ഇറാന്റെ ആണവകേന്ദ്രങ്ങളില്‍ അമേരിക്ക നടത്തിയ ബോംബാക്രമണം ഫലം കണ്ടില്ലെന്ന് യു.എസ് ഇന്റലിജന്‍സ് റിപ്പോര്‍ട്ട്.ഇറാന്റെ ആണവപദ്ധതി തകര്‍ക്കുന്നതിന് ആക്രമണത്തിന് സാധിച്ചില്ലെന്നാണ് റിപ്പോര്‍ട്ടില്‍ പറയുന്നത്.എന്നാല്‍ ഇന്റലിജന്‍സ് റിപ്പോര്‍ട്ട് നിഷേധിച്ച് പ്രസിഡന്റ് ഡൊണള്‍ഡ് ട്രംപ് രംഗത്ത് എത്തി.അമേരിക്ക ഇറാനിലെ ആണവകേന്ദ്രങ്ങളില്‍ നടത്തിയ ആക്രമണത്തെകുറിച്ചുള്ള പെന്റഗന്റെ ഇന്റലിജന്‍സ് റിപ്പോര്‍ട്ടാണ് വാഷിങ്ടണ്‍പോസ്റ്റും ന്യൂയോര്‍ക്ക് ടൈസും അടക്കമുള്ള യു.എസ് മാധ്യമങ്ങള്‍ പുറത്തുവിട്ടത്.ഞായറാഴ്ച അമേരിക്ക നടത്തിയ ബങ്കര്‍ ബസ്റ്റര്‍ ബോംബ് ആക്രമണത്തില്‍ ഇറാന്റെ സമ്പൂഷ്ടീകരിച്ച യൂറേനിയം ശേഖരം ഇല്ലാതായില്ലെന്നാണ് യു.എസ് പ്രതിരോധ ഇന്റലിജന്‍സ് ഏജന്‍സിയുടെ വിലയിരുത്തലായി പുറത്ത് വന്നത്.സെന്‍ട്രിഫ്യൂജുകള്‍ക്കും കാര്യമായ കേടുപാടുകള്‍ ഇല്ല.അമേരിക്കയുടെ ആക്രമണത്തിലൂടെ ഇറാന്റെ ആണവകേന്ദ്രങ്ങളെ ദുര്‍ബലമാക്കുന്നതിന് മാത്രമേ സാധിച്ചിട്ടുള്ളു.ഏതാനും മാസങ്ങള്‍ക്കുള്ളില്‍ പൂര്‍വ്വസ്ഥിതിയിലേക്ക് എത്തിക്കുന്നതിന് ഇറാന് കഴിയുമെന്നും യു.എസ് ഡിഫന്‍സ് ഇന്റലിജന്‍സ് ഏജന്‍സി വിലയിരുത്തുന്നുണ്ട്.

യു.എസ് ആക്രമണത്തിന് മുന്‍പ് തന്നെ ആണവകേന്ദ്രങ്ങളില്‍ നിന്നും സബുഷ്ടീകരിച്ച യൂറേനിയം സുരക്ഷിത കേന്ദ്രങ്ങളിലേക്ക് മാറ്റിയെന്നും വിലയിരുത്തല്‍ ഉണ്ട്.എന്നാല്‍ അമേരിക്കന്‍ മാധ്യമങ്ങളുടെ റിപ്പോര്‍ട്ടുകള്‍ തള്ളി പ്രസിഡന്റ് ഡൊണള്‍ഡ് ട്രംപ് രംഗത്ത് എത്തി.ഫോര്‍ദോ അടക്കം മൂന്ന് ആണവകേന്ദ്രങ്ങള്‍ പൂര്‍ണ്ണമായി നശിപ്പിക്കപ്പെട്ടുവെന്ന് ട്രംപ് അവകാശപ്പെട്ടു.സിഎന്‍എന്നും ന്യൂയോര്‍ക്ക് ടൈസും വ്യാജവാര്‍ത്തകള്‍ ചമയ്ക്കുന്നുവെന്നും ചരിത്രത്തിലെ തന്നെ ഏറ്റവും വിജയകരമായ ആക്രമണങ്ങളില്‍ ഒന്നിനെ താഴ്ത്തിക്കാണിക്കാന്‍ ശ്രമിക്കുകയാണെന്നും ട്രംപ് ആരോപിച്ചു.ഇറാനിലെ ആണവകേന്ദ്രങ്ങള്‍ തകര്‍ക്കുന്നതിനാണ് യുദ്ധം എന്ന് വിശദീകരിച്ചാണ് ഇസ്രയേല്‍ ആക്രമണം ആരംഭിച്ചത്. എന്നാല്‍ വെടിനിര്‍ത്തലിന് ശേഷവും ഇറാന്റെ ആണവകേന്ദ്രങ്ങള്‍ക്ക് എന്ത് സംഭവിച്ചുവെന്ന കാര്യത്തില്‍ ഇസ്രയേലിനും വ്യക്തതയില്ല.യു.എസ് ആക്രമണത്തിന്റെ ഫലം എന്തെന്ന് വിലയിരുത്താറായിട്ടില്ലെന്നാണ് ഇസ്രയേല്‍ പ്രതിരോധ സേന വക്താവ് എഫി ഡെഫ്രിന്‍ ഇന്ന് പ്രതികരിച്ചത്

പ്രാബല്യത്തില്‍ വന്ന് മണിക്കൂറുകള്‍ക്കുള്ളില്‍ ഇറാന്‍ വെടിനിര്‍ത്തല്‍ ലംഘിച്ചെന്ന ആരോപണവുമായി ഇസ്രയേല്‍. ഇറാന്‍ വീണ്ടും മിസൈല്‍ ആക്രമണത്തിന് ശ്രമിച്ചെന്ന് ഇസ്രയേല്‍ ആരോപിച്ചു.ഇറാന് ശക്തമായ തിരിച്ചടി നല്‍കാന്‍ സൈന്യത്തിന് നിര്‍ദ്ദേശം നല്‍കിയെന്ന് ഇസ്രയേല്‍ പ്രതിരോധമന്ത്രി ഇസ്രയേല്‍ കാറ്റ്‌സ് അറിയിച്ചു.എന്നാല്‍ വെടിനിര്‍ത്തല്‍ ആരംഭിച്ചതിന് ശേഷം മിസൈലുകള്‍ അയച്ചിട്ടില്ലെന്ന് ഇറാന്‍ പ്രതികരിച്ചു.പന്ത്രണ്ട് ദിവസം നീണ്ടുനിന്ന രൂക്ഷമായ ആക്രമണങ്ങള്‍ക്ക് ശേഷം ആണ് ഇറാനും ഇസ്രയേലും വെടിനിര്‍ത്തലിന് വഴങ്ങിയത്.ഖത്തറിന്റെ നിര്‍ണ്ണായക ഇടപെടല്‍ ആണ് വെടിനിര്‍ത്തലിലേക്ക് നയിച്ചത്.ഖത്തര്‍ പ്രധാനമന്ത്രി ഷെയ്ഖ് മുഹമ്മദ് ബിന്‍ അബ്ദുള്‍ റഹ്‌മാന്‍ അല്‍ താനിയാണ് ഇറാനുമായി വെടിനിര്‍ത്തല്‍ ചര്‍ച്ചകള്‍ നടത്തിയത്.ധാരണയില്‍ എത്തിയതിന് പിന്നാലെ അമേരിക്കന്‍ പ്രസിഡന്റ് ഡൊണള്‍ഡ് ട്രംപ് പ്രാബല്യത്തില്‍ വന്നതായി പ്രഖ്യാപിച്ചു.വെടിനിര്‍ത്തല്‍ നിര്‍ദ്ദേശം അംഗീകരിച്ചെന്ന് ഇസ്രയേല്‍ ഭരണകൂടവും അറിയിച്ചു.

വെടിനിര്‍ത്തല്‍ പ്രാബല്യത്തില്‍ വന്നതായി ഇറാന്‍ ദേശീയടെലിവിഷനും സ്ഥിരീകരിച്ചു.വെടിനിര്‍ത്തല്‍ നിലവില്‍ വന്നതോടെ ഇസ്രയേല്‍ വ്യോമമേഖല തുറന്നു.ജനങ്ങള്‍ക്ക് ഷെല്‍ട്ടറുകളില്‍ നിന്നും സുരക്ഷിതമായി പുറത്തിറങ്ങാം എന്ന് ഇസ്രയേല്‍ സൈന്യവും അറിയിച്ചു.എന്നാല്‍ രണ്ട് മണിക്കൂറിന് ഇറാന്‍ വെടിനിര്‍ത്തല്‍ നിര്‍ദ്ദേശം ലംഘിച്ചെന്ന ആരോപണവുമായി ഇസ്രയേല്‍ രംഗത്ത് എത്തി.വടക്കന്‍ ഇസ്രയേല്‍ ലക്ഷ്യമിട്ട് ഇറാനില്‍ നിന്നും ബാലിസ്റ്റിക് മിസൈല്‍ തൊടുത്തുവെന്നാണ് ആരോപണം.വടക്കന്‍ ഇസ്രയേലില്‍ അപായസൈറനുകളും മുഴങ്ങി.കരാര്‍ ലംഘത്തിന് ഇറാനില്‍ തീവ്രമായ ആക്രമണങ്ങള്‍ നടത്താന്‍ ഇസ്രയേല്‍ പ്രതിരോധ മന്ത്രി ഇസ്രയേല്‍ കാറ്റ്‌സ് സൈന്യത്തിന് നിര്‍ദ്ദേശവും നല്‍കി.ഇന്ന് പുലര്‍ച്ചെ മുതല്‍ ഇസ്രയേലില്‍ ഇറാന്‍ രൂക്ഷമായ ആക്രമണം ആണ് നടത്തിയത്.വെടിനിര്‍ത്തലിന് അരമണിക്കൂര്‍ മുന്‍പ് വരെ ഇസ്രയേലില്‍ ഇറാന്‍ ശക്തമായ ആക്രമണം തുടര്‍ന്നു.മൂന്ന് തവണയായി മിസൈലുകള്‍ കൂട്ടത്തോടെ തൊടുത്തു.ഇറാന്റെ ആക്രമണത്തില്‍ ഇന്ന് മാത്രം ഇസ്രയേലില്‍ ഒന്‍പത് പേരാണ് കൊല്ലപ്പെട്ടത് മുപ്പത്തിമൂന്ന് പേര്‍ക്ക് പരുക്കേറ്റു.അതെസമയം ഇറാന്‍ വെടിനിര്‍ത്തല്‍ ലംഘിച്ചാല്‍ ആക്രമണം പുനരാരംഭിക്കും എന്ന് ഇസ്രയേല്‍ ഭരണകൂടം മുന്നറിയിപ്പ് നല്‍കിയിട്ടുണ്ട്.

രാജ്യാന്തര വിപണിയില്‍ അസംസ്‌കൃത എണ്ണവിലയില്‍ കുത്തനെ ഇടിവ്.വിലയില്‍ അഞ്ച് ശതമാനത്തിലധികം ആണ് ഇടിവ്.ബ്രെന്റ് ക്രൂഡ് വില ബാരലിന് എഴുപത് ഡോളറില്‍ താഴെ എത്തി.ബ്രെന്റ് ക്രൂഡ് വില 69.5 ഡോളറായും യുഎഇയുടെ മര്‍ബാന്‍ ക്രൂഡിന്റെ വില 70 ഡോളറായിട്ടും ആണ് കുറഞ്ഞത്.അമേരിക്കന്‍ ക്രൂഡായ വെസ്റ്റ് ടെക്‌സസ് ഇന്റര്‍മീഡിയറ്റിന്റെ വില 66.5 ഡോളറായും കുറഞ്ഞു.ഇറാന്‍-ഇസ്രയേല്‍ ഏറ്റമുട്ടല്‍ അവസാനിക്കുന്നു എന്ന സൂചനകളും ഖത്തറിലെ യു.എസ് എയര്‍ബേസ് ആക്രമണത്തിന് പ്രത്യാക്രമണം ഉണ്ടാകില്ലെന്ന ഡൊണള്‍ഡ് ട്രംപിന്റെ പ്രഖ്യാപനവും ആണ് വിലയിടിവ് കാരണമായി വിലയിരുത്തപ്പെടുന്നത്.

ഇന്നലെ ക്രൂഡ് ഓയില്‍ വില എഴുപത്തിയെട്ട് ഡോളറിലേക്ക് വരെ ഉയര്‍ന്നതിന് ശേഷം ഇടിവ് രേഖപ്പെടുത്തുന്നത്.രാജ്യാന്തര എണ്ണ നീക്കത്തില്‍ അതിനിര്‍ണ്ണായകമായ ഹോര്‍മുസ് കടലിടുക്ക് ഇറാന്‍ അടച്ചേക്കുമെന്ന സൂചനകളും വിപണിയെ ആശങ്കയിലാക്കിയിരുന്നു.കടലിടുക്ക് അടയ്ക്കുന്നതിന് ഇറാന്‍ പാര്‍ലമെന്റ് അംഗീകാരവും നല്‍കിയിരുന്നു.എന്നാല്‍ അത്തരത്തില്‍ ഒരു നീക്കത്തിലേക്ക് ഇറാന്‍ നീങ്ങാന്‍ തയ്യാറാകാതിരുന്നതും എണ്ണവിലയിടിവിന് കാരണമായി.