രാജ്യത്തെ ഗാര്‍ഹിക തൊഴിലാളി നിയത്തിലെ ചട്ടങ്ങളില്‍ ഭേദഗതി വരുത്തി യുഎഇ. തൊഴിലാളിയും തൊഴിലുടമയും തമ്മിലുള്ള തര്‍ക്കങ്ങള്‍ പരിഹരിക്കുന്നതിന് നടപടിക്രമങ്ങള്‍ വേഗത്തിലാക്കുന്നതാണ് പുതിയ ഭേദഗതി. മാനവവിഭവശേഷി മന്ത്രാലയത്തിന്റെ നേതൃത്വത്തില്‍ തര്‍ക്കങ്ങള്‍ക്ക് വേഗത്തില്‍ പരിഹാരം കാണുകയാണ് ലക്ഷ്യം.

ഗാര്‍ഹിക തൊഴിലാളികളും തൊഴിലുടമയും റിക്രൂട്ട്‌മെന്റ് കമ്പനികളും ഉള്‍പ്പെടുന്ന തകര്‍ക്കങ്ങള്‍ക്ക് പരിഹാരം കാണുന്നതിനാണ് നിയമത്തില്‍ പുതിയ ഭേദഗതി വരുത്തിയിരിക്കുന്നത്. നിയമഭേദഗതിയിലൂടെ തര്‍ക്കങ്ങള്‍ക്ക് വേഗത്തില്‍ പരിഹാരം കാണുകയാണ് ലക്ഷ്യം. പുതിയ നിയമം അനുസരിച്ച് തൊഴിലാളികളുടെ കേസുകള്‍ ആദ്യം മാനവവിഭവശേഷി സ്വദേശിവത്കരണ മന്ത്രാലയത്തിന്റെ നേതൃത്വത്തില്‍ പ്രത്യേകം പരിഗണിക്കും. ഇതിലൂടെ പരിഹരിക്കാന്‍ കഴിയാത്ത കേസുകള്‍ മാത്രമേ അപ്പീല്‍ കോടതിയിലേക്ക് കൈമാറുകയുള്ളു. ഗാര്‍ഹിക തൊഴിലാളികളുടെ പ്രശ്‌നങ്ങള്‍ വേഗത്തില്‍ പരിഹിക്കുന്നതിനായാണ് തൊഴില്‍ നിയമത്തിലെ പുതിയ മാറ്റം.

അമ്പതിനായിരം ദിര്‍ഹത്തിനു താഴെയുള്ള കേസുകളായിരിക്കും മാനവവിഭവശേഷി സ്വദേശിവത്കരണ മന്ത്രാലയത്തിന് പരിഹരിക്കാന്‍ അനുമതിയുണ്ടാകുക. നിശ്ചിത സമയത്തിനുള്ളില്‍ കേസുകള്‍ പരിഹരിക്കാന്‍ കഴിഞ്ഞില്ലെങ്കില്‍ മന്ത്രാലയം കോടതിയെ സമീപിക്കണം. മന്ത്രാലയത്തിന്റെ തീരുമാനത്തില്‍ എതിര്‍പ്പുണ്ടെങ്കില്‍ പതിനഞ്ച് ദിവസത്തിനുള്ളില്‍ കോടതിയില്‍ കേസ് ഫയല്‍ ചെയ്യാം. ഇതില്‍ മാനവവിഭവശേഷി മന്ത്രാലയത്തിന്റെ തീരുമാനം അടിസ്ഥാനമാക്കിയാകും കോടതിയുടെ ഇടപെടല്‍.

യുഎഇയില്‍ ടെലി മാര്‍ക്കറ്റിംഗിന് ഏര്‍പ്പെടുത്തിയ പുതിയ നിയമങ്ങള്‍ ഓഗസ്റ്റ് 27ന് പ്രാബല്യത്തില്‍ വരും. ആവര്‍ത്തിച്ചുള്ള നിയമലംഘനങ്ങള്‍ക്ക് പിഴകള്‍ ഗണ്യമായി വര്‍ദ്ധിക്കും. ഈ വര്‍ഷം ജൂണിലാണ് ടെലിമാര്‍ക്കറ്റിംഗിന് നിയന്ത്രണങ്ങള്‍ ഏര്‍പ്പെടുത്തി പുതിയ നിയമം പ്രഖ്യാപിച്ചത്.രാജ്യത്തെ ടെലിമാര്‍ക്കറ്റിംഗ് രീതികള്‍ ഉപഭോക്താക്കള്‍ക്ക് ബുദ്ധിമുട്ടുകള്‍ സൃഷ്ടിക്കാതിരിക്കുന്നതിനാണ് പുതിയ നിയന്ത്രണങ്ങള്‍ ഏര്‍പ്പെടുത്തുന്നത്. വിവിധ നിയമലംഘനങ്ങള്‍ക്ക് അയ്യായിരം മുതല്‍ ഒന്നരലക്ഷം ദിര്‍ഹം വരെ പിഴ ചുമത്തും. അനുമതിയില്ലാതെ ടെലിമാര്‍ക്കറ്റിംഗ് പരിശീലനം നല്‍കിയാല്‍ അമ്പതിനായിരം ദിര്‍ഹമാണ് പിഴ.

പെരുമാറ്റ ചട്ടം പാലിക്കാത്ത കമ്പനികള്‍ക്ക് പതിനായിരം മുതല്‍ അമ്പതിനായിരം ദിര്‍ഹം വരെയും പിഴ ചുമത്തും. കമ്പനിയുടെ വാണിജ്യ ലൈലന്‍സിനു കീഴില്‍ രജിസ്റ്റര്‍ ചെയ്യാത്ത നമ്പറുകള്‍ ഉപയോഗിച്ചാല്‍ 75,000 ദിര്‍ഹം വരെയാണ് പിഴ. സ്ഥാപനത്തിന്റെ മാര്‍ക്കറ്റിംഗ് കോളുകള്‍ രജിസ്റ്ററായി സൂക്ഷിച്ചില്ലെങ്കില്‍ അമ്പതിനായിരം ദിര്‍ഹം പിഴ ലഭിക്കും. കോളുകള്‍ റെക്കോര്‍ഡ് ചെയ്യുന്നതിന് ഉപഭോക്താവിന്റെ അനുമതി വാങ്ങണം. നിയമം ലംഘിച്ചാല്‍ മുപ്പതിനായിരം ദിര്‍ഹം വരെയാണ് പിഴ. വിളിക്കുന്നതിന്റെ ഉദ്ദേശ്യം, കമ്പനി എന്നിവ തുടക്കത്തില്‍ തന്നെ ഉപഭോക്താവിനെ അറിയിച്ചില്ലെങ്കില്‍ മുപ്പതിനായിരം ദിര്‍ഹമാണ് പിഴ. ഫോണ്‍ നമ്പര്‍ ലഭിച്ച ഉറവിടം ഉപഭോക്താവ് ആവശ്യപ്പെട്ടിട്ടും വ്യക്തമാക്കിയില്ലെങ്കില്‍ 75,000 ദിര്‍ഹം വരെയാണ് പിഴ ലഭിക്കുക.

രാവിലെ 9 മുതല്‍ വൈകുന്നേരം 6 വരെ മാത്രമായിരിക്കും ഉപഭോക്താക്കളെ വിളിക്കുന്നതിന് അനുമതി. ആദ്യ കോളില്‍ സേവനങ്ങള്‍ നിരസിച്ചാല്‍ ആവര്‍ത്തിച്ച് വിളിക്കാന്‍ പാടില്ല. ഇത് ലംഘിച്ചാല്‍ അമ്പതിനായിരം ദിര്‍ഹം വരെ പിഴ ലഭിക്കും. സമ്മതമില്ലാതെ സ്വകാര്യ വിവരങ്ങള്‍ വെളിപ്പെടുത്തുകയോ വിവരങ്ങള്‍ കൈമാറ്റം ചെയ്യപ്പെടുകയോ ചെയ്താല്‍ ഒന്നര ലക്ഷം ദിര്‍ഹം വരെയാണ് പിഴ. മാര്‍ക്കറ്റിംഗ് ആവശ്യങ്ങള്‍ക്കായി സ്വകാര്യ നമ്പറുകള്‍ ഉപയോഗിച്ചാലും പിഴ ലഭിക്കും. ആവര്‍ത്തിച്ചുള്ള നിയമലംഘങ്ങള്‍ക്ക് അയ്യായിരം മുതല്‍ ഇരുപതിനായിരം വരെ വ്യക്തികള്‍ക്ക് പിഴ ഈടാക്കും. വിവിധ നിയമലംഘങ്ങള്‍ ആവര്‍ത്തിച്ചാല്‍ പിഴതുക ഗണ്യമായി വര്‍ദ്ധിക്കുമെന്നാണ് മുന്നറിയിപ്പ്.

യുഎഇയില്‍ ഗതാഗത നിയമലംഘനങ്ങള്‍ക്ക് ലഭിച്ച ബ്ലാക്ക് പോയിന്റുകളുടെ എണ്ണം കുറയ്ക്കുന്നതിനുള്ള പദ്ധതിയുമായി ആഭ്യന്തരമന്ത്രാലയം.
ഗതാഗതനിയമം കൃത്യമായി പാലിച്ച് വാഹനം ഓടിച്ച് ബ്ലാക്ക് പോയിന്റെ കുറയ്ക്കുന്നതിനുള്ള പദ്ധതിയാണ് പ്രഖ്യാപിക്കപ്പെട്ടിരിക്കുന്നത്.ആക്‌സിഡന്റ് ഫ്രീ ഡേ എന്ന പേരില്‍ പ്രഖ്യാപിച്ചിരിക്കുന്ന ഗതാഗതബോധവത്കരണത്തിന്റെ ഭാഗമായിട്ടാണ് ബ്ലാക്ക് പോയിന്റുകളുടെ എണ്ണം കുറയ്ക്കുന്നതിനുള്ള അവസരം യുഎഇ ആഭ്യന്തരമന്ത്രാലയം ഒരുക്കിയിരിക്കുന്നത്.

നാല് ബ്ലാക്ക് പോയിന്റ് ആണ് ഒഴിവാക്കാന്‍ കഴിയുക.ഓഗസ്റ്റ് ഇരുപത്തിയാറ് മുതല്‍ ഗതാഗതനിയമലംഘങ്ങള്‍ ഇല്ലാതെ വാഹനം ഓടിക്കുന്നവരുടെ നാല് ബ്ലാക്ക് പോയിന്റാണ് ഇളവ് ചെയ്യുക. ബ്ലാക്ക് പോയിന്റ് ഒഴിവാക്കിക്കിട്ടുന്നതിന് ആഭ്യന്തരമന്ത്രാലയത്തിന്റെ വെബ്‌സൈറ്റില്‍ പ്രവേശിച്ച് ട്രാഫിക് പ്രതിജ്ഞയിലും ഒപ്പുവെയ്ക്കണം. ഓഗസ്റ്റ് ഇരുപത്തിയാറ് മുതല്‍ രണ്ടാഴ്ച്ചക്കാലം ആണ് ഈ ക്യാമ്പയിന്‍ നീണ്ടുനില്‍ക്കുക എന്നും ആഭ്യന്തരമന്ത്രാലയം അറിയിച്ചു. മധ്യവേനലവധി കഴിഞ്ഞ രാജ്യത്ത് സ്‌കൂളുകള്‍ വീണ്ടും തുറക്കുന്നതിന്റെ പശ്ചാത്തലത്തില്‍ ആണ് ആഭ്യന്തരമന്ത്രാലയം പുതിയ ട്രാഫിക് ക്യാമ്പയിന്‍ ആരംഭിച്ചിരിക്കുന്നത്.

സ്‌കൂളുകള്‍ തുറക്കുമ്പോള്‍ നിരത്തുകളില്‍ വാഹനത്തിരക്ക് വര്‍ദ്ധിക്കുന്നത് പരിഗണിച്ചാണ് ക്യാമ്പയിന്‍. ഉത്തരവാദിത്തത്തോടെയുള്ള ഡ്രൈവറിംഗ് പരിശീലിപ്പിക്കുന്നതിനാണ് ബോധവത്കരണ ക്യാമ്പയിന്‍ എന്നും ആഭ്യന്തരമന്ത്രാലയം വ്യക്തമാക്കി.

ഷാര്‍ജ പൊലീസിന്റെ നേതൃത്വത്തില്‍ വന്‍ മയക്കുമരുന്ന് സംഘത്തെ പിടികൂടി. മാര്‍ബിള്‍ സ്ലാബുകളില്‍ ഒളിപ്പിച്ചു കടത്താന്‍ ശ്രമിച്ച 226 കിലോ മയക്കുമരുന്ന് പിടിച്ചെടുത്തു. ഏഷ്യന്‍ വംശജരായ മൂന്ന് പേരെ അറസ്റ്റ് ചെയ്തതായി പൊലീസ് അറിയിച്ചു.മാര്‍ബിള്‍ സ്ലാബുകളില്‍ ഒളിപ്പിച്ചു കടത്താന്‍ ശ്രമിച്ച വന്‍ മയക്കുമരുന്ന് ശേഖരമാണ് ഷാര്‍ജ പൊലീസ് ആന്റിനാര്‍ക്കോട്ടിക് വിഭാഗം പിടികൂടിയത്. 226 കിലോ ഹാഷിഷ്, മയക്കുമരുന്ന് ഗുളിഗകള്‍, സൈകോട്രോപിക് മരുന്നുകള്‍ എന്നിവയാണ് കണ്ടെടുത്തത്. രാജ്യത്തെ തുറമുഖം വഴി കടത്താനുള്ള പദ്ധതിയാണ് പൊലീസ് തകര്‍ത്തത്.

മയക്കുമരുന്ന് കടത്ത് സംഘത്തെ കുറിച്ച് ലഭിച്ച വിവരത്തിന്റെ അടിസ്ഥാനത്തില്‍ പൊലീസ് കൃത്യമായ നിരീക്ഷണം നടത്തിയാണ് സംഘത്തെ പിടികൂടിയത്. ഏഷ്യന്‍ പൗരന്മാരായ മൂന്ന് പേരാണ് പിടിയിലായതെന്ന് പൊലീസ് അറിയിച്ചു. അന്താരാഷ്ട്ര മയക്കുമരുന്ന് സംഘവുമായിച്ചേര്‍ന്നായിരുന്നു മൂന്നുപേരടങ്ങുന്ന സംഘത്തിന്റെ പ്രവര്‍ത്തനമെന്ന് ഷാര്‍ജ പൊലീസ് ഡെപ്യൂട്ടി കമാന്‍ഡര്‍ ഇന്‍ ചീഫ് മേജര്‍ ജനറല്‍ അബ്ദുല്ല മുബാറക് ബിന്‍ അമേര്‍ പറഞ്ഞു. പ്രതികളെ പിടികൂടാനുള്ള പോലീസ് സേനയുടെ പ്രയത്‌നത്തെ അദ്ദേഹം അഭിനന്ദിച്ചു.

രാജ്യത്തിനുപുറത്തുള്ള വിതരണക്കാര്‍ യുഎഇയിലേക്ക് മയക്കുമരുന്ന് കടത്താനും വില്‍ക്കാനും ശ്രമിക്കുന്നുണ്ടെന്ന് ഷാര്‍ജ പൊലീസ് ആന്റി നാര്‍ക്കോട്ടിക് വിഭാഗം ഡയറക്ടര്‍ കേണല്‍ മജീദ് സുല്‍ത്താന്‍ അല്‍ അസം വ്യക്തമാക്കി. മയക്കുമരുന്നുസംഘത്തെ തിരിച്ചറിയാനും അവരുടെ പ്രവര്‍ത്തനങ്ങള്‍ നിരീക്ഷിക്കാനുമായി പൊലീസിലെ ഡ്രഗ് കണ്‍ട്രോള്‍ അഡ്മിനിസ്‌ട്രേഷന്‍ ഡിസ്ട്രക്റ്റീവ് സ്റ്റോണ്‍ എന്ന പേരില്‍ ഓപ്പറേഷന്‍ ആരംഭിച്ചതായും അല്‍ അസം അറിയിച്ചു.