അമേരിക്കന്‍ സമ്പദ്ഘടന വീണ്ടും മാന്ദ്യഭീതിയില്‍.പ്രസിഡന്റ് ഡൊണള്‍ഡ് ടംപിന്റെ നയങ്ങള്‍ അമേരിക്കയെ സാമ്പത്തിക മാന്ദ്യത്തിലേക്കാണ് നയിക്കുന്നത് എന്ന ആശങ്കയാണ് ശക്തമാകുന്നത്.അമേരിക്കന്‍ ഓഹരി വിപണികളും തകര്‍ച്ച നേരിടുകയാണ്.
അമേരിക്കന്‍ പ്രസിഡന്റായി ഡൊണള്‍ഡ് ട്രംപ് വീണ്ടും ചുമതലയേറ്റതിന് ശേഷം സ്വീകരിക്കുന്ന നയസമീപനങ്ങള്‍ സമ്പദ്ഘടനയെ വീണ്ടും മാന്ദ്യത്തിലേക്ക് നയിക്കും എന്ന ഭീതി ശക്തിപ്പെട്ടിരിക്കുകയാണ്.ഇന്നലെ അമേരിക്കന്‍ ഓഹരിവിപണികളില്‍ നേരിട്ട വന്‍തകര്‍ച്ചയ്ക്ക് കാരണവും ഈ ഭീതിയാണ്.

സാമ്പത്തിക മാന്ദ്യസാധ്യത തളളാത്ത ട്രംപിന്റെ നിലപാടും വിപണിയുടെ ആത്മവിശ്വാസത്തെ ബാധിച്ചു.ഫോക്‌സിന് നല്‍കിയ അഭിമുഖത്തില്‍ ഈ വര്‍ഷം സാമ്പത്തികപ്രതിസന്ധിയുണ്ടാകുമോ എ്ന്ന ചോദ്യത്തിന് ട്രംപ് കൃത്യമായ മറുപടി നല്‍കിയിട്ടില്ല.കാര്യങ്ങള്‍ അങ്ങനെ പ്രവചിക്കാന്‍ താനില്ലെന്നായിരുന്നു ട്രംപിന്റെ പ്രതികരണം.തിങ്കളാഴ്ച മാത്രം 1.75 ട്രില്യണ്‍ ഡോളറിന്റെ നഷ്ടമാണ് അമേരിക്കന്‍ വിപണി നേരിട്ടത്.മാന്ദ്യഭീതിയില്‍ ഡോളറിന് മൂല്യത്തില്‍ ഇടിവ് നേരിട്ടു.ക്രൂഡ് ഓയില്‍ വില എഴുപത് ഡോളറില്‍ താഴേയ്ക്ക് എത്തി.ട്രംപിന്റെ നികുതി നയം ആഗോളതലത്തില്‍ വ്യാപാരയുദ്ധത്തിന് തുടക്കമിടുമെന്ന ആശങ്ക ശക്തമായി തുടരുകയാണ്.ഇതിനൊപ്പം ആണ് ചെലവുചുരുക്കലും പിരിച്ചുവിടലും യു.എസ് വിപണിയെ മാന്ദ്യഭീതിയിലാക്കുന്നത്.

ഗാസവെടിനിര്‍ത്തലിന്റെ രണ്ടാംഘട്ടത്തിനുള്ള ചര്‍ച്ചകള്‍ വൈകാതെ ആരംഭിച്ചേക്കും.ചര്‍ച്ചകള്‍ക്ക് ഹമാസും ഇസ്രയേലും സമ്മതമറിയിച്ചു എന്നാണ് റിപ്പോര്‍ട്ട്്.ഗാസയുടെ ഭാവി സംബന്ധിച്ച് ഈജിപ്തുമായി ഹമാസും ചര്‍ച്ചകള്‍ ആരംഭിച്ചിട്ടുണ്ട്.

നാളെയോ മറ്റന്നാളോ ഗാസ വെടിനിര്‍ത്തല്‍ ചര്‍ച്ചകള്‍ പുനരാരംഭിക്കാന്‍ കഴിഞ്ഞേക്കും എന്നാണ് മധ്യസ്ഥര്‍ പ്രതീക്ഷ പ്രകടിപ്പിക്കുന്നത്.തുടര്‍ചര്‍ച്ചകള്‍ക്കുള്ള മധ്യസ്ഥരുടെ ക്ഷണം സ്വീകരിക്കുന്നതായി ഇസ്രയേല്‍ പ്രധാനമന്ത്രി ബെന്യമിന്‍ നെതന്യാഹുവിന്റെ ഓഫീസും വ്യക്തമാക്കിയിട്ടുണ്ട്.തിങ്കളാഴ്ച പ്രതിനിധി സംഘത്തെ ഖത്തര്‍ തലസ്ഥാനമായ ദോഹയിലേക്ക് അയക്കും എന്നും നെതന്യാഹുവിന്റെ ഓഫീസ് അറിയിച്ചു.രണ്ടാംഘട്ട വെടിനിര്‍ത്തലിനുള്ള ചര്‍ച്ചകള്‍ തുടങ്ങുന്നതിനുള്ള അനുകൂല സാഹചര്യം ഒരുങ്ങുന്നുവെന്ന് ഹമാസും വ്യക്തമാക്കി.

ഗാസയില്‍ നിന്നും ഇസ്രയേല്‍ സൈന്യം പൂര്‍ണ്ണമായും പിന്‍വാങ്ങുന്നത് അടക്കമുള്ള സങ്കീര്‍ണ്ണമായ വിഷയങ്ങള്‍ ആണ് രണ്ടാംഘട്ടത്തില്‍ ചര്‍ച്ചചെയ്യേണ്ടത്.ഇതൊടൊപ്പം തന്നെ ഗാസയുടെ പുനര്‍നിര്‍മ്മാണത്തിനായി അറബ് രാഷ്ട്രങ്ങള്‍ അംഗീകരിച്ച പദ്ധതി സംബന്ധിച്ച് ഈജിപ്ത് ഹമാസുമായി ചര്‍ച്ചകള്‍ നടത്തുന്നതായും റിപ്പോര്‍ട്ടുകള്‍ ഉണ്ട്.ചര്‍ച്ചകള്‍ക്കായി ഹമാസിന്റെ പ്രതിനിധി സംഘം ഈജിപത് തലസ്ഥാനമായ കെയ്‌റോയില്‍ എത്തിയിട്ടുണ്ട്.ഗാസയുടെ നിയന്ത്രണത്തിനായി ഒരു താത്കാലികഭരണസമിതിക്ക് രൂപം നല്‍കുന്നത് അടക്കമുള്ള നിര്‍ദ്ദേശങ്ങള്‍ ചര്‍ച്ച ചെയ്യുന്നുണ്ട്. തെരഞ്ഞെടുപ്പ് വരെ ഗാസയുടെ നിയന്ത്രണത്തിനായി താത്കാലിക ഭരണസമിതിക്ക് രൂപം നല്‍കുന്നതിന് ഹമാസും സമ്മതം അറിയിച്ചതായാണ് സൂചന.

ഗാസയുടെ പുനരുദ്ധാരണത്തിനുള്ള അറബ് ലീഗ് പദ്ധതിക്ക് ഇസ്ലാമിക രാജ്യങ്ങളുടെ കൂട്ടായ്മയുടെ പിന്തുണ.ഗാസ പുനരുദ്ധാരണ പദ്ധതിക്ക് രാജ്യാന്തരസമൂഹം പിന്തുണ നല്‍കണം എന്ന് ഓര്‍ഗനൈസേഷന്‍ ഓഫ് ഇസ്ലാമിക് കോപ്പറേഷന്‍ അഭ്യര്‍ത്ഥിച്ചു.

സൗദി അറേബ്യയിലെ ജിദ്ദയില്‍ ചേര്‍ന്ന ഇസ്ലാമിക രാജ്യങ്ങളുടെ കൂട്ടായുടെ അടിയന്തര യോഗം ആണ് അറബ് ലീഗിന്റെ പദ്ധതി നടപ്പാക്കാന്‍ തീരുമാനിച്ചത്.ഗാസയുടെ പുനര്‍നിര്‍മ്മാണത്തിനായി ഈജിപ്ത് തയ്യാറാക്കിയ പദ്ധതിയാണ് അറബ് ലീഗിലും ഒ.ഐ.സിയും അംഗീകരിച്ചത്.ജിദ്ദയില്‍ ചേര്‍ന്ന ഒ.ഐ.സി യോഗത്തില്‍ അന്‍പത്തിയേഴ് ഇസ്ലാമിക രാജ്യങ്ങളുടെ പ്രതിനിധികള്‍ ആണ് പങ്കെടുത്തത്.അമേരിക്കന്‍ പ്രസിഡന്റ് ഡൊണള്‍ഡ് ട്രംപിന്റെ പദ്ധതിക്ക് ബദലായി ഈജിപ്ത് തയ്യാറാക്കിയ പദ്ധതിയുമായി മുന്നോട്ട് പോകും എന്ന് ഒ.ഐ.സി പ്രസ്താവനയില്‍ അറിയിച്ചു.

വേഗത്തില്‍ ഗാസയുടെ പുനര്‍നിര്‍മ്മാണം പൂര്‍ത്തിയാക്കണം എന്നും ഇസ്ലാമിക രാജ്യങ്ങളുടെ കൂട്ടായ്മ ആവശ്യപ്പെട്ടു.മേഖലയിലെയും രാജ്യാന്തരതലത്തിലേയും ഫണ്ടിംഗ് ഏജന്‍സികള്‍ ഗാസയുടെ പുനര്‍നിര്‍മ്മാണത്തിന് പിന്തുണ നല്‍കണം എന്നും ഒ.ഐ.സി ആവശ്യപ്പെട്ടു.മൂന്ന് ഘട്ടങ്ങളിലായി ഗാസയുടെ പുന്‍നിര്‍മ്മാണം നടത്തുന്നതിനുള്ള പദ്ധതിയാണ് ഈജിപ്ത് തയ്യാറാക്കിയത്. വീടുകളും റോഡുകളും പശ്ചാത്തലസൗകര്യങ്ങളും ഘട്ടംഘട്ടമായി നിര്‍മ്മിക്കും.ഹമാസിന് ഒഴിവാക്കി ഒരു താത്കാലിക ഭരണസമിതി രുപീകരിക്കും എന്നും ഈജ്പ്തിന്റെ പദ്ധതിയില്‍ പറയുന്നുണ്ട്.