യാത്രക്കാരുടെ എണ്ണത്തില്‍ റെക്കോര്‍ഡ് വര്‍ദ്ധനയുമായി ദുബൈ രാജ്യാന്തര വിമാനത്താവളം. 2023 ല്‍ 86.9 ദശലക്ഷം യാത്രക്കാരാണ് ദുബൈ വഴി സഞ്ചരിച്ചത്. ഏറ്റവുമധികം യാത്രക്കാരെത്തിയ രാജ്യങ്ങളുടെ പട്ടികയില്‍ ഇന്ത്യയും ഉള്‍പ്പെടുന്നുണ്ട്. ഈ വര്‍ഷവും കൂടുതല്‍ യാത്രക്കാരെ സ്വകരിക്കാന്‍ ഒരുങ്ങുകയാണ് വിമാനത്താവളം.2023 ലെ കണക്കു പ്രകാരമാണ് ദുബൈ രാജ്യാന്തര വിമാനത്താവളത്തില്‍ റെക്കോര്‍ഡ് യാത്രക്കാര്‍ എത്തിയതായി വ്യക്തമാക്കുന്നത്. 86.9 ദശലക്ഷം യാത്രക്കാരാണ് 2023 ല്‍ ദുബൈ വിമാനത്താവളം വഴി സഞ്ചരിച്ചത്. ഇന്ത്യ, സൗദിഅറേബ്യ, യുകെ, പാക്കിസ്ഥാന്‍ എന്നിവിടങ്ങളില്‍ നിന്നുമുള്ള യാത്രക്കാരാണ് ഏറ്റവും അധികം ദുബൈ വിമാനത്താവളം വഴി എത്തിയത്.

ഇതിനു പുറമേ വിവിധ രാജ്യങ്ങളിലേക്കുള്ള ട്രാന്‍സിറ്റ് യാത്രക്കാരും കൂടുതലായി എത്തിയതായി കണക്കുകള്‍ വ്യക്തമാക്കുന്നു. 2028 ല്‍ 89.1 ദശലക്ഷം യാത്രക്കാര്‍ വിമാനത്തവാളം വഴി സഞ്ചരിച്ചിരുന്നു. തുടര്‍ന്ന് കോവിഡിനു ശേഷം 2022 ല്‍ 66 ദശലക്ഷമായിരുന്നു യാത്രക്കാരുടെ എണ്ണം. ഈ വര്‍ഷവും യാത്രക്കാരുടെ എണ്ണത്തില്‍ വലിയ വര്‍ദ്ധനവ് ഉണ്ടാകുമെന്നാണ് പ്രതീക്ഷിക്കുന്നത്. മിഡില്‍ ഈസ്റ്റിലെ പ്രധാന ഹബ്ബായി പ്രവര്‍ത്തിക്കുന്നതിനാല്‍ ആളുകള്‍ യാത്രയ്ക്കായി കൂടുതല്‍ തിരഞ്ഞെടുക്കുന്നത് ദുബൈ വിമാനത്താവളത്തെയാണ്. യാത്രക്കാര്‍ക്കായി മെച്ചപ്പെട്ട സേവനങ്ങളാണ് ലഭ്യമാക്കുന്നത്. സ്മാര്‍ട്ട് ഗേറ്റുകളുടെ ഉപയോഗവും അതിവേഗമുള്ള യാത്രാ നടപടികളുമാണ് യാത്രക്കാര്‍ക്കായി ഒരുക്കിയിട്ടുള്ളതെന്ന് ദുബൈ എയര്‍പോര്‍ട്‌സ് സിഇഒ പോള്‍ ഗ്രിഫിത്ത്‌സ് അറിയിച്ചു.

104 രാജ്യങ്ങളിലെ 262 ലക്ഷ്യസ്ഥാനങ്ങളിലേക്കാണ് ദുബൈ വിമാനത്താവളത്തില്‍ നിന്നും സര്‍വ്വീസ് നടത്തുന്നത്. 100 അന്താരാഷ്ര വിമാന കമ്പനികളാണ് വിവിധ രാജ്യങ്ങളിലേക്കായി സര്‍വ്വീസ് നടത്തുന്നത്. അവധിക്കാലം ആഘോഷിക്കാന്‍ ആളുകള്‍ തിരഞ്ഞെടുക്കുന്ന പ്രധാന നഗരമെന്ന നിലയിലും നിരവധി അന്താരാഷ്ട്ര ഇവന്റുകളും ലോക പ്രശസ്തമായ സ്ഥാനങ്ങളുമാണ് ദുബൈയിലേ്ക്ക് സന്ദര്‍ശകരെ ആകര്‍ഷിക്കുന്നതെന്നാണ് വിലയിരുത്തല്‍.

ഗാസയില്‍ അടുത്ത എട്ട് ആഴ്ച്ച വരെ പൂര്‍ണ്ണതോതില്‍ ആക്രമണം തുടരുമെന്ന് ഇസ്രയേല്‍ പ്രതിരോധ സേനം. അതിനുള്ളില്‍ ഹമാസിനെ പൂര്‍ണ്ണമായും തകര്‍ക്കാന്‍ കഴിയും എന്നാണ് ഇസ്രയേല്‍ സൈന്യത്തിന്റെ പ്രതീക്ഷ. ഇതിനിടെ ഹമാസ് ബന്ദികളെ ഉടന്‍ മോചിപ്പിക്കുന്നില്ലെങ്കില്‍ റഫായില്‍ മാര്‍ച്ച് പത്തിന് കരയുദ്ധം ആരംഭിക്കുന്നെ് ഇസ്രയേല്‍ മന്ത്രി മുന്നറിയിപ്പ് നല്‍കി.ഗാസ മുനമ്പില്‍ പൂര്‍ണ്ണതോതിലുളള യുദ്ധം ആറ് മുതല്‍ എട്ട് ആഴ്ച്ചകള്‍ വരെയെ ഇനി വേണ്ടിവരു എന്നാണ് ഇസ്രയേല്‍ സൈന്യം കണക്കുകൂട്ടുന്നത്. അതിന് ശേഷം ലക്ഷ്യം നിര്‍ണ്ണയിച്ചുള്ള വ്യോമാക്രമണങ്ങള്‍ അടക്കം പരിമിതമായ ആക്രമണങ്ങളെ വേണ്ടിവരു എന്നാണ് ഇസ്രേയല്‍ പ്രതിരോധ സേന കരുതുന്നത്.

ഗാസയിലെ ഹമാസിന്റെ ഇരുപത്തിനാല് ബറ്റാലിയനുകളില്‍ പതിനെട്ടും തകര്‍ത്തതായി ഇസ്രയേല്‍ പ്രതിരോധമന്ത്രി യോവ് ഗല്ലാന്റ് വ്യക്തമാക്കി. റഫാ ആണ് ഇപ്പോള്‍ ഹമാസിന്റെ കേന്ദ്രസ്ഥാനം എന്നും ഇവിടെ ആക്രമണം ആസൂത്രണം ചെയ്യുകയാണെന്നും ഇസ്രയേല്‍ പ്രതിരോധമന്ത്രി പറഞ്ഞു. റഫായില്‍ ഹമാസിന്റെ കമാന്‍ഡ് സെന്ററുകളും തുരങ്കങ്ങളും ഉണ്ട്. സാധാരണക്കാര്‍ക്ക് ദോഷമുണ്ടാകാതിരിക്കാന്‍ പ്രത്യേകനടപടിക്രമങ്ങള്‍ സ്വീകരിച്ച ശേഷമായിരിക്കും റഫായില്‍ ഹമാസിന് നേര്‍ക്കുള്ള ആക്രമണം എന്നും യോവ് ഗല്ലാന്റ് പറഞ്ഞു. അതെസമയം ഒക്ടോബര്‍ ഏഴിന് ഇസ്രയേലില്‍ നിന്നും കസ്റ്റഡിയില്‍ എടുത്തവരെ ഹമാസ് ഉടന്‍ വിട്ടയക്കുന്നില്ലെങ്കില്‍ മാര്‍ച്ച് പത്തിന് റഫായില്‍ ആക്രമണം ആരംഭിക്കും എന്ന് ഇസ്രയേല്‍ യുദ്ധമന്ത്രിസഭാ അംഗം ബെന്നി ഗ്യാന്റ്‌സ് ഭീഷണി മുഴക്കി.

മാര്‍ച്ച് പതിനൊന്നിനോ പന്ത്രണ്ടിനോ റമദാന്‍ ആരംഭിക്കാന്‍ ഇരിക്കെ ആണ് പതിനഞ്ച് ലക്ഷത്തോളം പേര്‍ അഭയം തേടിയിരിക്കുന്ന റഫായില്‍ കരയുദ്ധം ആരംഭിക്കും എന്ന് ഇസ്രയേലിന്റെ മുന്‍പ്രതിരോധ മന്ത്രി കൂടിയായ ബെന്നി ഗ്യാന്റസ് മുന്നറിയിപ്പ് നല്‍കുന്നത്. റമദാന്‍ ആരംഭിക്കുന്നതിന് മുന്നോടിയായി വെടിനിര്‍ത്തല്‍ നടപ്പാക്കുന്നതിനായി ഖത്തറിന്റെ നേതൃത്വത്തില്‍ മധ്യസ്ഥ ചര്‍ച്ചകള്‍ നടക്കുന്നുണ്ടെങ്കിലും ആശാവഹമായ പുരോഗതികള്‍ ഇല്ല.

സൗദി അറേബ്യയില്‍ ഈ ശൈത്യകാലത്ത് തണുപ്പ് മുന്‍വര്‍ഷങ്ങളെ അപേക്ഷിച്ച് കുറവെന്ന് കാലാവസ്ഥാ കേന്ദ്രം. രണ്ട് പതിറ്റാണ്ടിനിടയില്‍ ഏറ്റവും കുറവ് തണുപ്പ് അനുഭവപ്പെട്ട ശൈത്യകാലം ആണ് കടന്നുപോകുന്നത്.പതിവിന് വിപരീതമായി കടുത്ത തണുപ്പിലേക്ക് കടക്കാതെ സൗദിയിലെ ശൈത്യകാലം വിടവാങ്ങുന്നുവെന്നാണ് കാലാവസ്ഥാ കേന്ദ്രം വ്യക്തമാക്കുന്നത്.

കഴിഞ്ഞ ഇരുപത് വര്‍ഷങ്ങള്‍ക്കിടയിലെ ഏറ്റവും കുറവ് തണുപ്പാണ് ഇത്തവണ രേഖപ്പെടുത്തിയതെന്ന് കാലാവസ്ഥാ കേന്ദ്രം വ്യക്തമാക്കുന്നത്. രാജ്യത്ത് എവിടെയും താപനില പൂജ്യം ഡിഗ്രി സെല്‍ഷ്യസിന് താഴേയ്ക്ക് ഇത്തവണ എത്തിയില്ല. അതിശൈത്യം അനുഭവപ്പെടുന്ന അല്‍മുറബ്ബനിയ്യ സീസണിലും തണുപ്പ് പതിനിലും കുറഞ്ഞെന്ന് സൗദി ദേശീയകാലാവസ്ഥാ കേന്ദ്രം അറിയിച്ചു. തുറൈഫിലാണ് ശൈത്യകാലത്ത് ഏറ്റവും കുറഞ്ഞ താപനില രേഖപ്പെടുത്താറുള്ളത്.

മൈസ് ഏഴ് ഡിഗ്രിയിലേക്ക് വരെ ഇവിടെ മുന്‍വര്‍ഷങ്ങളില്‍ താപനില താഴ്ന്നിരുന്നു. എന്നാല്‍ ഇത്തവണ ഇവിടെ പോലും മൈനസ് ഡിഗ്രി സെല്‍ഷ്യസിലേക്ക് താപനില താഴ്ന്നില്ല.കാറ്റിന്റെ ദീശയിലുണ്ടായ മാറ്റം ആണ് തുണുപ്പില്‍ കുറവ് വരുത്തിയത്. കാറ്റിന്റെ ദിശയിലുണ്ടായ മാറ്റമാണ് രാജ്യത്ത് തണുപ്പ് കുറയുന്നതിന് കാരണം.

യുഎഇയുടെ എണ്ണേതരവിദേശ വ്യാപാരത്തില്‍ റെക്കോര്‍ഡ് വളര്‍ച്ച എന്ന് വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തും. 2023-ല്‍ യുഎഇയുടെ എണ്ണേതര വിദേശവ്യാപാരം 3.5 ട്രില്ല്യണായി വളര്‍ന്നെന്ന് ഷെയ്ഖ് മുഹമ്മദ് അറിയിച്ചു.എണ്ണേതിര വിദേശവ്യാപാരത്തില്‍ രാജ്യം അഭുതപൂര്‍വ്വമായ വളര്‍ച്ച കൈവരിക്കുന്നുവെന്നാണ് ഷെയ്ഖ് മുഹമ്മദ് ബിന്‍ റാഷിദിന്റെ പ്രസ്താവന. ഈ രംഗത്ത് ഓരോ ദിവസവും പുതിയ പുതിയ നേട്ടങ്ങള്‍ കൈവരിച്ചുകൊണ്ടാണ് യുഎഇയുടെ മുന്നേറ്റം.

ആഗോളതലത്തില്‍ വാണിജ്യ-വ്യാപാര രംഗം തകര്‍ച്ച നേരിടുമ്പോള്‍ ആണ് യുഎഇ ഈ മേഖലയില്‍ മുന്നേറ്റം കുറിക്കുന്നതെന്നും ഷെയ്ഖ് മുഹമ്മദ് അറിയിച്ചു. 2023-ന്റെ തുടക്കത്തില്‍ തന്നെ ആ വര്‍ഷം റെക്കോര്‍ഡ് ഭേദിക്കുന്ന വളര്‍ച്ചയാണ് യുഎഇ മുന്നില്‍ കണ്ടിരുന്നത്. എന്നാല്‍ പ്രതീക്ഷകള്‍ക്ക് അപ്പുറമായിരുന്നു വളര്‍ച്ച. സമഗ്രമായ പങ്കാളിത്തകരാറുകളിലൂടെ കഴിഞ്ഞ വര്‍ഷം മുഴുവനും യുഎഇ മുന്നേറ്റം തുടര്‍ന്നു എന്നും ഷെയ്ഖ് മുഹമ്മദ് ബിന്‍ റാഷിദ് അല്‍ മക്തും പറഞ്ഞു.പത്ത് രാജ്യങ്ങളുമായുള്ള ഇടപാടുകളിലാണ് വന്‍ വര്‍ദ്ധന രേഖപ്പെടുത്തിയിരിക്കുന്നത്.

തുര്‍ക്കിയുമായുള്ള വാണിജ്യ-വ്യാപാര ഇടപാടുകളില്‍ 103 ശതമാനത്തിന്റെ വര്‍ദ്ധനയാണ് രേഖപ്പെടുത്തിയിരിക്കുന്നത്. ഹോങ്കോങ്ങും ചൈനയുമായുള്ള ഇടപാടുകളില്‍ നാല്‍പ്പത്തിയേഴ് ശതമാനത്തിന്റെയും അമേരിക്കയുമായുള്ള ഇടപാടുകളില്‍ ഇരുപത് ശതമാനത്തിന്റെ വര്‍ദ്ധന പോയവര്‍ഷം രേഖപ്പെടുത്തിയെന്നും ഷെയ്ഖ് മുഹമ്മദ് ബിന്‍ റാഷിദ് അല്‍ മക്തും അറിയിച്ചു. രാജ്യാന്തര വ്യാപരമേഖലയില്‍ യുഎഇ ഇന്ന് സുപ്രധാന സ്ഥാപമാണ് കൈയ്യാളുന്നതെന്നും ഷെയ്ഖ് മുഹമ്മദ് ബിന്‍ റാഷിദ് അല്‍ മക്തും പറഞ്ഞു.

ദുബൈ മെട്രോ ബ്ലുലൈന്‍ നിര്‍മ്മാണം ഈ വര്‍ഷം ആരംഭിക്കും എന്ന് ആര്‍ടിഎ. മുപ്പത് കിലോമീറ്റര്‍ ദൂരത്തിലാണ് ബ്ലുലൈന്‍ നിര്‍മ്മിക്കുന്നത്. 2030-ന് മുന്‍പ് നിര്‍മ്മാണം പൂര്‍ത്തിയാക്കുന്നതിന് ആര്‍ടിഎയുടെ തീരുമാനം.ദുബൈ മെട്രോയുടെ നിലവിലുള്ള ഗ്രീന്‍-റെഡ് ലൈനുകളെ തമ്മില്‍ ബന്ധിപ്പിച്ചുള്ള ബ്ലൂലൈന്‍ പദ്ധതി ഈ വര്‍ഷം ആരംഭിക്കുമെന്ന് ആര്‍ടിഎ ചെയര്‍മാന്‍ മാത്തര്‍ അല്‍ തായറാണ് അറിയിച്ചത്. 2025-ല്‍ നിര്‍മ്മാണം ആരംഭിക്കും എന്നായിരുന്നു ആര്‍ടിഎ നേരത്തെ വ്യക്തമാക്കിയിരുന്നത്.മുപ്പത് കിലോമീറ്റര്‍ ദൂരത്തില്‍ നിര്‍മ്മിക്കുന്ന റെയില്‍ പാതയുടെ 15.5 കിലോമീറ്റര്‍ ദൂരം ഭൂമിക്കടിയില്‍ ആയിരിക്കും.

നഗരത്തിലെ ഒന്‍പത് പ്രധാനകേന്ദ്രങ്ങളിലൂടെ ആണ് പുതി ലൈന്‍ പോകുന്നത്. ഇതോടെ ഈ കേന്ദ്രങ്ങളില്‍ നിന്നും ദുബൈ വിമാനത്താവളത്തിലേക്ക് ഇരുപത്തിയഞ്ച് മിനുട്ടുകള്‍ കൊണ്ട് എത്താന്‍ കഴിയും.മൊത്തം പതിനാല് സ്റ്റേഷനുകള്‍ പുതിയ പാതയില്‍ ഉണ്ടാകും എന്നും ആര്‍ടിഎ ചെയര്‍മാന്‍ അറിയിച്ചു. ദുബൈ ക്രിക്ക് ഹാര്‍ബര്‍, ഫെസ്റ്റിവല്‍ സിറ്റി, ഗ്ലോബല്‍ വില്ലേജ്, അല്‍വര്‍ഖ, മിര്‍ദിഫ്, സിലിക്കണ്‍ ഒയാസിസ്,അക്കാദമിക് സിറ്റി തുടങ്ങിയ മേഖലകളിലൂടെയാണ് ബ്ലു ലൈന്‍ കടന്നുപോകുക.ഏഴ് എലിവേറ്റഡ് സ്റ്റേഷനുകളും അഞ്ച് ഭൂഗര്‍ഭ സ്റ്റേഷനുകളുമായിരിക്കും പുതിയ പാതയില്‍ ഉണ്ടാവുക.

രണ്ട് എലിവേറ്റഡ് ട്രാന്‍സ്ഫര്‍ സ്റ്റേഷനുകളും പുതിയ ലൈനില്‍ ഉണ്ടാകും. റെഡ്‌ലൈനില്‍ സെന്റര്‍ പോയിന്റിലും ഗ്രീന്‍ലൈനില്‍ ക്രിക്ക് സ്‌റ്റേഷനിലുമായിരിക്കും പുതിയ പാതയെ ബന്ധിപ്പിക്കുക.