ദുബൈയില്‍ താമസ കെട്ടിടങ്ങളിലെ അനധികൃത പാര്‍ട്ടീഷനുകള്‍ക്കെതിരെ വ്യാപക പരിശോധയുമായി മുനിസിപ്പാലിറ്റി. ജനസാന്ദ്രതയേറിയ പ്രദേശങ്ങളിലാണ് ആദ്യഘട്ടത്തില്‍ പരിശോധന നടത്തുന്നത്. മലയാളികള്‍ ഉള്‍പ്പെടെയുള്ള നിരവധി പ്രവാസികള്‍ക്ക് തിരിച്ചടിയാകും മുനിസിപ്പാലിറ്റിയുടെ തീരുമാനം.
താമസ കെട്ടിടങ്ങളില്‍ അനധികൃതമായി കൂടുതല്‍ ആളുകളെ താമസിപ്പിക്കുന്നത് അപകട സാധ്യത വര്‍ദ്ധിപ്പിക്കുന്നതായി ദുബൈ മുനിസിപ്പാലിറ്റി അറിയിച്ചു. മലയാളികള്‍ ഏറെ തിങ്ങിപ്പാര്‍ക്കുന്ന കരാമയിലും യൂണിയന്‍, അല്‍ബര്‍ഷ എന്നിവ ഉള്‍പ്പെടുന്ന മേഖലകളിലാണ് ആദ്യഘട്ടം പരിശോധന നടത്തുന്നത്. അല്‍ റിഗ്ഗ, മുറാഖാബാത്, അല്‍ ബര്‍ഷ, സത്വ, അല്‍ റഫ എന്നിവിടങ്ങളിലാണ് ആദ്യഘട്ട പരിശോധന. കെട്ടിട ഉടമകള്‍ക്ക് നേരത്തെ മുന്നറിയിപ്പ് നല്‍കിയിരുന്നു. പരിശോധയില്‍ അനധികൃത പാര്‍ട്ടിഷനുകള്‍ കണ്ടെത്തിയാല്‍ കനത്ത പിഴ ഈടാക്കും. ദുബൈ മുനിസിപ്പാലിറ്റി, ദുബൈ ലാന്‍ഡ് ഡിപ്പാര്‍ട്ട്്‌മെന്റ്, സിവില്‍ ഡിഫന്‍സ് എന്നിവര്‍ ചേര്‍ന്നാണ് പരിശോധന നടത്തുന്നത്. പാര്‍ട്ടീഷന്‍ മുറികളില്‍ ബാച്ചിലേഴ്‌സും, കുടുംബങ്ങളും ഉള്‍പ്പെടെ നിരവധി ആളുകള്‍ താമസിക്കുന്നതായാണ് മുനിസിപ്പാലിറ്റിയുടെ കണ്ടെത്തല്‍. ഫ്‌ളാറ്റുകളില്‍ അധികമായി മുറികള്‍ തിരിക്കുന്നതിന് മുനിസിപ്പാലിറ്റിയുടെ അനുമതി നിര്‍ഡബന്ധമാണ്. താമസ കെട്ടിടങ്ങളില്‍ ബെഡ് സ്‌പേസുകള്‍ നല്‍കുന്നതിനും പ്രത്യേകം അനുമതി വാങ്ങണം. നിയമവിരുദ്ധമായി താമസ സൗകര്യമൊരുക്കുന്ന ഫ്‌ളാറ്റ് ഉടമകള്‍ക്കെതിരെ കനത്ത പിഴ ഈടാക്കുന്നതിനാണ് തീരുമാനം.
