യുഎഇയില്‍ തൊഴിലന്വേഷകരെ ലക്ഷ്യമിട്ട് നടത്തുന്ന തട്ടിപ്പുകളില്‍ വീഴരുതെന്ന് മാനവവിഭവശേഷി സ്വദേശിവല്‍ക്കരണ മന്ത്രാലയം മുന്നറിയിപ്പ് നല്‍കി.രാജ്യത്തിനകത്തും പുറത്തുമുള്ള തൊഴില്‍ അന്വേഷകര്‍ റിക്രൂട്‌മെന്റ് നടപടികള്‍ ആരംഭിക്കുന്നതിനമുന്‍പ് ഓഫര്‍ ലെറ്ററിന്റെയും തൊഴിലുടമയുടെയും ആധികാരികത ഉറപ്പാക്കണമെന്ന് മന്ത്രാലയം നിര്‍ദേശിച്ചു .യുഎഇയില്‍ തൊഴിലന്വേഷകരെ ലക്ഷ്യമിട്ട് നടക്കുന്ന തട്ടിപ്പുകളെ ചെറുക്കുന്നതിനാണ് നിര്‍ദേശം.ഓഫര്‍ ലെറ്ററിലെ സീരിയല്‍ നമ്പറും ബാര്‍കോഡും ഉപയോഗിച്ച് രേഖയുടെ സാധുത പരിശോധിക്കാം. ജോലി ഉറപ്പാക്കാതെ പണമടയ്ക്കുകയോ മറ്റ് നടപടികളിലേക്ക് കടക്കുകയോ ചെയ്യരുതെന്നും മന്ത്രാലയം വ്യക്തമാക്കി. ജോലി ലഭിക്കുന്നതിനോ റിക്രൂടമെന്റിനോ തൊഴിലാളിയില്‍നിന്ന് പണം ഈടാക്കാന്‍ പാടില്ല. റിക്രൂട്‌മെന്റിനും നിയമനത്തിനുമുള്ള ചെലവ് തൊഴിലുടമ വഹിക്കണം. പ്രവേശന വീസ, യാത്രാ, മെഡിക്കല്‍ പരിശോധന, താമസാനുമതി എന്നിവയുമായി ബന്ധപ്പെട്ട ചെലവും തൊഴിലുടമ വഹിക്കണം.ലൈസന്‍സുള്ള റിക്രൂട്‌മെന്റ് ഏജന്‍സികള്‍ വഴി മാത്രം നിയമന നടപടികള്‍ നടത്തണം. റിക്രൂട്‌മെന്റ്, താല്‍ക്കാലിക തൊഴില്‍, മധ്യസ്ഥ ഏജന്‍സികള്‍ക്ക് മൊഹ്‌റെയുടെ പ്രത്യേക ലൈസന്‍സ് ആവശ്യമാണ്.നിയമലംഘനം നടത്തുന്നവര്‍ക്ക് കനത്ത പിഴ ലഭിക്കും. വിദേശ തൊഴിലാളിയെ യുഎഇയില്‍ എത്തിക്കുന്നതിന് വ്യാജ വിവരങ്ങളോ രേഖകളോ സമര്‍പ്പിച്ചാല്‍ 20,000 മുതല്‍ ഒരു ലക്ഷം ദിര്‍ഹം വരെ പിഴ ചുമത്താം. അനുമതിയില്ലാത്ത തൊഴിലാളിയെ നിയമിക്കുക, റിക്രൂട്ട് ചെയ്തശേഷം ജോലി നല്‍കാതെ വിടുക തുടങ്ങിയ നിയമലംഘനങ്ങള്‍ക്ക് 50,000 മുതല്‍ രണ്ട് ലക്ഷം ദിര്‍ഹം വരെ പിഴയുണ്ട്.ഓഫര്‍ ലെറ്ററില്‍ പറഞ്ഞ ശമ്പളം, ജോലി, മറ്റ് വ്യവസ്ഥകള്‍ എന്നിവയും പിന്നീട് ഒപ്പിടുന്ന തൊഴില്‍ കരാറുമായി പൊരുത്തപ്പെടുന്നുണ്ടെന്ന് ഉറപ്പാക്കണം. ജോലി ഉറപ്പാക്കാന്‍ പണം ആവശ്യപ്പെടുന്നെങ്കില്‍ ജാഗ്രത പാലിക്കണമെന്നും മന്ത്രാലയം ഓര്‍മിപ്പിച്ചു. വ്യാജ ജോലി വാഗ്ദാനത്തിനോ നിയമവിരുദ്ധ റിക്രൂട്‌മെന്റിനോ ഇരയായാല്‍ മന്ത്രാലയത്തിന്റെ ഔദ്യോഗിക സേവന സംവിധാനങ്ങളിലൂടെയോ പൊലീസിലോ പരാതി നല്‍കണം.
നിരവധി വിമാന സര്‍വ്വീസുകള്‍ ഇന്നും വൈകി..എയര്‍ അറേബ്യ,ഫ്‌ലൈദുബൈയുടെ നിരവധി സര്‍വ്വീസുകള്‍ റദ്ദാക്കി
ദുബായ്, അബുദാബി വിമാനത്താവളങ്ങളില്‍ നിന്ന് പുറപ്പെടേണ്ട നിരവധി വിമാനങ്ങള്‍ ഇന്നും വൈകി.
ഫ്‌ലൈദുബായിയുടെ അഭ, ഇസ്താംബുള്‍, അസ്താന, ടെല്‍ അവീവ് സര്‍വീസുകള്‍ ഉള്‍പ്പെടെ ഒട്ടേറെ സര്‍വീസുകള്‍ ഇന്ന് റദ്ദാക്കി.എയര്‍ അറേബ്യയുടെ ഷാര്‍ജയില്‍ നിന്നുള്ള കുവൈറ്റ്, ബഹ്‌റൈന്‍, ഖത്തര്‍, ഈജിപ്ത് സര്‍വീസുകളും റദ്ദാക്കിയിട്ടുണ്ട്.എന്നാല്‍ എമിറേറ്റ്സ്, എത്തിഹാദ് സര്‍വീസുകള്‍ പൊതുവെ സാധാരണ നിലയില്‍ തുടരുമ്പോഴും, ചില സര്‍വീസുകള്‍ക്ക് നേരിയ കാലതാമസമുണ്ടാകുന്നുണ്ട്.എയര്‍ലൈനുകളും വിമാനത്താവളങ്ങളും റിപ്പോര്‍ട്ട് ചെയ്ത ഫ്‌ലൈറ്റ് റദ്ദാക്കലുകള്‍, കാലതാമസങ്ങള്‍, ഷെഡ്യൂള്‍ മാറ്റങ്ങള്‍ എന്നീ തടസ്സങ്ങളെല്ലാം സംഘര്‍ഷവുമായോ പ്രാദേശിക സുരക്ഷാ സാഹചര്യവുമായോ ബന്ധപ്പെട്ടതല്ല ,ചിലത് പ്രവര്‍ത്തനപരമോ സാങ്കേതികമോ മറ്റ് കാരണങ്ങളാലോ ആകാം എന്ന് അധികൃതര്‍ വ്യക്തമാക്കി.അതിനാല്‍ യാത്രക്കാര്‍ വീട്ടില്‍ നിന്ന് ഇറങ്ങും മുന്‍പ് ഫ്‌ലൈറ്റ് സ്റ്റാറ്റസ് നിര്‍ബന്ധമായും പരിശോധിക്കുക.ദുബായില്‍ നിന്ന് ഫ്‌ലൈ ദുബായില്‍ യാത്ര ചെയ്യുന്നവര്‍ നാല് മണിക്കൂര്‍ മുന്‍പ് എയര്‍പോര്‍ട്ടില്‍ എത്തണം. മറ്റ് യാത്രക്കാര്‍ മൂന്ന് മണിക്കൂര്‍ മുന്‍പെങ്കിലും എത്തുക.ഓണ്‍ലൈന്‍ ചെക്ക്ഇന്‍ പൂര്‍ത്തിയാക്കാനും, എയര്‍ലൈനിന്റെ ഔദ്യോഗിക അറിയിപ്പുകള്‍ മാത്രം പിന്തുടരാനും അധികൃതര്‍ നിര്‍ദേശിച്ചു
വീണ്ടും നയതന്ത്ര നീക്കങ്ങള്‍ക്ക് സാധ്യത; ഇരുരാജ്യങ്ങളുടെയും നീക്കങ്ങള്‍ വീക്ഷിച്ച് ലോകരാഷ്ട്രങ്ങള്‍
അമേരിക്ക-ഇറാന് സംഘര്‍ഷത്തില്‍ വീണ്ടും നയതന്ത്ര നീക്കങ്ങള്‍ക്ക് സാധ്യത. ഇറാന്റെ ഏഴ് ദിവസത്തെ വെടിനിര്‍ത്തല്‍ നിര്‍ദേശം അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് തള്ളിയെങ്കിലും, ടെഹ്‌റാനുമായി വീണ്ടും ചര്‍ച്ചകള്‍ക്ക് സാധ്യതയുണ്ടെന്നാണ് റിപ്പോര്‍ട്ടുകള്‍. ഇറാനുമായി ഈ ആഴ്ച തന്നെ കൂടുതല്‍ ചര്‍ച്ചകള്‍ നടന്നേക്കുമെന്ന് ട്രംപ് വ്യക്തമാക്കിയിട്ടുണ്ട്.
അതേസമയം, ഇറാന് നയതന്ത്ര ചര്‍ച്ചകള്‍ക്ക് തയ്യാറാണെന്നും എന്നാല്‍ ഏതുതരത്തിലുള്ള ആക്രമണത്തെയും ശക്തമായി നേരിടുമെന്നും ഇറാന് വിദേശകാര്യ മന്ത്രി അബ്ബാസ് അരാഖ്ചി വ്യക്തമാക്കി. ന്യൂയോര്‍ക്കിലെത്തിയത് യുദ്ധത്തിന് വേണ്ടിയല്ല, സമാധാനം തേടിയാണെന്നും അദ്ദേഹം പ്രതികരിച്ചു.
ഇറാന്റെ നിര്‍ദേശം അമേരിക്ക തള്ളിയെങ്കിലും നയതന്ത്ര ചര്‍ച്ചകള്‍ പൂര്‍ണമായി അവസാനിച്ചിട്ടില്ലെന്നാണ് പുറത്തുവരുന്ന റിപ്പോര്‍ട്ടുകള്‍. ഖത്തറിന്റെ മധ്യസ്ഥതയിലാണ് നിലവില്‍ ന്യൂയോര്‍ക്കില്‍ ചര്‍ച്ചകള്‍ തുടരുന്നത്. ആണവ വിഷയങ്ങളടക്കം വിവിധ വിഷയങ്ങളില്‍ ക്രിയാത്മകമായ ചര്‍ച്ചകള്‍ തുടരുന്നതായാണ് റിപ്പോര്‍ട്ടുകള്‍. ഇറാന്റെ ആദ്യ നിര്‍ദേശത്തില്‍ മാറ്റങ്ങള്‍ വരുത്തുന്നതിനായി ഖത്തര്‍ പ്രതിനിധികള്‍ ഇരുപക്ഷവുമായും വീണ്ടും ചര്‍ച്ച നടത്തിയതായും റിപ്പോര്‍ട്ടുകളുണ്ട്. ഇരുരാജ്യങ്ങളും തമ്മിലുള്ള അടുത്ത നീക്കങ്ങളിലേക്കാണ് ഇനി അന്താരാഷ്ട്ര സമൂഹത്തിന്റെ ശ്രദ്ധ.
ഹൂതി ആക്രമണം; സൗദിക്ക് സൈനിക പിന്തുണയുമായി പാകിസ്താനും തുര്‍ക്കിയും
ൗദി അറേബ്യയിലെ നഗരങ്ങളെയും തന്ത്രപ്രധാന എണ്ണകേന്ദ്രങ്ങളെയും ലക്ഷ്യമിട്ട് ഹൂതികള്‍ ആക്രമണം ശക്തമാക്കിയ പശ്ചാത്തലത്തില്‍ സൈനിക പിന്തുണയുമായി പാകിസ്താനും തുര്‍ക്കിയും. മക്ക സംയുക്ത പ്രതിരോധ കരാറിന്റെ ഭാഗമായി മൂന്ന് രാജ്യങ്ങളുടെയും സൈന്യാധിപന്മാര്‍ അടിയന്തര യോഗം ചേരുമെന്ന് സൗദി വിദേശകാര്യ മന്ത്രാലയം അറിയിച്ചു.
മക്ക, ജിദ്ദ, യാന്‍ബു എന്നീ നഗരങ്ങള്‍ ലക്ഷ്യമിട്ട് ഹൂതികള്‍ നിരവധി മിസൈലുകളും ഡ്രോണുകളും തൊടുത്തുവിട്ടതിനെ തുടര്‍ന്ന് സൗദി അറേബ്യയില്‍ അടിയന്തര ജാഗ്രതാ നിര്‍ദ്ദേശം പുറപ്പെടുവിച്ചിരുന്നു. മക്ക പ്രതിരോധ കരാറിലെ വ്യവസ്ഥകള്‍ പ്രകാരം അംഗരാജ്യങ്ങളില്‍ ഏതെങ്കിലും ഒരു രാജ്യത്തിന് നേരെ ഉണ്ടാകുന്ന സൈനിക ആക്രമണം മൂന്ന് രാജ്യങ്ങള്‍ക്കും നേരെയുള്ള ആക്രമണമായി കണക്കാക്കി സംയുക്തമായി പ്രതിരോധിക്കും.
യെമനിലെ ഹൂതികള്‍ നടത്തുന്ന ആക്രമണങ്ങളില്‍ ഇറാന് പങ്കില്ലെന്ന് പ്രസിഡന്റ് മസൂദ് പെസഷ്‌കിയാന്‍ യു എസ് മാധ്യമത്തിന് നല്‍കിയ അഭിമുഖത്തില്‍ വ്യക്തമാക്കി. ‘ഹൂതികള്‍ ചെയ്യുന്നത് അവരുടെ സ്വന്തം ഉത്തരവാദിത്തമാണ്’ എന്ന് അദ്ദേഹം പറഞ്ഞു. ഹോര്‍മുസ് കടലിടുക്ക് തുറന്നുനല്‍കണമെങ്കില്‍ ലെബനന്‍ ഉള്‍പ്പെടെയുള്ള എല്ലാ മേഖലകളിലും യുഎസ് യുദ്ധം അവസാനിപ്പിക്കണം, ഉപരോധം പിന്‍വലിക്കണം, മരവിപ്പിച്ച ധനശേഖരം വിട്ടുനല്‍കണം എന്നീ ഉപാധികള്‍ ഇറാന് മുന്നോട്ടുവെച്ചു. ഇറാനിയന്‍ കമ്പനികളുമായി ഇടപാട് നടത്തുന്ന മൂന്നാം രാജ്യങ്ങളിലെ സ്ഥാപനങ്ങള്‍ക്കെതിരെ യു.എസ് ‘സെക്കന്‍ഡറി ഉപരോധം’ പ്രഖ്യാപിച്ചതിനെ തുടര്‍ന്ന് യുഎഇയും ഒമാനും ഇറാനിയന്‍ വിമാനങ്ങള്‍ക്ക് വിലക്കേര്‍പ്പെടുത്തി. മേഖലയില്‍ യുഎസ്-ഇറാന് സൈനിക നീക്കങ്ങള്‍ താല്‍ക്കാലികമായി കുറഞ്ഞിട്ടുണ്ടെങ്കിലും ഹൂതികളുടെയും ഹിസ്ബുല്ലയുടെയും ആക്രമണങ്ങള്‍ മധ്യപൂര്‍വേഷ്യയെ വീണ്ടും യുദ്ധഭീതിയിലാഴ്ത്തുകയാണ്.
യുഎഇയില്‍ നാല് വര്‍ഷത്തിനിടെ 1,136 ഹെവി ട്രക്ക് അപകടങ്ങള്‍
യുഎഇയില്‍ നാല് വര്‍ഷത്തിനിടെ 1,136 ഹെവി ട്രക്ക് അപകടങ്ങള്‍ റിപ്പോര്‍ട്ട് ചെയ്തതായി ആഭ്യന്തര മന്ത്രാലയം.
2022 മുതല്‍ 2025 വരെയുള്ള കാലയളവിലെ കണക്കാണ് ആഭ്യന്തര മന്ത്രാലയം പുറത്തുവിട്ടത്.മുന്‍പ് സംഭവിച്ചതിനെ അപേക്ഷിച്ച്അപകടങ്ങളുടെ എണ്ണം 2024ല്‍ കുത്തനെ ഉയര്‍ന്ന് 332 അപകടങ്ങളില്‍ എത്തിയിരുന്നു.
2025ലും ട്രക്ക് അപകടങ്ങള്‍ നിരക്ക് ഉയര്‍ന്ന തോതില്‍ തന്നെയായിരുന്നു.മുന്‍ വര്‍ഷത്തേക്കാള്‍ നേരിയ കുറവുണ്ടെങ്കിലും 2025ല്‍ 325 അപകടങ്ങളാണ് റിപ്പോര്‍ട്ട് ചെയ്തത്.വാഹനാപകടങ്ങളുടെ പ്രധാന കാരണങ്ങളലൊന്ന് വാഹനങ്ങളുടെ കൃത്യമായ പരിപാലനമില്ലാ.്മയാണെന്ന് ആഭ്യന്തര മന്ത്രാലയം ഓര്‍മ്മിപ്പച്ചു. വാഹനങ്ങളുടെ ടയറിന് സംഭവിക്കുന്ന തകരാറുകളും സുരക്ഷയുമായി ബന്ധപ്പെട്ട മറ്റ് തകരാറുകളും അപകടങ്ങള്‍ക്കുള്ള പ്രധാന കാരണമാണ്. ദീര്‍ഘദൂരം സഞ്ചരിക്കുകയും, ദീര്‍ഘനേരം റോഡില്‍ ചെലവഴിക്കുകയും, ഭാരമേറിയ ലോഡുകള്‍ കയറ്റുകയും ചെയ്യുന്ന ട്രക്കുകള്‍ക്ക് റോഡില്‍ സഞ്ചരിക്കുന്നതിന് ആവശ്യമായ കൃത്യമായ പരിശോധനകളും ശരിയായ അറ്റകുറ്റപ്പണികളും നിര്‍ബന്ധമാണെന്നും അധികൃതര്‍ ഓര്‍മ്മിപ്പിച്ചു
ദുബൈ മിറാക്കിള്‍ ഗാര്‍ഡന്‍ ഒക്ടോബര്‍ എട്ടിന് തുറക്കും
വേനല്‍ച്ചൂടിന് അവസാനമാകുന്നതോടെ വിനോദസഞ്ചാര കേന്ദ്രങ്ങള്‍ വീണ്ടും സന്ദര്‍ശകര്‍ക്കായി ഒരുങ്ങുകയായി.ദുബൈയിലെ പ്രശസ്ത വിനോദസഞ്ചാര കേന്ദ്രമായ ‘ദുബൈ മിറാക്കിള്‍ ഗാര്‍ഡന്റെ’ 15ാമത് സീസണ്‍ 2026 ഒക്ടോബര്‍ എട്ടിന് ആരംഭിക്കും.ഇതിനായുള്ള ടിക്കറ്റുകള്‍ ഔദ്യോഗിക വെബ്‌സൈറ്റിലൂടെ മുന്‍കൂട്ടി ബുക്ക് ചെയ്യാം.യു.എ.ഇ നിവാസികള്‍ക്കും സ്വദേശികള്‍ക്കും പ്രത്യേക നിരക്കില്‍ ടിക്കറ്റുകള്‍ ലഭ്യമാണ്. വര്‍ണാഭമായ പുഷ്പാലങ്കാരങ്ങള്‍, പുതിയ തീമുകള്‍, കുടുംബങ്ങള്‍ക്കായുള്ള വിവിധ വിനോദ പരിപാടികള്‍ എന്നിവയോടെയാണ് ഇത്തവണയും മിറാക്കിള്‍ ഗാര്‍ഡന്‍ സന്ദര്‍ശകരെ സ്വാഗതം ചെയ്യുന്നത്. മുതിര്‍ന്നവര്‍ക്ക് 70 ദിര്‍ഹവും കുട്ടികള്‍ക്ക് 50 ദിര്‍ഹവുമാണ് നിരക്ക്. പൊതു സന്ദര്‍ശകര്‍ക്ക് മുതിര്‍ന്നവര്‍ക്ക് 100 ദിര്‍ഹവും കുട്ടികള്‍ക്ക് 80 ദിര്‍ഹവുമാണ് ടിക്കറ്റ് നിരക്ക്. മൂന്നുവയസ്സില്‍ താഴെയുള്ള കുട്ടികള്‍ക്ക് പ്രവേശനം സൗജന്യമാണ്. കൂടാതെ മിറാക്കിള്‍ ഗാര്‍ഡനും ബട്ടര്‍ഫ്‌ലൈ ഗാര്‍ഡനും സന്ദര്‍ശിക്കാവുന്ന കോംബോ ടിക്കറ്റിന് 140 ദിര്‍ഹമാണ് നിരക്ക്. എല്ലാ വര്‍ഷവും ഒക്ടോബര്‍ മുതല്‍ മേയ് വരെയുള്ള മാസങ്ങളിലാണ് മിറാക്കിള്‍ ഗാര്‍ഡന്‍ പൊതുജനങ്ങള്‍ക്കായി തുറന്നുകൊടുക്കുന്നത്.
ഇത്തിഹാദ് റെയില്‍ പാസഞ്ചര്‍ ട്രെയിന്‍ സര്‍വീസ് ;ദുബായില്‍ നിന്ന് അബുദാബിയിലേക്കുള്ളടിക്കറ്റ് ബുക്കിങ് ഔദ്യോഗികമായി ആരംഭിച്ചു
ദുബായില്‍ നിന്ന് അബുദാബിയിലേക്കുള്ള ഇത്തിഹാദ് റെയില്‍ പാസഞ്ചര്‍ ട്രെയിന്‍ സര്‍വീസിന്റെ ടിക്കറ്റ് ബുക്കിങ് ഔദ്യോഗികമായി ആരംഭിച്ചു. 57 മിനിറ്റുകൊണ്ട് ദുബായില്‍ നിന്ന് അബുദാബിയിലെത്താം.ഔദ്യോഗിക പോര്‍ട്ടലായ ഇത്തിഹാദ് റെയില്‍.എഇ വഴിയാണ് ബുക്കിങ് നടക്കുന്നത്.കംഫര്‍ട്ട് ക്ലാസില്‍ ഒരു ഭാഗത്തേക്കുള്ള ഏറ്റവും കുറഞ്ഞ യാത്രാനിരക്ക് 39 ദിര്‍ഹമാണ്. കൂടുതല്‍ സൗകര്യങ്ങളുള്ള പ്രീമിയം ക്ലാസ് നിരക്കുകള്‍ 109 ദിര്‍ഹത്തില്‍ ആരംഭിക്കുന്നു.ദുബായ് അല്‍ യലായിസ് സ്റ്റേഷനും അബുദാബിയിലെ മുഹമ്മദ് ബിന്‍ സായിദ് സിറ്റി സ്റ്റേഷനും തമ്മിലാണ് ഈ സര്‍വീസ് ബന്ധിപ്പിക്കുന്നത്. ജുമൈറ ഗോള്‍ഫ് എസ്റ്റേറ്റിന് സമീപം സ്ഥിതി ചെയ്യുന്ന ദുബായ് സ്റ്റേഷന്‍ ദുബായ് മെട്രോ ശൃംഖലയുമായും നേരിട്ട് ബന്ധപ്പെട്ടിരിക്കുന്നു. മെട്രോ സ്റ്റേഷനില്‍നിന്ന് നേരിട്ട് റെയില്‍വേ ടെര്‍മിനലിലേക്ക് പ്രവേശിക്കാമെന്നത് യാത്രക്കാര്‍ക്ക് കണക്റ്റിവിറ്റി എളുപ്പമാക്കും.കഴിഞ്ഞ ജൂണില്‍ അബുദാബിഫുജൈറ റൂട്ടിലാണ് യുഎഇയിലെ ആദ്യ യാത്രാ ട്രെയിന്‍ സര്‍വീസ് ആരംഭിച്ചത്. സര്‍വീസ് തുടങ്ങി ചുരുങ്ങിയ മാസങ്ങള്‍ക്കുള്ളില്‍ ഈ റൂട്ടില്‍ 70,000ലധികം ടിക്കറ്റുകള്‍ വിറ്റഴിഞ്ഞതായി അധികൃതര്‍ വ്യക്തമാക്കിയിരുന്നു. ദുബായ്അബുദാബി ദേശീയപാതകളിലെ തിരക്ക് ഗണ്യമായി കുറയ്ക്കാന്‍ പുതിയ റെയില്‍ പാത സഹായിക്കും.സെപ്റ്റംബര്‍ 30നാണ് റൂട്ടിലെ ആദ്യ സര്‍വീസ്.
യുഎഇ-ഇറാന് ബന്ധത്തില്‍ പുതിയ നീക്കം; നയതന്ത്ര ചര്‍ച്ചകള്‍ക്ക് സാധ്യത തെളിയുന്നതായി അന്‍വര്‍ ഗര്‍ഗാഷ്
യുഎഇ-ഇറാന് ബന്ധത്തില്‍ പുതിയ നയതന്ത്ര നീക്കത്തിന് സാധ്യത. ഇരുരാജ്യങ്ങളും തമ്മിലുള്ള അഭിപ്രായവ്യത്യാസങ്ങള്‍ തുടരുന്നുണ്ടെങ്കിലും, ചര്‍ച്ചകള്‍ക്ക് പുതിയ വാതില്‍ തുറന്നതായി യുഎഇ പ്രസിഡന്റ്ിന്റെ നയതന്ത്ര ഉപദേഷ്ടാവ് ഡോ. അന്‍വര്‍ ഗര്‍ഗാഷ്. ന്യൂഡല്‍ഹിയില്‍ നടന്ന ബ്രിക്‌സ് സമ്മിറ്റ് വേദി നിര്‍ണായകമായെന്നും അന്‍വര്‍ ഗര്‍ഗാഷ് വ്യക്തമാക്കി.
അബുദാബി കിരീടാവകാശി ഷെയ്ഖ് ഖാലിദ് ബിന്‍ മുഹമ്മദ് ബിന്‍ സായിദ് അല്‍ നഹ്യാനും ഇറാന് പ്രസിഡന്റ് മസൂദ് പെസഷ്‌കിയാനും ന്യൂഡെല്‍ഹിയില്‍ നടത്തിയ കൂഴിടക്കാഴ്ചയാണ് പുതിയ നയതന്ത്ര നീക്കത്തിന് തുടക്കംകുറിച്ചത്. എല്ലാ വിഷയങ്ങളിലും ധാരണയായിട്ടില്ലെങ്കിലും, നിലവിലെ സംഘര്‍ഷങ്ങള്‍ കൈകാര്യം ചെയ്യാനും ഭാവി ബന്ധങ്ങളെക്കുറിച്ച് ചര്‍ച്ച ചെയ്യാനും പുതിയ വാതില്‍ തുറന്നതായി യുഎഇ പ്രസിഡന്റിന്റെ നയതന്ത്ര ഉപദേഷ്ടാവ് ഡോ. അന്‍വര്‍ ഗര്‍ഗാഷ് പറഞ്ഞു. യുക്തിസഹമായ നിലപാടുകളാണ് ഇറാന് പ്രസിഡന്റ് മസൂദ് പെക്ഷിയാന്‍ സ്വീകരിച്ചതെന്നും അന്‍വര്‍ഗര്‍ഗാഷ് കൂട്ടിച്ചേര്‍ത്തു.
ഇറാനുമായി വിശ്വാസം പുനഃസ്ഥാപിക്കാന്‍ വാക്കുകള്‍ക്കപ്പുറം നയതന്ത്രനടപടികള്‍ ആവശ്യമാണെന്നും ഗര്‍ഗാഷ് വ്യക്തമാക്കി. വ്യാപാരം, വ്യോമയാനം, വിപണികളിലേക്കും തുറമുഖങ്ങളിലേക്കുമുള്ള പ്രവേശനം തുടങ്ങിയ സാമ്പത്തിക-വാണിജ്യ പ്രവര്‍ത്തനങ്ങള്‍ സാധാരണ നിലയിലാക്കാന്‍ ചര്‍ച്ചകള്‍ അനിവാര്യമാണെന്നും അദ്ദേഹം പറഞ്ഞു. പ്രാദേശിക രാഷ്ട്രീയത്തിലെ ഇറാന്റെ പങ്കും പുനഃപരിശോധിക്കണമെന്ന് ഗര്‍ഗാഷ് ആവശ്യപ്പെട്ടു.
ഗള്‍ഫ് രാജ്യങ്ങള്‍ ആഗ്രഹിക്കുന്നത് പരമാധികാരവും സുരക്ഷിതമായ വ്യാപാരപാതകളും മേഖലയിലെ സ്ഥിരതയാണെന്നും അദ്ദേഹം വ്യക്തമാക്കി. സൗദി അറേബ്യയുടെ സുരക്ഷ ഗള്‍ഫിന്റെ മൊത്തത്തിലുള്ള സുരക്ഷയുമായി നേരിട്ട് ബന്ധപ്പെട്ടതാണെന്നും ഗര്‍ഗാഷ് പറഞ്ഞു. സൗദിയെ ബാധിക്കുന്ന ഏതൊരു സുരക്ഷാ പ്രശ്‌നവും യുഎഇയെ നേരിട്ട് ബാധിക്കുമെന്നും അദ്ദേഹം വ്യക്തമാക്കി.
വിമാനശൃംഖല വിപുലീകരിക്കുന്നു; കൂടുതല്‍ വിമാനങ്ങള്‍ സജ്ജമാക്കി ഫ്‌ളൈ ദുബായ്
വിമാനശൃംഖല വിപുലീകരിക്കുന്നതിന്റെ ഭാഗമായി വിമാനങ്ങളുടെ എണ്ണം നൂറിലധികമാക്കാനും ക്യാബിന്‍ നവീകരണ പദ്ധതികള്‍ക്കും തുടക്കമിട്ട് ഫ്‌ലൈദുബായ്. 2026-ല്‍ മാത്രം ഏഴ് ബോയിങ് 737-9 മാക്സ്, നാല് ബോയിങ് 737-8 മാക്സ് എന്നിവയുള്‍പ്പെടെ 11 പുതിയ വിമാനങ്ങള്‍ ഫളൈദുബായുടെ നിരയിലെത്തും. പഴയ വിമാനങ്ങള്‍ക്ക് പകരം കൂടുതല്‍ ഇന്ധനക്ഷമതയുള്ള പുതിയ തലമുറ വിമാനങ്ങള്‍ അവതരിപ്പിക്കുന്നതിന്റെ ഭാഗമായാണ് ഈ നടപടി.
സര്‍വീസുകളുടെ എണ്ണം കൂട്ടാനും പുതിയ റൂട്ടുകളിലേക്ക് സര്‍വീസ് വ്യാപിപ്പിക്കാനും ഇതിലൂടെ സാധിക്കും. ബിസിനസ് ക്ലാസിലെ വര്‍ധിച്ചുവരുന്ന ആവശ്യക്കാര്‍ക്ക് അനുസൃതമായി മികച്ച യാത്രാനുഭവവും ഉയര്‍ന്ന നിലവാരമുള്ള സേവനവും ലഭ്യമാക്കാനാണ് ലക്ഷ്യമിടുന്നത്. വിമാനങ്ങളുടെ എണ്ണം 100 കടക്കുന്നത് ഫ്‌ലൈദുബായുടെ വളര്‍ച്ചയിലെ സുപ്രധാന നാഴികക്കല്ലാണെന്ന് ഫ്‌ലൈദുബായ് ചീഫ് എക്‌സിക്യൂട്ടീവ് ഓഫീസര്‍ ഗൈത് അല്‍ ഗൈത് പറഞ്ഞു. കേബിന്‍ നവീകരണ പദ്ധതിയിലൂടെ യാത്രാനുഭവം കൂടുതല്‍ മെച്ചപ്പെടുത്താന്‍ കഴിയുമെന്നും അദ്ദേഹം വ്യക്തമാക്കി.
വമ്പന്‍ ഇളവുകളുമായി എമിറേറ്റ്സ് എയര്‍ലൈന്‍സ്; ഓഫര്‍ 2027 ഓഗസ്റ്റ് 31 വരെ നടത്തുന്ന ബുക്കിങ്ങുകള്‍ക്ക്
വിമാന ടിക്കറ്റുകള്‍ക്ക് ഇളവുകളുമായി എമിറേറ്റ്സ് എയര്‍ലൈന്‍സ്. ജയ്വാന്‍ കാര്‍ഡ് ഉപയോഗിച്ച് ടിക്കറ്റ് ബുക്ക് ചെയ്യുന്നവര്‍ക്കാണ് ഇളവുകള്‍ ലഭിക്കുക. നാളെ മുതല്‍ 2027 ഓഗസ്റ്റ് 31 വരെ നടത്തുന്ന ബുക്കിങ്ങുകള്‍ക്ക് ഈ ഓഫര്‍
യുഎഇയുടെ ദേശീയ കാര്‍ഡ് പേയ്മെന്റ് ശൃംഖലയായ ‘ജയ് വാന്‍’ ഉപയോഗിച്ച് എമിറേറ്റ്സ് വിമാന ടിക്കറ്റുകള്‍ ബുക്ക് ചെയ്യാനുള്ള കരാറില്‍ എമിറേറ്റ്സും അല്‍ ഇത്തിഹാദ് പേയ്മെന്റ്‌സും ഒപ്പുവച്ചു. എമിറേറ്റ്സ് യുഎഇ കമേഴ്ഷ്യല്‍ ഓപറേഷന്‍സ് വൈസ് പ്രസിഡന്റ് അബ്ദുല്ല അല്‍ ഒലാമയും അല്‍ ഇത്തിഹാദ് പേയ്മെന്റ്‌സ് ചീഫ് പ്രൊഡക്ട് ഓഫീസര്‍ ആന്ദ്രേ സി യാന്‍ചെറ്റിയും ചേര്‍ന്നാണ് കരാറില്‍ ഒപ്പുവച്ചത്.
ജയ് വാന്‍ കാര്‍ഡുകള്‍ ഉപയോഗിച്ച് എമിറേറ്റ്സ് ഡോട് കോം വഴിയോ എമിറേറ്റ്സ് റീട്ടെയില്‍ സ്റ്റോറുകള്‍ വഴിയോ ടിക്കറ്റുകള്‍ ബുക്ക് ചെയ്യാം. ജയ് വാന്‍ റോയല്‍ ഡെബിറ്റ് കാര്‍ഡ്, പ്രെസ്റ്റിജ് ഡെബിറ്റ് കാര്‍ഡ്, പ്രീപെയ്ഡ് കാര്‍ഡ് തുടങ്ങി എല്ലാത്തരം ജയ് വാന്‍ കാര്‍ഡുകളും എമിറേറ്റ്സ് സ്വീകരിക്കും. ദുബായില്‍ നിന്നുള്ള വണ്‍-വേ, റിട്ടേണ്‍ യാത്രകള്‍ക്ക് ജയ് വാന്‍ കാര്‍ഡ് ഉടമകള്‍ക്ക് എല്ലാ ക്ലാസുകളിലെ ടിക്കറ്റുകളിലും പ്രത്യേക ഡിസ്‌കൗണ്ട് ലഭിക്കും.
നാളെ മുതല്‍ 2027 ഓഗസ്റ്റ് 31 വരെ നടത്തുന്ന ബുക്കിങ്ങുകള്‍ക്ക് ഈ ഓഫര്‍ ലഭ്യമാണ്. ഈ ടിക്കറ്റുകള്‍ ഉപയോഗിച്ച് 2028 ഫെബ്രുവരി 29 വരെ യാത്ര ചെയ്യാം. രാജ്യത്തെ ക്യാഷ്ലെസ് സാമ്പത്തിക വ്യവസ്ഥയ്ക്കും ഡിജിറ്റല്‍ പേയ്മെന്റ് രംഗത്തിനും കൂടുതല്‍ കരുത്തേകുന്നതാണ് ഈ പങ്കാളിത്തമെന്ന് എമിറേറ്റ്സ് ഡെപ്യൂട്ടി പ്രസിഡന്റും ചീഫ് കമേഴ്ഷ്യല്‍ ഓഫീസറുമായ അദ്‌നാന്‍ കാസിം പറഞ്ഞു. ഇടപാടുകാര്‍ക്ക് കൂടുതല്‍ സൗകര്യവും ലളിതമായ യാത്രാനുഭവവും ഉറപ്പാക്കാന്‍ ഇതിലൂടെ സാധിക്കുമെന്ന് അല്‍ ഇത്തിഹാദ് പേയ്മെന്റ്‌സ് ചീഫ് ഓപറേറ്റിങ് ഓഫീസര്‍ താരിഖ് അല്‍ ഹാവി വ്യക്തമാക്കി.