍ക്ക് ജീവിതത്തിലേയ്ക്ക് മടങ്ങിവരാന്‍ ആവശ്യമായ എല്ലാ സഹായങ്ങളും ലഭ്യമാക്കുമെന്ന് അല്‍ ജലീല ഫൗണ്ടേഷന്‍ ഡയറക്ടര്‍ ഡോ. രാജാ ഈസ സലേ അല്‍ ഗുര്‍ഗ് അറിയിച്ചു. അര്‍ബുദ ബാധിതര്‍, ഹൃദയസംബന്ധമായ അസുഖങ്ങള്‍, മറ്റ് വിട്ടുമാറാത്ത രോഗമുള്ളവര്‍ ഉള്‍പ്പെടെ 8600ല്‍ അധികം രോഗികള്‍ക്ക് ഫൗണ്ടേഷന്‍ ഇതുവരെ ചികിത്സ ലഭ്യമാക്കിയിട്ടുണ്ട്. ആരോഗ്യ വിഭാഗത്തിലെ മികവിനായി പ്രധാന പങ്കുവഹിക്കുന്ന എല്ലാവര്‍ക്കും നന്ദി അറിയിക്കുന്നുവെന്ന് ദുബൈ ഹെല്‍ത്ത് ബോര്‍ഡ് ഡയറക്ടര്‍മാരുടെ ചെയര്‍മാന്‍ ഷെയ്ഖ് മന്‍സൂര്‍ ബിന്‍ മുഹമ്മദ് ബിന്‍ റാഷിദ് അല്‍ മക്തൂം അറിയിച്ചു. മുഹമ്മദ് ബിന്‍ റാഷിദ് അല്‍ മക്തൂം ഫൗണ്ടേഷന്‍, ഔഖാഫ് ദുബൈ, തറാഹൂം, അല്‍ ബത്ത ഹോള്‍ഡിങ് എന്നിവരുടെ സഹകരണത്തോടെയാണ് പുതിയ സംരംഭത്തിന്റെ പ്രവര്‍ത്തനം. കുട്ടികള്‍ക്ക് ആവശ്യമായ പരിചരണം ഉറപ്പാക്കുകയും സാധാരണ ജീവിതത്തിലേയ്ക്ക് തിരികെ കൊണ്ടുവരാന്‍ സാധ്യമായതെല്ലാം ചെയ്യുകയാണ് ചൈല്‍ഡ് ഫണ്ടിന്റെ ലക്ഷ്യമെന്നും ഷെയ്ഖ് മന്‍സൂര്‍ പറഞ്ഞു. അല്‍ ജലീല ചില്‍ഡ്രന്‍സ് ആശുപത്രിയില്‍ സന്ദര്‍ശനം നടത്തിയ ഷെയ്ഖ് മന്‍സൂര്‍ ചികിത്സയിലിരിക്കുന്ന കുട്ടികളെ കണ്ട് ആശയ വിനിമയം നടത്തുകയും ചെയ്തു.

പ്രശ്‌നങ്ങള്‍ പരിഹരിച്ച് പ്രവര്‍ത്തനം പുനരാരംഭിക്കുന്നതിന് ഗോഫസ്റ്റിന് തൊണ്ണൂറ് ദിവസം കൂടി സമയം അനുവദിച്ച് ഇന്ത്യന്‍ കമ്പനി നിയമ ട്രിബ്യൂണല്‍. അടുത്ത മൂന്ന് മാസത്തേക്കുള്ള പ്രവര്‍ത്തന പദ്ധതിയും ഗോഫസ്റ്റ് എന്‍.സി.എല്‍.ടിക്ക് സമര്‍പ്പിക്കണം.സാമ്പത്തികപ്രതിസന്ധിയെ തുടര്‍ന്ന് കഴിഞ്ഞ മെയില്‍ സര്‍വീസ് നിര്‍ത്തിയ ഗോഫസ്റ്റ് തിരികെ വരാന്‍ പലവിധ ശ്രമങ്ങള്‍ നടത്തിയെങ്കിലും ഫലവത്തായില്ല. സര്‍വീസ് മുടങ്ങി ആറ് മാസങ്ങള്‍ പിന്നിട്ടിട്ടും പ്രശ്‌നപരിഹാരം കാണാന്‍ കഴിയാത്ത സാഹചര്യത്തില്‍ ആണ് മൂന്ന് മാസങ്ങള്‍കൂടി ദേശീയകമ്പനി നിയമ ട്രിബ്യൂണല്‍ അനുവദിച്ചിരിക്കുന്നത്. ഫെബ്രുവരി നാല് വരെയാണ് സമയം അനുവദിച്ചിരിക്കുന്നത്. 6500 കോടി രൂപയോളം ആണ് ഗോഫസ്റ്റിന്റെ കടം.

ഏതാനും വിമാനങ്ങളുമായി സര്‍വീസ് പുനരാരംഭിക്കുന്നതിനുള്ള തയ്യാറെടുപ്പുകളുമായി മുന്നോട് പോയ ഗോഫസ്റ്റിന് വിമാനങ്ങള്‍ വാടകയ്ക്ക് നല്‍കിയ കമ്പനികള്‍ നല്‍കിയ കേസുകള്‍ ആണ് തടസ്സമായത്. പിന്നാലെ പൈലറ്റും ക്യാബിന്‍ ക്രൂവും അടക്കമുള്ള വിമാനജീവനക്കാര്‍ മറ്റ് എയര്‍ലൈനുകളിലേക്ക് ചേക്കേറി. എയര്‍ലൈന്‍ ഏറ്റെടുക്കുന്നതിന് നവീന്‍ ജിന്‍ഡാലിന്റെ ജിന്‍ഡാല്‍ ഗ്രൂപ്പ് താത്പര്യം പ്രകടപ്പിച്ച് രംഗത്ത് എത്തിയിരുന്നുവെങ്കില്‍ പിന്നീട് പിന്‍മാറി.

മലേഷ്യന്‍ എയര്‍ലൈന്‍സും ഗോഫസ്റ്റ് ഏറ്റെടുക്കാന്‍ ഒരുങ്ങുന്നുവെന്ന റിപ്പോര്‍ട്ടുകള്‍ പുറത്ത് വന്നെങ്കിലും തുടര്‍നടപടികള്‍ ഉണ്ടായില്ല.ഒരു മികച്ച കമ്പനി ഇപ്പോഴും എയര്‍ലൈന്‍ ഏറ്റെടുക്കുന്നതിനായി താത്പര്യം പ്രകടിപ്പിച്ച് രംഗത്തുണ്ടെന്നാണ് മാനേജ്‌മെന്റ് വ്യക്തമാക്കുന്നത്. മൂന്ന് മാസങ്ങള്‍ക്കുള്ളില്‍ ഗോഫസ്റ്റ് പ്രശ്‌നങ്ങള്‍ പരിഹരിച്ച് തിരികെ വരുന്നില്ലെങ്കില്‍ പിന്നീട് അത് അസാധ്യമായി മാറും.

രാജ്യാന്തരവിപണിയില്‍ അസംസ്‌കൃത എണ്ണയ്ക്ക് വീണ്ടും വിലയിടിവ്. ബ്രെന്റ് ക്രൂഡ് വില വീണ്ടും എണ്‍പത് ഡോളറിന് താഴേയ്ക്ക് എത്തി.
ഉത്പാദനനിയന്ത്രണം സംബന്ധിച്ച് ഒപെക്കില്‍ സമവായം ഉണ്ടാകാത്തതാണ് വിലയിടിവിന് കാരണം.ഇസ്രയേല്‍-ഹാമാസ് യുദ്ധം ആരംഭിച്ചിതിന് ശേഷം നൂറ് ഡോളറിലേക്ക് വരെ ഉയര്‍ന്ന എണ്ണവില പിന്നീട് ഇടിയുകയായിരുന്നു. ഇന്ന് ബ്രെന്റ് ക്രൂഡിന്റെ വില എഴുപത്തിയൊന്‍പത് ഡോളറായും കുറഞ്ഞു.

വിപണിയിലേക്ക് കൂടുതല്‍ എണ്ണ എത്തുകയും ആവശ്യകത ആനുപാതികമായി വര്‍ദ്ധിക്കാത്തതും ആണ് വിപണിയിലെ അസ്ഥിരതയ്ക്ക് കാരണമായി വിദഗദ്ധര്‍ പറയുന്നത്. എണ്ണവിപണനവുമായി ബന്ധപ്പെട്ട 2024-ലേക്കുള്ള നയരൂപീകരണത്തിനായി ഈ മാസം മുപ്പതിന് യോഗം ചേരാനുള്ള തയ്യാറെടുപ്പിലാണ് ഒപെക്പ്ലസ് രാജ്യങ്ങള്‍. അടുത്ത വര്‍ഷം ആദ്യ പാദത്തിലും നിലവിലെ വിതരണനിയന്ത്രണം തുടരുന്നതിനാണ് സൗദി അറേബ്യയുടെയും റഷ്യയുടെയും തീരുമാനം. എന്നാല്‍ ഒപെക് പ്ലസ് സഖ്യത്തിലെ മുഴുവന്‍ അംഗങ്ങള്‍ക്കും വിതരണനിയന്ത്രണം തുടരുന്നതിനോട് അനുകൂല നിലപാടല്ല.

അഫ്രിക്കന്‍ രാജ്യങ്ങള്‍ ആണ് വിയോജിപ്പ് പ്രകടിപ്പിക്കുന്നത്. എന്നാല്‍ മുഴുവന്‍ അംഗരാജ്യങ്ങളും വിതരണനിയന്ത്രണം തുടരുന്നതിനോട് യോജിക്കും എന്നാണ് ഒപെക് നേതൃത്വം വ്യക്തമാക്കുന്നത്. സമായമുണ്ടാക്കുന്നതിനുള്ള ചര്‍ച്ചകള്‍ തുടരുകയാണ്.