ദുബൈ ആര്‍ടിഎയുടെ നോല്‍ കാര്‍ഡുകളുടെ കുറഞ്ഞ റീചാര്‍ജിംഗ് തുക 20 ദിര്‍ഹമായി പുതുക്കി നിശ്ചയിച്ചു. നേരത്തെ കുറഞ്ഞ റീചാര്‍ജിംഗ് തുക അഞ്ച് ദിര്‍ഹമായിരുന്നു. ജനുവരി 15 മുതല്‍ പുതുക്കിയ നിരക്ക് പ്രാബല്യത്തില്‍ വരും.ദുബൈ റോഡ്‌സ് ആന്റ് ട്രാന്‍സ്‌പോര്‍ട്ട് അഥോരിറ്റിയുടെ സേവനങ്ങള്‍ക്കായാണ് നോല്‍ കാര്‍ഡുകള്‍ ഉപയോഗിക്കുന്നത്. ഇനി മുതല്‍ നോല്‍ കാര്‍ഡുകള്‍ റീ ചാര്‍ജ് ചെയ്യുന്നതിന് 20 ദിര്‍ഹമായിരിക്കും കുറഞ്ഞ തുക. നേരത്തെ അഞ്ച് ദിര്‍ഹവും, പത്ത് ദിര്‍ഹവും ഉപയോഗിച്ച് റീചാര്‍ജ് ചെയ്യാന്‍ കഴിഞ്ഞിരുന്നു.

പുതുക്കിയ നിരക്ക് പ്രകാരം കുറഞ്ഞ റീചാര്‍ജിംഗ് തുക 20 ദിര്‍ഹമായി നിശ്ചയിച്ചു. ജനുവരി 15 മുതല്‍ നോല്‍ കാര്‍ഡ് ഉപയോക്താക്കള്‍ക്ക് കുറഞ്ഞത് 20 ദിര്‍ഹം ഉപയോഗിച്ച് മാത്രമേ റീ ചാര്‍ജ് ചെയ്യാന്‍ കഴിയു. ദുബൈ മെട്രോ, ട്രാം, ബസ്, അബ്ര, ഫെറി, എന്നിവിടങ്ങളിലാണ് ആര്‍ടിഎയുടെ പ്രീപെയ്ഡ് നോല്‍ കാര്‍ഡുകള്‍ ഉപയോഗിക്കുന്നത്. ഇതിനൊപ്പം ദുബൈയില്‍ ടാക്‌സി പാര്‍ക്കിംഗ് ഉള്‍പ്പെടെ രണ്ടായിരത്തിലധികം സേവനങ്ങള്‍ക്കും നോല്‍ കാര്‍ഡ് ഉപയോഗിക്കാന്‍ കഴിയും. നാല് തരത്തിലുള്ള നോല്‍ കാര്‍ഡുകളാണ് ആര്‍ടിഎ നല്‍കുന്നത്. ഇതിനൊപ്പെ സാംസങ് സ്മാര്‍ട്ട് ഫോണ്‍ ഉപയോഗിത്തുന്നവര്‍ക്ക് ഡിജിറ്റല്‍ നോല്‍ കാര്‍ഡ് ഉപയോഗിക്കാനും കഴിയും.

നോല്‍ കാര്‍ഡ് ഉപയോക്താക്കള്‍ക്ക് ആകര്‍ഷമായ നിരവധി ഓഫറുകളും ആര്‍ടിഎ പ്രഖ്യാപിച്ചിരുന്നു. ലോയല്‍റ്റി ആന്‍ഡ് റിവാര്‍ഡ് പ്രോഗ്രാമായ നോല്‍ പ്ലസ് വഴി പോയിന്റുകള്‍ നേടാന്‍ കഴിയും. ഇതിലൂടെ ഷോപ്പിംഗിനും മറ്റും പണം നല്‍കുന്ന പദ്ധതിയും നടപ്പിലാക്കുന്നുണ്ട്.

ജബല്‍അലിയിലെ പുതിയ ഹൈന്ദവക്ഷേത്രത്തില്‍ വിശ്വാസികളുടെ തിരക്ക് വര്‍ദ്ധിച്ചു. പുതുവര്‍ഷത്തിലെ ആദ്യദിനം മാത്രം നാല്‍പ്പതിനായിരത്തോളം വിശ്വാസികളെയാണ് ക്ഷേത്രം സ്വീകരിച്ചത്. വാരാന്ത്യങ്ങളിലും ജബലലി ക്ഷേത്രത്തിലേക്ക് സന്ദര്‍ശകര്‍ ഒഴുകുന്നുണ്ട്.
മുന്‍വര്‍ഷത്തെ അപേക്ഷിച്ച് ഭക്തരുടെ എണ്ണത്തില്‍ വന്‍ വര്‍ദ്ധനയാണ് ജബലലി ക്ഷേത്രത്തില്‍ രേഖപ്പെടുത്തിയിരിക്കുന്നത്.പുതുവത്സര ദിനത്തില്‍ മാത്രം പന്ത്രണ്ടായിരത്തോളം ഭക്തരാണ് അധികമായി എത്തിയത്.

മണിക്കുറില്‍ രണ്ടായിരം വരെ ഭക്തര്‍ ജനുവരി ഒന്നിന് ക്ഷേത്രത്തില്‍ എത്തി. സന്ദര്‍ശകരുടെ തിരക്ക് കൈകാര്യം ചെയ്യുന്നതിന് ആവശ്യമായ ക്രമീകരണങ്ങള്‍ ക്ഷേത്രത്തില്‍ ഒരുക്കിയിട്ടുണ്ട്. കുടുംബങ്ങള്‍ക്കും, വയോധികര്‍ക്കും,ഭിന്നശേഷിക്കാര്‍ക്കും,ഗര്‍ഭിണികള്‍ക്കും, കൈക്കുഞ്ഞുങ്ങളുമായി എത്തുന്ന അമ്മമാര്‍ക്കും എല്ലാം പ്രത്യേക പരിഗണന നല്‍കുന്നുണ്ട്. അവധി ദിവസങ്ങളില്‍ ആണ് ക്ഷേത്രത്തില്‍ തിരക്കേറുന്നതെന്ന് ജനറല്‍ മാനേജര്‍ മോഹന്‍ നരസിംഹമൂര്‍ത്തി പറഞ്ഞു. തിങ്കളാഴ്ച മുതല്‍ വെള്ളിയാഴ്ച വരെയുള്ള ദിവസങ്ങളില്‍ മൂവായിരത്തിനും നാലായിരത്തിനും ഇടയിലാണ് ഭക്തരുടെ എണ്ണം.

വാരാന്ത്യഅഴധി ദിവസങ്ങളില്‍ പന്ത്രണ്ടായിരം വരെയായി വിശ്വാസികളുടെ എണ്ണം വര്‍ദ്ധിക്കും. വലിയ തിരക്ക് അനുഭവപ്പെടുന്ന പൊതുഅവധി ദിനങ്ങളില്‍ പ്രത്യേക അര്‍ച്ചനയോ അഭിഷേകമോ ഉണ്ടാകില്ല. ദര്‍ശനം മാത്രമാണ് അനുവദിക്കുക. വിശ്വാസികളെകൂടാതെ വിനോദസഞ്ചാരികളും ജബലലി ക്ഷേത്രം സന്ദര്‍ശിക്കുന്നുണ്ട്. ബര്‍ദുബൈ ക്ഷേത്രം അടച്ചതോട് കൂടി ജബലലി ക്ഷേത്രത്തില്‍ വിശ്വാസികളുടെ തിരക്ക് വീണ്ടും വര്‍ദ്ധിക്കും.

യുഎഇയില്‍ പ്ലാസ്റ്റിക് നിരോധനം ലംഘിക്കുന്നവര്‍ക്ക് രണ്ടായിരം ദിര്‍ഹം വരെ പിഴശിക്ഷ. ഇരുനൂറ് ദിര്‍ഹം ആണ് ഏറ്റവും കുറഞ്ഞ പിഴ ശിക്ഷ. ജനുവരി ഒന്നിനാണ് ഒറ്റത്തവണ ഉപയോഗിക്കുന്ന പ്ലാസ്റ്റിക് ബാഗുകള്‍ക്ക് നിരോധനം പ്രാബല്യത്തില്‍ വന്നത്.ദുബൈ അടക്കം യുഎഇയുടെ മുഴുവന്‍ എമിറേറ്റുകളിലും ഒറ്റത്തവണ മാത്രം ഉപയോഗിക്കുന്ന പ്ലാസ്റ്റിക് ബാഗുകള്‍ക്ക് നിരോധനം നിലവില്‍ വന്നിട്ടുണ്ട്. ഒറ്റത്തവണ മാത്രം ഉപയോഗിക്കുന്ന പ്ലാസിറ്റിക് ബാഗുകള്‍ക്ക് നിരോധനം ഏര്‍പ്പെടുത്താനുള്ള യുഎഇ മന്ത്രിസഭാ തീരുമാനം ആണ് വിവിധ എമിറേറ്റുകളില്‍ പ്രാബല്യത്തില്‍ വന്നിരിക്കുന്നത്.

പ്ലാസ്റ്റിക് കവറുകള്‍ ആവശ്യമുള്ളവര്‍ക്ക് ഇരുപത്തിയഞ്ച് ഫില്‍സ് ഈടാക്കിയാണ് സൂപ്പര്‍മാര്‍ക്കറ്റുകളും ഹൈപ്പര്‍മാര്‍ക്കറ്റുകളും നല്‍കുന്നത്. യുഎഇ ഭരണകൂടം നിശ്ചയിച്ച നിരക്കാണ് ഇരുപത്തിയഞ്ച് ഫില്‍സ്. ഒറ്റത്തവണ ഉപയോഗിക്കുന്ന പ്ലാസ്റ്റിക് ബാഗുകള്‍ക്കുള്ള നിരോധനം ലംഘിക്കുന്നവര്‍ക്ക് ഇരുനൂറ് ദിര്‍ഹം ആണ് പിഴശിക്ഷ. കുറ്റം ആവര്‍ത്തിച്ചാല്‍ പിഴ ഇരട്ടിയാകും. പരമാവധി രണ്ടായിരം ദിര്‍ഹം വരെയാണ് പിഴശിക്ഷ ലഭിക്കുക. ഘട്ടംഘട്ടമായി പ്ലാസ്റ്റികിന്റെ ഉപയോഗം ഒഴിവാക്കുന്നതിനാണ് യുഎഇ ഭരണകൂടം തീരുമാനിച്ചിരിക്കുന്നത്. ഒറ്റതവണ മാത്രം ഉപയോഗിക്കുന്ന പ്ലാസ്റ്റിക്ക് വസ്തുക്കള്‍ക്ക് 2026 ജനുവരി ഒന്നിന് നിരോധനം ബാധകമാകും. പ്ലാസ്റ്റിക് കപ്പുകള്‍, പ്ലേറ്റുകള്‍, കണ്ടയ്‌നറുകള്‍,സ്പൂണ്‍ ഫോര്‍ക്ക്,സ്‌ട്രോ തുടങ്ങിയവയാണ് 2026-ല്‍ നിരോധിക്കപ്പെടുക.

യുഎഇയില്‍ സ്വദേശിവത്കരണം രണ്ട് വര്‍ഷത്തിനുള്ളില്‍ നടപ്പിലാക്കിയത് 13508 സ്വകാര്യ സ്ഥാപനങ്ങളിലെന്ന് മാനവവിഭശേഷി സ്വദേശിവത്കരണ മന്ത്രാലയം. നാഫിസ് പദ്ധതി വഴിയാണ് ഇമറാത്തികള്‍ക്ക് നിയമം നല്‍കിയിരിക്കുന്നത്. 2023 ല്‍ മാത്രം 6491 സ്വകാര്യ സ്ഥാപനങ്ങളാണ് സ്വദേശിവത്കരണത്തിന്റെ ഭാഗമായത്. അമ്പതോ അതില്‍ കൂടുതലോ ജീവനക്കാരുടെ സ്വകാര്യ സ്ഥാപനങ്ങളില്‍ രണ്ട് ശതമാനം ഇമറാത്തികള്‍ക്ക് തൊഴില്‍ നല്‍കണമെന്നായിരുന്നു യുഎഇ മാനവവിഭവശേഷി സ്വദേശിവത്കരണ മന്ത്രാലയത്തിന്റെ തീരുമാനം. 2022 ല്‍ 7,017 ഇമറാത്തികള്‍ക്കും 2023 ല്‍ 6491 ഇമറാത്തികള്‍ക്കുമാണ് സ്വകാര്യ സ്ഥാപനങ്ങളില്‍ നിയമനം നല്‍കിയത്.

നാഫിസ് പ്രോഗ്രാമിലൂടെയാണ് നിയമനം നടപ്പിലാക്കിയത്. 61,000 ല്‍ ധികം ഇമറാത്തികല്‍ നാഫിസ് പദ്ധതി വഴി ആനുകൂല്യം നേടുന്നതായും മന്ത്രാലയം അറിയിച്ചു. 2023 ല്‍ സ്വകാര്യ മേഖലയില്‍ ജോലി ചെയ്യുന്ന ഇമറാത്തികളുടെ എണ്ണം 82,000 ആയി വര്‍ദ്ധിപ്പിക്കുയായിരുന്നു ലക്ഷ്യം. 79000 ഇമറാത്തികളാണ് കഴിഞ്ഞ വര്‍ഷം സ്വകാര്യ മേഖലയില്‍ ജോലി നേടിയത്. 2024 മുതല്‍ സ്വദേശിവത്കണം ചെറുകിട സ്ഥാപനങ്ങളിലേക്കും വ്യാപിച്ചിരിക്കുയാണ്. 20 മുതല്‍ 49 വരെ ജീവനക്കാരുള്ള കമ്പനികള്‍ 2024-ല്‍ ഒരു സ്വദേശിയേയും 2025-ല്‍ രണ്ടാമത് ഒരു സ്വദേശിയേയും നിയമിക്കണം. സ്വദേശി നിയമനം നടപ്പിലാക്കാത്ത കമ്പനികള്‍ക്കെതിരെ കടുത്ത നടപടികാളാണ് മന്ത്രാലയം സ്വീകരിക്കുന്നത്.

നേരത്തെ വ്യാജ സ്വദേശിവത്കരണം നടത്തിയ സ്ഥാപനങ്ങള്‍ക്കെതിരെയും നടപടി സ്വീകരിച്ചിരുന്നു. 2025 നുള്ളില്‍ പുതിയ അനുപാതം അനുസരിച്ച് സ്വദേശിവത്കരണം നടപ്പിലാക്കാത്ത കമ്പനികള്‍ക്ക് 96,000 ദിര്‍ഹം പിഴ ഈടാക്കും. ഇതിനുപുറമേ കൃത്യമായി നടപ്പിലാക്കുന്ന കമ്പനികള്‍ക്ക് നിരവധി ആനുകൂല്യങ്ങളും പ്രഖ്യാപിച്ചിട്ടുണ്ട്. സ്വദേശിവത്കരണത്തന് ഇമറാത്തികളെ പ്രോത്സാഹിപ്പിക്കുന്നതായി നാഫിസ് പദ്ധതി വഴി ഗൈഡുകള്‍ പ്രസിദ്ധീകരിച്ചിരുന്നു. വൈവിധ്യമുള്ള തൊഴില്‍ മേഖലകളില്‍ ജോലി ആഗ്രഹിക്കുന്നവര്‍ക്കും മറ്റ് തൊഴില്‍ അന്വേഷകര്‍ക്കും നാഫിസില്‍ രജിസ്റ്റര്‍ ചെയ്യാന്‍ സാധിക്കും.