ദുബൈ: ഗതാഗത തടസ്സവും വാഹന നീക്കവും നിരീക്ഷിക്കുന്നതിന് ആര്‍ട്ടിഫിഷ്യല്‍ ഇന്റലിജന്‍സിന്റെ സഹായത്തോടെ പ്രവര്‍ത്തിക്കുന്ന നിരീക്ഷണ വാഹനവുമായി ദുബൈ ആര്‍ടിഎ. വാഹനത്തിന്റെ പൈലറ്റ് ഓപ്പറേഷന്‍ തുടങ്ങിയതായി ആര്‍ടിഎ അറിയിച്ചു. ഗതാഗത രംഗത്ത് അതിനൂതനമായ സാങ്കേതിക വിദ്യകളാണ് റോഡ്‌സ് ആന്റ് ട്രാന്‍സ്‌പോര്‍ട്ട് അതോരിറ്റി പ്രയോജനപ്പെടുത്തുന്നത്. റോഡുകളുടെ ഗുണനിലാവരവും ട്രാഫിക് സുരക്ഷയും ഉറപ്പു വരുത്തുന്നതിന് ഡിജിറ്റല്‍, നിര്‍മിതബുദ്ധി സാങ്കേതിക വിദ്യകള്‍ ഉപയോഗിക്കുന്നതിന്റെ ഭാഗമായാണ് ദുബൈ റോഡ്‌സ് ആന്റ് ട്രാന്‍സ്‌പോര്‍ട്ട് അതോരിറ്റി പുതിയ സംവിധാനം പരീക്ഷണാടിസ്ഥാനത്തില്‍ പുറത്തിറക്കിയിരിക്കുന്നത്. ഒരു റോഡില്‍ നിന്ന് മറ്റൊരു റോഡിലേക്കു കടക്കുമ്പോള്‍ വാഹനങ്ങള്‍ ഏതെങ്കിലും തടസ്സം നേരിടുന്നുണ്ടോ എന്നാണ് പരിശോധിക്കുക. റോഡിന്റെ ഡിസൈനില്‍ ഉള്‍പ്പെടെ വരുത്തേണ്ട മാറ്റം കൃത്യമായി എഐ വാഹനം ഒപ്പിയെടുക്കും. ഇതിനായി ക്യാമറകളും സെന്‍സറുകളും വാഹനത്തിലുണ്ട്. ഗതാഗതം വഴിതിരിച്ചു വിടുന്നതിലെ തടസ്സങ്ങളും ഈ വാഹനം വിലയിരുത്തും. പരമ്പരാഗത രീതിയിലുള്ള സ്ഥല പരിശോധനയേക്കാള്‍ 85 ശതമാനം അധികം മെച്ചപ്പെട്ട വിവരങ്ങളാണ് എഐ സാങ്കേതിക സംവിധാനത്തിലൂടെ ലഭിക്കുന്നത്. ദബൈയുടെ നഗര സൗന്ദര്യം നിലനിര്‍ത്താന്‍ സഹായിക്കുന്നതാണ് പുതിയ പരിശോധനാ സംവിധാനമെന്ന് ആര്‍ടിഎ ട്രാഫിക് ആന്‍ഡ് റോഡ്‌സ് ഏജന്‍സി സിഇഒ ഹുസൈന്‍ അല്‍ ബന്ന പറഞ്ഞു.

അബുദബി: വാഹന അപകടങ്ങള്‍ ഉണ്ടായാല്‍ സ്വയം റിപ്പോര്‍ട്ട് ചെയ്യുന്ന സംവിധാനം നടപ്പിലാക്കാന്‍ യുഎഇ. അപകടം നടന്നാല്‍ രക്ഷാപ്രവര്‍ത്തനത്തിനുള്ള സമയം നാല്‍പത് ശതമാനം വരെ കുറക്കാന്‍ കഴിയുന്നതാണ് പദ്ധതി. ഇ കോള്‍ എന്ന പേരില്‍ നടപ്പിലാക്കുന്ന പദ്ധതിയ്ക്ക് യുഎഇ മന്ത്രിസഭ അംഗീകാരം നല്‍കി. യുഎഇയിലെ വാഹനങ്ങള്‍ക്ക് ഇനി അപകടങ്ങള്‍ സ്വയം റിപ്പോര്‍ട്ട് ചെയ്യാന്‍ കഴിയുന്ന സംവിധാനമാണ് നടപ്പിലാക്കുന്നത്. വാഹനങ്ങളില്‍ ഇകോള്‍ സംവിധാനം ഏര്‍പ്പെടുത്താന്‍ യുഎഇ മന്ത്രിസഭ അനുമതി നല്‍കി. അപകടത്തിനും രക്ഷാപ്രവര്‍ത്തനത്തിനുമിടയിലെ സമയം 40 ശതമാനം കുറക്കാന്‍ ഈ സംവിധാനത്തിലൂടെ കഴിയുമെന്നാണ് വിലയിരുത്തല്‍. മൂന്ന് വര്‍ഷം മുമ്പ് അബൂദബിയിലെ വാഹനങ്ങളില്‍ ഇകോള്‍ സംവിധാനം പരീക്ഷണാടിസ്ഥാനത്തില്‍ സ്ഥാപിച്ചിരുന്നു. അപകടത്തില്‍പെട്ടാല്‍ വാഹനം തന്നെ അക്കാര്യം പൊലീസില്‍ റിപ്പോര്‍ട്ട് ചെയ്യും. അപകടത്തിന്റെ വ്യാപ്തി, വാഹനത്തിന്റെ മോഡല്‍, അപകടം നടന്ന സ്ഥലം, യാത്രക്കാരുടെ എണ്ണം എന്നിവ സഹിതമാണ് പൊലീസില്‍ റിപ്പോര്‍ട്ട് എത്തുക. അബുദബിയില്‍ വാഹനാപകടമണരം പത്ത്ശതമാനം വരെ കുറക്കാന്‍ ഈ സംവിധാനത്തിന് കഴിഞ്ഞിട്ടുണ്ടെന്നാണ് പഠനം. പൊലീസ്, ആംബുലന്‍സ്, സിവില്‍ഡിഫന്‍സ് എന്നിവക്ക് അപകടസ്ഥലത്തേക്ക് കുതിച്ചെത്താനുള്ള സമയം നാലുമിനിറ്റായി കുറക്കാന്‍ ഇതിന് കഴിയുമെന്നാണ് പഠനം വ്യക്തമാക്കുന്നത്.

ദുബൈ: ഭക്ഷ്യവസ്തുക്കള്‍, പഴം, പച്ചക്കറി വിപണിയുടെ ലോകത്തിലെ പ്രധാന ഹബ്ബമായി യുഎഇയെ മാറ്റുകയാണ് ലക്ഷ്യം. ഇതിനായി നിലവിലെ മാര്‍ക്കറ്റുകളുടെ വലിപ്പം ഇരട്ടിയാക്കും. ദുബൈ മുനിസിപ്പാലിറ്റിയും ഡിപി വേള്‍ഡും ദുബൈയില്‍ ലോകത്തിലെ ഏറ്റവും വലിയ ലോജിസ്റ്റിക്‌സ് ഹബ്ബ് നിര്‍മ്മിക്കുകയാണ്. പദ്ധതിയ്ക്കായി കരാറില്‍ ഒപ്പുവെച്ചു. ദുബൈ ഒന്നാം ഉപഭരണാധികാരിയും ഉപപ്രധാനമന്ത്രിയും യുഎഇ ധന മന്ത്രിയുമായ ഷെയ്ഖ് മക്തും ബിന്‍ മുഹമ്മദ് ബിന്‍ റാഷിദ് അല്‍ മക്തും പദ്ധതിയുടെ പ്രഖ്യാപനം നടത്തി. ലോകത്തിന്റെ വിവിധ മേഖലകളിലേക്കുള്ള കയറ്റുമതി, ഇറക്കുമതി, വിപണിയായി ദുബൈയെ ഉയര്‍ത്തുകയാണ് ലക്ഷ്യമെന്ന് ഷെയ്ഖ് മക്തും പറഞ്ഞു. നൂതനമായ അടിസ്ഥാന സൗകര്യങ്ങള്‍ ഇതിനായി വികസിപ്പിക്കും. മികച്ച നിലവാരത്തില്‍ വാണിജ്യ നിക്ഷേപ അവസരങ്ങള്‍ സൃഷ്ടിക്കാനും പദ്ധതി ലക്ഷ്യമിടുന്നുണ്ട്. യുഎഇയുടെ ഭക്ഷ്യസുരക്ഷാ തന്ത്രത്തെ പിന്തുണയ്ക്കുന്നതാകും പദ്ധതിയെന്നും ഷെയ്ഖ് മക്തും പറഞ്ഞു. ഡിപി വേള്‍ഡിന്റെ കീഴില്‍ പഴം പച്ചക്കറി വിപണിയുടെ വിപുലീകരണം കൂടുതല്‍ നിക്ഷേപ അവസരങ്ങളെയും പ്രതീക്ഷിക്കുന്നുണ്ട്. ഇരു വകുപ്പുകളും തമ്മില്‍ ഒപ്പുവെച്ച കരാറിന് ഏകീകൃത നടപടിക്രമങ്ങളാകും സ്വീകരിക്കുക.

ദുബൈ: റോഡപകടമരണ നിരക്കില്‍ തൊണ്ണൂറ്റിമൂന്ന് ശതമാനം കുറവ് രേഖപ്പെടുത്തിയതായി റിപ്പോര്‍ട്ട്. ദുബൈ നടപ്പിലാക്കുന്ന ട്രാഫിക് സേഫ്റ്റി സ്ട്രാറ്റജി ഫലം കണ്ടതായി വിലയിരുത്തല്‍. ദുബൈ ആര്‍ടിഎയും പൊലീസും പ്രവര്‍ത്തന പുരോഗതി വിലയിരുത്തി. 2023 ല്‍ ദുബൈയില്‍ രേഖപ്പെടുത്തിയത് എക്കാലത്തെയും കുറഞ്ഞ റോഡപകട മരണനിരക്കാണ്. 2007 നും 2023 നും ഇടയില്‍ വാഹനാപകട മരണ നിരക്ക് 93 ശതമാനം കുറഞ്ഞതായി അധികൃതര്‍ അറിയിച്ചു. ഒരു ലക്ഷം ആളുകളില്‍ 1.6 എന്നതാണ് റോഡപകടങ്ങളിലെ മരണ നിരക്ക്. ദുബൈ ട്രാഫിക് സേഫ്റ്റി സ്ട്രാറ്റജിയുടെ ഭാഗമായി റോഡ് അപകടമരണങ്ങള്‍ പൂജ്യത്തിലേക്ക് എത്തിക്കുകയാണ് ലക്ഷ്യം. ആര്‍ടിഎയും പൊലീസും ചേര്‍ന്ന് നടപ്പിലാക്കിയ റോഡ് സുരക്ഷാ പദ്ധതികളുടെ ഭാഗമാണിത്. ദുബൈ റോഡ്‌സ് ആന്റ് ട്രാന്‍സ്‌പോര്‍ട്ട് അതോരിറ്റിയിലെയും ദുബൈ പൊലീസിലെയും ഉന്നത ഉദ്യോഗസ്ഥരുടെ നേതൃത്വത്തിലാണ് പ്രവര്‍ത്തനങ്ങളുടെ പുരോഗതി വിലയിരുത്തിയത്. ദുബൈ ട്രാഫിക് സേഫ്റ്റി സ്ട്രാറ്റജിയുടെ ഫലങ്ങളും സൂചകങ്ങളും ഇരു വകുപ്പുകളും അവലോകനം ചെയ്തു. ട്രാഫിക് സുരക്ഷയുടെ കാര്യത്തില്‍ ദുബൈയെ ലോകത്തിലെ ഏറ്റവും മികച്ച നഗരമാക്കി മാറ്റുന്നതിനുള്ള സീറോ ഫാറ്റലിറ്റീസ് എന്ന കാഴ്ചപ്പാടോടു കൂടിയുള്ള പ്രവര്‍ത്തനങ്ങളാണ് നടപ്പിലാക്കുന്നതെന്ന് ആര്‍ടിഎ ചെയര്‍മാന്‍ മറ്റര്‍ അല്‍ തായര്‍ പറഞ്ഞു. 2023 ല്‍ കാല്‍നട ക്രോസിംഗുകള്‍, മോട്ടോര്‍ സൈക്കിളുകള്‍, ഇ സ്‌കൂട്ടറുകള്‍, സൈക്കിളുകള്‍ എന്നിവയുമായി ബന്ധപ്പെട്ട് അഞ്ച് ലക്ഷത്തിലധികം നിയമലംഘനങ്ങളാണ് രേഖപ്പെടുത്തിയത്. ദുബൈ മെട്രോയുടെ ബ്ലൂ ലൈന്‍ പദ്ധതിയും യോഗത്തില്‍ വിലയിരുത്തി. സെന്റര്‍പോയിന്റില്‍ റെഡ്‌ലൈനിലും അല്‍ ഖോറില്‍ ഗ്രീന്‍ ലൈനിലും ബന്ധിപ്പിച്ചാണ് ബ്ലൂ ലൈന്‍ നിര്‍മ്മിക്കുക. പുതിയ ലൈനില്‍ പ്രതിദിനം രണ്ട് ലക്ഷം യാത്രക്കാരെയാണ് പ്രതീക്ഷിക്കുന്നത്. ദുബൈ പോലീസ് കമാന്‍ഡര്‍ ഇന്‍ ചീഫ് ലെഫ്റ്റനന്റ് ജനറല്‍ അബ്ദുല്ല ഖലീഫ അല്‍ മര്‍റി, വിവിധ ഉദ്യോഗസ്ഥര്‍ എന്നിവരും യോഗത്തില്‍ പങ്കെടുത്തു.

ദുബൈ: ലോകത്തിലെ തന്നെ ഏറ്റവും വിലിയ കാര്‍ മാര്‍ക്കറ്റ് നിര്‍മ്മിക്കാനൊരുങ്ങി ദുബൈ. പദ്ധതിയ്ക്കായി ദുബൈ മുനിസിപ്പാലിറ്റിയും ഡിപി വേള്‍ഡും കമ്മില്‍ പങ്കാളിത്ത കരാറില്‍ ഒപ്പുവെച്ചു. രണ്ട് കോടി ചതുരശ്ര മീറ്റര് വിസ്തീര്‍ണത്തിലായിരിക്കും കാര്‍ മാര്‍ക്കറ്റ് പണിയുക. ലോകത്തിലെ വാഹന പ്രേമികളുടെയും കമ്പനികളുടെയും മുഖ്യ ആകര്‍ഷണമാകുകയാണ് ദുബൈ. പ്രമുഖ വാഹന നിര്‍മ്മാതാക്കളെയും നിക്ഷേപകരെയും ദുബൈയിലേക്ക് ആകര്‍ഷിക്കുന്നതാണ് ലോകത്തിലെ ഏറ്റവും വലിയ കാര്‍ മാര്‍ക്കറ്റ് ദുബൈയില്‍ നിര്‍മ്മിക്കുന്നത്. പദ്ധതിയ്ക്കായി ദുബൈ മുനിസിപ്പാലിറ്റി ഡയറക്ടര്‍ ജനറല്‍ ദാവൂദ് അല്‍ ഹജ്‌റിയും ഡിപി വേള്‍ഡ് സിഇഒ സുല്‍ത്താന്‍ അഹ്മദ് ബിന്‍ സുലായമും തമ്മില്‍ കരാറില്‍ ഒപ്പുവെച്ചു. ദുബൈ ഒന്നാം ഉപഭരണാധികാരിയും ഉപപ്രധാനമന്ത്രിയും ധനമന്ത്രിയുമായ ഷെയ്ഖ് മക്തും ബിന്‍ മുഹമ്മദ് ബിന്‍ റാഷിദ് മക്തുമിന്റെ സാന്നിദ്യത്തിലായിരുന്നു കരാറില്‍ ഒപ്പുവെച്ചത്. ദുബൈയുടെ സമഗ്ര സാമ്പത്തിക വികസന പദ്ധതിയായ ഡി33യുടെ ഭാഗമായാണ് കാര്‍ മാര്‍ക്കറ്റ് നിര്‍മ്മിക്കുന്നത്. ഓട്ടമോട്ടീവ് രംഗത്തെ ആഗോള പ്രധാന സമ്മേളനങ്ങളും പരിപാടികള്‍ക്കും ആതിഥ്യം വഹിക്കാനും കാര്‍ മാര്‍ക്കറ്റില്‍ സൗകര്യമുണ്ടാകും. ദുബൈ സമ്പദ്‌വ്യവസ്ഥയുടെ വലുപ്പം ഇരട്ടിയാക്കാനും 2033ല്‍ മികച്ച മൂന്ന് സാമ്പത്തിക നഗരങ്ങളിലൊന്നായി ദുബൈയെ മാറ്റാനുമാണ് ശ്രമിക്കുന്നതെന്ന് ഷെയ്ഖ് മക്തൂം പറഞ്ഞു. യുഎഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂം, ദുബൈ കിരീടാവകാശിയും എക്‌സിക്യൂട്ടീവ് കൗണ്‍സില്‍ ചെയര്‍മാനുമായ ഷെയ്ഖ് ഹംദാന്‍ ബിന്‍ മുഹമ്മദ് ബിന്‍ റാഷിദ് അല്‍ മക്തൂം എന്നിവരുടെ മേല്‍നോട്ടത്തിലായിരിക്കും പദ്ധതി.