സൗദി അറേബ്യയുടെ പുതിയ എയര്‍ലൈനായ റിയാദ് എയര്‍ എഴുനൂറോളം പൈലറ്റുമാര്‍ക്ക് നിയമനം നല്‍കാന്‍ ഒരുങ്ങുന്നു. ഒക്ടോബര്‍ മുതല്‍ പൈലറ്റുമാര്‍ ജോലിയില്‍ പ്രവേശിച്ച് തുടങ്ങും. 2025 മുതല്‍ ആണ് റിയാദ് എയര്‍ സര്‍വീസ് ആരംഭിക്കുക.ലോകത്തിലെ തന്നെ പ്രധാനപ്പെട്ട എയര്‍ലൈനായി മാറുന്നതിനുള്ള തയ്യാറെടുപ്പുകളുമായിട്ടാണ് റിയാദ് എയര്‍ മുന്നോട്ട് പോകുന്നത്. ഇതിന്റെ ഭാഗമായിട്ടാണ് 2025-ല്‍ സര്‍വീസ് ആരംഭിക്കാനിരിക്കുന്ന എയര്‍ലൈനിലേക്ക് പൈലറ്റുമാരുടെ നിയമം ആരംഭിച്ചിരിക്കുന്നത്. ഇതിനകം 20 പൈലറ്റുമാര്‍ക്ക് റിയാദ് എയര്‍ നിയമനം നല്‍കി കഴിഞ്ഞു.

അടുത്ത മൂന്ന് വര്‍ഷത്തിനുള്ളില്‍ 700 പൈലറ്റുമാര്‍ക്ക് നിയമനം നല്‍കുമെന്ന് റിയാദ് എയര്‍ അറിയിച്ചു. ബോയിംഗിന്റെ 787-9 വിമാനങ്ങളിലും ബോയിംഗ് 777 വിമാനങ്ങളിലും പ്രവര്‍ത്തനപരിചയം ഉള്ള പൈലറ്റുമാരെയാണ് റിയാദ് എയര്‍ തേടുന്നത്. പൈലറ്റുമാരെ നിയമിക്കുന്നതിനുള്ള അഭിമുഖങ്ങള്‍ നടന്നുവരികയാണെന്ന് എയര്‍ലൈന്‍ സി.ഇ.ഒ പീറ്റര്‍ ബെല്ലെവ് അറിയിച്ചു.

ജനുവരി മുതല്‍ പൈലറ്റുമാര്‍ ജോലിയില്‍ പ്രവേശിച്ച് തുടങ്ങും. ചിലര്‍ക്ക് ഒക്ടോബര്‍ നവംബര്‍ മാസങ്ങളിലും നിയമനം നല്‍കും. സൗദി പബ്ലിക് ഇന്‍വെസ്റ്റ്‌മെന്റ് ഫണ്ടിന്റെ ഉടമസ്ഥതയില്‍ ആരംഭിക്കുന്ന റിയാദ് എയറിനായി 71 ബോയിംഗ് 787-9 ഡ്രിംലൈനര്‍ വിമാനങ്ങള്‍ക്കാണ് ഓര്‍ഡര്‍ നല്‍കിയിരിക്കുന്നത്. 121 ബോയിംഗ് 787 ഡ്രിംലൈനര്‍ വിമാനങ്ങള്‍ കൂടി വാങ്ങുന്നതിനാണ് റിയാദ് എയറിന്റെ പദ്ധതി.

യുഎഇയുടെ എണ്ണേതര വിദേശവ്യാപാരത്തില്‍ റെക്കോര്‍ഡ് മുന്നേറ്റം. ആറ് മാസത്തിനിടയില്‍ 1.23 ട്രില്യണ്‍ ദിര്‍ഹത്തിന്റെ ഇടപാടുകള്‍ ആണ് യുഎഇ നടത്തിയിരിക്കുന്നത്. യുഎഇയുടെ ചരിത്രത്തിലെ ഏറ്റവും മികച്ച വാണിജ്യ വര്‍ഷമാണ് 2023 എന്ന് വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തും പറഞ്ഞു.

2017-ല്‍ യുഎഇ നടത്തിയ ആകെ വ്യാപാരത്തിന് തുല്ല്യമാണ് ഈ വര്‍ഷം ആദ്യ പകുതിയിലെ എണ്ണേതര വിദേശവ്യാപാരം എന്നും ഷെയ്ഖ് മുഹമ്മദ് ബിന്‍ റാഷിദ് അല്‍മക്തും പറഞ്ഞു. ഈ വര്‍ഷം ആദ്യ ആറ് മാസക്കാലയളവിനിടയില്‍ 205 ബില്യണ്‍ ദിര്‍ഹത്തിന്റെ എണ്ണേതര കയറ്റുമതിയാണ് യുഎഇ നടത്തിയത്. എണ്ണേതര കയറ്റുമതിയില്‍ ഈ വര്‍ഷം 11.9 ശതമാനത്തിന്റെ വളര്‍ച്ചയാണ് യുഎഇ കൈവരിച്ചത്. ഈ വര്‍ഷം ആദ്യപാദത്തിലെ എണ്ണേതര ഇടപാടുകളില്‍ കഴിഞ്ഞ വര്‍ഷം ഇതെ കാലയളവിനെ അപേക്ഷിച്ച് 13.4 ശതമാനം വളര്‍ച്ച കൈവരിച്ചു.

2031 എത്തുമ്പോഴേക്കും യുഎഇയുടെ എണ്ണെതര വിദേശവ്യാപാരം നാല് ട്രില്ല്യനായി വര്‍ദ്ധിക്കുമെന്നും ഷെയ്ഖ് മുഹമ്മദ് പ്രവചിച്ചു. യുഎഇയുടെ ചരിത്രത്തിലെ തന്നെ ഏറ്റവും മികച്ച വാണിജ്യ വര്‍ഷമാണ് 2023. രാജ്യാന്തരവ്യാപാരത്തില്‍ യുഎഇ നിര്‍ണ്ണായക സ്ഥാനത്ത് തുടരുമെന്നും ഷെയ്ഖ് മുഹമ്മദ് പറഞ്ഞു.

യുഎഇയില്‍ സ്‌കൂളില്‍ തോറ്റതിന് പിന്നാലെ വിദ്യാര്‍ത്ഥി ഹൃദയാഘാതത്തെ തുടര്‍ന്ന് മരിച്ചെന്ന പ്രചാരണം വ്യാജമെന്ന് എമിറേറ്റ്‌സ് സ്‌കൂള്‍ എസ്റ്റാബ്ലിഷ്‌മെന്റ്. യുഎഇയിലെ ഒരു സ്‌കൂള്‍ വിദ്യാര്‍ത്ഥിനി അടുത്ത ക്ലാസില്ലേക്കുള്ള പരീക്ഷകളില്‍ പരാജയപ്പെട്ടതിന് പിന്നാലെ ഹൃദയാഘാതം മൂലം മരിച്ചുവെന്നായിരുന്നു സമൂഹമാധ്യമങ്ങളിലെ പ്രചാരണം. ഒരെ ക്ലാസില്‍ രണ്ട് വര്‍ഷം ഇരികേണ്ടിവരുന്ന സാഹചര്യമാണ് ഹൃദയാഘാതത്തിലേക്ക് നയിച്ചതെന്നും ചില സമൂഹമാധ്യമ പോസ്റ്റുകളില്‍ പറഞ്ഞിരുന്നു. എന്നാല്‍ ഈ പ്രചാരണം വ്യാജമാണെന്ന് എമിറേറ്റ്‌സ് സ്‌കൂള്‍ എസ്റ്റാബ്ലിഷ്‌മെന്റ് അറിയിച്ചു.യാതൊരുടിസ്ഥാനവുമില്ലാതെ ചില സമൂഹമാധ്യമ ഉപയോക്താക്കള്‍ വ്യാജമായി സൃഷ്ടിച്ചതാണ് ഈ പ്രചാരണം എന്നും ഇ.എസ്.ഇ അറിയിച്ചു. സമൂഹമാധ്യമ പോസ്റ്റുകളില്‍ പറയുന്ന പേരിലുള്ള പെണ്‍കുട്ടി രാജ്യത്തെ സ്‌കൂളുകളില്‍ പഠിച്ചിരുന്നില്ലെന്നും ഇ.എസ്.ഇ അറിയിച്ചു.