ഓണ്‍ലൈന്‍ ഷോപ്പുകളുടെ മറവിലുള്ള സൈബര്‍ തട്ടിപ്പുകള്‍ വര്‍ദ്ധിച്ചെന്ന് യുഎഇ സൈബര്‍ സുരക്ഷാ കൗണ്‍സില്‍.ഓണ്‍ലൈന്‍ ഷോപ്പിംഗുകളില്‍ കൂടുതല്‍ ജാഗ്രത പുലര്‍ത്തണം.വിശ്വസിനിയമായ സൈറ്റുകളെ മാത്രം ഷോപ്പിംഗിന് ആശ്രയിക്കണം എന്നും കൗണ്‍സില്‍ നിര്‍ദ്ദേശം നല്‍കി.

വൈറ്റ് ഫ്രൈഡേ അടക്കമുള്ള ഷോപ്പിംഗ് പ്രമോഷണുകളുടെ സമയത്താണ് സൈബര്‍ തട്ടിപ്പുകള്‍ കൂടുന്നത്.അന്‍പത് ശതമാനത്തിലധികം വിലക്കിഴിവ് വാഗ്ദാനം ചെയ്താണ് തട്ടിപ്പുകാര്‍ ഇരകളെ ആകര്‍ഷിക്കുന്നത്.ഇത്തരം തട്ടിപ്പുസൈറ്റുകളുടെ എണ്ണത്തില്‍ മുപ്പത്തിയാറ് ശതമാനത്തോളം ആണ് വര്‍ദ്ധന.കഴിഞ്ഞ വര്‍ഷം 38 ദശലക്ഷം സൈബര്‍ തട്ടിപ്പുകള്‍ ആണ് രേഖപ്പെടുത്തിയിരിക്കുന്നത്.

സംശകരമായ ലിങ്കുകളില്‍ പ്രവേശിക്കരുതെന്നും വ്യക്തിവിവരങ്ങള്‍ നല്‍കരുതെന്നും യുഎഇ സൈബര്‍ സുരക്ഷാ കൗണ്‍സില്‍ മുന്നറിയിപ്പ് നല്‍കി.ഓണ്‍ലൈനില്‍ ഷോപ്പിംഗ് നടത്തും മുന്‍പ് സൈറ്റിന്റെ വിശ്വാസ്യത ഉറപ്പാക്കണം എന്നും നിര്‍ദ്ദേശത്തില്‍ പറയുന്നു.

2025 കമ്മ്യൂണിറ്റി വര്‍ഷമായി പ്രഖ്യാപിച്ച് യുഎഇ പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്‍. സാമൂഹിക ബന്ധങ്ങള്‍ ശക്തിപ്പെടുത്തുന്നതിനും സമൂഹത്തിലെ ഐക്യം വളര്‍ത്തുന്നതിനുമാണ് ലക്ഷ്യമിടുന്നതെന്ന് ഷെയ്ഖ് മുഹമ്മദ് പറഞ്ഞു. കൈകോര്‍ക്കുക എന്ന മുദ്രാവാക്യവുമായാണ് പുതിയ സംരംഭം നടപ്പിലാക്കുക.

രാജ്യത്തിന്റെ ഭാവി വളര്‍ച്ചയ്ക്കായി ഒന്നിച്ചു പ്രവര്‍ത്തിക്കാം എന്ന ആശത്തിലാണ് 2025 കമ്മ്യൂണിറ്റി വര്‍ഷമായി പ്രഖ്യാപിച്ചത്. കൈകോര്‍ക്കുക എന്ന മുദ്രാവാക്യത്തിലാണ് പുതിയ ദേശീയ സംരംഭം നടപ്പിലാക്കുക. സാമൂഹിക ബന്ധങ്ങള്‍ ശക്തിപ്പെടുത്തുന്നതിനും സമൂഹത്തിലെ ഐക്യം വളര്‍ത്തുന്നതിനും സുസ്ഥിരമായ വളര്‍ച്ചക്കുള്ള സാധ്യതകള്‍ തുറക്കുന്നതിനുമായി ഒരുമിച്ച് പ്രവര്‍ത്തിക്കുമെന്ന് പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്‍ പറഞ്ഞു. പുതിയ സംരംഭത്തിന് വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തും ആശംസകള്‍ അറിയിച്ചു. സമൂഹത്തിലെ ഐക്യം വരാനിരിക്കുന്ന തലമുറയുടെ മികച്ച ഭാവിക്ക് അടിത്തറയാകും എന്ന കാഴ്ചപ്പാടോടെയാണ് പുതിയ സംരംഭം.

വ്യക്തികള്‍ തമ്മിലുള്ള കരുതലും ബന്ധവുമാണ് രാജ്യത്തിന്റെ അടിത്തറയെന്ന് ഷെയ്ഖ് മുഹമ്മദ് പറഞ്ഞു. ഇമാറാത്തി പൈതൃകം കാത്ത് സംരക്ഷിക്കുന്നതിനായി വിവിധ പരിപാടികള്‍ സംഘടിപ്പിക്കും. എഐ ഉള്‍പ്പെടെ നൂതന സാങ്കേതിക വിദ്യകളുടെ പ്രവര്‍ത്തനവും ഭാവി പദ്ധതികള്‍ രൂപീകരിക്കുന്നതിനായി വിവിധ പദ്ധതികളും തയ്യാറാക്കും. വൈസ് പ്രസിഡന്റും ഉപപ്രധാനമന്ത്രിയും പ്രസിഡന്‍ഷ്യല്‍ കോര്‍ട്ട് ചെയര്‍മാനുമായ ഷെയ്ഖ് മന്‍സൂര്‍ ബിന്‍ സായിദ് അല്‍ നഹ്യാന്‍, പ്രസിഡന്‍ഷ്യല്‍ കോര്‍ട്ട് ഡെപ്യൂട്ടി ചെയര്‍പേഴ്‌സണ്‍ ഷെയ്ഖ മറിയം ബിന്‍ത് മുഹമ്മദ് ബിന്‍ സായിഗ് അല്‍ നഹ്യാന്‍ എന്നിവര്‍ പുതിയ സംരംഭത്തിനു മേല്‍നോട്ടം വഹിക്കും. കഴിഞ്ഞ വര്‍ഷം പരസ്ഥിതി ദിനത്തില്‍ 2024 സുസ്ഥിരതാ വര്‍ഷരമായി പ്രഖ്യാപിച്ചിരുന്നു.

ഇസ്രയേല്‍ പ്രവേശനം അനുവദിച്ചതോടെ വടക്കന്‍ ഗാസയിലേക്ക് പലസ്തീനികള്‍ തിരികെ എത്തിത്തുടങ്ങി.പതിനായിരങ്ങളാണ് സ്വദേശത്തേക്ക് മടങ്ങി എത്തുന്നത്.വെടിനിര്‍ത്തിലിന്റെ ഒന്നാംഘട്ടത്തില്‍ മോചിപ്പിക്കുന്ന ബന്ദികളുടെ പട്ടിക ഹമാസ് കൈമാറിയതിന് പിന്നാലെയാണ് ഇസ്രയേല്‍ പ്രവേശനം അനുവദിച്ചത്.

ഇന്ന് രാവിലെയാണ് വടക്കന്‍ ഗാസയിലേക്കുള്ള രണ്ട് പ്രവേശന കവാടങ്ങള്‍ ഇസ്രയേല്‍ സൈന്യം തുറന്നത്.ഇതോടെ കാല്‍നടയായും വാഹനങ്ങളിലും പലസ്തീനികള്‍ സ്വദേശത്തേക്കുള്ള മടക്കയാത്ര ആരംഭിച്ചു.കര്‍ശനപരിശോധനയ്ക്ക്് ശേഷം ആണ് വാഹനങ്ങള്‍ വടക്കന്‍ ഭാഗത്തേക്ക് കടത്തിവിടുന്നത്.വാഹനങ്ങളില്‍ ഹമാസ് ആയുധങ്ങള്‍ കടത്തുന്നില്ലെന്ന് ഉറപ്പാക്കുന്നതിനാണ് പരിശോധന.ആറുലക്ഷത്തോളം പലസ്തീനികള്‍ ആണ് ഗാസയുടെ വടക്കന്‍ ഭാഗത്തേക്ക് മടങ്ങുന്നതിന് കാത്തുനിന്നത്.ഇസ്രയേല്‍ ആക്രമണത്തില്‍ പൂര്‍ണ്ണമായും തകര്‍ക്കപ്പെട്ട അവസ്ഥയില്‍ ആണ് വടക്കന്‍ ഗാസ.വീടുകളുടെയും കെട്ടിടങ്ങളുടെയും അവശിഷ്ടങ്ങള്‍ മാത്രമാണ് ഇവിടെയുള്ളത്.

ആദ്യഘട്ടത്തിലെ ബന്ദിമോചനത്തില്‍ ഹമാസ് കരാര്‍ ലംഘനം നടത്തിയെന്ന് ആരോപിച്ചാണ് ഇസ്രയേല്‍ വടക്കാന്‍ ഗാസയിലേക്കുള്ള പ്രവേശനം നിഷേധിച്ചത്.അര്‍ബേല്‍ യെഹൂദ് എന്ന ഇരുപത്തിയെട്ടുകാരിക്ക് ശനിയാഴ്ച മോചനം നല്‍കാതിരുന്നതാണ് പ്രതിസന്ധി സൃഷ്ടിച്ചത്.പകരം നാല് ഇസ്രയേലിന് സൈനികരെയാണ് ഹമാസ് മോചിപ്പിച്ചത്.തുടര്‍ന്ന് ഖത്തര്‍ ഇടപെട്ട് നടത്തിയ ചര്‍ച്ചകളിലാണ് പ്രശ്‌നം പരിഹരിച്ചത്.അടുത്ത വ്യാഴാഴ്ച അര്‍ബേല്‍ യെഹൂദ് അടക്കം മൂന്ന് ബന്ദികള്‍ക്ക് ഹമാസ് മോചനം നല്‍കും.ശനിയാഴ്ച മറ്റ് മൂന്ന് ബന്ദികള്‍ക്ക് കൂടി മോചനം നല്‍കും എന്നാണ് പ്രതീക്ഷ.

യുഎഇ അടക്കം ഗള്‍ഫ് രാജ്യങ്ങളിലും വിപുലമായ റിപബ്ലിക് ദിനാഘോഷം.അബുദബി ഇന്ത്യന്‍ എംബസിയിലും ദുബൈ കോണ്‍സുലേറ്റിലും ആഘോഷപരിപാടികള്‍ നടന്നു.റിപബ്ലിക് ദിനത്തില്‍ രാഷ്ട്രപതി ദ്രൗപതി മുര്‍മ്മുവിനെ യുഎഇ രാഷ്ട്രനേതാക്കള്‍ അഭിനന്ദിച്ചു

വിപുലമായ പരിപാടികളോടെയാണ് യുഎഇയിലെ ഇന്ത്യന്‍ നയനതന്ത്രകാര്യാലയങ്ങളില്‍ റിപബ്ലിക് ദിനാഘോഷപരിപാടികള്‍ അരങ്ങേറിയത്.അബുദബി ഇന്ത്യന്‍ എംബസിയില്‍ അംബാസഡര്‍ സഞ്ജയ് സുധീര്‍ ദേശീയ പതാക ഉയര്‍ത്തി.തുടര്‍ന്ന് രാഷ്ട്രപതി ദ്രൗപതി മുര്‍മ്മുവിന്റെ റിപബ്ലിക് ദിന സന്ദേശം അംബാസഡര്‍ വായിച്ചു.

ദേശഭക്തിഗാനങ്ങള്‍ അടക്കം കലാസാംസ്‌കാരിക പരിപാടികളും അരങ്ങിലെത്തി.ദുബൈ ഇന്ത്യന്‍ കോണ്‍സുലേറ്റില്‍ രാവിലെ നടന്ന ചടങ്ങില്‍ കോണ്‍സുല്‍ ജനറല്‍ സതീഷ് കുമാര്‍ ശിവന്‍ പതാക ഉയര്‍ത്തി.കോണ്‍സുലേറ്റിലും കലാസംസ്‌കാരിക പരിപാടികള്‍ ഒരുക്കിയിരുന്നു.യുഎഇയിലെ വിവിധ ഇന്ത്യന്‍ അസോസിയേഷനുകളുടെയും പ്രവാസി കൂട്ടായ്മകളുടെയും നേതൃത്വത്തിലും റിപബ്ലിക് ദിനാഘോഷങ്ങള്‍ നടന്നു