യുഎഇയില്‍ അന്തരീക്ഷത്തില്‍ പൊടിപടലങ്ങള്‍ നിറഞ്ഞ കാലാവസ്ഥ.രാജ്യത്ത് വിവിധയിടങ്ങളില്‍ പൊടിക്കാറ്റും വീശുന്നുണ്ട്.നാളെയും പൊടിക്കാറ്റിന് സാധ്യതയുണ്ടെന്നാണ് ദേശീയ കാലാവസ്ഥാ കേന്ദ്രത്തിന്റെ മുന്നറിയിപ്പ്

ഇന്ന് രാവിലെ മുതല്‍ തന്നെ രാജ്യത്ത് പലയിടത്തും അന്തരീക്ഷത്തില്‍ പൊടിപടലങ്ങള്‍ നിറഞ്ഞ അവസ്ഥയാണ് അനുഭവപ്പെട്ടത്.ഇന്ന് കാഴ്ച്ചയ്ക്ക് തടസ്സം സൃഷ്ടിക്കും വിധത്തില്‍ പൊടിക്കാറ്റിന് സാധ്യതയുണ്ടെന്ന് ദേശീയകാലാവസ്ഥാ കേന്ദ്രം മുന്നറിയിപ്പ് നല്‍കിയിരുന്നു.വിവിധയിടങ്ങളില്‍ ഓറഞ്ച് യെല്ലോ അലര്‍ട്ടുകളും പ്രഖ്യാപിച്ചിട്ടുണ്ട്.

ദുബൈ,ഷാര്‍ജ,അബുദബി എമിറേറ്റുകളില്‍ ആണ് മുന്നറിയിപ്പ്.വാഹനം ഓടിക്കുന്നവര്‍ ജാഗ്രത പാലിക്കണം എന്നാണ് നിര്‍ദ്ദേശം.ഇതിനൊപ്പം പൊടിപടലങ്ങള്‍ കയറാതിരിക്കുന്നതിന് കെട്ടിടങ്ങളുടെ ജനാലകളും വാതിലുകളും അടച്ചിടണം എന്നും ദേശീയകാലാവസ്ഥാ കേന്ദ്രം ആവശ്യപ്പെട്ടു.നാളെയും പൊടിക്കാറ്റും പൊടിപടലങ്ങള്‍ നിറഞ്ഞ അന്തരീക്ഷവും തുടരും എന്നാണ് ദേശീയ കാലാവസ്ഥാ കേന്ദ്രത്തിന്റെ മുന്നറിയിപ്പ്.രാജ്യത്ത് അന്തരീക്ഷ ഈര്‍പ്പത്തിലും വര്‍ദ്ധനയുണ്ട്.ഇന്ന് രാവിലെ മൂടല്‍മഞ്ഞും അനുഭവപ്പെട്ടു.

അബുദബി ഷെയ്ഖ് മുഹമ്മദ് ബിന്‍ റാഷിദ് റോഡില്‍ ഏര്‍പ്പെടുത്തിയിരുന്ന മിനിമം വേഗത ഗതാഗത അതോറിട്ടി പിന്‍വലിച്ചു.ഗതാഗതം സുഗമമാക്കുന്നതിന്റെ ഭാഗമായിട്ടാണ് നടപടി.അബുദബിയില്‍ രണ്ട് പ്രധാന ഹൈവേകളില്‍ വേഗപരിധി കുറച്ചത് ഇന്ന് പ്രാബല്യത്തില്‍ വന്നു.

അബുദബി ഷെയ്ഖ് മുഹമ്മദ് ബിന്‍ റാഷിദ് റോഡില്‍ മണിക്കൂറില്‍ 120 കിലോമീറ്ററില്‍ താഴെ വാഹനം ഓടിക്കാന്‍ പാടില്ലെന്ന നിബന്ധന പിന്‍വലിച്ചു എന്നാണ് അബുദബി മൊബിലിറ്റിയുടെ അറിയിപ്പ്.ഇനി മുതല്‍ വാഹനം ഓടിക്കുന്നവര്‍ മിനിമം വേഗത പാലിക്കേണ്ടതില്ല.ഗതാഗതം കൂടുതല്‍ സുഗമമവും സുരക്ഷിതവും ആക്കുക എന്ന ലക്ഷ്യത്തിലാണ് മിനിമം വേഗത ഒഴിവാക്കുന്നത്.2023 ഏപ്രിലില്‍ ആണ് ഷെയ്ഖ് മുഹമ്മദ് ബിന്‍ റാഷിദ് റോഡില്‍ മണിക്കൂറില്‍ 120 കിലോമീറ്റര്‍ മിനിമം വേഗത ഏര്‍പ്പെടുത്തിയത്.ഇടതുവശത്തുള്ള ആദ്യ രണ്ട് വരികളില്‍ ആയിരുന്നു മിനിമം വേഗത ഏര്‍പ്പെടുത്തിയിരുന്നത്.

ഇത് പാലിക്കാത്തവര്‍ക്ക് നാനൂറ് ദിര്‍ഹം പിഴയും ചുമത്തിയിരുന്നു. മണിക്കൂറില്‍ 140 കിലോമീറ്ററാണ് ഈ പാതയില്‍ പരമാവധി വേഗത.അതെസമയം അബുദബി ഷെയ്ഖ് ഖലീഫ ബിന്‍ സായിദ് ഇന്റര്‍നാഷണല്‍ റോഡിലും അബുദബി സൈ്വഹാന്‍ റോഡിലും പരമാവധി വേഗതയയില്‍ മാറ്റംവരുത്തിയത് പ്രാബല്യത്തിലായി.ഷെയ്ഖ് ഖലീഫ ബിന്‍ സായിദ് ഇന്റര്‍നാഷണല്‍ റോഡില്‍ പരമാവധി വേഗത മണിക്കൂറില്‍ 160 കിലോമീറ്ററില്‍ നിന്നും 140 കിലോമീറ്ററായാണ് കുറച്ചത്. സൈ്വഹാന്‍ റോഡില്‍ മണിക്കൂറില്‍ കൂടിയ വേഗത മണിക്കൂറില്‍ 120 കിലോമീറ്ററില്‍ നിന്നും നൂറ്
കിലോമീറ്ററായി കുറച്ചു.

സിറിയയുടെ പുന്‍നിര്‍മ്മാണത്തിന് സഹായം വാഗ്ദാനം ചെയ്ത് യുഎഇ.അബുദബിയില്‍ എത്തി സിറിയന്‍ പ്രസിഡന്റ് അഹമ്മദ് അല്‍ ഷാര യുഎഇ പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാനുമായി കൂടിക്കാഴ്ച നടത്തി.

സിറിയന്‍ പ്രസിഡന്റായതിന് ശേഷമുള്ള ആദ്യ യുഎഇ സന്ദര്‍ശനത്തിനായാണ് അഹമ്മദ് അല്‍ ഷാര അബുദബിയില്‍ എത്തിയത്.യുഎഇ പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്‍ അഹമ്മദ് അല്‍ ഷാരയെ സ്വീകരിച്ചു.സിറിയയുടെ സുരക്ഷയും സ്ഥിരതയും മധ്യപൂര്‍വ്വദേശത്തിന് പ്രധാനമാണെന്ന് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്‍ പറഞ്ഞു.സിറയയ്ക്ക് സാധ്യമായ എല്ലാ പിന്തുണയും യുഎഇ നല്‍കും.സിറിയന്‍ ജനതയുടെ അഭിലാഷങ്ങള്‍ നിറവേറ്റന്ന രീതിയില്‍ സിറിയയെ പുന്‍നിര്‍മ്മിക്കണം എന്നും പരിവര്‍ത്തനഘട്ടത്തിലെ വെല്ലുവിളികളെ അതിജീവിക്കണം എന്നും ഷെയ്ഖ് മുഹമ്മദ് ബിന്‍ പറഞ്ഞു.

പുതിയ സര്‍ക്കാര്‍ അധികാരമേറ്റതിന് ശേഷം ഗള്‍ഫ് രാജ്യങ്ങളുടെ പിന്തുണ തേടിയാണ് അഹമ്മദ് അല്‍ ഷാരയുടെ സന്ദര്‍ശനം. അബുദബി അല്‍ ബത്തിന്‍ വിമാനത്താവളത്തില്‍ ആണ് അഹമ്മദ് അല്‍ ഷാര വിമാനമിറങ്ങിയത്. യുഎഇ ഉപപ്രധാനമന്ത്രിയും വിദേശകാര്യമന്ത്രിയുമായ ഷെയ്ഖ് അബ്ദുള്ള ബിന്‍ സായിദ് അല്‍ നഹ്യാന്‍ വിമാനത്താവളത്തില്‍ എത്തി സ്വീകരിച്ചു.തുടര്‍ന്ന് അല്‍ ഷാറ്റി കൊട്ടരത്തില്‍ ഗാര്‍ഡ് ഓഫ് ഓണറും നല്‍കി.

സൗദി ജയിലില്‍ കഴയുന്ന അബ്ദുള്‍ റഹീമിന്റെ മോചനക്കാര്യത്തില്‍ തീരുമാനം വൈകുന്നു. റിയാദിലെ ക്രിമിനല്‍ കോടതി വീണ്ടും കേസ് മാറ്റിവെച്ചു.ഇത് പതിനൊന്നാം തവണയാണ് കോഴിക്കോട് ഫറോക്ക് സ്വദേശി അബ്ദുള്‍ റഹീമിന്റെ ഹര്‍ജി മാറ്റിവെയ്ക്കുന്നത്.ഇന്ന് രാവിലെ എട്ട് മണിക്കായിരുന്നു സിറ്റിംഗ്.ജയിലില്‍ നിന്നും അബ്ദുല്‍ റഹീമും പ്രഭിഭാഗം അഭിഭാഷകരും ഓണ്‍ലനൈയി ഹാജരായെങ്കിലും കോടതി മറ്റൊരു ദിവസത്തേക്ക് കേസ് മാറ്റിവെച്ചു.

ദിയാധനം നല്‍കിയതിനെ തുടര്‍ന്ന് അബ്ദുള്‍ റഹീമിന്റെ വധശിക്ഷ റദ്ദാക്കിയെങ്കിലും പബ്ലിക് റൈറ്റ് പ്രകാരമുള്ള കേസില്‍ തീര്‍പ്പുണ്ടാവാത്തതാണ് മോചനത്തിന് തടസ്സം.അബ്ദുള്‍ റഹീം ജയ്‌ലില്‍ പത്തൊന്‍പതാം വര്‍ഷത്തിലേക്ക് കടന്നു.പബ്ലിക് റൈറ്റ് പ്രകാരം കോടതി ഇനി തടവുശിക്ഷ വിധിച്ചാലും റഹീമിന് അധികാലം ജയിലില്‍ കഴിയേണ്ടിവരില്ലെന്നാണ് കണക്കുകൂട്ടുന്നത്.കഴിഞ്ഞ വര്‍ഷം ഒക്ടോബര്‍ ഇരുപത്തിയൊന്നിനാണ് പബ്ലിക് റൈറ്റ് പ്രകാരമുള്ള സിറ്റിംഗ് ആരംഭിച്ചത്.

ഇന്ത്യയ്ക്കും ദുബൈയ്ക്കുമിടയില്‍ വാണിജ്യ-വ്യാപാരബന്ധത്തില്‍ വന്‍ വളര്‍ച്ച എന്ന് കണക്കുകള്‍. കഴിഞ്ഞ അഞ്ച് വര്‍ഷത്തിനിടയില്‍ മാത്രം 3500 കോടിയിലധികം ദിര്‍ഹത്തിന്റെ പരസ്പര നിക്ഷേപം ആണ് നടന്നത്.

കഴിഞ്ഞ അഞ്ച് വര്‍ഷത്തിനിടയില്‍ മാത്രം ഇന്ത്യയിലേക്ക് ദുബൈയില്‍ നിന്നും ഒഴുകിയത് 1720 കോടി ദിര്‍ഹത്തിന്റെ നിക്ഷേപമാണ്.ഇതെ കാലയളവില്‍ ദുബൈയിലേക്ക് ഇന്ത്യയില്‍ നിന്നും 1500 കോടി ദിര്‍ഹത്തിന്റെ നിക്ഷേപവും എത്തി.2024-ല്‍ മാത്രം 16623 ഇന്ത്യന്‍ കമ്പനികള്‍ ദുബൈയില്‍ ആരംഭിച്ചു.ദുബൈയിലെ ഇന്ത്യന്‍ കമ്പനികളുടെ എണ്ണം ഇന്ന് എഴുപതിനായിരത്തിലധികം ആണ്.ദുബൈയുടെ ഏറ്റവും വലിയ വ്യാപാരപങ്കാളികളില്‍ മുന്‍നിരയിലാണ് ഇന്ന് ഇന്ത്യയുടെ സ്ഥാനം.ദുബൈ പോര്‍ട്ട് വേള്‍ഡ് കഴിഞ്ഞ ഇരുപത് വര്‍ഷത്തിലധികമായി ഇന്ത്യയില്‍ പ്രവര്‍ത്തിക്കുന്നുണ്ട്.

വിവിധ ഇന്ത്യനഗരങ്ങള്‍ക്കും ദുബൈയ്ക്കും ഇടയില്‍ ആഴ്ച്ചയില്‍ പറക്കുന്നത് 538 വിമാനങ്ങളാണ്.2024-ല്‍ മാത്രം പന്ത്രണ്ട് ദശലക്ഷം യാത്രക്കാര്‍ ദുബൈയ്ക്കും ഇന്ത്യയ്ക്കും ഇടയില്‍ സഞ്ചരിച്ചു.ദുബൈ മീഡിയ ഓഫീസ് പുറത്തുവിട്ടതാണ് ഈ കണക്കുകള്‍.സമസ്ത മേഖലകളിലും ദുബൈയും ഇന്ത്യയും തമ്മിലുള്ള സഹകരണം അനുദിനം വളരുകയാണ്.ആ വളര്‍ച്ചയ്ക്ക് ആക്കം കൂട്ടുന്നതാണ് ദുബൈ കിരീടവകാശി ഷെയ്ഖ് ഹംദാന്‍ ബിന്‍ മുഹമ്മദ് ബിന്‍ റാഷിദ് അല്‍ മക്തുമിന്റെ ഇന്ത്യാ സന്ദര്‍ശനം.
ന്യൂസ് ഡസക്ക്,എന്‍ടിവി