ആരോടും വ്യക്തിപരമായ വിരോധം പാർട്ടിക്ക് ഇല്ലെന്ന് സി പി ഐ എം സംസ്ഥാന സെക്രട്ടറി എം വി ഗോവിന്ദൻ. പുതുപ്പള്ളിയിലെ എൽ.ഡി.എഫ് സ്ഥാനാർഥി ജെയ്ക് സി. തോമസ് എൻ.എസ്.എസ് ജനറൽ സെക്രട്ടറി സുകുമാരൻ നായരുമായി കൂടിക്കാഴ്ച നടത്തിയ വിഷയത്തിൽ പ്രതികരിക്കുകയായിരുന്നു ഗോവിന്ദൻ.

നയമാണ് പ്രശ്നം. ആരെയെങ്കിലും എപ്പോഴും ശത്രുപക്ഷത്ത് നിർത്തിയുള്ള നിലപാട് പാർട്ടിക്ക് ഇല്ല. മുൻപുമില്ല, ഇപ്പോഴുമില്ല, ഇനിയുമില്ല. പാർട്ടി എടുക്കുന്ന നിലപാടിനെ സംബന്ധിച്ചു കൃത്യമായ അഭിപ്രായം അപ്പപ്പോൾ രേഖപ്പെടുത്താറുണ്ട്. എൻഎസ്എസിന്റെ സമദൂര നിലപാടു പലപ്പോഴും സമദൂരമാകാറില്ലെന്നും ഗോവിന്ദൻ പറഞ്ഞു. സമദൂരം എന്നു പറഞ്ഞത് അത്രയും നല്ലത്. ഏതെങ്കിലും ഒരു ഭാഗത്ത് ഇല്ലല്ലോ. ജി.സുകുമാരൻനായരായാലും വെള്ളാപ്പള്ളി നടേശനായാലും തിരഞ്ഞെടുപ്പിന്റെ ഭാഗമായി വോട്ട് അഭ്യർഥിക്കാനുള്ള ജനാധിപത്യ മര്യാദയും അവകാശവും സ്ഥാനാർത്ഥിക്ക് ഉണ്ട്. സമുദായ സംഘടനാ നേതാക്കളെ കാണുന്നതിനെ തിണ്ണനിരങ്ങൽ എന്നൊക്കെ പറയുന്നത് കോൺഗ്രസിന്റെ പ്രയോഗമാണെന്നും ഗോവിന്ദൻ പറഞ്ഞു.

എല്ലാ സമുദായനേതാക്കളെയും വോട്ടർമാരെയും സ്ഥാനാർഥികൾ കാണും. പുരോഗമന സ്വഭാവമുള്ള പാർട്ടിയാണ് സി പി ഐ എം. എന്നാൽ മറ്റുള്ളവർക്കും വോട്ടുണ്ടെന്നും എല്ലാവരോടും വോട്ട് അഭ്യർഥിക്കുമെന്നും എം.വി.ഗോവിന്ദൻ പറഞ്ഞു.

പ്രചാരണ രംഗം ചൂട് പിടിച്ചതോടെ രാഷ്ട്രീയ വാദപ്രതിവാദങ്ങളും പുതുപ്പള്ളിയിൽ സജീവമാകുന്നു. പുതുപ്പള്ളിയിൽ വികസനം ചർച്ചചെയ്യാൻ തയാറാണെന്ന് യു ഡി എഫ്. വികസനപ്രവർത്തനങ്ങൾ ഉയർത്തി ചർച്ചയ്ക്ക് ഇടതുപക്ഷം തയ്യാറാണോ എന്ന ചാണ്ടി ഉമ്മൻ ചോദിച്ചു.

വികസനവും കരുതലും എന്ന മോഡല്‍ വെറുതെയുണ്ടായതല്ലതെന്ന് ചാണ്ടി ഉമ്മൻ പറഞ്ഞു. പുതുപ്പള്ളിയില്‍നിന്നാണ് ആ മോഡല്‍ കേരളത്തിലേക്ക് വ്യാപിച്ചത്. കേരളം കണ്ട മികച്ച വികസന മോഡലായിരുന്നു ഉമ്മന്‍ ചാണ്ടിയുടേതെന്നും ചാണ്ടി ഉമ്മൻ പറഞ്ഞു. വികസനം ഇല്ലെങ്കിൽ എത്രയും കാലം ഉമ്മൻചാണ്ടിയെ ജനങ്ങൾ വിജയിപ്പിക്കുമായിരുന്നോ എന്ന് ചാണ്ടി ഉമ്മൻ ചോദിച്ചു.

ക്ഷേമപെന്‍ഷന്‍ മുടങ്ങി, സപ്ലൈക്കോയില്‍ സാധനങ്ങളില്ല, വിലക്കയറ്റം, പെട്രോള്‍-ഡീസല്‍ വില വര്‍ധനയിലെ സർക്കാർ നിലപാട്, എല്ലാം ചർച്ചയാകണമെന്ന് ചാണ്ടി ഉമ്മൻ പറഞ്ഞു. യു ഡി എഫ് ഉയർത്തുന്ന രാഷ്ട്രീയത്തെ നേരിടാൻ കഴിയാത്തത് കൊണ്ടാണ് മറ്റു വിവാദങ്ങൾ എൽ ഡി എഫ് ഉയർത്തുന്നതെന്ന് കെ പി സി സി അധ്യക്ഷൻ കെ സുധാകരൻ പറഞ്ഞു.