യുഎഇ ധനകാര്യ മന്ത്രാലയം 2026 ലെ ഫെഡറല് ബജറ്റ് ഇയര്ബുക്ക് പുറത്തിറക്കി. ഫെഡറല് ബജറ്റ് തുടര്ച്ചയായ രണ്ടാം വര്ഷവും സാമ്പത്തിക സന്തുലിതാവസ്ഥ നിലനിര്ത്തുന്നു, വിവിധ മേഖലകളിലെ നേട്ടങ്ങളും ലക്ഷ്യങ്ങളും ഉള്ക്കൊള്ളുന്നതാണ് ബജറ്റ് ഇയര്ബുക്ക്
‘ജനങ്ങളില് നിക്ഷേപിക്കുക, ഭാവി സുരക്ഷിതമാക്കുക’ എന്ന പ്രമേയത്തിലാണ് യുഎഇ ധനകാര്യ മന്ത്രാലയം 2026 ലെ ഫെഡറല് ബജറ്റ് ഇയര്ബുക്ക് പുറത്തിറക്കിയിരിക്കുന്നത്. ഫെഡറല് ബജറ്റിലെ ചിലവാക്കല് മുന്ഗണനയും സുസ്ഥിര വികസനത്തിന് സ്വീകരിച്ച നടപടിക്രമങ്ങളേയും ഇയര്ബുക്ക് എടുത്തുകാണിക്കുന്നുണ്ട്. മനുഷ്യകേന്ദ്രീകൃതമാണ് വികസനമെന്നതും യുഎഇയുടെ ധാനസ്ഥിതിയും ആഗോളപ്രതിസന്ധികള്ക്കിടയിലും അത് എങ്ങനെ ദേശിയ വളര്ച്ചയ്ക്ക് മുതല്ക്കൂട്ടായി എന്നും ഇയര് ബുക്ക് വിശദീകരിക്കുന്നുണ്ട്. സാമ്പത്തിക സുതാര്യതയും ഉള്ക്കൊള്ളലും ശക്തിപ്പെടുത്തുന്നതിനുള്ള മന്ത്രാലയത്തിന്റെ പ്രതിബദ്ധതയെ പ്രതിഫലിപ്പിക്കുന്നതിനൊപ്പം, സാമ്പത്തിക ആസൂത്രണവും യുഎഇയുടെ ദേശീയ തന്ത്രപരമായ മുന്ഗണനകളും തമ്മിലുള്ള അടുത്ത സംയോജനത്തേയും ഇത് എടുത്തുകാണിക്കുന്നു. സുസ്ഥിര ഭാവി കെട്ടിപ്പടുക്കുന്നതിനുള്ള നേതൃത്വത്തിന്റെ ദര്ശനം സാക്ഷാത്കരിക്കാനുള്ള ശ്രമങ്ങള് ഇത് ത്വരിതപ്പെടുത്തുമെന്ന് ദുബായിയുടെ ഒന്നാം ഡെപ്യൂട്ടി ഭരണാധികാരിയും ഉപപ്രധാനമന്ത്രിയും ധനമന്ത്രിയുമായ ഷെയ്ഖ് മക്തൂം ബിന് മുഹമ്മദ് ബിന് റാഷിദ് അല് മക്തൂം പറഞ്ഞു. സമൂഹത്തെ നേരിട്ട് സ്വാധീനിക്കുന്ന മേഖലകളിലേക്ക് വിഭവങ്ങള് കാര്യക്ഷമമായും വഴക്കത്തോടെയും നയിക്കുന്നതിനുള്ള ഫെഡറല് ഗവണ്മെന്റിന്റെ പ്രതിബദ്ധത ബജറ്റ് പ്രതിഫലിപ്പിക്കുന്നുവെന്നും അദ്ദേഹം പറഞ്ഞു. ഫെഡറല് ബജറ്റ് തുടര്ച്ചയായ രണ്ടാം വര്ഷവും സാമ്പത്തിക സന്തുലിതാവസ്ഥ നിലനിര്ത്തുന്നു, വരുമാനവും ചെലവും 2025 ലെ 71.5 ബില്യണ് ദിര്ഹുമായി താരതമ്യം ചെയ്യുമ്പോള് 92.4 ബില്യണിലെത്തി, ഇത് ഏകദേശം 29% വര്ദ്ധനവിനെ പ്രതിനിധീകരിക്കുന്നു. ഈ സന്തുലിതാവസ്ഥ ദേശീയ സമ്പദ്വ്യവസ്ഥയുടെ ശക്തിയും പ്രതിരോധശേഷിയും സാമ്പത്തിക സ്ഥിരത നിലനിര്ത്താനുള്ള അതിന്റെ കഴിവും പ്രതിഫലിപ്പിക്കുന്നു. 2026ലെ ചെലവ് മുന്ഗണനകള് സമൂഹ ക്ഷേമത്തെ നേരിട്ട് ബാധിക്കുന്ന മേഖലകളില് ശ്രദ്ധ കേന്ദ്രീകരിക്കുന്നത് തുടരുന്നു. പൊതു സേവന മേഖലയ്ക്ക് 30.8 ബില്യണ് ദിര്ഹവും വിദ്യാഭ്യാസ മേഖലയ്ക്ക് 16.9 ബില്യണ് ദിര്ഹവും ബജറ്റ് നീക്കിവയ്ക്കുന്നു, ആരോഗ്യ സംരക്ഷണ മേഖലയ്ക്ക് 5.7 ബില്യണ് ദിര്ഹം, ഭവന മേഖലയ്ക്ക് 3.7 ബില്യണ് ദിര്ഹം, സാമ്പത്തിക കാര്യങ്ങള്ക്കായി 1.4 ബില്യണ് ദിര്ഹം ബജറ്റില് നീക്കിവച്ചിട്ടുണ്ട്, അതേസമയം മറ്റ് മേഖലകള്ക്കായി 33.9 ബില്യണ് ദിര്ഹവും നീക്കിവച്ചിട്ടുണ്ട്.
UAE ബജറ്റ് ഇയര്ബുക്ക് 2026: രണ്ടാം വര്ഷവും സാമ്പത്തിക സന്തുലിതാവസ്ഥ നിലനിര്ത്തി
