ഷാര്‍ജ കല്‍ബയില്‍ മഴക്കെടുതിയെ തുടര്‍ന്ന് ആയിരത്തിലധികം പേരെ മാറ്റിപ്പാര്‍പ്പിച്ചെന്ന് പൊലീസ് അറിയിച്ചു. നൂറ്റിയമ്പതിലധികം കുടുംബങ്ങളെ ആണ് കഴിഞ്ഞ ദിവസങ്ങളില്‍ പെയ്ത കനത്ത മഴ ബാധിച്ചത്. വെള്ളംകയറി കല്‍ബയില്‍ നിരവധി വീടുകള്‍ക്കും വീട്ടുപകരണങ്ങള്‍ക്കും നാശനഷ്ടങ്ങള്‍ സംഭവിച്ചിട്ടുണ്ട്.ബുധനാഴ്ച വരെ തകര്‍ത്ത പെയ്ത മഴ ഷാര്‍ജയുടെ കിഴക്കന്‍ നഗരമായ കല്‍ബയില്‍ കനത്ത ദുരിതം ആണ് വിതച്ചത്. വെള്ളം ഉയര്‍ന്നതിനെ തുടര്‍ന്ന് 1100 പേരെ മാറ്റിപ്പാര്‍പ്പിച്ചെന്ന് ഷാര്‍ജ പൊലീസ് അറിയിച്ചു. 173 കുടുംബങ്ങളെ ആണ് കനത്ത മഴ ബാധിച്ചത്. മൂന്ന് സ്‌കൂളുകളില്‍ തയ്യാറാക്കിയ താത്കാലിക കേന്ദ്രങ്ങളിലേക്കാണ് ഇവരെ മാറ്റിപ്പാര്‍പ്പിച്ചത്.

കനത്തെ മഴ തുടര്‍ന്ന് ഉയര്‍ന്ന വെള്ളം ഇറങ്ങിയതിന് ശേഷം മാറ്റിപ്പാര്‍പ്പിച്ചവര്‍ വീടുകളിലേക്ക് തിരികെ എത്തിത്തുടങ്ങിയെന്നും പൊലീസ് അറിയിച്ചു. റോഡുകള്‍ വീണ്ടും തുറന്നതായും വെള്ളക്കെട്ടുകള്‍ ഭുരിഭാഗവും നീക്കം ചെയ്തതായും പൊലീസ് അറിയിച്ചു. എന്നാല്‍ വീടുകളിലും കടകളിലും വെള്ളം കയറി വലിയ നാശനഷ്ടങ്ങള്‍ ഉണ്ടായിട്ടുണ്ട്. വെള്ളം കയറി പലരുടെയും വീടുകളിലെ ഗൃഹോപകരണങ്ങള്‍ക്ക് കേടുപാടുകള്‍ സംഭവിച്ചു.

സോഫകള്‍ക്കും, കാര്‍പ്പെറ്റുകള്‍ക്കും, കപ്‌ബോര്‍ഡുകള്‍ക്കും കേഡുപാടുകള്‍ സംഭവിച്ചെന്ന് വീടുകളില്‍ തിരികെ എത്തിയവര്‍ പറഞ്ഞു. വാഷിംഗ് മെഷീന്‍, റെഫ്രിജറേറ്റര്‍ എന്നിവയില്‍ വെള്ളം കയറി. രണ്ട് ദിവസത്തോളം പലവീടുകളിലും വെള്ളം നിന്നു. മൂന്ന് ദിവസത്തോളം ആണ് കല്‍ബയില്‍ വീടുകളില്‍ നിന്നും മാറ്റിപ്പാര്‍പ്പിച്ചവര്‍ സ്‌കൂളുകളിലെ താത്കാലിക കേന്ദ്രങ്ങളില്‍ കഴിഞ്ഞത്.

സ്വതന്ത്ര പലസ്തീന്‍ രാഷ്ട്രത്തെ അംഗീകരിച്ചാല്‍ അത് ഭീകവാരത്തിനുള്ള അംഗീകാരമായിരിക്കും എന്ന് ഇസ്രയേല്‍ പ്രധാനമന്ത്രി ബെന്യാമിന്‍ നെതന്യാഹു. പലസ്തീന്‍ രാഷ്ട്രത്തിന് അംഗീകാരം നല്‍കാനുള്ള ഏത് നീക്കത്തേയും ഇസ്രയേല്‍ എതിര്‍ക്കുമെന്നും നെതന്യാഹു പറഞ്ഞു. അതെസമയം ഗാസ അതിര്‍ത്തിക്ക് സമീപം പലസ്തീനികളെ പാര്‍പ്പിക്കുന്നതിന് ഈജിപ്ത് സൗകര്യം ഒരുക്കുന്നതായും റിപ്പോര്‍ട്ടുകള്‍ ഉണ്ട്.

്എക്‌സില്‍ ഹിബ്രുവില്‍ എഴുതിയ കുറിപ്പില്‍ ആണ് പലസ്തീന്‍ രാഷ്ട്രത്തിന് ഏകപക്ഷിയമായി അംഗീകാരം നല്‍കാനുള്ള ഏത് നീക്കത്തേയും എതിര്‍ക്കുമെന്ന് ഇസ്രയേല്‍ പ്രധാനമന്ത്രി ബെന്യാമിന്‍ നെതന്യാഹു വ്യക്തമാക്കിയത്.പലസ്തീന്‍ പ്രശ്‌നത്തിന് പരിഹാരം കാണുന്നതിന് അമേരിക്കയും അറബ് രാജ്യങ്ങളും ചേര്‍ന്ന് പദ്ധതി തയ്യാറാക്കുന്നുവെന്ന് ദി വാഷിംഗ്ടണ്‍ പോസ്റ്റ് റിപ്പോര്‍ട്ട് ചെയ്തിരുന്നു. സ്വതന്ത്രപലസ്തീന്‍ രാഷ്ട്രത്തിന് അംഗീകാരം നല്‍കുന്നത് അടക്കം പ്രശ്‌നത്തിന് ശാശ്വതപരിഹാരം കാണുന്നതിനാണ് അമേരിക്കുയും അറബ് രാജ്യങ്ങളും ചേര്‍ന്ന് പദ്ധതി തയ്യാറാക്കുന്നതെന്നും പത്രം റിപ്പോര്‍ട്ട് ചെയ്തിരുന്നു.

ഇതിനോടാണ് ഇസ്രയേല്‍ പ്രധാനമന്ത്രി ബെന്യാമിന്‍ നെതന്യാഹുവിന്റെ പ്രതികരണം. പലസ്തീന്‍ രാഷ്ട്രത്തിന് അംഗീകാരം നല്‍കുന്നത് മുന്‍പ് കണ്ടിട്ടില്ലാത്ത വിധത്തിലുള്ള ഭീകരതയ്ക്കുള്ള പ്രോത്സാഹനമാകും എന്നും നെതന്യാഹു പറഞ്ഞു. ആറ് ആഴ്ച്ച നീണ്ടുനില്‍ക്കുന്ന വെടിനിര്‍ത്തലോട് കൂടി സമാധാനപദ്ധതി നടപ്പാക്കിത്തുടങ്ങുന്നതിനാണ് അമേരിക്കയുടെയും അറബ് രാഷ്ട്രങ്ങളുടെയും നീക്കം എന്നും വാഷിംഗ്ടണ്‍ റിപ്പോര്‍ട്ടില്‍ ഉണ്ട്. റമദാന് മുന്നോടിയായി മാര്‍ച്ച് പത്തിന് എങ്കിലും സമാധാന കരാറിലേക്ക് എത്തിക്കുന്നതിനാണ് ശ്രമം. പലസ്തീന്‍ രാഷ്ട്രരുപീകരണത്തിനുള്ള സമയക്രമം അടക്കം കരാറില്‍ ഉണ്ടാകും എന്നും റിപ്പോര്‍ട്ടില്‍ പറയുന്നു.

ഇതിനിടെ ഗാസ അതിര്‍ത്തിയില്‍ ഈജിപ്ത് പലസ്തീന്‍ അഭയാര്‍ത്ഥികള്‍ക്കായി സ്ഥലമൊരുക്കുന്നുവെന്ന് രാജ്യാന്തര വാര്‍ത്താ ഏജന്‍സിയായ റോയിട്ടേഴ് റിപ്പോര്‍ട്ട് ചെയ്തു. റഫായില്‍ ഇസ്രയേല്‍ കരയുദ്ധം ആരംഭിച്ചാല്‍ ഉണ്ടാകുന്ന വന്‍ മാനുഷികദുരന്തം പരിഗണിച്ചാണ് ഈജിപ്തിന്റെ ഈ നീക്കം എന്നും റോയിട്ടേഴ്‌സ് റിപ്പോര്‍ട്ട് ചെയ്തു.

ഷാര്‍ജ കല്‍ബയില്‍ തകര്‍ത്ത് പെയ്ത മഴ ജനങ്ങള്‍ക്ക് സമ്മാനിച്ചത് കനത്ത ദുരിതം. അറുപതിലധികം കുടുംബങ്ങളെ ആണ് മാറ്റിപ്പാര്‍പ്പിച്ചത്. നിരവധി വാണിജ്യ-വ്യാപാര സ്ഥാപനങ്ങളുടെയും പ്രവര്‍ത്തനത്തെ വെള്ളപ്പൊക്കം ബാധിച്ചു.രാജ്യത്തിന്റെ മറ്റ് ഭാഗങ്ങളില്‍ മഴ ശമിച്ചപ്പോള്‍ കല്‍ബയുടെ വിവിധ ഭാഗങ്ങളില്‍ ഇന്നലേയും ശക്തമായ മഴയാണ് അനുഭവപ്പെട്ടത്. കഴിഞ്ഞ നാല് ദിവസങ്ങളില്‍ പെയ്ത കനത്ത മഴ പലയിടത്തും പ്രളയസമാനസാഹചര്യം ആണ് സൃഷ്ടിച്ചത്.

കടകളിലും വാണിജ്യവ്യാപാര സ്ഥാപനങ്ങളിലും എല്ലാം വെള്ളം കയറി. അറുപത്തിയൊന്ന് കുടുംബങ്ങളെയാണ് കല്‍ബയില്‍ നിന്നും ഷാര്‍ജ ഹൗസിംഗ് ഡിപ്പാര്‍ട്ട്‌മെന്റ് മാറ്റിപ്പാര്‍പ്പിച്ചത്. അന്‍പ്പത്തിയാറ് കുടുംങ്ങള്‍ക്ക് കല്‍ബ നഗരത്തില്‍ തന്നെയും ശേഷിക്കുന്നവരെ ദിബ്ബ അല്‍ ഹിസന്‍, ഖോര്‍ഫക്കാന്‍ എന്നിവടങ്ങളിലേക്കാണ് മാറ്റിയത്. ആകെ 346 പേരെ പേരെ മാറ്റിപ്പാര്‍പ്പിച്ചിട്ടുണ്ട്. കഴിഞ്ഞ ദിവസം പെയ്ത കനത്ത മഴയെ തുടര്‍ന്ന് ഷാര്‍ജയുടെ കിഴക്കന്‍ പ്രദേശങ്ങളില്‍ നിന്നും എഴുനൂറിലധിരം കുടുംബങ്ങളെ മാറ്റിപ്പാര്‍പ്പിച്ചെന്ന് പൊലീസ് അറിയിച്ചു. മഴ ദുരിതം വിതച്ചവര്‍ക്ക് സഹായം എത്തിക്കുന്നതിന് പ്രവാസി സംഘടനകളും കൂട്ടായ്മകളും സജീവമായി രംഗത്തുണ്ട്.കനത്ത മഴയിലും വെള്ളപ്പൊക്കത്തിലും നിരവധി വീടുകള്‍ക്കും കേടുപാടുകള്‍ സംഭവിച്ചു.

ഷാര്‍ജ വ്യവസായ മേഖല പൂര്‍ണ്ണമായും തന്നെ വെള്ളപ്പൊക്കത്തില്‍ സ്തംഭിച്ചു. നിരവധി വാഹനങ്ങള്‍ക്കും കേടുപാടുകള്‍ സംഭവിച്ചിട്ടുണ്ട്. നഗരത്തില്‍ ഉയര്‍ന്ന വെള്ളം നീക്കുന്നതിന് കഠിനശ്രമങ്ങള്‍ ആണ് കല്‍ബ മുന്‍സിപ്പാലിറ്റിയുടെ നേതൃത്വതതില്‍ നടത്തുന്നത്. ഷാര്‍ജയിലെ മറ്റ് മുന്‍സിപ്പാലിറ്റികളും കല്‍ബയിലെ കെടുതികള്‍ നേരിടുന്നതിന് രംഗത്ത് ഉണ്ട്. വെള്ളം പമ്പ് ചെയ്ത് നീക്കുന്നതിന് ഷാര്‍ജ സിറ്റി മുന്‍സിപ്പാലിറ്റി അറുപതോളം ടാങ്കറുകളും ഉയര്‍ന്ന ശേഷിയുള്ള നിരവധി പമ്പുകളും കല്‍ബയില്‍ എത്തിച്ചിട്ടുണ്ട്.

ചൈനയുടെ ഡ്രാഗണ്‍ മാര്‍ട്ടിന് സമാനമായി ദുബൈയില്‍ ഭാരത് മാര്‍ട്ട് വരുന്നു. ഇന്ത്യന്‍ പ്രധാനമന്ത്രി നരേന്ദ്രമോദിയും യുഎഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തുമും ചേര്‍ന്ന് ഭാരത് മാര്‍ട്ടിന്റെ ശിലാസ്ഥാപനം നടത്തി. ഇരുപത്തിയേഴ് ലക്ഷം ചതുരശ്രമീറ്ററില്‍ ആണ് വന്‍ വാണിജ്യ കേന്ദ്രം നിര്‍മ്മിക്കുന്നത്.ദുബൈയില്‍ നടന്ന ലോകസര്‍ക്കാര്‍ ഉച്ചകോടിയോട് അനുബന്ധിച്ചാണ് പ്രധാനമന്ത്രി നരേന്ദ്രമോദിയും യുഎഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍മക്തുമും ചേര്‍ന്ന് ഭാരത് മാര്‍ട്ട് പദ്ധതിക്ക് തുടക്കമിട്ടത്.

2026-ല്‍ ഭാരത് മാര്‍ട്ടിന്റെ പ്രവര്‍ത്തനം ആരംഭിക്കും എന്നാണ് പ്രതീക്ഷിക്കുന്നത്.ജബല്‍അലി ഫ്രീ സോണലാണ് ഭാരത് മാര്‍ട്ട് ആരംഭിക്കുക. ഇന്ത്യന്‍ ഉത്പന്നങ്ങളെ ഒരു കുടക്കീഴില്‍ കൊണ്ടുവരികയും മികച്ച വിപണി കണ്ടെത്തുകയും ആണ് ഭാരത് മാര്‍ട്ടിന്റെ ലക്ഷ്യം. 1500 ഓളം ഷോപ്പുകള്‍ ഭാരത് മാര്‍ട്ടിലുണ്ടാകും. ഏഴ് ലക്ഷം ചതുരശ്രമീറ്ററില്‍ ആയിരിക്കും വെയര്‍ഹൗസ് സൗകര്യം.പദ്ധതിയുടെ ആദ്യഘട്ടം പതിമൂന്ന് ലക്ഷം ചതുരശ്രമീറ്ററിലാണ് നിര്‍മ്മിക്കുന്നത്. ഡി.പി വേള്‍ഡും ഇന്ത്യന്‍ വാണിജ്യമന്ത്രാലയവും ചേര്‍ന്നാണ് പദ്ധതി നടപ്പാക്കുക എന്നാണ് വിവരം. പദ്ധതിയുടെ അന്തിമ രൂപം ആയിട്ടില്ല. ഡി.പി വേള്‍ഡിനായിരിക്കും ഭാരത് മാര്‍ട്ടിന്റെ നടത്തിപ്പ് ചുമതല ്. ഇന്ത്യന്‍ ഉത്പ്പന്നങ്ങളുടെ സംഭരണം,ചില്ല-മൊത്ത വ്യാപാരം,പുനര്‍കയറ്റുമതി എന്നിവ എല്ലാം ഭാരത് മാര്‍ട്ട് എന്ന ഒറ്റകേന്ദ്രത്തില്‍ നിന്നും സാധിക്കും വിധത്തിലാണ് വിഭാവനം ചെയ്തിരിക്കുന്നത്. വലിയ യന്ത്രസാമഗ്രികള്‍ മുതല്‍ ഭക്ഷ്യവസ്തുക്കള്‍ വരെ വിവിധ തരം ഉത്പന്നങ്ങള്‍ സംഭരിക്കുകയും വിതരണം ചെയ്യുകയും ചെയ്യുന്ന കേന്ദ്രമായിരിക്കും ഭാരത് മാര്‍ട്ട്.

കയറ്റുമതിക്കാര്‍ക്ക് ദുബൈ കേന്ദ്രമായി രാജ്യാന്തര തലത്തില്‍ ഇന്ത്യന്‍ ഉത്പന്നങ്ങള്‍ക്ക് കൂടുതല്‍ വിപണികള്‍ കണ്ടെത്തുന്നതിനും ഭാരത് മാര്‍ട്ട് പ്രയോജനപ്പെടും. ഇന്ത്യന്‍ ഉത്പാദകര്‍ക്ക് കൂടുതല്‍ അവസരം തുറക്കുന്നതായിരിക്കും ഭാരത് മാര്‍ട്ട് എന്ന് ഡിപി വേള്‍ഡ് സി.ഇ.ഒ സുല്‍ത്താന്‍ അഹമ്മദ് ബിന്‍ സുലായേം പറഞ്ഞു. ഇന്ത്യന്‍ ചെറുകിട ഇടത്തരം വ്യവസായികള്‍ക്ക് പുതിയ വിപണികളിലേക്ക് തങ്ങളുടെ ഉത്പന്നങ്ങള്‍ കയറ്റുമതി ചെയ്യുന്നതിനുള്ള ഒരു പ്ലാറ്റ്‌ഫോം ആയി ഭാരത് മാര്‍ട്ട് മാറും എന്നും ഡിപി വേള്‍ഡ് വ്യക്തമാക്കുന്നുണ്ട്.

യുഎഇയില്‍ ഇത്തിഹാദിന്റെ പാസഞ്ചര്‍ ട്രെയിന്‍ എത്തുന്നതോടെ ടിക്കറ്റ് ബുക്ക് ചെയ്യാന്‍ നോല്‍ കാര്‍ഡ് ഉപയോഗിക്കാം. ദുബൈ റോഡ്‌സ് ആന്റ് ട്രാന്‍സ്‌പോര്‍ട്ട് അതോരിറ്റിയും ഇത്തിഹാദ് റെയിലും പദ്ധതിയ്ക്കായി കരാറില്‍ ഒപ്പുവെച്ചു. ദുബൈയില്‍ നടന്ന ലോക സര്‍ക്കാര്‍ ഉച്ചകോടിയിലാണ് തീരുമാനം.ഇത്തിഹാദ് റെയില്‍ രാജ്യത്ത് പാസഞ്ചര്‍ ട്രെയിന്‍ സര്‍വ്വീസ് ആരംഭിക്കുന്നതിനുള്ള പ്രവര്‍ത്തനങ്ങള്‍ പുരോഗമിക്കുകയാണ്. പാസഞ്ചര്‍ ട്രെയിന്‍ എത്തുന്നതോടെ ടിക്കറ്റ് ബുക്ക് ചെയ്യുന്നതിന് ആര്‍ടിഎഇയുടെ നോല്‍ കാര്‍ഡുകള്‍ ഉപയോഗിക്കാന്‍ കഴിയും.

ഇതിനായി യുഎഇയുടെ ദേശീയ റെയില്‍വേ കമ്പനിയായ ഇത്തിഹാദ് റെയിലും ദുബൈ റോഡ്‌സ് ആന്റ് ട്രാന്‍സ്‌പോര്‍ട്ട് അതോരിറ്റിയും തമ്മിലാണ് നിര്‍ണായക കരാറില്‍ ഏര്‍പ്പെട്ടത്. ദുബൈയില്‍ നടന്ന ലോക സര്‍ക്കാര്‍ ഉച്ചകോടിയിലാണ് ധാരണാ പത്രത്തില്‍ ഒപ്പുവെച്ചത്. ടിക്കറ്റ് ബുക്ക് ചെയ്യുന്നതും പണം നല്‍കുന്നതും നോല്‍ കാര്‍ഡുകള്‍ ഉപയോഗിച്ച് നടത്താന്‍ കഴിയും. എല്ലാ ജനങ്ങള്‍ക്കും സേവനം ഉപയോഗിക്കാന്‍ കഴിയുന്നതിനാണ് പുതിയ പദ്ധതി നടപ്പിലാക്കുന്നത്. നോല്‍ കാര്‍ഡുകള്‍ നിലവില്‍ ദുബൈയില്‍ പൊതുഗതാഗത സംവിധാനങ്ങള്‍ക്കു പുറമേ നിരവധി സേവനങ്ങള്‍ക്ക് ഉപയോഗിക്കാന്‍ കഴിയും.

യുഎഇയിലെ 11 നഗരങ്ങളെ ബന്ധിപ്പിച്ചായിരിക്കും ഇത്തിഹാദിന്റെ പാസഞ്ചര്‍ ട്രെയിന്‍ എത്തുന്നത്. അബുദബിയിലെ സില മുതല്‍ ഫുജൈറ വരെയാണ് സര്‍വ്വീസ്. രാജ്യത്ത് റെയില്‍വേ സ്റ്റേഷനുകളുടെ നിര്‍മ്മാണവും പുരോഗമിക്കുകയാണ്. 400 പേര്‍ക്ക് യാത്ര ചെയ്യാന്‍ കഴിയുന്ന ട്രെയിനായിരിക്കും സര്‍വ്വീസ് നടത്തുക എന്നും ഇത്തിഹാദ് റെയില്‍ പ്രഖ്യാപിച്ചിരുന്നു.

അബുദബിയിലെ ബാപ്‌സ് ഹിന്ദുക്ഷേത്രത്തില്‍ വിഗ്രഹപ്രതിഷ്ഠ നടത്തി. സ്വാമിനാരായണ്‍ മൂര്‍ത്തി വിഗ്രഹം ആണ് പ്രതിഷ്ഠിച്ചത്. വൈകിട്ട് പ്രധാനമന്ത്രി നരേന്ദ്രമോദി ക്ഷേത്രം വിശ്വാസികള്‍ക്ക് സമര്‍പ്പിക്കും.രാവിലെ ബാപ്‌സ് മുഖ്യപുരോഹിതനും ആത്മിയ ഗുരുവുമായ മഹന്ത് സ്വാമി മഹാരാജിന്റെ നേതൃത്വത്തില്‍ ആണ് അബുദബി ക്ഷേത്രത്തിന്റെ
വിഗ്രഹപ്രതിഷ്ഠാ ചടങ്ങുകള്‍ പൂര്‍ത്തിയാക്കിയത്. സ്വാമിനാരായണ്‍ മൂര്‍ത്തി വിഗ്രഹത്തിന് ഒപ്പം ഉപപ്രതിഷ്ഠകളും നടത്തി.സ്വാമിനാരായണ്‍,അക്ഷര്‍-പുരുഷോത്തം, സ്വാമി അയ്യപ്പന്‍, ശ്രീകൃഷ്ണന്‍, പരമശിവന്‍, ഗണപതി തുടങ്ങിയരാണ് ക്ഷേത്രത്തിലെ പ്രധാന മൂര്‍ത്തികള്‍. വൈകിട്ടാണ് ക്ഷേത്രത്തിന്റെ ഔദ്യോഗിക ഉദ്ഘാടന ചടങ്ങ്.

ക്ഷണിക്കപ്പെട്ടവര്‍ക്ക് മാത്രമാണ് ഇന്ന് ക്ഷേത്രപരിസരത്തേക്ക് പ്രവേശനം അനുവദിച്ചിട്ടുണ്ട്. രജിസ്ട്രര്‍ ചെയ്തിട്ടുള്ളവര്‍ക്ക് ഫെബ്രുവരി പതിനെട്ട് മുതല്‍ ക്ഷേത്രത്തില്‍ ദര്‍ശനം നടത്താം.ദുബൈ അബുദബി ഹൈവേയില്‍ അബു മുറൈഖയില്‍ യുഎഇ ഭരണകൂടം നല്‍കിയ ഇരുപത്തിയേഴ് ഏക്കര്‍ സ്ഥലത്താണ് ശിലാക്ഷേത്രം നിര്‍മ്മിച്ചിരിക്കുന്നത്. 1997 മുതല്‍ ആണ് അബുദബിയിലെ ഹിന്ദുക്ഷേത്രത്തിനുള്ള ആലോചനകള്‍ ആരംഭിച്ചത്. 97-ല്‍ ഷാര്‍ജ സന്ദര്‍ശിച്ച സ്വാമി മഹാരാജ് ആണ് യുഎഇ തലസ്ഥാനത്ത് ഒരു ഹിന്ദുക്ഷേത്രം എന്ന ആവശ്യവും ആഗ്രഹവും പ്രകടിപ്പിച്ചത്. പിന്നീട് 2015-ല്‍ പ്രധാനമന്ത്രി നരേന്ദ്രമോദിയുടെ പ്രഥമ സന്ദര്‍ശനത്തില്‍ അബുദബിയില്‍ ്‌ക്ഷേത്രനിര്‍മ്മാണത്തിന് യുഎഇ ഭരണകൂടം ഭൂമി അനുവദിച്ചത്.

2019 ഡസിംബറില്‍ ആണ് ക്ഷേത്രത്തിന്റെ നിര്‍മ്മാണം ആരംഭിച്ചത്. 108 അടി ഉയരത്തത്തില്‍ പിങ്ക് മണല്‍ക്കല്ലും വെള്ളി മാര്‍ബിളും ഉപയോഗിച്ച് ക്ഷേത്രം നിര്‍മ്മിച്ചിരിക്കുന്നത്.