ഇസ്രയേലില്‍ കനത്ത നാശം വിതച്ച് ഇറാന്റെ മിസൈല്‍ ആക്രമണം. ആക്രമണങ്ങളില്‍ പത്ത് പേര്‍ മരിച്ചതായാണ് സ്ഥിരീകരണം.ഇറാനില്‍ ഇസ്രയേലും ശക്തമായ ആക്രമണം തുടരുകയാണ്.യെമനില്‍ നിന്നും ഹൂത്തികളും ഇസ്രയേലിലേക്ക് ആക്രമണം നടത്തുന്നുണ്ട്.മധ്യ ഇസ്രയേലിലും വടക്കന്‍ ഇസ്രയേലിലും ആണ് ഇറാന്റെ മിസൈലുകള്‍ നാശം വിതച്ചത്.മിസൈല്‍ ആക്രമണത്തില്‍ പത്ത് പേര്‍ മരിച്ചതായി ഇസ്രയേല്‍ എമര്‍ജന്‍സി സര്‍വീസസ് അറിയിച്ചു.നൂറ് പേര്‍ക്ക് പരുക്കേറ്റു.നിരവധി കെട്ടിടങ്ങളാണ് തകര്‍ന്നത്.ഹജ് ഖാസിം എന്ന പുതിയ ബാലിസ്റ്റിക് മിസൈല്‍ ആണ് ഇസ്രയേലിന് എതിരെ ഉപയോഗിച്ചതെന്ന് ഇറാന്‍ അവകാശപ്പെട്ടു.

ഇസ്രയേലിന്റെ വ്യോമപ്രതിരോധ സംവിധാനങ്ങളെ മറികടന്നാണ് ഇറാന്റെ മിസൈലുകള്‍ നാശംവിതയ്ക്കുന്നത്.ഇറാനില്‍ ഇസ്രയേലും ആക്രമണം തുടരുകയാണ്.ഇറാനിലെ എണ്ണപ്പാടങ്ങളും എണ്ണശുദ്ധീകരണശാലകളും ആണ് ഇന്നലെ രാത്രി ആക്രമിക്കപ്പെട്ടത്.ബുഷഹ്ര്‍ പ്രവിശ്യയിലെ പാര്‍സ് റിഫൈനറിയും ഫജര്‍ ജാം ഗ്യാസ് റിഫൈറിയും ആണ് ആക്രമിക്കപ്പെട്ടത്.പാര്‍സ് ലോകത്തിലെ ഏറ്റവും വലിയ എണ്ണപ്പാടങ്ങളില്‍ ഒന്നാണ്.ടെഹ്‌റാനിലെ പ്രതിരോധമന്ത്രാലയ ആസ്ഥാനവും ഇസ്രയേല്‍ ആക്രമിച്ചു.ഇറാന്‍-ഇസ്രയേല്‍ ഏറ്റുമുട്ടല്‍ കൂടുതല്‍ ശക്തിപ്പെടുമ്പോള്‍ നേരിട്ടുളള യുദ്ധത്തിലേക്ക് അത് വഴിമാറുമോ എന്ന ആശങ്കയാണ് മേഖലയില്‍ ഉയരുന്നത്.

ഇറാന് കടുത്ത മുന്നറിയിപ്പുമായി അമേരിക്കന്‍ പ്രസിഡന്റ് ഡൊണള്‍ഡ് ട്രംപ്.യു.എസിന് എതിരെ ആക്രമണം ഉണ്ടായാല്‍ ഇതുവരെ കാണാത്ത രീതിയിലുള്ള തിരിച്ചടിയുണ്ടാകും എന്നാണ് ഡൊണള്‍ഡ് ട്രംപിന്റെ ഭീഷണി.അതെസമയം ഇസ്രയേലിന്റെ സൈനിക നടപടിക്ക് പിന്നില്‍ അമേരിക്കയുടെ സഹായം ഉണ്ടെന്നതിന് തെളിവുകള്‍ ഉണ്ടെന്ന് ഇറാന്‍ ആരോപിച്ചു.

ഇറാനില്‍ ഇസ്രയേല്‍ നടത്തുന്ന ആക്രമണത്തില്‍ അമേരിക്കയ്ക്ക് യാതോരു പങ്കും ഇല്ലെന്നാണ് പ്രസിഡന്റ് ഡൊണള്‍ഡ് ട്രംപിന്റെ പ്രസ്താവന.ഇറാന്‍ എതെങ്കിലും തരത്തില്‍ തങ്ങള്‍ക്കും നേരെ ആക്രമണം നടത്തിയാല്‍ യു.എസ് സൈന്യത്തിന്റെ മുഴുവന്‍ ശക്തിയും കരുത്തും ഉപയോഗിച്ച് തിരിച്ചടിക്കും എന്നാണ് ഡൊണള്‍ഡ് ട്രംപ് സമൂഹമാധ്യമങ്ങളില്‍ പങ്കുവെച്ച കുറിപ്പില്‍ പറയുന്നു.ഇറാനേയും ഇസ്രയേലിനേയും കരാറില്‍ ഒപ്പുവെപ്പിച്ച് ഇപ്പോള്‍ നടക്കുന്ന ഏറ്റുമുട്ടല്‍ അവസാനിപ്പിക്കാന്‍ എളുപ്പത്തില്‍ കഴിയും എന്നും ട്രംപ് പറഞ്ഞു.

ഇസ്രയേലിന് സഹായം നല്‍കിയാല്‍ പശ്ചിമേഷ്യയിലെ അമേരിക്കന്‍ കേന്ദ്രങ്ങള്‍ ആക്രമിക്കും എന്ന് ഇറാന്‍ മുന്നറിയിപ്പ് നല്‍കിയതിന്റെ പശ്ചാത്തലത്തില്‍ ആണ് ട്രംപിന്റെ പ്രതികരണം.അതെസമയം ഇറാന്റെ ആണവകേന്ദ്രങ്ങളില്‍ ഇസ്രയേല്‍ നടത്തുന്ന ആക്രമണങ്ങളില്‍ അമേരിക്ക പങ്കാളിയാണെന്ന് ഇവിദേശകാര്യമന്ത്രി അബ്ബാസ് അറാഗ്ചി ആരോപിച്ചു.അമേരിക്ക പച്ചക്കൊടി കാട്ടാതെ ഒരിക്കലും ഇസ്രയേല്‍ ആക്രമണം നടത്തില്ലെന്നും ഇറാന്‍ വിദേശകാര്യമന്ത്രി ആരോപിച്ചു.ഇസ്രയേല്‍ ആക്രമണത്തില്‍ അമേരിക്കയ്ക്ക് പങ്കുണ്ടെന്നതിന് തങ്ങളുടെ പക്കല്‍ തെളിവുണ്ടെന്നും ഇറാന്‍ വിദേശകാര്യമന്ത്രി ആരോപിച്ചു.ഇതിനിടയില്‍ അമേരിക്കയും ഇറാനും തമ്മില്‍ ഇന്ന് നടക്കാനിരുന്ന ആണവചര്‍ച്ച
റദ്ദാക്കി.

പ്രസിഡന്റ് ഡൊണള്‍ഡ് ട്രംപിന്റെ കുടിയേറ്റ വിരുദ്ധ നയങ്ങള്‍ക്ക് എതിരായ പ്രതിഷേധം അമേരിക്കയിലെ ലോസ് എയ്ഞ്ചലസില്‍ വ്യാപിക്കുന്നു.പ്രതിഷേധക്കാരെ കൂട്ടത്തോടെ അറസ്റ്റ് ചെയ്ത് നീക്കുകയാണ് പൊലീസ്.ന്യൂയോര്‍ക്ക് അടക്കമുള്ള നഗരങ്ങളിലേക്കും പ്രതിഷേധം വ്യാപിക്കുന്നുണ്ട്.

അനധികൃത കുടിയേറ്റക്കാരെ കണ്ടെത്തുന്നതിനുളള പരിശോധനകള്‍ക്ക് എതിരെ ആരംഭിച്ച പ്രതിഷേധം അഞ്ച് ദിവസം പിന്നിടുകയാണ്.ലോസ് എയ്ഞ്ചലസില്‍ കര്‍ഫ്യു പ്രഖ്യാപിച്ചിരിക്കുകയാണ്.രാത്രി എട്ട് മുതല്‍ രാവിലെ ആറ് വരെയാണ് കര്‍ഫ്യു.നാഷണല്‍ ഗാര്‍ഡിനെയും മറീനുകളേയും ഇറക്കിയിട്ടും പ്രതിഷേധം നേരിടുന്നതിന് ട്രംപ് ഭരണകൂടത്തിന് കഴിഞ്ഞിട്ടില്ല.നൂറുകണക്കിന് പ്രക്ഷോഭകരെയാണ് പൊലീസ് അറസ്റ്റ് ചെയ്തത്.ലോസ് എയ്ഞ്ചലസ് പ്രക്ഷോഭം ദേശീയസുരക്ഷയ്ക്ക് ഭീഷണിയാണെന്നാണ് ഡൊണള്‍ഡ് ട്രംപ് പ്രതികരിച്ചത്.

രാജ്യത്തെ ഏറ്റവും വലിയ നഗരങ്ങളില്‍ ഒന്നായ ലോസ് ആഞ്ചലസില്‍ ആകെ ജനസംഖ്യയുടെ മൂന്നില്‍ ഒന്നും കുടിയേറ്റക്കാരാണെന്നാണ് കരുതുന്നത്. അതുകൊണ്ടുതന്നെയാണ് ട്രംപ് ലോസ് അഞ്ചലസിനെ തന്നെ പ്രധാനമായും ലക്ഷ്യംവെയ്ക്കുന്നത്. കഴിഞ്ഞ മാസം 239 അനധികൃത കുടിയേറ്റക്കാരെ നഗരത്തില്‍ നിന്ന് അറസ്റ്റ് ചെയ്തിരുന്നു. അറസ്റ്റിലായവരുടെ എണ്ണം കുറഞ്ഞുപോയെന്ന ട്രംപിന്റെ വിലയിരുത്തലിനെ തുടര്‍ന്നാണ് ഇമിഗ്രേഷന്‍ ആന്‍ഡ് കസ്റ്റംസ് എന്‍ഫോഴ്‌സ്‌മെന്റ് നടപടികള്‍ കര്‍ശനമാക്കിയത്. ഒരു ദിവസം ചുരുങ്ങിയത് മൂവായിരം പേരെയെങ്കിലും അറസ്റ്റ് ചെയ്യണമെന്നാണ് സര്‍ക്കാര്‍ ഐസിഇക്ക് നല്‍കിയിരിക്കുന്ന നിര്‍ദേശം. ഇത് നടപ്പിലാക്കാനുള്ള ശ്രമമാണ് വ്യാപക പ്രതിഷേധത്തില്‍ കലാശിച്ചത്.

ഗാസയിലെ ഭക്ഷണവിതരണ കേന്ദ്രത്തില്‍ ഇന്നും ഇസ്രയേലിന്റ വെടിവെയ്പ്.ആറ് പേര്‍ കൊല്ലപ്പെട്ടതായി ഗാസ സിവില്‍ ഡിഫന്‍സ് അറിയിച്ചു.ഭക്ഷണവിതരണ കേന്ദ്രത്തില്‍ വെടിയേറ്റ് മരിച്ച പലസ്തീനികളുടെ എണ്ണം നൂറ് കവിഞ്ഞു.തെക്കന്‍ ഗാസയിലെ റഫായില്‍ ആണ് സഹായവിതരണ കേന്ദ്രത്തില്‍ വെടിവെപ്പുണ്ടായത്.സഹായംകാത്തുനിന്ന എഴുപതിലധികം പേര്‍ക്ക് പരുക്കേറ്റതായാണ് റിപ്പോര്‍ട്ട്.സൈന്യത്തിന് നേരെ ഭീഷണിപ്പെടുത്തും വിധത്തില്‍ ആളുകള്‍ എത്തിയെന്നും.മുന്നറിയിപ്പ് നല്‍കുന്നതിന് വെടിയുതിര്‍ത്തെന്നും ആണ് ഇസ്രയേല്‍ പ്രതിരോധ സേന അറിയിച്ചു.മെയ് ഇരുപത്തിയേഴിന് ആണ് ഗാസ ഹ്യുമാനിറ്റേറിയന്‍ ഫൗണ്ടേഷന്‍ എന്ന സംഘടന ഭക്ഷണവിതരണം ആരംഭിച്ചത്.എന്നാല്‍ ജനത്തിരക്ക് തുടക്കം മുതല്‍ തന്നെ പ്രതിസന്ധകള്‍ സൃഷ്ടിച്ചിരുന്നു.ഇതെ തുടര്‍ന്ന് പലതവണ ഭക്ഷണവിതരണം നിര്‍ത്തിവെച്ചു.

ഹമാസിന്റെ നേരിട്ടുള്ള ഭീഷണിമൂലം ഇന്നലെ ഭക്ഷണവിതരണത്തിന് സാധിച്ചില്ലെന്നും ഗാസ ഹ്യുമാനിറ്റേറിയന്‍ ഫൗണ്ടേഷന്‍ അറിയിച്ചു.ഗാസയില്‍ ഇരുപത് ലക്ഷത്തോളം ജനങ്ങളാണ് പട്ടിണി നേരിടുന്നത്.ഇതിനിടയില്‍ ജിഎച്ച്എഫിന് ഫലപ്രദമായി സഹായവിതരണം നടത്താന്‍ കഴിയാത്തതിന് എതിരെ രാജ്യാന്തരതലത്തില്‍ കടുത്ത പ്രതിഷേധം ഉയരുന്നുണ്ട്.ജിഎച്ചഎഫിന്റെ പ്രവര്‍ത്തനം പൂര്‍ണ്ണപരാജയം ആണെന്ന് ഹമാസും ആരോപിച്ചു.ഐക്യരാഷ്ട്രസഭയുടെ നേതൃത്വത്തിലുള്ള സഹായവിതരണത്തിന് സുരക്ഷ ഉറപ്പാക്കാന്‍ തയ്യാറാണെന്നും ഹമാസ് നേതൃത്വം അറിയിച്ചു.