ഖത്തര്‍ അമീര്‍ ഷെയ്ഖ് തമീം ബിന്‍ ഹമദ് അല്‍ താനിയുമായി കൂടിക്കാഴ്ച നടത്തി യുഎഇ പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്‍.ഇറാന്‍ ഇസ്രയേല്‍ വെടിനിര്‍ത്തല്‍ അടക്കമുള്ള വിഷയങ്ങള്‍ കൂടിക്കാഴ്ച്ചയില്‍ ചര്‍ച്ചയായി.
ദോഹയില്‍ ആയിരുന്നു യുഎഇ പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്റെയും ഖത്തര്‍ അമീര്‍ ഷെയ്ഖ് തമീം ബിന്‍ ഹമദ് അല്‍താനിയുടെയും കൂടിക്കാഴ്ച്ച.ഇറാന്‍-ഇസ്രയേല്‍ വെടിനിര്‍ത്തല്‍ കരാര്‍ സാധ്യമാക്കുന്നതിന് ഖത്തര്‍ അമീര്‍ നടത്തിയ ശ്രമങ്ങളെ യുഎഇ ഭരണാധികാരി പ്രശംസിച്ചു.കഴിഞ്ഞ ദിവസം ഉണ്ടായ ആക്രമണത്തിന്റെ പശ്ചാത്തലത്തില്‍ ഖത്തറിനും ഖത്തര്‍ ജനതയ്ക്കുമുള്ള ഐക്യദാര്‍ഢ്യവും യുഎഇ പ്രസിഡന്റ് ഷെയ്ഖ് തമീം ബിന്‍ ഹമദ് അല്‍ താനിയെ അറിയിച്ചു.
ഖത്തരി ജനതയോടുള്ള യുഎഇയുടെ വൈകാരിക ബന്ധത്തിന് ഷെയ്ഖ് തമീം നന്ദി അറിയിച്ചതായും ഔദ്യോഗിക വാര്‍ത്താ ഏജന്‍സി അറിയിച്ചു.യുഎഇയും ഖത്തറും തമ്മിലുള്ള ബന്ധവും സഹകരണവും പശ്ചിമേഷ്യയിലെ ഏറ്റവും പുതിയ സംഭവവികാസങ്ങളും കൂടിക്കാഴ്ച്ചയില്‍ ചര്‍ച്ചയായി.ഖത്തര്‍ പ്രധാനമന്ത്രി ഷെയ്ഖ് മുഹമ്മദ് ബിന്‍ അബ്ദുള്‍ റഹ്‌മാന്‍ അല്‍ താനി ,ദുബൈ കിരീടവകാശിയും യുഎഇ ഉപപ്രധാനമന്ത്രിയുമായ ഷെയ്ഖ് ഹംദാന്‍ ബിന്‍ മുഹമ്മദ് ബിന്‍ റാഷിദ് അല്‍ മക്തും എന്നിവരടക്കമുള്ള പ്രതിനിധി സംഘവും കൂടിക്കാഴ്ച്ചയില്‍ പങ്കെടുത്തു.
