പ്രശസ്ത മാപ്പിളപ്പാട്ട് ഗായിക വിളയില്‍ ഫസീല (63) അന്തരിച്ചു. കോഴിക്കോട് വെള്ളിപ്പറമ്പിലെ വസതിയിലായിരുന്നു അന്ത്യം. വിളയില്‍ വത്സലയായിരുന്ന ഇവര്‍ പിന്നീട് ഇസ്ലാം മതം സ്വീകരിച്ച് വിളയില്‍ ഫസീല എന്ന പേര് സ്വീകരിക്കുകയായിരുന്നു. ആയിരത്തിലേറെ പാട്ടുകൾ പാടിയിട്ടുണ്ട്.

മലപ്പുറം ജില്ലയിലെ ചീക്കോട് പഞ്ചായത്തില്‍ വിളയിലില്‍ കേളന്‍- ചെറുപെണ്ണ് ദമ്പതികളുടെ മകളായാണ് ജനനം. അന്തരിച്ച മാപ്പിളപ്പാട്ട് ഗായകന്‍ വി.എം. കുട്ടിയാണ് സംഗീതരംഗത്തേക്ക് കൊണ്ടുവന്നത്. എം.എസ്. വിശ്വനാഥന്റെ സംഗീതത്തിലാണ് ഫസീല സിനിമയില്‍ അരങ്ങേറ്റം കുറിച്ചത്. പി.ടി അബ്ദുറഹ്മാന്റെ രചനയില്‍ ‘അഹദവനായ പെരിയോനെ’ എന്ന ഗാനമാണ് ഫസീല ആദ്യമായി പാടിയത്.

കിരികിരി ചെരിപ്പുമ്മൽ അണഞ്ഞുള്ള പുതുനാരി… ആമിന ബീവിക്കോമന മോനേ…ഹജ്ജിന്‍റെ രാവില്‍ ഞാന്‍ കഅബം കണ്ടു… തുടങ്ങിയവയൊക്കെ ഫാസീലയുടെ ഹിറ്റ് ഗാനങ്ങളാണ്. ഫോക് ലോര്‍ അക്കാദമി ലൈഫ് ടൈം അച്ചീവ്‌മെന്‍റ് അവാർഡ്, മാപ്പിളകലാ അക്കാദമി പുരസ്‌കാരം, മാപ്പിള കലാരത്‌നം അവാര്‍ഡ് എന്നിവ ലഭിച്ചിട്ടുണ്ട്. കേരളത്തിലും വിദേശത്തുമായി നിരവധി സ്റ്റേജ് ഷോകളിലും പാട്ടുകൾ പാടിയിട്ടുണ്ട്.

തിരുവനന്തപുരം മേയര്‍ ആര്യ രാജേന്ദ്രന്‍ പെണ്‍കുഞ്ഞിന് ജന്മം നല്‍കി. ഇന്നു രാവിലെ തിരുവനന്തപുരം എസ്.ടി. ആശുപത്രിയിലായിരുന്നു പ്രസവം. ബാലുശേരി എംഎല്‍എയായ സച്ചിന്‍ ദേവാണ് ആര്യയുടെ ജീവിതപങ്കാളി. അമ്മയും കുഞ്ഞും സുഖമായിരിക്കുന്നു എന്ന് ആര്യയുടെ അച്ഛന്‍ പറഞ്ഞു.

2022 സെപ്റ്റംബര്‍ നാലിനാണ് സച്ചിനും ആര്യയും വിവാഹിതരായത്. നിയമസഭയിലെ പ്രായം കുറഞ്ഞ അംഗമാണ് സച്ചിന്‍ ദേവ്. രാജ്യത്തെ ഏറ്റവും പ്രായം കുറഞ്ഞ മേയറാണ് ആര്യ. തിരുവനന്തപുരം ഓള്‍ സെയ്ന്റ്‌സ് കോളേജില്‍ വിദ്യാര്‍ഥിയായിരിക്കെ 21-ാം വയസ്സിലാണ് ആര്യ മേയറായത്. ബാലസംഘത്തില്‍ ഒന്നിച്ചു പ്രവര്‍ത്തിച്ചിരുന്ന സച്ചിനും ആര്യയും നീണ്ട കാലത്തെ സൗഹൃദത്തിനു ശേഷമാണ് ജീവിതത്തില്‍ ഒന്നിക്കാന്‍ തീരുമാനിച്ചത്.

മുഖ്യമന്ത്രിയുടെ മകൾക്കെതിരായ മാസപ്പടി വിവാദം അടിസ്ഥാന രഹിതമെന്ന് എൽ ഡി എഫ് കൺവീനർ ഇ പി ജയരാജൻ. വീണ വിജയന്‍ ഒരു കൺസൾട്ടൻസി നടത്തുന്നുണ്ട്. സേവനം നൽകിയതിന് നികുതി അടച്ച് രേഖാമൂലം പണം വാങ്ങിയിട്ടുണ്ട്. എന്ത് സര്‍വീസാണ് നൽകിയതെന്ന് കമ്പനിയാണ് പറയേണ്ടത്. തികച്ചും സുതാര്യമായി നടന്ന ഒരു ഇടപാടിനെക്കുറിച്ചാണ് കുടിപ്പക തീർക്കാൻ അനാവശ്യ വിവാദമുണ്ടാക്കുന്നത്. രാഷ്ട്രീയ വൈരാഗ്യം കാരണം മുഖ്യമന്ത്രിയുടെ മകളെ വ്യക്തിഹത്യ ചെയ്യുകയാണെന്നും ജയരാജൻ വിമര്‍ശിച്ചു. എത്ര കേന്ദ്രമന്ത്രിമാരുടെ മക്കൾ കൺസൾട്ടൻസി നടത്തുന്നുണ്ടെന്നും അദ്ദേഹം ചോദിച്ചു.

വീണ വലിയൊരു സ്ഥാപനത്തിന്റെ കൺസൾട്ടന്റാണ്. ഒരു കമ്പനി ഒരു കൺസൾട്ടന്റിന്റെ സേവനം വാങ്ങുന്നു. അതിന് ഇരു കമ്പനികളും തമ്മിൽ ധാരണയുണ്ടാക്കുന്നു. അത് സംബന്ധിച്ച് എല്ലാം സുതാര്യമായിത്തന്നെ നടത്തുന്നു. ഇതിൽ എന്താണ് പ്രശ്നം? അടിസ്ഥാനരഹിതമായ കാര്യങ്ങൾ അനാവശ്യമായി ഉന്നയിച്ച് ജനങ്ങളിൽ സംശയമുണ്ടാക്കാൻ എന്തിനാണ് ഇങ്ങനെ ശ്രമിക്കുന്നത്? ഇവിടെ എത്ര കേന്ദ്രമന്ത്രിമാരുടെ മക്കൾ കൺസൾട്ടൻസിയിൽ പ്രവർത്തിക്കുന്നുണ്ട്. ഇവിടെ ഏതൊക്കെ കൺസൾട്ടൻസികൾ പ്രവർത്തിക്കുന്നുണ്ടെന്നും ഇ പി ചോദിച്ചു.