സൗദി അറേബ്യയില്‍ വിസിറ്റ് വീസ അനുവദിക്കുന്നതിന് പുതിയ നിയന്ത്രണം ഏര്‍പ്പെടുത്തി വിദേശകാര്യ മന്ത്രാലയം. വീസ അനുവദിക്കുന്ന സൈറ്റില്‍ നിന്ന് സിംഗിള്‍, മള്‍ട്ടിപ്പിള്‍ എന്‍ട്രി ഓപ്ഷനുകള്‍ മന്ത്രാലയം പിന്‍വലിച്ചത്. പുതിയ നിയന്ത്രണം നിരവധി പ്രവാസികളെ പ്രതികൂലമായി ബാധിക്കും.
വീസക്ക് അപേക്ഷിക്കുന്നവര്‍ക്ക് ഏത് തരം വീസയാണ് അനുവദിക്കേണ്ടത് എന്ന് ഇനി മുതല്‍ അതാത് രാജ്യങ്ങളിലെ സൗദി എംബസിക്കോ കോണ്‍സുലേറ്റിനോ തീരുമാനിക്കാം. ഇത് സ്ഥിരം സംവിധാനമാണോ താല്‍കാലിക നിയന്ത്രണമാണോ എന്ന കാര്യത്തില്‍ വ്യക്തതയില്ല. രണ്ടുമാസം മുന്‍പാണ് സൗദിയിലേക്കുള്ള സന്ദര്‍ശക വീസ അപേക്ഷയില്‍ മാറ്റങ്ങളുണ്ടായത്. ഒരു വീസയില്‍ സൗദിയിലേക്ക് പലവട്ടം വരാന്‍ സാധിക്കുന്ന മള്‍ട്ടിപ്പിള്‍ എന്‍ട്രി അപേക്ഷ സൗകര്യം നേരത്തെ പിന്‍വലിച്ചിരുന്നു. ഇത് പിന്നീട് പുനഃസ്ഥാപിച്ചെങ്കിലും വിഎഫ്എസ് കേന്ദ്രങ്ങളില്‍ സൗകര്യം പുനഃസ്ഥാപിച്ചില്ല. ഇതിനു പിന്നാലെയാണ് വെബ്‌സൈറ്റില്‍ നിന്നും മള്‍ട്ടിപ്പിള്‍, സിംഗിള്‍ എന്‍ട്രി സൗകര്യം പിന്‍വലിച്ചത്.
സ്‌കൂള്‍ അവധിക്ക് ശേഷം സൗദിയിലേക്ക് വരാനിരുന്ന നൂറു കണക്കിന് പ്രവാസി കുടുംബങ്ങള്‍ ഇപ്പോഴും അനിശ്ചിതത്തിലാണ്. പുതിയ വീസ അനുവദിക്കുന്നത് ഏപ്രില്‍ മധ്യം വരെയാണ്. കേരളത്തില്‍ സ്‌കൂളുകളില്‍ പരീക്ഷ അവസാനിക്കുന്നത് മാര്‍ച്ച് അവസാനമാണ്. ഇതിന് ശേഷം രണ്ടാഴ്ച മാത്രമാണ് സൗദിയില്‍ തങ്ങാന്‍ പുതിയ വീസക്കാര്‍ക്ക് അനുവാദമുള്ളത്. ഇതേ തുടര്‍ന്ന് നിരവധി കുടുംബങ്ങള്‍ യാത്ര റദ്ദാക്കുകയാണ്. ഹജ് സീസണ്‍ ആയതുകൊണ്ടാണ് വീസ നിയമങ്ങളില്‍ നിയന്ത്രണം ഏര്‍പ്പെടുത്തിയത്.
