ആറാം ദിവസത്തിലേക്ക് കടന്ന് ഇറാന്‍-ഇസ്രയേല്‍ സംഘര്‍ഷം.പരസ്പരം ഉള്ള ഏറ്റുമുട്ടല്‍ കടുപ്പിച്ചിരിക്കുകയാണ് ഇരുരാജ്യങ്ങളും.ഇസ്രയേലിലേക്ക് ഹൈപ്പര്‍ സോണിക് മിസൈല്‍ തൊടുത്തുവെന്ന് ഇറാനിയന്‍ റവല്യൂഷണറി ഗാര്‍ഡ് അറിയിച്ചു.ഇസ്രയേല്‍ ആക്രമണത്തില്‍ ഇറാനില്‍ ഇതുവരെ അഞ്ചൂറിലധികം പേര്‍ കൊല്ലപ്പെട്ടെന്നാണ് റിപ്പോര്‍ട്ട്.
ഇന്നലെ രാത്രിയും ഇറാനില്‍ ടെഹ്‌റാന്‍ അടക്കമുള്ള നഗരങ്ങളില്‍ ശക്തമായ ആക്രമണം ആണ് ഇസ്രയേല്‍ പ്രതിരോധ സേന നടത്തിയത്.ഇറാന്റെ മിസൈല്‍ നിര്‍മ്മാണ കേന്ദ്രങ്ങളും ആണവകേന്ദ്രങ്ങളും ആണ് ആക്രമിച്ചതെന്നും ഇസ്രയേല്‍ പ്രതിരോധ സേന അറിയിച്ചു.ഇറാനില്‍ ഇതുവരെ ഇസ്രയേല്‍ ആക്രമണത്തില്‍ 585 പേര്‍ കൊല്ലപ്പെട്ടെന്നാണ് മനുഷ്യാവകാശ സംഘടനകള്‍ വ്യക്തമാക്കുന്നത്.1300-ല്‍ അധികം പേര്‍ക്ക് പരുക്കേറ്റു.

ഇറാനില്‍ നിന്നും ചൈനയും പാക്കിസ്ഥാനും അടക്കം പൗരന്‍മാരെ ഒഴിപ്പിക്കുകയാണ്.വിവിധ രാജ്യങ്ങള്‍ ഇസ്രയേലില്‍ നിന്നും പൗരന്‍മാരെ ഒഴിപ്പിക്കുന്നത് ആരംഭിച്ചിട്ടുണ്ട്.പോരാട്ടം തുടങ്ങുകയാണെന്നും കരുണ ഉണ്ടാവില്ലെന്നും ഇറാന്‍ പരമോന്നത നേതാവ് ആയത്തുല്ല അലി ഖമനയി പറഞ്ഞു.ശബ്ദത്തേക്കാള്‍ വേഗത്തില്‍ സഞ്ചരിക്കുന്ന ഹൈപ്പര്‍സോണിക് മിസൈല്‍ ഇന്നലെ രാത്രി ഇസ്രയേലിലേക്ക് തൊടുത്തെന്നാണ് ഇറാന്‍ അവകാശപ്പെടുന്നത്.ഇന്നലെ രാത്രി നടന്ന ഇറാന്റെ മിസൈല്‍ ആക്രമണത്തില്‍ ആര്‍ക്കും പരുക്കേറ്റിട്ടില്ലെന്ന് ഇസ്രയേല്‍ ഭരണകൂടം അറിയിച്ചു.വെള്ളിയാഴ്ച്ചയ്ക്ക് ശേഷം ഇതുവരെ നാനൂറോളം ബാലിസ്റ്റിക് മിസൈലുകളും നൂറുകണക്കിന് ഡ്രോണുകളും ആണ് ഇസ്രയേല്‍ ഭരണകൂടം ഇറാനിലേക്ക് അയച്ചത്.ഇതുവരെ ഇരുപത്തിനാല് മരണങ്ങളാണ് ഇസ്രയേല്‍ ഭരണകൂടം സ്ഥിരീകരിച്ചിരിക്കുന്നത്.എണ്ണൂറ് പേര്‍ക്ക് പരുക്കേറ്റു.ആയിരത്തിലധികം വാഹനങ്ങള്‍ക്ക് കേടുപാടുകള്‍ സംഭവിച്ചിട്ടുണ്ട്.നിരവധി കെട്ടിടങ്ങള്‍ക്കും കേടുപാടുകള്‍ സംഭവിച്ചു.

ഇറാന്റെ ആണവകേന്ദ്രങ്ങള്‍ ഇല്ലാതാക്കാനുള്ള ഇസ്രയേല്‍ പോരാട്ടത്തില്‍ അമേരിക്കയും ചേര്‍ന്നേക്കും എന്ന് സൂചന.ആക്രമണത്തില്‍ പങ്കുചേരുന്ന കാര്യം അമേരിക്കന്‍ പ്രസിഡന്റ് ഡൊണള്‍ഡ് ട്രംപ് പരിഗണിക്കുന്നുവെന്നാണ് രാജ്യാന്തരമാധ്യമങ്ങള്‍ റിപ്പോര്‍ട്ട് ചെയ്യുന്നത്.ഇറാന്‍ നിരുപാധികം കീഴടങ്ങാന്‍ തയ്യാറാകണം എന്നാണ് ഡൊണള്‍ഡ് ട്രംപ് ആവശ്യപ്പെടുന്നത്.ഇറാനിലെ ഫോര്‍ദോ ആണവകേന്ദ്രം തകര്‍ക്കുന്നതില്‍ അടക്കം ഇസ്രയേലിന് ഒപ്പം പങ്കുചേരുന്നത് ഡൊണള്‍ഡ് ട്രംപ് പരിഗണിക്കുന്നുവെന്നാണ് അമേരിക്കന്‍ മാധ്യമമായ സി.ബി.എസ് ന്യൂസ് റിപ്പോര്‍ട്ട് ചെയ്തു.ദേശീയ സുരക്ഷാ സംഘത്തിന്റെ യോഗം വിളിച്ചുചേര്‍ത്ത് ട്രംപ് ഇക്കാര്യം ചര്‍ച്ച ചെയ്തുവെന്നാണ് വിവരം.ഒന്നരമണിക്കൂര്‍ നീണ്ടുനിന്നതായിരുന്നു യോഗം.എന്നാല്‍ യുദ്ധത്തില്‍ പങ്കുചേരുന്നതില്‍ ട്രംപിന്റെ ഉപദേശകരില്‍ എല്ലാവര്‍ക്കും യോജിപ്പില്ല.

കാനഡയില്‍ നടന്ന ജി-7 ഉച്ചകോടി പൂര്‍ത്തിയാകും മുന്‍പ് തന്നെ പ്രസിഡന്റ് ഡൊണള്‍ഡ് ട്രംപ് ഇന്നലെ അമേരിക്കയിലേക്ക് മടങ്ങിയിരുന്നു.ഇതിന് പിന്നാലെയായിരുന്നു യോഗം.ഇറാന്റെ ആണവപദ്ധതികള്‍ ഏറ്റവും സുപ്രധാനമാണ് ഫോര്‍ദോ. ഒരു മലയില്‍ മൂന്നൂറ് മീറ്ററോളം ആഴത്തിലാണ് ഫോര്‍ദോ ആണവസമ്പൂഷ്ടീകരണ കേന്ദ്രം സ്ഥിതി ചെയ്യുന്നത്.ഇസ്രയേലിന്റെ കൈവശമുള്ള ആയുധങ്ങള്‍ ഉപയോഗിച്ച് ഇത് തകര്‍ക്കാന്‍ കഴിയില്ല.അമേരിക്കയ്ക്ക് മാത്രമാണ് ഭൂമിക്കടിയില്‍ ഇത്രയും ആഴത്തില്‍ ആക്രമണം നടത്താന്‍ കഴിയുന്ന ബോംബുകള്‍ ഉള്ളത്.ഇക്കാരണത്താലാണ് ഡൊണള്‍ഡ് ട്രംപ് യുദ്ധത്തില്‍ പങ്കുചേരുന്ന കാര്യം പരിഗണിക്കുന്നത്.

ഗാസയില്‍ ഭക്ഷ്യവിതരണ കേന്ദ്രത്തിന് സമീപം ഇസ്രയേല്‍ വെടിവെയ്പില്‍ 45 പലസ്തീനികള്‍ കൊല്ലപ്പെട്ടു.ഗാസയില്‍ ഇരുപത് മാസങ്ങള്‍ക്കിടെ ഇസ്രയേല്‍ ആക്രമണങ്ങളില്‍ കൊല്ലപ്പെട്ടവരുടെ എണ്ണം അന്‍പത്തയ്യായിരം കടന്നു.ഗാസ ഹ്യുമാനിറ്റേറിയന്‍ ഫൗണ്ടേഷന്റെ ഭക്ഷണവിതരണ കേന്ദ്രത്തിന് സമീപം ആണ് വെടിവെയ്പ്പുണ്ടായത് എന്നാണ് ഹമാസ് നിയന്ത്രിത ആരോഗ്യമന്ത്രാലയം വ്യക്തമാക്കുന്നത്.റാഫയ്ക്ക് സമീപത്തുള്ള സഹായവിതരണ കേന്ദ്രത്തിലായിരുന്നു വെടിവെയ്പ്.നിരവധി പേര്‍ക്ക് ആക്രമണത്തില്‍ പരുക്കേറ്റു.പരുക്കേറ്റവരെ കൊണ്ട് നാസര്‍ ഹോസ്പിറ്റില്‍ നിറഞ്ഞുകവിഞ്ഞിരിക്കുകയാണെന്ന് ആരോഗ്യമന്ത്രാലയം വ്യക്തമാക്കി.

ഇന്ന് പുലര്‍ച്ചെ ഭക്ഷ്യവസ്തുക്കള്‍ ശേഖരിക്കുന്നതിനായി എത്തിയവര്‍ക്ക് ഇസ്രയേല്‍ സൈന്യം വെടിയുതിര്‍ക്കുകയായിരുന്നു എന്നാണ് ദൃക്‌സാക്ഷികള്‍ പറയുന്നത്.എല്ലാ വശത്തുനിന്നും വെടിവെയ്പ്പുണ്ടായി എന്നും ദൃക്‌സാക്ഷികള്‍ പറയുന്നു.വെടിവെയ്പ് സംബന്ധിച്ച് ഇസ്രയേല്‍ സൈന്യം ഇതുവരെ പ്രതികരിച്ചിട്ടില്ല.ഇറാന്‍ യുദ്ധത്തിന്റെ മറവില്‍ ഇസ്രയേല്‍ ഗാസയില്‍ സാധാരണക്കാരെ കൊലപ്പെടുത്തുകയാണെന്ന് ഹമാസ് ആരോപിച്ചു.ഗാസ ഹ്യുമാനിറ്റേറിയന്‍ ഫൗണ്ടേഷന്‍ ഭക്ഷണവിതരണം ആരംഭിച്ച ഘട്ടം മുതല്‍ ഇസ്രയേല്‍ സൈന്യത്തിന്റെ ഭാഗത്ത് പലപ്പോഴുംവെടിവെയ്പ്പുണ്ടായിട്ടുണ്ട്.മൂന്നൂറിലധികം പേരാണ് സാഹയവിതരണ കേന്ദ്രങ്ങള്‍ക്ക് സമീപത്ത് മരണപ്പെട്ടത്.രണ്ടായിരത്തിലധികം പേര്‍ക്ക് പരുക്കേല്‍ക്കുകയും ചെയ്തു.

കുടിയേറ്റ വിരുദ്ധനയത്തിന് എതിരായ പ്രതിഷേധം തുടരുന്നതിനിടെ നാടുകടത്തല്‍ കൂടുതല്‍ ശക്തിപ്പെടുത്താന്‍ നിര്‍ദ്ദേശം നല്‍കി അമേരിക്കന്‍ പ്രസിഡന്റ് ഡൊണള്‍ഡ് ട്രംപ്.ചരിത്രത്തിലെ ഏറ്റവും വലിയ നാടുകടത്തലിന് ആവശ്യമായ നടപടി സ്വീകരിക്കാന്‍ ആണ് ട്രംപ് നിര്‍ദ്ദേശം നല്‍കിയിരിക്കുന്നത്.

സമൂഹമാധ്യമപോസ്റ്റിലൂടെയാണ് അനധികൃത കുടിയേറ്റക്കാരെ തടങ്കലിലാക്കുന്നതും നാടുകടത്തുന്നതും ശക്തിപ്പെടുത്താനുള്ള ഡൊണള്‍ഡ് ട്രംപിന്റെ നിര്‍ദ്ദേശം.ചരിത്രത്തിലെ ഏറ്റവും വലിയ നാടുകടത്തല്‍ നടപ്പാക്കുന്നതിനായി ഫെഡറല്‍ ഏജന്‍സികള്‍ കഴിവിന്റെ പരമാവധി ശ്രമിക്കണം എന്നാണ് നിര്‍ദ്ദേശം.ലോസ് എയ്ഞ്ചലസ്,ഷിക്കോഗോ,ന്യൂയോര്‍ക്ക് തുടങ്ങിയ നഗരങ്ങളില്‍ പരിശോധന കൂടുതല്‍ കേന്ദ്രീകരിക്കണം എന്നും ട്രംപ് ആവശ്യപ്പെട്ടു.ട്രംപിന്റെ കുടിയേറ്റ വിരുദ്ധ നയങ്ങള്‍ക്ക് എതിരെ ഏറ്റവും ശക്തമായ പ്രതിഷേധങ്ങള്‍ അരങ്ങേറിയത് ഈ മൂന്ന് നഗരങ്ങളിലാണ്.

ട്രംപിന്റെ ഏകാധിപത്യനയങ്ങള്‍ക്ക് എതിരെ അമേരിക്കന്‍ നഗരങ്ങളില്‍ വീണ്ടും പ്രതിഷേധങ്ങള്‍ ആരംഭിച്ചതിന് പിന്നാലെയാണ് അനധികൃതകുടിയേറ്റക്കാരെ മുഴുവന്‍ പിടികൂടി നാടുകടത്താന്‍ നിര്‍ദ്ദേശം നല്‍കുന്നത്.രാജാക്കന്മാരില്ല എന്ന ബാനര്‍ ഉയര്‍ത്തിയായിരുന്നു ജനകീയ പ്രക്ഷോഭം.കുടിയേറ്റക്കാര്‍ക്ക് എതിരായ നടപടി ട്രംപ് ഭരണകൂടം കടുപ്പിക്കുമ്പോള്‍ പ്രതിഷേധങ്ങളും ശക്തിപ്പെടാനാണ് സാധ്യത.