പലസ്തീനികളെ കുടിയൊഴിപ്പിക്കുന്നതിനുള്ള ഒരു നീക്കത്തോടും യോജിക്കാനാവില്ലെന്ന് അമേരിക്കയെ അറിയിച്ച് യുഎഇ.അമേരിക്കന്‍ വിദേശകാര്യസെക്രട്ടറി മാര്‍ക്കോ റൂബിയോയെ പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്‍ ആണ് യുഎഇയുടെ നിലപാട് അറിയിച്ചത്.അബുദബിയില്‍ ആയിരുന്നു കൂടിക്കാഴ്ച

പശ്ചിമേഷ്യന്‍ സന്ദര്‍ശനത്തിന്റെ ഭാഗമായി സൗദി അറേബ്യയില്‍ നിന്നാണ് അമേരിക്കന്‍ വിദേശകാര്യസെക്രട്ടറി മാര്‍ക്കോ റൂബിയോ യുഎഇയില്‍ .പലസ്തീനികളെ അവരുടെ ഭൂമിയില്‍ നിന്നും കുടിയിറക്കുന്നത് ലക്ഷ്യമിട്ടുള്ള ഏതൊരു നീകത്തേയും നിരസിക്കുന്നതായി യുഎഇ പ്രസിഡന്റ് നിലപാട് വ്യക്തമാക്കി.മേഖലയെ സമാധാനത്തിലേക്ക് നയിക്കുന്നതിന് ദ്വിരാഷ്ട്രപരിഹാരം അടിസ്ഥാനമാക്കിയുള്ള ശ്രമങ്ങള്‍ ആണ് വേണ്ടത്.ഗാസയുടെ പുനര്‍നിര്‍മ്മാണവും പ്രശ്‌നപരിഹാരശ്രമങ്ങളുടെ ഭാഗമാകണം എന്നും ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്‍ ആവശ്യപ്പെട്ടു.
മേഖലയുടെ സമാധാനത്തിന് ഭീഷണിയാകും വിധം സംഘര്‍ഷം വ്യാപിക്കുന്നത് തടയണം എന്നും യുഎഇ പ്രസിഡന്റ് വ്യക്തമാക്കി.

അധിനിവേശ പലസ്തീന്‍ പ്രദേശത്തെ സംഭവവികാസങ്ങളും ഗാസ പ്രതിസന്ധി പരിഹരിക്കുന്നതിനുള്ള ശ്രമങ്ങള്‍ അടക്കമുള്ള വിഷയങ്ങള്‍ നേതാക്കളുടെ കൂടിക്കാഴ്ച്ചയില്‍ ചര്‍ച്ചയായെന്നും യുഎഇയുടെ ഔദ്യോഗിക വാര്‍ത്താ ഏജന്‍സിയായ വാം റിപ്പോര്‍ട്ട് ചെയ്തു.പലസ്തീനികളെ ഒഴിപ്പിച്ച് ഗാസ വികസിപ്പിക്കും എന്ന അമേരിക്കന്‍ പ്രസിഡന്റ് ഡൊണള്‍ഡ് ട്രംപിന്റെ പ്രസ്താവന തള്ളി യുഎഇ നേരത്തെ തന്നെ രംഗത്ത് എത്തിയിരുന്നു.പലസ്തീനികള്‍ക്ക് സ്വന്തമായി രാജ്യം എന്നതാണ് യുഎഇയുടെ എക്കാലത്തേയും നിലപാട്.

റമദാനില്‍ ഭക്ഷണം പാചകം ചെയ്യുന്നതിനും വില്‍ക്കുന്നതിനും പ്രത്യേക പെര്‍മിറ്റ് വാങ്ങണമെന്ന് ഷാര്‍ജ മുനിസിപ്പാലിറ്റി. റസ്റ്ററന്റുകള്‍ക്കും, ഷോപ്പിംഗ് മാളുകള്‍ക്കും രണ്ട് തരത്തിലുള്ള പെര്‍മിറ്റാണ് അനുവദിക്കുക. ഭക്ഷ്യ സുരക്ഷ ഉറപ്പാക്കാന്‍ പരിശോധനയും നടത്തും.

റമദാന്‍ മാസം ഭക്ഷണം പാചകം ചെയ്യുന്നതിനും വില്‍ക്കുന്നതിനുമാണ് ഷാര്‍ജ മുനിസിപ്പാലിറ്റി പ്രത്യേക പെര്‍മിറ്റ് നല്‍കുന്നത്. ഇതിനുള്ള മാദണ്ഡങ്ങളും മുനിസിപ്പാലിറ്റി പുറപ്പെടുവിച്ചു. നോമ്പ് സമയം അവസാനിക്കുന്നതിനു മുമ്പായി റസ്റ്ററന്റുകളുടെ മുന്‍വശത്തായി ഭക്ഷണ സാധനങ്ങള്‍ വെക്കുന്നതിനും വില്‍പന നടത്തുന്നതിനുമാണ് പെര്‍മിറ്റ് അനുവദിക്കുന്നത്. ഷോപ്പിംഗ് മാളുകള്‍ക്കുള്ളിലെ റസ്റ്ററന്റുകള്‍ക്ക് മൂവായിരം ദിര്‍ഹമാണ് പെര്‍മിറ്റ് ഫീസ്. നോമ്പ് സമയം ഭക്ഷണം പുറത്തു നിന്ന് നല്‍കണം. ഡൈനിംഗ് ഏരിയ അനുവദിക്കില്ല. റസ്റ്റോറന്റുകള്‍, കഫറ്റീരിയകള്‍, ബേക്കറികള്‍ എന്നിവയ്ക്ക് അഞ്ഞൂറ് ദിര്‍ഹമാണ് പെര്‍മിറ്റ് ഫീസ്. കടയുടെ മുന്‍വശത്തായി പ്രത്യേകം ഒരുക്കിയ സ്ഥലത്ത് ഭക്ഷണ സാധനങ്ങള്‍ വില്‍പന നടത്തണം. ഗ്ലാസ് ബോക്‌സുകള്‍ക്കുള്ളില്‍ ലോഹ പാത്രങ്ങളില്‍ മാത്രമേ സാധനങ്ങള്‍ സൂക്ഷിക്കാന്‍ പാടുള്ളു.

അലൂമിനിയം ഫോയില്‍ ഉപയോഗിച്ച് ഭക്ഷണ സാധനങ്ങള്‍ മൂടണം. ഉചിതമായ താപനിലയില്‍ ഭക്ഷണ സാധനങ്ങള്‍ സൂക്ഷിക്കണം എന്നീ നിര്‍ദ്ദേശങ്ങളാണ് നല്‍കിയിരിക്കുന്നത്. എമിറേറ്റിലെ വിവിധ സേവന കേന്ദ്രങ്ങള്‍ വഴി പെര്‍മിറ്റിനായി അപേക്ഷിക്കാമെന്നും മുനിസിപ്പാലിറ്റി അറിയിച്ചു.

വ്യക്തികളുടെ മുഖംതിരിച്ചറിയുന്ന സാങ്കേതികവിദ്യ പട്രോള്‍ കാറുകളില്‍ സ്ഥാപിച്ച് ഷാര്‍ജ പൊലീസ്.കുറ്റവാളികളെ വേഗത്തില്‍ കണ്ടെത്തുന്നതിനാണ് നീക്കം.ഡ്രൈവിംഗിനിടയില്‍ മൊബൈല്‍ ഫോണ്‍ ഉപയോഗിക്കുന്നത് അടക്കമുള്ള നിയമലംഘനങ്ങളും പട്രോള്‍ വാഹനങ്ങളിലെ സ്മാര്‍ട്ട് ക്യാമറകളില്‍ പതിയും.

ആര്‍ട്ടിഫിഷ്യല്‍ ഇന്റലിജന്‍സ് സാങ്കേതികവിദ്യയുടെ സഹായത്തോടെ പ്രവര്‍ത്തിക്കുന്ന സ്മാര്‍ട്ട് ക്യാമറകള്‍ ആണ് ഷാര്‍ജ പൊലീസിന്റെ പട്രോള്‍ വാഹനങ്ങളില്‍ സ്ഥാപിച്ചിരിക്കുന്നത്.ഈ ക്യാമറകളിലെ ബയോമെട്രിക് സംവിധാനം വ്യക്തികളുടെ മുഖം തിരിച്ചറിയും.ഷാര്‍ജ പൊലീസ് ഓപ്പറേഷന്‍സ് റൂമിലെ സെന്‍ട്രല്‍ സെര്‍വറുമായി ബന്ധിപ്പിച്ചാണ് സ്മാര്‍ട്ട് ക്യാമറകള്‍ പ്രവര്‍ത്തിക്കുന്നത്.ക്യാമറകളില്‍ നിന്നും ലഭിക്കുന്ന വ്യക്തികളുടെ വിവരങ്ങള്‍ ഇവിടെ അതിവേഗത്തില്‍ വിശകലനം ചെയ്യും.

പൊലീസ് തിരയുന്ന വ്യക്തിയുടേതാണ് ദൃശ്യങ്ങള്‍ എങ്കില്‍ പെട്ടെന്ന് തന്നെ നടപടിക്ക് നിര്‍ദ്ദേശം നല്‍കും.പൊലീസ് തിരയുന്ന വാഹനങ്ങളുടെ നമ്പര്‍ പ്ലേറ്റുകള്‍ തിരിച്ചറിയുന്നതിനും പുതിയ സംവിധാനത്തിന്് ശേഷിയുണ്ട്.വാഹനം ഓടിക്കുമ്പോള്‍ പുകവലിക്കുന്നത്,മൊബൈല്‍ ഫോണ്‍ ഉപയോഗം,അശ്രദ്ധമായ ഡ്രൈവിംഗ് തുടങ്ങിയവയവും പട്രോള്‍ വാഹനങ്ങളിലെ സ്മാര്‍ട്ട് സംവിധാനം കണ്ടെത്തും.പുതിയ സംവിധാനം പരീക്ഷണഘട്ടത്തിലാണെന്നും ഷാര്‍ജ പൊലീസ് അറിയിചചു.

ദുബൈയില്‍ ഇന്നലെ ആരംഭിച്ച ഗള്‍ഫ് ഫുഡില്‍ വന്‍ ശന്ദര്‍ശകത്തിരക്ക്.5000-ല്‍ അധികം പ്രദര്‍ശകരാണ് ഇത്തവണ മേളയില്‍ പങ്കെടുക്കുന്നത്.ഇന്ത്യന്‍ സാന്നിധ്യവും ശക്തമാണ്.ദുബൈ വേള്‍ഡ് ട്രെയ്ഡ് സെന്ററിലാണ് പ്രദര്‍ശനം

ഭക്ഷ്യവിപണന രംഗത്തെ വന്‍കിട കമ്പനികള്‍ മുതല്‍ പുതുതലമുറക്കാര്‍ വരെ ഗള്‍ഫുഡിന്റെ മുപ്പതാം പതിപ്പില്‍ പങ്കെടുക്കുന്നുണ്ട്.ഗള്‍ഫ് ഫുഡിന്റെ ഇതുവരെയുള്ളതിലെ ഏറ്റവും വലിയ പതിപ്പാണ് ഇപ്പോള്‍ നടക്കുന്നത്.ഇരുപത്തിനാല് ഹാളുകളിലായി പതിമൂന്ന് ലക്ഷം ചതുരശ്രയടി വീസ്തീര്‍ണ്ണത്തിലാണ് ഗള്‍ഫ് ഫുഡ് നടക്കുന്നത്.മുഴുവന്‍ ഹാളുകളും തിങ്ങിനിറഞ്ഞാണ് സന്ദര്‍ശകര്‍.യുഎഇ വൈസ്പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തും ആദ്യദിനം ഗള്‍ഫ് ഫുഡില്‍ സന്ദര്‍ശനം നടത്തി.

മേളയില്‍ ഇന്ത്യന്‍ സാന്നിധ്യം എടുത്തുപറയേണ്ടത് തന്നെയാണ്.ഇന്ത്യയില്‍ നിന്നുള്ള 370 കമ്പനികള്‍ ആണ് ഇത്തവണ പങ്കെടുക്കുന്നത്.ഇന്ത്യന്‍ പവലിയന്‍ ഭക്ഷ്യസംസ്‌കരണ മന്ത്രി ചാരാഗ് പാസ്വാന്‍ ആണ് ഉദ്ഘാടനം ചെയ്തത്.ഇത്തവണ ആഖെ 129 രാജ്യങ്ങളില്‍ നിന്നുള്ള കമ്പനികള്‍ ആണ് ഗള്‍ഫ് ഫുഡില്‍ പങ്കെടുക്കുന്നത്.ആകെ 2000 കോടി ഡോളറിന്റെ ഇടപാടുകള്‍ ആണ് ഗള്‍ഫ് ഫുഡിന്റെ ഈ പതിപ്പില്‍ പ്രതീക്ഷിക്കുന്നത്.ഫെബ്രുവരി ഇരുപത്തിയൊന്ന് വെള്ളിയാഴ്ച മേള സമാപിക്കും.

വിമാനടിക്കറ്റുകള്‍ക്ക് വന്‍ നിരക്കിളവ് പ്രഖ്യാപിച്ച് ഷാര്‍ജ എയര്‍ലൈമായ എയര്‍അറേബ്യ.129 ദിര്‍ഹത്തിനാണ് വിമാനടിക്കറ്റുകള്‍ ലഭിക്കുക.നാളെ മുതല്‍ മാര്‍ച്ച് രണ്ട് വരെയാണ് 129 ദിര്‍ഹത്തിന് ടിക്കറ്റുകള്‍ ബുക്ക് ചെയ്യാന്‍ കഴിയുക.എയര്‍അറേബ്യ സര്‍വീസ് നടത്തുന്ന ഏത് നഗരത്തിലേക്കും 129 ദിര്‍ഹത്തിന്റെ ടിക്കറ്റ് ലഭിക്കും.2025 സെപ്റ്റംബര്‍ ഒന്ന് മുതല്‍ 2026 മാര്‍ച്ച് ഇരുപത്തിയെട്ട് വരെയുള്ള കാലയളവിലേക്കാണ് ഈ നിരക്കില്‍ ടിക്കറ്റുകള്‍ ബുക്ക് ചെയ്യാന്‍ കഴിയുക.ആകെ അഞ്ച് ലക്ഷം സീറ്റുകളില്‍ ആണ് നിരക്കിളവില്‍ വിമാനടിക്കറ്റുകള്‍ ലഭ്യമാക്കുന്നത്.

എയര്‍ അറേബ്യുടെ വെബ്‌സൈറ്റ് വഴി ഈ ടിക്കറ്റുകള്‍ ബുക്ക് ചെയ്യാം.യുഎഇയില്‍ ഷാര്‍ജ റാസല്‍ഖൈമ അബുദബി വിമാനത്താവളങ്ങളില്‍ നിന്നും ആണ് എയര്‍അറേബ്യ സര്‍വീസ് നടത്തുന്നത്.കഴിഞ്ഞ വര്‍ഷവും സമാനനിരക്കില്‍ എയര്‍അറേബ്യ ടിക്കറ്റുകള്‍ ലഭ്യമാക്കിയിരുന്നു.

ദുബൈയില്‍ കെട്ടിടവാടക വര്‍ദ്ധനയ്ക്ക് തൊണ്ണൂറ് ദിവസം മുന്‍പ് നോട്ടീസ് നല്‍കണം എന്ന് നിര്‍ദ്ദേശം.ദുബൈയിലെ വാടക സൂചികയുടെ അടിസ്ഥാനത്തില്‍ മാത്രമേ വര്‍ദ്ധന പാടുള്ളുവെന്നും നിര്‍ദ്ദേശത്തില്‍ പറയുന്നുണ്ട്.

പെട്ടെന്നുള്ള വാടകവര്‍ദ്ധന പാടില്ലെന്നാണ് ദുബൈ ലാന്‍ഡ് ഡിപ്പാര്‍ട്ട്‌മെന്റ് കെട്ടിട ഉടമകള്‍ക്കും റിയല്‍എസ്റ്റേറ്റ് സ്ഥാപനങ്ങള്‍ക്കും നല്‍കിയിരിക്കുന്ന നിര്‍ദ്ദേശം.വാടകരാര്‍ കാലാവധിക്ക് തൊണ്ണൂറ് ദിവസം മുന്‍പ് വാടക്കാര്‍ക്ക് നിരക്ക് വര്‍ദ്ധന സംബന്ധിച്ച അറിയിപ്പ് നല്‍കണം എന്നാണ് നിര്‍ദ്ദേശം.ദുബൈയില്‍ ഈ വര്‍ഷത്തിന്റെ തുടക്കത്തില്‍ ലാന്‍ഡ് ഡിപ്പാര്‍ട്ട്‌മെന്റ് പുതിയ വാടകസൂചിക പുറത്തിറക്കിയിരുന്നു.ഇതിന് ഒപ്പം ആണ് മൂന്ന് മാസം മുന്‍പ് നോട്ടീസ് നല്‍കണം എന്ന നിര്‍ദ്ദേശം.താമസകെട്ടിടങ്ങളുടെതാണ് പുതി വാടകസൂചിക.

വാണിജ്യകെട്ടിടങ്ങള്‍ക്കുള്ള പുതി സൂചിക വൈകാതെ പുറത്തിറക്കും എന്നാണ് പ്രതീക്ഷിക്കുന്നത്.ദുബൈയില്‍ ഒന്‍പത് ലക്ഷത്തോളം താമസകെട്ടിട വാടകകരാറുകള്‍ ആണ് 2024-ല്‍ രജിസ്റ്റര്‍ ചെയ്തത്.തൊട്ടുമുന്‍പുള്ള വര്‍ഷത്തെ അപേക്ഷിച്ച് എട്ട് ശതമാനം ആണ് വര്‍ദ്ധന.