ഹമാസ് ആയുധം ഉപേക്ഷിക്കണം എന്ന് പലസ്തീന്‍ പ്രസിഡന്റ് മഹമൂദ് അബ്ബാസ്.ഗാസയുടെ നിയന്ത്രണം പലസ്തീന്‍ അതോറിട്ടിക്ക് കൈമാറാന്‍ ഹമാസ് തയ്യാറകണം എന്നും മഹമൂദ് അബ്ബാസ് ആവശ്യപ്പെട്ടു.അതെസമയം അബ്ബാസിന്റെ പ്രസ്താവന തളളി ഹമാസ് രാഷ്ട്രീയനേതൃത്വം രംഗത്ത് എത്തി.

ഹമാസ് ആയുധം താഴെ വെച്ച് ഒരു രാഷ്ട്രീയപാര്‍ട്ടിയായി മാറണം എന്നാണ് പലസ്തീന്‍ പ്രസിഡന്റ് മഹമ്മൂദ് അബ്ബാസ് ആവശ്യപ്പെട്ടത്.വെസ്റ്റ് ബാങ്കില്‍ ഒരു നേതൃയോഗത്തിലാണ് അബ്ബാസിന്റെ പ്രസ്താവന.ഇസ്രയേലിന് ഗാസയില്‍ ആക്രമണം നടത്തുന്നതിന് ഹമാസ് കാരണങ്ങള്‍ നല്‍കുകയാണ്.ഗാസയുടെ നിയന്ത്രണാധികാരം പലസ്തീന്‍ അതോറിട്ടിക്ക് നല്‍കണം.ഹമാസിന്റെ പക്കലുള്ള ആയുധങ്ങളും അതോറിട്ടിക്ക് കൈമാറണം.ഹമാസ് ബന്ദികളാക്കിയ മുഴുവന്‍ ആളുകളേയും മോചിപ്പക്കണം എന്നും മഹമ്മദ് അബ്ബാസ് ആവശ്യപ്പെട്ടു.2007-ല്‍ ഹമാസ് അധികാരം പിടിച്ചെടുത്തതിന് ശേഷം പലസ്തീന്‍ അതോറിട്ടി വെസ്റ്റ്ബാങ്ക് മാത്രമാണ് നിയന്ത്രിക്കുന്നത്.

2008-ല്‍ ഹമാസ് ഗാസയില്‍ തെരഞ്ഞെടുപ്പിലും വിജയിച്ചു.ഇസ്രയേസുമായി പലസ്തീന്‍ അതോറിട്ടിക്ക് സഹകരിക്കുന്നുവെന്നാണ് ഹമാസിന്റെ ആരോപണം.അതെസമയം ഗാസയുടെ വിവിധ ഭാഗങ്ങളില്‍ ഇസ്രയേല്‍ ആക്രമണം തുടരുകയാണ്.നാല്‍പ്പത്തിയഞ്ച് പേരാണ് ഒടുവില്‍ കൊല്ലപ്പെട്ടത്.നൂറിലധികം പേര്‍ക്ക് പരുക്കേല്‍ക്കുകയും ചെയ്തു.

അന്തരിച്ച ഫ്രാന്‍സിസ് മാര്‍പാപ്പയുടെ സംസ്‌കാരചടങ്ങുകള്‍ ശനിയാഴ്ച നടക്കും എന്ന വത്തിക്കാന്‍.നാളെ സെന്റ് പീറ്റേഴ്‌സ് ബസലിക്കയില്‍ പൊതുദര്‍ശനം ആരംഭിക്കും.മാര്‍പാപ്പയുടെ സംസ്‌കാര ചടങ്ങുകളില്‍ അമേരിക്കന്‍ പ്രസിഡന്റ് ഡൊണള്‍ഡ് ട്രംപ് അടക്കമുള്ള ലോകനേതാക്കള്‍ പങ്കെടുക്കും.

ശനിയാഴ്ച യുഎഇ സമയം പന്ത്രണ്ട് മണിക്ക് ഫ്രാന്‍സിസ് മാര്‍പാപ്പയുടെ സംസ്‌കാരചടങ്ങുകള്‍ ആരംഭിക്കും എന്നാണ് വത്തിക്കാന്റെ അറിയിപ്പ്.ഇന്ന് രാവിലെ കര്‍ദ്ദിനാള്‍മാരുടെ യോഗം ആണ് സംസ്‌കാരചടങ്ങുകള്‍ സംബന്ധിച്ച തീരുമാനം കൈക്കൊണ്ടത്.നാളെ ഭൗതികശരീരം സെന്റ് പീറ്റേഴ്‌സ് ബസലിക്കയില്‍ എത്തിക്കും.ശനിയാഴ്ച വരെ സെന്റ് പീറ്റേഴ്‌സ് ബസലിക്കയില്‍ പൊതുദര്‍ശനം തുടരും.ബസലിക്കയുടെ മുന്‍വശത്തായിരിക്കും സംസ്‌കാരശുശ്രൂഷകള്‍ നടക്കുക.റോമിലെ സെന്റ് മേജര്‍ ബസലിക്കയില്‍ അന്ത്യവിശ്രമസ്ഥലം ഒരുക്കണം എന്നാണ് മാര്‍പാപ്പ മരണപത്രത്തില്‍ പറഞ്ഞിട്ടുള്ളത്.

ശവകൂടീരത്തില്‍ സവിശേഷമായ അലങ്കാരങ്ങളൊന്നും പാടില്ലെന്നും തന്റെ പേര് ലാറ്റിന്‍ ഭാഷയില്‍ ഫ്രാന്‍സിസ് എന്ന് മാത്രം എഴുതിയാല്‍ മതിയെന്നും ഫ്രാന്‍സിസ് മാര്‍പാപ്പ വ്യക്തമാക്കിയിട്ടുണ്ട്. മുന്‍ മാര്‍പാപ്പമാരില്‍ ഭൂരിപക്ഷവും അന്ത്യവിശ്രമം കൊള്ളുന്നത് വത്തിക്കാനിലെ സെന്റ് പീറ്റേഴ്‌സ് ബസിലിക്കയിലാണ്. ഇതില്‍ നിന്ന് വ്യത്യസ്തമായാണ് ഫ്രാന്‍സിസ് മാര്‍പാപ്പയുടെ തീരുമാനം.അമേരിക്കന്‍ പ്രസിഡന്റ് ഡൊണള്‍ഡ് ട്രംപും ഭാര്യയും സംസ്‌കാരചടങ്ങുകളില്‍ പങ്കെടുക്കും എന്ന് വൈറ്റ് ഹൗസ് വ്യക്തമാക്കിയിട്ടുണ്ട്.വിവിധ ലോകനേതാക്കളും സംസ്‌കാരചടങ്ങില്‍ പങ്കെടുക്കാന്‍ വത്തിക്കാനില്‍ എത്തും.ഹൃദയസ്തംഭവനവും സ്‌ട്രോക്കും ആണ് മാര്‍പാപ്പയുടെ മരണകാരണം എന്ന് വത്തിക്കാന്‍ വ്യക്തമാക്കി.

ഗാസയില്‍ രക്ഷാപ്രവര്‍ത്തകരെ ആക്രമിച്ച് കൊലപ്പെടുത്തിയ സംഭവത്തില്‍ തെറ്റ് സമ്മതിച്ച് ഇസ്രയേല്‍ സൈന്യം.സൈനിക ഉദ്യോഗസ്ഥര്‍ക്ക് ജോലിക്കിടയില്‍ പിഴവ് പറ്റിയെന്നാണ് ഇസ്രയേല്‍ സൈന്യത്തിന്റെ അന്വേഷണ റിപ്പോര്‍ട്ട്.ഇതിന്റെ അടിസ്ഥാനത്തില്‍ ഒരു ഡെപ്യുട്ടി കമാന്‍ഡറെ പുറത്താക്കിയെന്നും ഇസ്രയേല്‍ സൈന്യം അറിയിച്ചു.

മാര്‍ച്ച് ഇരുപത്തിമൂന്ന് റഫായ്ക്ക് സമീപം ആരോഗ്യപ്രവര്‍ത്തകരും രക്ഷാപ്രവര്‍ത്തകരുമായ പതിനഞ്ച് പേര്‍ കൊല്ലപ്പെട്ട സംഭവത്തിലാണ് ഇസ്രയേല്‍ തെറ്റുസമ്മതിക്കുന്നത്.ആംബുലന്‍സുകള്‍ ഹമാസിന്റേത് എന്ന് കരുതി വെടിവെയ്ക്കാന്‍ ഡെപ്യൂട്ടി ബറ്റാലിയന്‍ കമാന്‍ഡര്‍ ഉത്തരവിട്ടും എന്നാണ് അന്വേഷണ റിപ്പോര്‍ട്ടില്‍ പറയുന്നത്.ഇക്കാര്യത്തില്‍ സൈനിക ഉദ്യോഗസ്ഥര്‍ക്ക് പിഴവ് പറ്റി.സംഭവത്തില്‍ കമാന്‍ഡിംഗ് ഓഫീസറെ ശാസിക്കുമെന്നും റിപ്പോര്‍ട്ട് വ്യക്തമാക്കുന്നുണ്ട്.ഉത്തരവുകളുടെ ലംഘനം സംഭവം പൂര്‍ണ്ണമായി റിപ്പോര്‍ട്ട് ചെയ്യാതിരിക്കല്‍ തുടങ്ങിയ കുറ്റങ്ങളും അന്വേഷണത്തില്‍ കണ്ടെത്തിയിട്ടുണ്ട്.അതെസമയം തൊട്ടടുത്തുനിന്നാണ് ആക്രമണം നടന്നതെന്ന വാദം റിപ്പോര്‍ട്ട് തളളി.

കൊല്ലപ്പെട്ടവരില്‍ ആറ് പേര്‍ ഹമാസ് പ്രവര്‍ത്തകര്‍ ആണെന്നും റിപ്പോര്‍ട്ടിലുണ്ട്.ഇസ്രയേല്‍ ആക്രമണത്തില്‍ എട്ട് റെഡ്‌ക്രെസന്റ് ജീവനക്കാര്‍,ഗാസ സിവില്‍ ഡിഫന്‍സില്‍ നിന്നുള്ള ആറ് പേര്‍,ഐക്യരാഷ്ട്രസഭയുടെ ഒരു ജീവനക്കാര്‍ എന്നിവരാണ് കൊ്ല്ലപ്പെട്ടത്. മാര്‍ച്ച് ഇരുപത്തിമൂന്നിന് പുലര്‍ച്ചെ പരുക്കേറ്റവര്‍ക്ക് അടിയന്തരസഹായം നല്‍കാന്‍ പോയവരാണ് ആക്രമിക്കപ്പെട്ടത്. തുടര്‍ന്ന് ഇവരെ ആംബുലന്‍സ് അടക്കം മണലില്‍ കുഴിച്ചമൂടി.ഒരാഴ്ച്ചയ്ക്ക് ശേഷം യുഎന്‍ രക്ഷാപ്രവര്‍ത്തകര്‍ ആണ് മൃതദേഹങ്ങള്‍ കണ്ടെത്തിയത്.