കുവൈത്തില്‍ കുടുംബങ്ങള്‍ക്ക് താമസിക്കാനുള്ള മേഖലകളില്‍ നിന്നും ബാച്ചിലേഴ്‌സിനെ ഒഴിപ്പിക്കുന്നതിനുള്ള കരട് നിയമത്തിന് മുന്‍സിപ്പാലിറ്റി രൂപം നല്‍കി.പകരം ബാച്ചിലര്‍മാര്‍ക്കായി പ്രത്യേക പാര്‍പ്പിട സമുച്ചയങ്ങള്‍ നിര്‍മ്മിക്കും.
പ്രവാസി കുടുംബങ്ങള്‍ക്ക് താമസിക്കാനുള്ള മേഖലയില്‍ നിന്നും ബാച്ചിലര്‍മാരെ മാറ്റുന്നതിനുള്ള കരട് നിയമത്തിനാണ് കുവൈത്ത് മുന്‍സിപ്പാലിറ്റി അംഗീകാരം നല്‍കിയിരിക്കുന്നത്.ജലീബ് അല്‍ ശുയൂഖ് പ്രദേശത്ത് അനുഭവപ്പെടുന്ന പ്രതിസന്ധികള്‍ക്ക്പരിഹാരം കാണുന്നതിന് ആണ് തയ്യാറാക്കിയ പദ്ധതിയുടെ ഭാഗമായാണ് കരട് നിയമം എന്ന് പ്രാദേശികമാധ്യമങ്ങള്‍ റിപ്പോര്‍ട്ട് ചെയ്തു.

അഞ്ച് വര്‍ഷത്തിനുള്ളില്‍ നടപ്പാക്കാന്‍ ഉദ്ദേശിക്കുന്ന ഏഴിന കര്‍മ്മപദ്ധതികള്‍ക്ക് ആണ് രൂപം നല്‍കിയിരിക്കുന്നത്.ആറ് ലേബര്‍ സിറ്റികള്‍ ആണ് സ്ഥാപിക്കാന്‍ ഒരുങ്ങുന്നത്.നാല് ലക്ഷത്തോളം ബാച്ചിലര്‍മാര്‍ക്ക് താമസിക്കാന്‍ കഴിയുന്ന പന്ത്രണ്ട് ഭവനസമുച്ചയങ്ങളും നിര്‍മ്മിക്കും.വ്യവസായിക-കാര്‍ഷിക മേഖലകളില്‍ മാത്രമായി
തൊഴിലാളികളുടെ താമസകേന്ദ്രങ്ങള്‍ ക്രമീകരിക്കും.ജലീബ് മേഖലയിലെ ബാച്ചിലേഴ്‌സിന്റെ എണ്ണം കുറയ്ക്കുക,സുരക്ഷാ വെല്ലുവിളികള്‍ ലഘൂകരിക്കുക, മേഖലയിലെ ജനസാന്ദ്രത കുറയ്ക്കുക എന്നിവ ലക്ഷ്യമിട്ടാണ് പുതിയ കരട് നിയമം തയ്യാറാക്കിയിരിക്കുന്നത്.

കേരളം ഉള്‍പ്പടെയുള്ള ഇന്ത്യന്‍ സെക്ടറുകളിലേക്കും വിവിധ വിദേശരാജ്യങ്ങളിലേക്കും കുറഞ്ഞനിരക്കില്‍ വിമാനടിക്കറ്റുകള്‍ പ്രഖ്യാപിച്ച് ഷാര്‍ജ എയര്‍ലൈനായ എയര്‍അറേബ്യ.വിവിധ സെക്ടറുകളില്‍ ജൂലൈയ് ഓഗസ്റ്റ് സെപ്റ്റംബര്‍ മാസങ്ങളിലെ ടിക്കറ്റുകള്‍ ആണ് കുറഞ്ഞ നിരക്കില്‍ ലഭ്യമാക്കിയിരിക്കുന്നത്.കേരളത്തില്‍ നിന്നും യുഎഇയിലേക്കുള്ള ടിക്കറ്റുകള്‍ക്കും നിരക്കിളവുണ്ട്.149 ദിര്‍ഹം മുതല്‍ ആരംഭിക്കുന്ന വണ്‍വേ ടിക്കറ്റുകള്‍ ആണ് എയര്‍ അറേബ്യ പ്രഖ്യാപിച്ചിരിക്കുന്നത്.ജൂലൈയ് ആറ് വരെയുള്ള ദിവസങ്ങളില്‍ ആണ് കുറഞ്ഞ നിരക്കില്‍ ടിക്കറ്റ് ബുക്ക് ചെയ്യാന്‍ സാധിക്കുക.ജുലൈയ് പതിനാല് മുതല്‍ സെപ്റ്റംബര്‍ മുപ്പത് വരെയുള്ള ടിക്കറ്റുകള്‍ ഈ ദിവസങ്ങളില്‍ ബുക്ക് ചെയ്യാന്‍ സാധിക്കുക.കേരളത്തിലേക്കുള്ള ടിക്കറ്റ് നിരക്കുകള്‍ 315 ദിര്‍ഹം മുതല്‍ ആണ് ആരംഭിക്കുന്നത്.

ഓഗസ്റ്റ് സെപ്റ്റംബര്‍ മാസങ്ങളിലാണ് കേരളത്തിലേക്ക് കുറഞ്ഞ നിരക്കുകളില്‍ എയര്‍അറേബ്യ ടിക്കറ്റുകള്‍ ലഭ്യമാക്കിയിട്ടുള്ളത്.കരളത്തില്‍ നിന്നും തിരികെ യുഎഇ നഗരങ്ങളിലേക്ക 293 ദിര്‍ഹം മുതല്‍ ടിക്കറ്റുകള്‍ ലഭ്യമാണ്.ജുലൈയ് 14 മുതലുള്ള ദിവസങ്ങളിലേക്കാണ്് യുഎഇയിലേക്കുള്ള ടിക്കറ്റുകള്‍ ലഭിക്കുക.ചെന്നൈയിലേക്ക് 275 ദിര്‍ഹം മുതല്‍ ടിക്കറ്റുകള്‍ ലഭിക്കു.ഷാര്‍ജയില്‍ നിന്നും ബഹ്‌റൈന്‍,മസ്‌ക്കത്ത് തുടങ്ങിയ സ്ഥലങ്ങളിലേക്ക് 149 ദിര്‍ഹം മുതല്‍ ആണ് നിരക്ക്.സലാല,റിയാദ്,കുവൈത്ത് എന്നിവടങ്ങളിലേക്ക് 199 ദിര്‍ഹം മുതലും ടിക്കറ്റുകള്‍ ലഭിക്കും.എയര്‍അറേബ്യയുടെ ബുക്കിംഗ് പോര്‍ട്ടില്‍ നിരക്കിളവിലുള്ള ടിക്കറ്റുകളുടെ പ്രത്യേക പട്ടിക നല്‍കിയിട്ടുണ്ട്.ഇതില്‍ നിന്നും അനുയോജ്യമായ തീയതികള്‍ തെരഞ്ഞെടുക്കാം.

അബുദബി ജനസംഖ്യയില്‍ ഏഴര ശതമാനത്തിന്റെ വര്‍ദ്ധന എന്ന് സ്റ്റാറ്റിസ്റ്റിക്‌സ് സെന്ററിന്റെ കണക്ക്.കഴിഞ്ഞ ഒരു പതിറ്റാണ്ടിനിടയില്‍ അന്‍പത് ശതമാനത്തിലധികം ആണ് ജനസംഖ്യാ വര്‍ദ്ധന.കഴിഞ്ഞ വര്‍ഷം 41,35985-ആയിട്ടാണ് അബുദബിയിലെ ജനസംഖ്യ ഉയര്‍ന്നത്.2014-ല്‍ അബുദബിയില്‍ ഇരുപത്തിയേഴ് ലക്ഷം ആയിരുന്നു എമിറേറ്റിലെ ജനസംഖ്യ എന്ന് അബുദബി സ്റ്റാറ്റിസ്റ്റിക്‌സ് സെന്റര്‍ അറിയിച്ചു.രാജ്യാന്തരതലത്തിലുള്ള പ്രതിഭകളേയും നിക്ഷേപവും ആകര്‍ഷിക്കുന്നതിന് അബുദബി ഭരണകൂടം സ്വീകരിച്ച നടപടികള്‍ ആണ് ജനസംഖ്യാ വര്‍ദ്ധനയില്‍ പ്രതിഫലിക്കുന്നത്.അബുദബി ജനസംഖ്യയിലെ അന്‍പത്തിനാല് ശതമാനം പേരും ഇരുപത്തിയഞ്ചിനും നാല്‍പ്പത്തിനാലിനും ഇടയില്‍ പ്രായമുള്ളവരാണെന്നും സ്റ്റാറ്റിസ്റ്റിക്‌സ് സെന്റര്‍ അറിയിച്ചു.

എമിറേറ്റിലെ തൊഴില്‍ ശക്തിയില്‍ 2024-ല്‍ 9.1 ശതമാനത്തിന്റെ വര്‍ദ്ധനയാണ് രേഖപ്പെടുത്തിയിരിക്കുന്നത്.എല്ലാ മേഖലകളിലും തന്നെ വളര്‍ച്ചയുണ്ട്.സാമ്പത്തികവളര്‍ച്ചയിലും അബുദബി കുതിപ്പ് തുടരുകയാണ്.2024-ല്‍ എമിറേറ്റിന്റെ ജിഡിപി 3.8 ശതമാനം വര്‍ദ്ധന രേഖപ്പെടുത്തി 1.2 ട്രില്യണ്‍ ദിര്‍ഹത്തില്‍ എത്തി.എണ്ണേതര മേഖലകളുടെ വളര്‍ച്ചയാണ് വരുമാനത്തില്‍ വര്‍ദ്ധന വരുത്തുന്നത്.മൊത്തം ആഭ്യന്തര ഉത്പാദനത്തിന്റെ 54.7 ശതമാനവും എണ്ണേതര മേഖലയില്‍ നിന്നും ആണ്.

സൗദിഅറേബ്യയില്‍ അനധികൃത താമസക്കാര്‍ക്കെതിരെ നടപടി കടുപ്പിച്ച് ആഭ്യന്തര മന്ത്രാലയം. ഒരാഴ്ചക്കിടെ 13,532 പേര്‍ പിടിയിലായി. നിയമലംഘകര്‍ക്ക് സഹായങ്ങള്‍ നല്‍കുന്നവര്‍ക്തെതിരെ കര്‍ശന നടപടി സ്വീകരിക്കുമെന്നും മന്ത്രാലയം മുന്നറിയിപ്പ് നല്‍കി.ജൂണ്‍ 19നും 25നും ഇടയില്‍ നടത്തിയ പരിശോധയിലാണ് 13,532 അനധികൃത താമസക്കാര്‍ പിടിയിലായത്. 7903 പേര്‍ താമസ നിയമലംഘനം നടത്തിയതിനാണ് പിടിയിലാത്. അതിര്‍ത്തി സുരക്ഷാ നിയമം ലംഘിച്ച 3744 പേരും, തൊഴില്‍ നിയമങ്ങള്‍ ലംഘിച്ച 1885 പേരുമാണ് പിടിയിലായത്. നിയമവിരുദ്ധമായി അതിര്‍ത്തി കടക്കാന്‍ ശ്രമിച്ചവരില്‍ 31 ശതമാനം പേര്‍ യമന്‍ പൗരന്മാരും, 67 ശതമാനം പേര്‍ എത്യോപ്യന്‍ പൗരന്മാരും, രണ്ട് പേര്‍ മറ്റ് രാജ്യക്കാരുമാണ്.

നിയമലംഘകര്‍ക്ക് ഗതാഗതം, താമസം, തൊഴില്‍ എന്നിവ നല്‍കിയ 17 പേരെയും അറസ്റ്റ് ചെയ്തു. പിടിയിലായവരില്‍ 9479 പേരെ നാടുകടത്തിയതായി ആഭ്യന്തര മന്ത്രാലയം അറിയിച്ചു. 6225 പേരെ യാത്രാ രേഖകള്‍ ശരിയാക്കുന്നതിനായി നയതന്ത്ര കാര്യാലയങ്ങളിലേക്ക് കൈമാറി. 10783 പുരുഷന്മാരും, 1125 സ്ത്രീകളും ഉള്‍പ്പെടെ 11908 അനധികൃത താമസക്കാര്‍ നിയമനടപടികള്‍ നേരിടുന്നതായും മന്ത്രാലയം അറിയിച്ചു. നിയമവിരുദ്ധമായി രാജ്യത്ത് കഴിയുന്നവര്‍ക്ക് സഹായം നല്‍കുന്നവര്‍ക്ക് 15 വര്‍ഷം വരെ തടവും ഒരു ദശലക്ഷം സ ൗദി റിയാല്‍ പിഴയും ശിക്ഷ ലഭിക്കുമെന്ന് ആഭ്യന്തര മന്ത്രാലയം മുന്നറിയിപ്പ് നല്‍കി.

വിദേശങ്ങളിലേക്ക് പണം അയക്കുന്നതിന് പ്രത്യേക നിരക്ക് ഈടാക്കുമെന്ന അറിയിപ്പില്‍ വിശദീകരണവുമായി യുഎഇ ബാങ്കായ എമിറേറ്റ്‌സ് എന്‍ബിഡി.ഇന്ത്യ അടക്കം പ്രവാസികള്‍ കൂടുതലുള്ള രാജ്യങ്ങളിലേക്കുള്ള റെമിറ്റന്‍സിന് നിരക്ക് ഈടാക്കില്ലെന്നാണ് പുതിയ അറിയിപ്പ്.ഇന്ത്യയിലേക്ക് പണം അയക്കുന്നത് തുടര്‍ന്നും സൗജന്യമായിരിക്കും എന്നാണ് എമിറേറ്റ്‌സ് എന്‍ബിഡിയുടെ വിശദീകരണം.പാക്കിസ്ഥാന്‍,ഈജിപ്ത്,ഫിലിപ്പൈന്‍സ് തുടങ്ങിയ രാജ്യങ്ങളിലേക്കും പണം അയക്കുന്നതിന് റെമിറ്റന്‍സ് ഫീ ഈടാക്കില്ല.വിദേശങ്ങളിലേക്കുള്ള ഡയറക്ട് റെമിറ്റന്‍സിന് സെപ്റ്റംബര്‍ ഒന്ന് മുതല്‍ പ്രത്യേക നിരക്ക് ഈടാക്കുമെന്ന് വ്യക്തമാക്കി എമിറേറ്റ്‌സ് എന്‍ബിഡി കഴിഞ്ഞ ദിവസങ്ങളില്‍ ഇമെയില്‍ അയച്ചിരുന്നു.

ഓരോ തവണ പണം അയക്കുമ്പോഴും 26.25 ദിര്‍ഹം വീതം നിരക്ക് ഈടാക്കും എന്നായിരുന്നു അറിയിപ്പ്.ബാങ്കിന്റെ സ്മാര്‍ട്ട് ആപ്ലിക്കേഷന്‍,ഓണ്‍ലൈന്‍ പ്ലാറ്റ്‌ഫോം എന്നിവ വഴി പണം അയക്കുന്നവര്‍ക്കാണ് നിരക്ക് ഏര്‍പ്പെടുത്തിയത്.നിലവില്‍ ഈ പ്ലാറ്റ്‌ഫോം വഴി വിദേശങ്ങളിലേക്ക് പണം അയക്കുന്നതിന് പ്രത്യേക നിരക്ക് ഈടാക്കുന്നില്ല.നൂറ് ദിര്‍ഹത്തില്‍ കുറയാത്ത തുകയാണ് അയക്കാന്‍ കഴിയുക. ഈ രീതി ഇനിയും തുടരും എന്നാണ് എമിറേറ്റ്‌സ് എന്‍ബിഡിയുടെ അറിയിപ്പ്.ഇക്കാര്യത്തില്‍ കൂടുതല്‍ വിശദീകരണവുമായി നാളെ വാര്‍ത്താക്കുറിപ്പ് പ്രസിദ്ധീകരിക്കും.നിരക്ക് വര്‍ദ്ധന ബാധിക്കുന്ന ഉപയോക്താക്കള്‍ക്ക് പ്രത്യേക അറിയിപ്പ് നല്‍കും എന്നും എമിറേറ്റ്‌സ് എന്‍ബിഡി അറിയിച്ചു.