പതാക ദിനവും, ദേശീയ ദിനവും വിപുലമായി ആഘോഷിക്കാന്‍ ക്യാമ്പയിന്‍ ആരംഭിച്ച് ദുബൈ. ഒരു മാസം നീണ്ടു നില്‍ക്കുന്നതാകും ആഘോഷ പരിപാടികള്‍. സര്‍ക്കാര്‍, അര്‍ദ്ധസര്‍ക്കാര്‍, സ്വകാര്യ സ്ഥാപനങ്ങള്‍ എന്നിവരുടെ പങ്കാളിത്തത്തോടെയാകും പരിപാടികള്‍ സംഘടിപ്പിക്കുക.

നവംബര്‍ മൂന്ന് മുതല്‍ ഡിസംബര്‍ മൂന്ന് വരെ നീണ്ടു നില്‍ക്കുന്നതാണ് ആഘോഷ പരിപാടികള്‍. യുഎഇയുടെ സ്ഥാപക പിതാക്കന്മാരായ ഷെയ്ഖ് സായിദ് ബിന്‍ സുല്‍ത്താന്‍ അല്‍ നഹ്യാന്‍, ഷെയ്ഖ് റാഷിദ് ബിന്‍ സയീദ് അല്‍ മക്തും എന്നിവര്‍ക്കുള്ള ആദരവായാണ് ആഘോഷം നടത്തുന്നത്. ഡിസംബര്‍ 2,3 തിയതികളില്‍ കരിമരുന്ന് പ്രദര്‍ശനം നടത്തും. ജെബിആര്‍ ബീച്ച്, അല്‍ സീഫ്, ഹത്ത, ദുബൈ ഫെസ്റ്റിവല്‍ സിറ്റി, തുടങ്ങിയ സ്ഥലങ്ങളിലാണ് പ്രദര്‍ശനം ഒരുക്കുക. ഹത്തയില്‍ പരമ്പരാഗത നൃത്ത, സംഗീത പരിപാടികളും സംഘടിപ്പിക്കും. ഗ്ലോബല്‍ വില്ലേജില്‍ എല്ലാ ദിവസവും പ്രത്യേക പരിപാടികള്‍ നടത്തും. ബീച്ച് കാന്റീന്‍, റൈപ്പ് മാര്‍ക്കറ്റ്, വിന്റര്‍ വണ്ടര്‍ലാന്‍ഡ് എന്നിവയുള്‍പ്പെടെ നിരവധി സീസണല്‍ മാര്‍ക്കറ്റുകള്‍ ആഘോഷങ്ങളുടെ ഭാഗമാകും.

ഡിസംബര്‍ 2 ന് സിറ്റി വാക്കില്‍ യൂണിയന്‍ ഡേ പരേഡ് നടക്കും, എമിറേറ്റിലെ പ്രധാന സാംസ്‌കാരിക കേന്ദ്രങ്ങളില്‍ പ്രത്യേക പരിപാടികള്‍ സംഘടിപ്പിക്കും. രാജ്യത്തെ ഏറ്റഴും വലിയ ഓപ്പണ്‍ ഹെറിറ്റേജ് മ്യൂസിയമായ അല്‍ ഷിന്ദഗ മ്യൂസിയത്തില്‍ രാജ്യത്തിന്റെ പൈതൃകവും ചരിത്ര പ്രാധാന്യവും നിറഞ്ഞ വിവിധ പരിപാടികള്‍ ഒരുക്കും. താമസക്കാര്‍ക്കും സന്ദര്‍ശകര്‍ക്കും ഒരു പോലെ ആഘോഷങ്ങളുടെ ഭാഗമാകാന്‍ കഴിയുന്ന തരത്തിലാണ് പരിപാടികള്‍ ഒരുക്കുക എന്ന് ദുബൈ രണ്ടാം ഉപഭരണാധികാരിയും ദുബൈ മീഡിയ കൗണ്‍സില്‍ ചെയര്‍മാനുമായ ഷെയ്ഖ് അഹമ്മദ് ബിന്‍ മുഹമ്മദ് ബിന്‍ റാഷിദ് അല്‍ മക്തും പറഞ്ഞു.

ദുബൈയുടെ വ്യോമയാനമേഖലയില്‍ ഏതാനും വര്‍ഷങ്ങള്‍ക്കുള്ളില്‍ ഒന്നരലക്ഷത്തിലധികം തൊഴിലവസരങ്ങള്‍ തുറക്കുമെന്ന് പഠന റിപ്പോര്‍ട്ട്.അല്‍മക്തും വിമാനത്താവള വികസനം ആണ് പ്രധാനമായും പുതിയ തൊഴിലവസരങ്ങള്‍ സൃഷ്ടിക്കുക.രാജ്യാന്തരഗവേഷണ സ്ഥാപനമായ ഓക്‌സ്‌ഫോഡ് എക്ക്‌ണോമിക്‌സിന്റെ റിപ്പോര്‍ട്ടില്‍ ആണ് ഇക്കാര്യം വ്യക്തമാക്കുന്നത്.

2030-ഓട് കൂടി 185000 പുതിയ തൊഴിലവസരങ്ങള്‍ കൂടി തുറക്കും എന്നാണ് ഓക്‌സഫോഡ് എക്ക്‌ണോമിക്‌സിന്റെ റിപ്പോര്‍ട്ടില്‍ പറയുന്നത്. വ്യോമയാന മേഖലയുമായി ബന്ധപ്പെട്ട് ദുബൈയില്‍ തൊഴിലെടുക്കുന്നവരുടെ എണ്ണം 816000-ആയും വര്‍ദ്ധിക്കും.കോവിഡ് മഹാമാരിക്കാലത്തിന് ശേഷം ദുബൈയുടെ വ്യോമയാന മേഖല ശക്തമായ തിരിച്ചുവരവാണ് നടത്തിയിരിക്കുന്നത്.ദുബൈ എയര്‍ലൈനുകളായ എമിറേറ്റ്‌സും ഫ്‌ളൈ ദുബൈയും കോടിന് ശേഷം വന്‍തോതിലാണ് ജീവനക്കാരുടെ എണ്ണവും റൂട്ടുകളും വര്‍ദ്ധിപ്പിക്കുന്നത്.ലോകത്തിലെ ഏറ്റവും വലിയ വിമാനത്താവളം ദുബൈയില്‍ തുറക്കുന്നതിനുള്ള തയ്യാറെടുപ്പുകളിലാണ് ഭരണകൂടം.

നിലവിലുള്ള ദുബൈ വിമാനത്താവളത്തിന്റെ അഞ്ചിരട്ടി വലിപ്പമുള്ള വിമാനത്താവളം ആണ് അല്‍മക്തുമില്‍ നിര്‍മ്മിക്കുന്നത്.ദുബൈയുടെ വ്യോമയാന മേഖലയുടെ കുതിപ്പില്‍ നിര്‍ണ്ണായകമാകും എന്നാണ് ഓക്‌സഫോഡ് എക്ക്‌ണോമിക്‌സിന്റെ റിപ്പോര്‍ട്ടില്‍ പറയുന്നത്. ദുബൈയുടെ ജിഡിപിയിലേക്ക് 610 കോടി ദിര്‍ഹത്തിന്റെ സംഭവന പുതിയ വിമാനത്താവളം നല്‍കും. പുതിയ വിമാനത്താവളത്തോട് അനുബന്ധിച്ച് മാത്രം 132000 തൊഴിലവസരങ്ങള്‍ തുറക്കപ്പെടും. ദുബൈ വിമാനകമ്പനിയായ എമിറേറ്റിസില്‍ നിലവില്‍ 103000 ജീവനക്കാരാണുള്ളത്. ഇരുപത്തിയേഴായിരത്തോളം പേര്‍ക്ക് കൂടി തൊഴില്‍ നല്‍കുന്നതിന് ആണ് എമിറേറ്റ്‌സിന്റെ ശ്രമം.

ഇന്ത്യന്‍ രൂപയുമായുള്ള യുഎഇ ദിര്‍ഹം അടക്കമുള്ള ഗള്‍ഫ് കറന്‍സികളുടെ വിനിമയ നിരക്കില്‍ വീണ്ടും വര്‍ദ്ധന. ഒരു ദിര്‍ഹത്തിന്റെ വിനിമയ നിരക്ക് ഇന്ന് 22 രൂപ തൊണ്ണൂറ് പൈസ എന്ന നിലയിലേക്ക് വരെ ഉയര്‍ന്നു.

ഇന്ത്യന്‍ രൂപയുടെ മൂല്യം തുടര്‍ച്ചയായി ഇടിയുന്നതാണ് പ്രവാസികള്‍ നാട്ടിലേക്ക് അയക്കുന്ന പണത്തിന് ഉയര്‍ന്ന വിനിമയ നിരക്ക് ലഭിക്കുന്നത്. ഡോളറിന 84-ന് മുകളിലാണ് നിലവില്‍ ഇന്ത്യന്‍ രൂപയുടെ മൂല്യം. രൂപ-ദിര്‍ഹം വിനിമയ നിരക്ക് 22.90 എന്ന നിലയിലേക്ക് വരെ ഉയര്‍ന്നിരുന്നു.പിന്നീട് അത് താഴ്‌ന്നെങ്കിലും 22.80 ന് മുകളിലാണ് നിലവില്‍ വിനിമയ നിരക്ക്.

ഇന്നലെ 84.08 എന്ന നിലയിലേക്ക് ഇന്ത്യന്‍ രൂപയൂടെ മൂല്യം താഴ്ന്നിരുന്നു.നവംബറില്‍ നടക്കാന്‍ പോകുന്ന അമേരിക്കന്‍ തെരഞ്ഞെടുപ്പും ഫെഡറല്‍ റിസര്‍വ് തീരുമാനങ്ങളും എല്ലാം യു.എസ് ഡോളറിന് കൂടുതല്‍ കരുത്ത് പകരുന്നുണ്ട്. ഇതാണ് ഇന്ത്യന്‍ രൂപയുടെ മൂല്യത്തില്‍ പ്രതിഫലിക്കുന്നത്.

ദുബൈയില്‍ മൂന്ന് മാളുകളില്‍ കൂടി പണമടച്ചുള്ള പാര്‍ക്കിങ് ഏര്‍പ്പെടുത്തുന്നതിന് തീരുമാനം. മാള്‍ ഓഫ് എമിറേറ്റ്‌സ്, ദെയ്‌റ സിറ്റി സെന്റര്‍, മിര്‍ദിഫ് സിറ്റി സെന്റര്‍ എന്നിവിടങ്ങളിലാണ് പണമടച്ചുള്ള പാര്‍ക്കിംഗ് ഏര്‍പ്പെടുത്തുന്നത്. പാര്‍ക്ക് ഇന്‍ കമ്പനിയാണ് പുതിയ പണമടച്ചുള്ള പാര്‍ക്കിംഗ് ഏര്‍പ്പെടുത്തുക.എമിറേറ്റിലെ മൂന്ന് മാളുകളില്‍ കൂടിയാണ് പണമടച്ചുള്ള പാര്‍ക്കിങ് സംവിധാനം ഏര്‍പ്പെടുത്തുന്നത്. മാള്‍ ഓഫ് എമിറേറ്റ്‌സ്, ദെയ്‌റ സിറ്റി സെന്റര്‍, മിര്‍ദിഫ് സിറ്റി സെന്റര്‍ എന്നിവിടങ്ങളിലാണ് പുതിയ പാര്‍ക്കിംഗ് സംവിധാനം നിലവില്‍ വരിക.

അടുത്ത വര്‍ഷം ജനുവരി ഒന്ന് മുതല്‍ പാര്‍ക്കിങ് നിലവില്‍ വരും. ദുബൈയില്‍ പൊതു സ്ഥലങ്ങളിലെ പാര്‍ക്കിങ് നിയന്ത്രിക്കുന്ന പാര്‍ക്ക് ഇന്‍ കമ്പനിയാണ് മാളുകളിലെ പാര്‍ക്കിങ് നിയന്ത്രിക്കുന്നത്. മാളുകളില്‍ എത്തുന്നവര്‍ക്ക് മറ്റ് തടസ്സങ്ങളില്ലാതെ പാര്‍ക്കിങിന് സൗകര്യമൊരുക്കും. മൂന്ന് മാളുകളിലായി 21,000 പാര്‍ക്കിങ് സ്ഥലങ്ങളാണുള്ളത്. പ്രതിവര്‍ഷം 20 ദശലക്ഷത്തിലധികം വാഹനങ്ങള്‍ക്ക് പാര്‍ക്കിങ് ലഭിക്കും. പാര്‍ക്കിങ് മേഖലയിലേക്ക് പ്രവേശിക്കുന്ന സ്ഥലത്ത് വാഹനത്തിന്റെ നമ്പര്‍ പ്ലേറ്റുകള്‍ ക്യാമറകള്‍ സ്‌കാന്‍ ചെയ്യും.

തുടര്‍ന്ന് എസ്എംഎസ് മുഖേനെ പാര്‍ക്കിങ് ഫീസ് വിശദാംശങ്ങള്‍ ലഭിക്കും. ആവശ്യമായ സമയം തിരഞ്ഞെടുത്ത ശേഷം എസ്എംഎസ് വഴിയും പാര്‍ക്ക് ഇന്നിന്റെ വെബ്‌സൈറ്റ് വഴിയും പണം അടക്കാം. പുതിയ സ്മാര്‍ട്ട് സംവിധാനം വഴി സുഗമമായ പാര്‍ക്കിങ് സാധ്യമാകുമെന്ന് പാര്‍ക്ക് ഇന്‍ സിഇഒ മുഹമ്മദ് അബ്ദുള്ള അല്‍ അലി പറഞ്ഞു.

യുഎഇയില്‍ കുതിപ്പ് തുടര്‍ന്ന് സ്വര്‍ണ്ണവില. ഇരുപത്തിരണ്ട് ക്യാരറ്റ് സ്വര്‍ണ്ണത്തിന്റെ വില 308 ദിര്‍ഹത്തിന് മുകളിലെത്തി.രാജ്യാന്തര സാഹചര്യങ്ങള്‍ ആണ് സ്വര്‍ണ്ണവിലയിലെ കുതിപ്പിന് കാരണം.

മുന്നൂറും കടന്ന് കുതിക്കുകയാണ് യുഎഇയില്‍ വിപണിയില്‍ സ്വര്‍ണ്ണവില. ഇരുപത്തിരണ്ട് ക്യാരറ്റ് സ്വര്‍ണ്ണത്തിന്റെ വില 308 ദിര്‍ഹം ഇരുപത്തിയഞ്ച് ഫില്‍സായും ഇരുപത്തിനാല് ക്യാരറ്റ് സ്വര്‍ണ്ണത്തിന്റെ വില മുന്നൂറ്റിമുപ്പത്തിമൂന്ന് ദിര്‍ഹമായും ഇന്ന് ഉയര്‍ന്നു.298 ദിര്‍ഹം അന്‍പത് ഫില്‍സ് ആണ് ഇരുപത്തിയൊന്ന് ക്യാരറ്റ് സ്വര്‍ണ്ണത്തിന്റെ യുഎഇ വിപണിയിലെ വില.രാജ്യാന്തര തലത്തില്‍ സ്വര്‍ണ്ണത്തിലേക്ക് കൂടുതല്‍ നിക്ഷേപം ഒഴുകിയെത്തുന്നത് വില വര്‍ദ്ധനയ്ക്ക് കാരണം.

ഒരൗണ്‍സ് സ്വര്‍ണ്ണത്തിന്റെ വില 2750 ഡോളറിലേക്ക് വരെ ഇന്ന് ഉയര്‍ന്നിരുന്നു. അമേരിക്കന്‍ ഫെഡറല്‍ റിസര്‍വ് അടിസ്ഥാന പലിശനിരക്കുകളില്‍ വരും മാസങ്ങളില്‍ വീണ്ടും കുറവ് വരുത്തും എന്ന പ്രതീക്ഷകളാണ് സ്വര്‍ണ്ണത്തിലേക്ക് കൂടുതല്‍ നിക്ഷേപകരം എത്തിക്കുന്നത്.നവംബറില്‍ നടക്കാന്‍ പോകുന്ന അമേരിക്കന്‍ പ്രസിഡന്റ് തെരഞ്ഞെടുപ്പും സ്വര്‍ണ്ണവിലയെ സ്വാധീനിക്കുന്നുണ്ട്.