രാജ്യാന്തര വിപണിയുടെ ചുവടുപിടിച്ച് യുഎഇയിലും സ്വര്‍ണ്ണവിലയില്‍ വന്‍ വര്‍ദ്ധന.ഇരുപത്തിനാല് ക്യാരറ്റ് സ്വര്‍ണ്ണത്തിന്റെ വില 311 ദിര്‍ഹം ഇരുപത്തിയഞ്ച് ഫില്‍സായി ഉയര്‍ന്നു.ഒരു ദിവസത്തിനിടയില്‍ മാത്രം ആറ് ദിര്‍ഹത്തിലധികം ആണ് വര്‍ദ്ധന.
വിലയില്‍ പുതിയ പുതിയ ഉയരങ്ങള്‍ താണ്ടുകയാണ് സ്വര്‍ണ്ണം.ഇരുപത്തിരണ്ട് ക്യാരറ്റ് സ്വര്‍ണ്ണത്തിന്റെ വില 288 ദിര്‍ഹമായിട്ടാണ് ഇന്ന് ഉയര്‍ന്നത്. ഇരുപത്തിയൊന്ന് ക്യാരറ്റിന് 279 ദിര്‍ഹവും പതിനെട്ട് ക്യാരറ്റിന് 239 ദിര്‍ഹവും ആണ് യുഎഇ വിപണിയില്‍ ഇന്ന് വില.രാജ്യാന്തരവിപണിയില്‍ ഔണ്‍സ്വര്‍ണ്ണത്തിന്റെ വില 2570 ഡോളറിലേക്ക് വരെ ഉയര്‍ന്നു.

അമേരിക്കയില്‍ നിന്നും സാമ്പത്തിക റിപ്പോര്‍ട്ടുകള്‍ സ്വര്‍ണ്ണവിലയില്‍ പെട്ടെന്നുള്ള വര്‍ദ്ധനവിന് കാരണം. അമേരിക്ക സാമ്പത്തിക രംഗം മാന്ദ്യത്തിലേക്ക് സംശയിക്കുന്ന റിപ്പോര്‍ട്ടുകള്‍ ആണ് കഴിഞ്ഞ ദിവസം പുറത്ത് വന്നത്.തൊഴിലില്ലായ്മ ഉയര്‍ന്നതും പണപ്പെരുപ്പം പ്രതീക്ഷിച്ചതിലും താഴെയായതും അമേരിക്കന്‍ സമ്പദ് രംഗത്തിന് നല്ല സൂചനയല്ല നല്‍കുന്നത്. ഈ സാഹചര്യത്തില്‍ അമേരിക്കന്‍ കേന്ദ്രബാങ്ക് പലിശ നിരക്കുകള്‍ അടുത്ത യോഗത്തില്‍ കുറച്ചേക്കും എന്നാണ് സൂചന.ഒറ്റയടിക്ക് പലിശനിരക്ക് കുറയ്ക്കാന്‍ ഫെഡറല്‍ റിസര്‍വ് തീരുമാനിക്കില്ലെങ്കിലും ചെറിയൊരു കുറവ് പോലും സ്വര്‍ണ്ണവിലയെ സ്വാധീനിക്കും.കൂടുതല്‍ നിക്ഷേപകര്‍ സ്വര്‍ണ്ണത്തിലേക്ക് എത്തുന്നതോടെ വില വീണ്ടും കൂടും.

സെപ്റ്റംബര്‍ പതിനേഴ് പതിനെട്ട് തീയതികളില്‍ ആണ് അമേരിക്കന്‍ ഫെഡറല്‍ റിസര്‍വിന്റെ നിര്‍ണ്ണായക യോഗം.തീരുമാനങ്ങള്‍ സെപ്റ്റംബര്‍ പതിനെട്ടിന് പ്രഖ്യാപിക്കും.

യുഎഇ തലസ്ഥാനമായ അബുദബിയില്‍ എണ്ണഖനനം നടത്തുന്നതിന് ഇന്ത്യന്‍ കമ്പനികള്‍ക്ക് അനുമതി. ഇന്ത്യന്‍ പൊതുമേഖലാ സംരംഭമായ ഊര്‍ജ ഭാരതിന് ആണ് അബുദബിയില്‍ എണ്ണ ഉത്പാദനം ആരംഭിക്കുന്നതിന് അനുമതി ലഭിച്ചിരിക്കുന്നത്. റുവൈസ് മേഖലയില്‍ ആണ് ഇന്ത്യന്‍ കമ്പനികള്‍ക്ക് എണ്ണഖനനം നടത്തുന്നതിന് അവകാശം ലഭിച്ചിരിക്കുന്നത്.

ഇന്ത്യന്‍ ഓയില്‍ കോര്‍പ്പറേഷന്റെയും ഭാരത് പെട്രോളിയത്തിന്റെയും സംയുക്ത സംരംഭമായ ഊര്‍ജ ഭാരത് പ്രൈവറ്റ് ലിമിറ്റഡിന് ആണ് അബുദബിയില്‍ എണ്ണ ഉത്പാദനം നടത്തുന്നതിന് അനുമതി ലഭിച്ചിരിക്കുന്നത്. അബുദബി സുപ്രീംകൗണ്‍സില്‍ ഫോര്‍ ഫിനാന്‍ഷ്യല്‍ ആന്റ് എക്കണോമിക്ക് അഫയേഴ്‌സ് ആണ് ഊര്‍ജ ഭാരതിന് ഉത്പാദന അനുമതി നല്‍കിയതായി പ്രഖ്യാപിച്ചത്. അബുദബിയില്‍ എണ്ണ ഉത്പാദനം നടത്തുന്നതിന് ഒരു വിദേശകമ്പനിക്ക് ലഭിക്കുന്ന ആദ്യ സമ്പൂര്‍ണ്ണ കരാറാണ് ഊര്‍ജ ഭാരതുമായുള്ളത്.

റുവൈസിലെ ഓണ്‍ഷോര്‍ ബ്ലോക്ക് ഒന്നില്‍ ആണ് ഇന്ത്യന്‍ കമ്പനിക്ക് ഉത്പാദന അവകാശം ലഭിച്ചിരിക്കുന്നത്. 6162 ചതുരശ്രമീറ്റര്‍ പ്രദേശം ആണ് ഊര്‍ജ്ജ ഭാരത് ലിമിറ്റഡിന് ഖനനത്തിനായി അനുവദിച്ചിരിക്കുന്നത്.അഞ്ച് വര്‍ഷത്തിലധികമായി ഊര്‍ജ ഭാരത് ലിമിറ്റഡ് റുവൈസിലെ ഓണ്‍ഷോര്‍-ബ്ലോക്ക് വണ്ണില്‍ എണ്ണപര്യവേഷണം നടത്തുന്നുണ്ട്. മുപ്പത്തിയെട്ട് ചതുരശ്രകിലോമീറ്റര്‍ പ്രദേശത്തായിരുന്നു പര്യവേഷണങ്ങള്‍.ഇത് വിജയം കണ്ടതോട് കൂടിയാണ് ഉത്പാദന അവകാശം അനുവദിച്ചിരിക്കുന്നത്.എണ്ണശേഖരത്തിന് ഒപ്പം വന്‍തോതില്‍ പ്രകൃതിവാദക ശേഖരവും ഇവിടെ ഉണ്ടെന്നാണ് കണ്ടെത്തല്‍.ഇതുവരെ 164 ദശലക്ഷം ഡോളര്‍ ഊര്‍ജഭാരത് ഇവിടെ നിക്ഷേപിച്ചിട്ടുണ്ട്.ഇന്ത്യ -യുഎഇ ബന്ധത്തില്‍ പുതുചരിത്രം രചിക്കുന്നതാണ് പൊതുമേഖലാ എണ്ണകമ്പനിയ്ക്ക് അബുദബിയില്‍ എണ്ണഉത്പാദനാവകാശം അനുവദിച്ച നടപടി.

ഗാസയില്‍ ഇസ്രയേല്‍ ആക്രമണങ്ങളില്‍ ഗുരുതരമായി പരുക്കേറ്റവരെ അടിയന്തരചികിത്സയ്ക്കായി യുഎഇയില്‍ എത്തിച്ചു.ലോകാരോഗ്യ സംഘടനയുമായി ചേര്‍ന്നാണ് അടിയന്തര ഒഴിപ്പിക്കല്‍.അടിയന്തര ചികിത്സ ആവശ്യമുള്ള തൊണ്ണൂറ്റിയേഴ് പേരെയാണ് അബുദബിയില്‍ എത്തിയത്.

ആക്രമണങ്ങളില്‍ ഗുരുതരമായി പരുക്കേറ്റവരും രോഗികളും കുടുംബങ്ങളും അടക്കം 252 പേരെയാണ് ഇത്തിഹാദ് വിമാനത്തില്‍ ഗാസയില്‍ നിന്നും യുഎഇ അബുദബിയില്‍ എത്തിച്ചത്.ചികിത്സ ആവശ്യമുള്ള 97 പേരും കുടുംബാംഗങ്ങളായ 155 പേരും ആണ് അബുദബിയില്‍ എത്തിയത് സംഘത്തില്‍ 142 പേര്‍ കുട്ടികളാണ്.ഇസ്രയേലിലെ റാമോണ്‍ വിമാനത്താവളത്തില്‍ നിന്നാണ് ഇവരെ യുഎഇയിലേക്ക് കൊണ്ടുവന്നത്.ഖറാം അബു സലാം ക്രോസിംഗ് വഴിയാണ് ഗാസയില്‍ നിന്നും ഇവരെ റാമോണ്‍ വിമാനത്താവളത്തില്‍ എത്തിച്ചത്. ലോകാരോഗ്യസംഘടനയും യുഎഇയും കൈകോര്‍ത്താണ് അടിയന്തര ഒഴിപ്പിക്കല്‍ നടപടി പൂര്‍ത്തിയായത്.

ഇസ്രയേലിലെ റാമോണ്‍ വിമാനത്താവളത്തില്‍ നിന്നും പലസ്തീനികളുമായി യുഎഇയിലേക്ക് പറക്കുന്ന രണ്ടാമത്തെ വിമാനം ആണ് ഇതിനെന്ന് യുഎഇ രാജ്യാന്തരസഹകരണ സഹമന്ത്രി റീം അല്‍ അല്‍ ഹാഷിമി പറഞ്ഞു.അടിയന്തരചികിത്സ ആവശ്യമുള്ളവര്‍ക്ക് അത് വേഗത്തില്‍ ലഭ്യമാക്കുന്നതിന് ആണ് യുഎഇയുടെ ശ്രമം. യുഎഇയ്ക്ക് ഒരിക്കല്‍ കൂടി നന്ദി രേഖപ്പെടുത്തുകയാണെന്ന് ലോകാരോഗ്യസംഘടന മേധാവി ടെട്രോസ് അദാനോ ഗെബ്രിയേസസ് പറഞ്ഞു.ഗാസ യുദ്ധം ആരംഭിച്ചതിന് ശേഷം ഇതുവരെയായി യുഎഇ ചികിത്സ ആവശ്യമുള്ളവരും കുടുംബാംഗങ്ങളും അടക്കം 1917 പേരെയാണ് അബുദബിയില്‍ എത്തിച്ചത്.

ഹരിതോര്‍ജ്ജത്തില്‍ പ്രവര്‍ത്തിക്കുന്ന ബസുകള്‍ നിരത്തിലിറക്കി അബുദബി ഗതാഗത വകുപ്പ്. ഇലക്ട്രിക്-ഹൈഡ്രജന്‍ ബസുകള്‍ ആണ് യുഎഇയുടെ തലസ്ഥാന എമിറേറ്റില്‍ സര്‍വീസ് ആരംഭിച്ചിരിക്കുന്നത്. പരീക്ഷണഘട്ടത്തിന് ശേഷം എമിറേറ്റില്‍ കൂടുതല്‍ ഹരിത ബസുകള്‍ നിരത്തിലിറക്കുന്നതിന് ആണ് പദ്ധതി.അബുദബി മൊബിലിറ്റിയുടെ ഹരിത ബസ് പദ്ധതിക്കാണ് തുടക്കമായിരിക്കുന്നത്. വൈദ്യുതിയിലും ഹൈഡ്രജനിലും പ്രവര്‍ത്തിക്കുന്ന ബസുകള്‍ ആണ് അബുദബിയില്‍ ഇന്ന് സര്‍വീസ് ആരംഭിച്ചിരിക്കുന്നത്. റൂട്ട് 65-ല്‍ ആണ് ആദ്യഘട്ടത്തില്‍ ഗ്രീന്‍ ബസുകള്‍ സര്‍വീസ് നടത്തുന്നത്.

മറീന മാളില്‍ നിന്നും റീം ഐലന്‍ഡിലേക്കാണ് സര്‍വീസ്. ഫോസില്‍ ഇന്ധനത്തില്‍ നിന്നും ഘട്ടംഘട്ടമായി ഹരിതോര്‍ജ്ജത്തിലേക്ക് മാറുന്നതിനുള്ള അബുദബിയുടെ പദ്ധതി പ്രകാരം ആണ് റൂട്ട് 65-ല്‍ ആദ്യഘട്ടത്തില്‍ സര്‍വീസ് നടത്തുന്നത്. 2030-ഓട് കൂടി അബുദബി ഐലന്‍ഡിനെ പൂര്‍ണ്ണമായും പൊതുഗതാഗത ഹരിതമേഖലയാക്കി മാറ്റുകയാണ് ഐടിസിയുടെ ലക്ഷ്യം.പൊതുഗാതഗത്തിന് പൂര്‍ണ്ണമായും ഇലക്ട്രിക്-ഹൈഡ്രജന്‍ ബസുകളിലേക്ക് മാറുന്നതിനാണ് ശ്രമം.

2023-ല്‍ ആണ് അബുദബി ഗതാഗതവകുപ്പ് ഗ്രീന്‍ ബസ് പ്രോഗ്രാമിന് തുടക്കമിട്ടത്. 2025 ജൂണ്‍ വരെയാണ് പരീക്ഷണം തുടരുക.ഈ ഘട്ടത്തില്‍ ബസ് ഡ്രൈവര്‍മാര്‍ അടക്കമുള്ളവര്‍ക്ക് അബുദബി മൊലിറ്റിയുടെ നേതൃത്വത്തില്‍
പരിശീലനം നല്‍കും. പരിശീലനഘട്ടത്തില്‍ പ്രകടനം വിലയിരുത്തിയശേഷമായിരിക്കും ഗ്രീന്‍ബസുകള്‍ വ്യാപിപ്പിക്കുക.പാരിസ് ഉടമ്പടിയുടെ ഭാഗമായി 2050-ഓട് കൂടി കാര്‍ബണ്‍ ബഹിര്‍ഗമനം പൂര്‍ണ്ണമായും ഒഴിവാക്കുക എന്നതാണ് അബുദബിയുടെ ലക്ഷ്യം.

ദുബൈയില്‍ ട്രക്കുകള്‍ അടക്കമുള്ള ഭാരവാഹനങ്ങളുടെ നിരീക്ഷണത്തിന്
സംയുക്ത നീക്കവുമായി പൊലീസും ആര്‍ടിഎയും. സംയുക്ത പെട്രോള്‍ യൂണിറ്റിനാണ് രൂപം നല്‍കിയിരിക്കുന്നത്എമിറേറ്റിലെ ആറ് പ്രധാന റോഡുകളിലെ പരിശോധന ക്യാമ്പയിന്‍ ലക്ഷ്യമിട്ടാണ് ദുബൈ റോഡ്‌സ് ആന്റ് ട്രാന്‍സ്‌പോര്‍ട്ട് അതോറിട്ടിയും പൊലീസും ചേര്‍ന്ന് സംയുക്ത പട്രോള്‍ യൂണിറ്റുകള്‍ക്ക് രൂപം നല്‍കിയിരിക്കുന്നത്.

ഷെയ്ഖ് മുഹമ്മദ് ബിന്‍ സായിദ് റോഡ്, എമിറേറ്റ്‌സ് റോഡ്, അല്‍ഖൈല്‍ റോഡ്, റാസല്‍ഖോര്‍ റോഡ്, അല്‍മക്തും എയര്‍പോര്‍ട്ട് റോഡ്, അബുദബി അല്‍ഐന്‍ റോഡ് എന്നിവിടങ്ങളിലാണ് സംയുക്ത പരിശോധന. ഗതാഗത നിരീക്ഷണം, ഗതാഗതബോധവത്കരണം എന്നിവയും സംയുക്ത നീക്കത്തിന്റെ ഭാഗമായി നടക്കും. ഭാരവാഹനങ്ങള്‍ ഓടിക്കുന്നവര്‍ ഗതാഗത നിയമങ്ങള്‍ കര്‍ശനമായി പാലിക്കണം എന്നും വേഗപരിധി ലംഘിക്കരുതെന്നും ആര്‍ടിഎയും പൊലീസും ആവശ്യപ്പെട്ടു. ദീര്‍ഘദൂര യാത്രകള്‍ക്കിടയില്‍ ആവശ്യമായ വിശ്രമം എടുക്കണം എന്നും വാഹനം കൃത്യമായ ഇടവേളകളില്‍ പരിശോധയ്ക്ക് വിധേയമാക്കണം എന്നും പൊലീസും ആര്‍ടിഎയും ആവശ്യപ്പെട്ടു.

73861 ഭാരവാഹനങ്ങള്‍ ആണ് ദുബൈ ആര്‍ടിഎയില്‍ രജിസ്റ്റര്‍ ചെയ്തിരിക്കുന്നത്.

യുഎഇയില്‍ സ്വര്‍ണ്ണത്തിന്റെ വില വീണ്ടും വര്‍ദ്ധിച്ചു. ഇരുപത്തിനാല് ക്യാരറ്റ് സ്വര്‍ണ്ണത്തിന്റെ വില ഗ്രാമിന് 305 ദിര്‍ഹമായി ഉയര്‍ന്നു. കേരളത്തില്‍ 53720 രൂപയാണ് ഒരു പവന്‍ സ്വര്‍ണ്ണത്തിന്റെ വില.കഴിഞ്ഞ രണ്ട് ദിവസമായി കാര്യമായ മാറ്റമില്ലാതിരുന്ന സ്വര്‍ണ്ണവില ഇന്ന് വീണ്ടും വര്‍ദ്ധന രേഖപ്പെടുത്തിയിരിക്കുകയാണ്.

ഇരുപത്തിരണ്ട് ക്യാരറ്റ് സ്വര്‍ണ്ണം 282 ദിര്‍ഹം അന്‍പത് ഫില്‍സായും ഇരുപത്തിയൊന്ന് ക്യാരറ്റ് സ്വര്‍ണ്ണത്തിന്റെ വില 273 ദിര്‍ഹം അന്‍പത് ഫില്‍സായും വര്‍ദ്ധിച്ചു. രാജ്യാന്തരവിപണിയിലെ ചലനങ്ങള്‍ ആണ് യുഎഇയുടെ ആഭ്യന്തരവിപണിയിലും സ്വര്‍ണ്ണവില വര്‍ദ്ധനയ്ക്ക് കാരണം. 2518 ഡോളറിലേക്കാണ് ഇന്ന് രാജ്യാന്തരവിപണിയില്‍ ഒരു ഔണ്‍സ് സ്വര്‍ണ്ണത്തിന്റെ വില വര്‍ദ്ധിച്ചത്. അമേരിക്ക കേന്ദ്രബാങ്ക് പലിശനിരക്ക് കുറച്ചേക്കും എന്ന പ്രതീക്ഷകളാണ് സ്വര്‍ണ്ണത്തിലേക്ക് കൂടുതല്‍ നിക്ഷേപകരെ എത്തിക്കുന്നതും ആവശ്യകത വര്‍ദ്ധിപ്പിക്കുന്നതും.

സെപ്റ്റംബര്‍ പതിനേഴ് പതിനെട്ട് തീയതികളില്‍ ആണ് അമേരിക്കന്‍ ഫെഡറല്‍ റിസര്‍വിന്റെ നിര്‍ണ്ണായക യോഗം.തീരുമാനങ്ങള്‍ സെപ്റ്റംബര്‍ പതിനെട്ടിന് പ്രഖ്യാപിക്കും.അടിസ്ഥാന പലിശനിരക്കുകള്‍ കുറച്ചേക്കും എന്നാണ് സൂചന.എങ്കില്‍ സ്വര്‍ണ്ണവില വീണ്ടും വര്‍ദ്ധിക്കും.