യെമനില്‍ വധശിക്ഷയ്ക്ക് വിധിക്കപ്പെട്ട നിമിഷ പ്രിയയുടെ മോചനത്തിന്റെ പേരില്‍ മധ്യസ്ഥന്‍ സാമുവല്‍ ജെറോം സാമ്പത്തിക തട്ടിപ്പ് നടത്തുന്നുവെന്ന് കൊല്ലപ്പെട്ട തലാലിന്റെ സഹോദരന്‍.തങ്ങളുമായി ഇതുവരെ സാമൂവല്‍ ജെറോം ചര്‍ച്ച നടത്തിയിട്ടില്ല.ഫെയ്‌സ്ബുക്കിലാണ് സഹോദരന്റെ കുറിപ്പ്.മധ്യസ്ഥന്‍ എന്ന് അവകാശപ്പെടുന്ന സാമുവല്‍ ജെറോം വര്‍ഷങ്ങളായി മധ്യസ്ഥതയുടെ പേരില്‍ ഞങ്ങളുടെ ചോര വില്‍ക്കുകയാണ് തലാലിന്റെ സഹോദരന്‍ അബ്ദുല്‍ ഫത്താഹ് മഹ്ദി ആരോപിച്ചു.നാല്‍പ്പതിനായിരം ഡോളര്‍ എങ്കിലും അയാള്‍ കവര്‍ന്നു.തലാലിന്റെ കുടുംബവുമായി ചര്‍ച്ച ചെയ്യുന്നതിനായി മാധ്യമങ്ങളിലൂടെ ഇരുപതിനായിരം ഡോളര്‍ അഭ്യാര്‍ത്ഥിക്കുന്നത് ശ്രദ്ധയില്‍പ്പെട്ടു.

മധ്യസ്ഥതയുടെ പേരില്‍ പണപ്പിരിവ് നടത്തുന്ന സാമൂവല്‍ ജെറോം ഒരു തവണ പോലും തങ്ങളെ കാണുകയോ സന്ദേശം അയക്കുകയോ ഫോണില്‍ സംസാരിക്കുകയോ ചെയ്തിട്ടില്ല എന്നും സഹോദര്‍ പറയുന്നു.നിമിഷപ്രിയയുടെ വധശിക്ഷ നടപ്പാക്കുന്നതിന് പ്രസിഡന്റിന്റെ അനുമതി ലഭിച്ചതിന് ശേഷം സനായില്‍ വന്ന് ഞങ്ങളെ അഭിനന്ദിക്കുകയാണ് സാമൂവല്‍ ജെറോ ചെയ്തത്.മാധ്യമങ്ങളില്‍ അവകാശപ്പെടുന്നത് പോലെ അയാള്‍ അഭിഭാഷകന്‍ അല്ല.സാമുവല്‍ ജെറോമിന്റെ തട്ടിപ്പുകള്‍ പുറത്തുകൊട്ടുവരുമെന്നും അബ്ദുല്‍ ഫത്താഹ് മഹ്ദി പറഞ്ഞു.ഫെയ്‌സ്ബുക്കിലാണ് അബ്ദുല്‍ ഫത്താഹ് മഹ്ദിയുടെ കുറിപ്പ്.അറബിയിലുള്ള കുറിപ്പ് മലയാളത്തിലും ഇംഗ്ലീഷിലും തര്‍ജ്ജമ ചെയ്തിട്ടുണ്ട്.

ഷാര്‍ജയില്‍ മരിച്ചനിലയില്‍ കണ്ടെത്തിയ അതുല്യയുടെ ഭര്‍ത്താവിനെ ജോലിയില്‍ നിന്നും പിരിച്ചുവിട്ടു.ദുബൈയിലെ സ്വകാര്യകമ്പനിയുടേതാണ് നടപടി.അതുല്യയുടെ മരണത്തില്‍ അന്വേഷണം വേണം എന്ന് ആവശ്യപ്പെട്ട് കുടുംബം ഇന്ന് യുഎഇയിലും പരാതി നല്‍കി.ദുബൈയിലെ കോണ്‍ട്രാക്ടിംഗ് കമ്പനിയില്‍ സൈറ്റ് എഞ്ചിനിയറായിട്ടാണ് സതീഷ് ജോലി ചെയ്തിരുന്നത്.ജോലിയില്‍ നിന്നും പിരിച്ചുവിട്ടുകൊണ്ടുള്ള കത്ത് കമ്പനി ഇന്ന് രേഖാമൂലം നല്‍കി.അതുല്യയെ സതീഷ് ഉപദ്രവിക്കുന്നതിന്റെ വീഡിയോകളുടെയും ബന്ധുക്കള്‍ നല്‍കിയ പരാതികളുടെയും അടിസ്ഥാനത്തില്‍ ആണ് സ്വകാര്യകമ്പനിയുടെ നടപടി.ഒരു വര്‍ഷം മുന്‍പാണ് ഈ കമ്പനിയില്‍ സതീഷ് ജോലിക്ക് കയറിയത്.അതുല്യയുടെ മരണത്തില്‍ അന്വേഷണം ആവശ്യപ്പെട്ട ബന്ധുക്കള്‍ ഇന്ന് ഷാര്‍ജ പൊലീസിലും പരാതി നല്‍കും.

ദുബൈ ഇന്ത്യന്‍ കോണ്‍സുലേറ്റിലും പരാതി നല്‍കുന്നതിന് ആണ് കുടുംബത്തിന്റെ നീക്കം.കൊല്ലം ചവറ തെക്കുഭാഗം പൊലീസ് സതീഷിന് എതിരെ കൊലക്കുറ്റം ചുമത്തി കേസ് രജിസ്റ്റര്‍ ചെയ്തിട്ടുണ്ട്.എഫ്‌ഐ.ആര്‍ അടക്കമുള്ള രേഖകളും ഗാര്‍ഹിക പീഢനത്തിന്റെ വിശദാംശങ്ങളും അതുല്യയുടെ ബന്ധുക്കള്‍ കോണ്‍സുലേറ്റിന് കൈമാറും.കൊല്ലത്ത് രജിസ്റ്റര്‍ ചെയ്ത കേസിന്റെ അടിസ്ഥാനത്തില്‍ സതീഷിനെ നാട്ടിലെത്തിക്കുന്നതിന് കേരള പൊലീസ് നടപടി ആരംഭിച്ചിട്ടുണ്ട്.പ്രത്യേക അന്വേഷണ സംഘത്തിനും പൊലീസ് രൂപം നല്‍കിയിട്ടുണ്ട്.

ലാന്‍ഡിംഗിനിടെ തെന്നിമാറി കൊച്ചി-മുംബൈ എയര്‍ഇന്ത്യ വിമാനം.മുംബൈ വിമാനത്താവളത്തില്‍ ആണ് അപകടം.വിമാനത്തിന് കേടുപാടുകള്‍ സംഭവിച്ചതായാണ് റിപ്പോര്‍ട്ട്.യാത്രക്കാരും ജീവനക്കാരും സുരക്ഷിതരാണ്.
ഇന്ന് രാവിലെ കൊച്ചിയില്‍ നിന്നും പുറപ്പെട്ട എയര്‍ബസ് എ320 വിമാനം ആണ് മുംബൈ ഛത്രപതി ശിവജി വിമാനത്താവളത്തിന്റെ റണ്‍വേയില്‍ നിന്നും തെന്നിമാറിയത്.ലാന്‍ഡിംഗിനിടെ രാവിലെ ഒന്‍പതരയോട് കൂടിയായിരുന്നു അപകടം.കന്നമഴയാണ് വിമാനം റണ്‍വേയില്‍ നിന്നും തെന്നിമാറാന്‍ കാരണം.

വിമാനം സുരക്ഷിതമായി ടെര്‍മിനലിലേക്ക് എത്തിക്കാന്‍ കഴിഞ്ഞെന്നും യാത്രക്കാരും ജീവനക്കാരും സുരക്ഷിതരാണെന്നും എയര്‍ഇന്ത്യ അറിയിച്ചു.വിമാനത്തിന്റെ മൂന്ന് ടയറുകള്‍ തകര്‍ന്നതായും എഞ്ചിന് തകരാര്‍ സംഭവിച്ചതായും റിപ്പോര്‍ട്ടുകള്‍ ഉണ്ട്. വിമാനം പരിശോധിച്ച് വരുന്നുവെന്നാണ് എയര്‍ഇന്ത്യ വ്യക്തമാക്കുന്നത്.അപകടത്തില്‍ റണ്‍വേയ്ക്കും ചെറിയ നാശം സംഭവിച്ചിട്ടുണ്ട്. പ്രധാന റണ്‍വേ ആയ 09/27-ന് നേരിയ കേടുപാടുകള്‍ സംഭവിച്ചെന്നും പ്രവര്‍ത്തനം താത്കാലികമായി നിര്‍ത്തിവെച്ചെന്നും വിമാനത്താവള അധികൃതര്‍ അറിയിച്ചു.