അബുദബി: യുഎഇയിലെ പ്രമുഖ ബാങ്കുകളുടെ പേരില്‍ വ്യാജ സന്ദേശങ്ങള്‍ അയച്ച് തട്ടിപ്പ് വ്യാപകമാകുന്നു. ബാങ്കിന്റെ സേവനങ്ങള്‍ തുടര്‍ന്ന് ലഭിക്കണമെങ്കില്‍ വിളിക്കാന്‍ ആവശ്യപ്പെട്ടാണ് സന്ദേശം ലഭിക്കുന്നത്. ബാങ്കുകളുടെ പേരില്‍ വ്യാജ നോട്ടീസും പ്രചരക്കുന്നുണ്ട്. തട്ടിപ്പില്‍പ്പെടാതിരിക്കാന്‍ മുന്നറിയിപ്പ് നല്‍കുകയാണ് പൊലീസ്. ഉപയോക്താക്കളുടെ ഫോണില്‍ ബാങ്കുകളുടെ പേരില്‍ സന്ദേശം ലഭിക്കും. ബാങ്ക് നല്‍കുന്ന സേവനങ്ങള്‍ അവസാനിച്ചതായും തുടരണമെങ്കില്‍ തിരിക്കുന്ന നമ്പറില്‍ ബന്ധപ്പെടാനും ആവശ്യപ്പെടും. സുരക്ഷാ കാരണങ്ങളാല്‍ നിങ്ങളുടെ ബാങ്ക് അക്കൗണ്ട് മരവിപ്പിച്ചതായും, എടിഎം, ഡെബിറ്റ്, ക്രെഡിറ്റ് കാര്‍ഡുകള്‍ ബ്ലോക്കായതായും അറിയച്ചാണ് സന്ദേശങ്ങള്‍ ലഭിക്കുക. ബാങ്കിന്റെ ഔദ്യോഗിക രേഖ എന്ന് തെറ്റിദ്ധരിപ്പിച്ചാണ് തട്ടിപ്പ്. നമ്പറില്‍ ബന്ധപ്പെടുന്നവരുടെ അക്കൗണ്ട് വിവരങ്ങള്‍ കൈക്കലാക്കിയ ശേഷം പണം കവരുന്നതാണ് രീതി. ബാങ്കില്‍ നിന്നും എന്ന പേരില്‍ ലീഗല്‍ നോട്ടീസ് ഉപയോക്താക്കള്‍ക്ക് ലഭിച്ചതോടെ ബാങ്കുമായി ബന്ധപ്പെട്ടപ്പോഴാണ് തട്ടിപ്പ് രീതികള്‍ പുറത്തറിയുന്നത്. സംഭവം ശ്രദ്ധയില്‍പ്പെട്ടതോടെ രാജ്യത്തെ ബാങ്കുകള്‍ ഉപയോക്താക്കള്‍ക്ക് മുന്നറിയിപ്പ് നല്‍കി കഴിഞ്ഞു.

ഇതിനു പുറമേ ബാങ്ക് പ്രതിനിധികളാണെന്ന് പരിചയപ്പെടുത്തി ഫോണ്‍ കോളുകളിലൂടെയും തട്ടിപ്പ് വ്യാപകുമാകുന്നുണ്ട്. ഇത്തരം ചതിക്കുഴിയില്‍ അകപ്പെടാതിരിക്കാന്‍ സ്വയം ജാഗ്രത പുലര്‍ത്തണമെന്ന് മുന്നറിയിപ്പ് നല്‍കുകയാണ് പൊലീസ്. അക്കൗണ്ടുകള്‍ അപ്‌ഡേറ്റ് ചെയ്യുന്നതിന്റെ പേരില്‍ എസ്എംഎസ്, വാട്‌സ്ആപ്പ്, ഇമെയിലുകള്‍, ഫോണ്‍ കോളുകള്‍ എന്നിവ വഴി വ്യക്തിഗത വിവരങ്ങള്‍ വെളിപ്പെടുത്താന്‍ ബാങ്കുകള്‍ ഉപയോക്താക്കളോട് ആവശ്യപ്പെടില്ലെന്ന് ബാങ്ക് അധികൃതര്‍ അറിയിച്ചു. അടുത്തിടെ തട്ടിപ്പുകളില്‍ മലയാളികള്‍ ഉള്‍പ്പെടെ നിരവധി പ്രവാസികള്‍ക്കാണ് പണം നഷ്ടമായത്. തട്ടിപ്പുമായി ബന്ധപ്പെട്ട് രാജ്യത്തിനകത്തും പുറത്തുമുള്ള ഏഴ് ഏഷ്യക്കാരെ അറസ്റ്റ് ചെയ്തതായും പൊലീസ് അറിയിച്ചു.

ഷാര്‍ജ: പന്ത്രണ്ടാമത് രാജ്യാന്തര ഗവണ്‍മെന്റ് കമ്മ്യൂണിക്കേഷന്‍ ഫോറത്തിന് ഷാര്‍ജയില്‍ സമാപനം. ഇന്നത്തെ വിഭവങ്ങള്‍ നാളത്തെ സമ്പത്ത് എന്ന പ്രമേയത്തിലായിരുന്നു രണ്ട് ദിവസം നീണ്ടു നിന്ന പന്ത്രണ്ടാമത് രാജ്യാന്തര ഗവണ്‍മെന്റ് കമ്മ്യൂണിക്കേഷന്‍ ഫോറം ഷാര്‍ജയില്‍ നടന്നത്. സുപ്രീം കൗണ്‍സില്‍ അംഗവും ഷാര്‍ജ ഭരണാധികാരിയുമായി ഷെയ്ഖ് ഡോ.സുല്‍ത്താന്‍ ബിന്‍ മുഹമ്മദ് അല്‍ ഖാസിമിയുടെ നേതൃത്വത്തില്‍ ഷാര്‍ജ ഉപഭരണാധികാരിയും ഷാര്‍ജ മീഡിയ കൗണ്‍സില്‍ ചെയര്‍മാനുമായ അഹമ്മദ് അല്‍ ഖാസിമിയുടെ സാന്നിധ്യത്തിലായിരുന്നു ഐജിസിഎഫ് സംഘടിപ്പിച്ചിരുന്നത്. പന്ത്രണ്ടാമത് രാജ്യാന്തര ഗവണ്‍മെന്റ് കമ്മ്യൂണിക്കേഷന്‍ ഫോറത്തില്‍ ഇതുവരെയില്ലാത്ത ഒരു പുരസ്‌കാര പ്രഖ്യാപനം നടന്നു. രാജ്യത്തിന്റെ യശസ്സ് ഉയര്‍ത്തിയ, ബഹിരാകാശ നിലയത്തില്‍ ആറ് മാസം ചെലവഴിച്ച് നിരവധി റെക്കോര്‍ഡുകള്‍ നേടിയ സുല്‍ത്താന്‍ അല്‍ നെയാദിനെ പേഴ്‌സണാലിറ്റി ഓഫ് ദി ഇയര്‍ ആയി പ്രഖ്യാപിച്ചു. ഇതിന് പുറമേ നിരവധി മേഖലകളിലെ പ്രമുഖരേയും അവാര്‍ഡ് നല്‍കി ആദരിച്ചു. രണ്ട് ദിവസത്തെ സമ്മേളനത്തില്‍ ലോക നേതാക്കളും ചിന്തകരും എഴുത്തുകാരും പ്രഭാഷകരുമടക്കം 250ലേറെ വിദഗ്ധര്‍ പരിപാടിയുടെ ഭാഗമായി. ചര്‍ച്ചകള്‍, പ്രഭാഷണങ്ങള്‍, സെമിനാറുകള്‍ എന്നിവയും ഫോറത്തില്‍ ഉള്‍പ്പെടുത്തിയിരുന്നു. പ്രകൃതി, സംസ്‌കാരം, കല, കായികം, സാങ്കേതിക വിദ്യ എന്നിവയിലും ചര്‍ച്ചയുണ്ടായി. യുഎഇ കാലാവസ്ഥ പരിസ്ഥിതി മന്ത്രി മറിയം ബിന്ദ് മുഹമ്മദ് അല്‍ മഹെരി, അമേരിക്കന്‍ ന്യായാധിപന്‍ ഫ്രാങ്ക് കാപ്രിയോ, മുന്‍ ഈജിപ്ഷ്യന്‍ മന്ത്രി ഡോ.ഒസാമ കമാല്‍ എന്നിവരും മുഖ്യ പ്രഭാഷകരായിരുന്നു.

അബുദബി: യുഎഇ പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്‍ സെല്‍ഫി എടുക്കുന്നതിനായി ഒരു യുവാവിനൊപ്പം നില്‍ക്കുന്ന വീഡിയോ സോഷ്യല്‍ മീഡിയയില്‍ വൈറലാകുന്നു. അബുദബിയിലെ തിരക്കേറിയ ഷോപ്പിംഗ് മാളിലാണ് ഷെയ്ഖ് മുഹമ്മദ് എത്തിയത്. സാധാരണക്കാരെ സ്വീകരിക്കുന്ന ഷെയ്ഖ് മുഹമ്മദിന്റെ ചിത്രങ്ങള്‍ മുമ്പും വൈറലായിരുന്നു. ഒരു രാജ്യത്തിന്റെ ഭരണാധികാരി എങ്ങനെ ആയിരിക്കണം എന്നതിന്റെ ഉത്തമ ഉദാഹരണമാണ് യുഎഇ പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്‍. സാധാരണക്കാരെ എന്നും ചേര്‍ത്തു നിര്‍ത്തുന്ന ഭരണാധികാരിയുടെ ചിത്രം നിരവധി തവണ കണ്ടു കഴിഞ്ഞു. ഷെയ്ഖ് മുഹമ്മദിന്റെ ഈ താഴ്മ തന്നെ അദ്ദേഹത്തിന് ലോകജനതക്കിടയില്‍ ആരാധകരെ സൃഷ്ടിച്ചു. കഴിഞ്ഞ ദിവസം അബുദബിയിലെ മാളിലെത്തിയ ഷെയ്ഖ് മുഹമ്മദിന്റെ ചിത്രങ്ങളാണ് ഇപ്പോള്‍ വൈറലായിരിക്കുന്നത്. തന്നോടൊപ്പമുള്ള ഒരു ചെറിയ സംഘത്തിനൊപ്പം മാളിലൂടെ നടന്നു നീങ്ങിയ രാജ്യത്തിന്റെ ഭരണാധികാരിയെ ആളുകള്‍ ആദ്യം തിരിച്ചറിഞ്ഞില്ല. മനസിലാക്കി തുടങ്ങിയതോടെ പലര്‍ക്കും ആകാംഷയായി. ഇതിനിടെയാണ് സെല്‍ഫി എടുക്കാന്‍ അനുവാദം ചോദിച്ച് ഒരാള്‍ എത്തിയത്. അദ്ദേഹത്തെ ചേര്‍ത്തു നിര്‍ത്തി ഷെയ്ഖ് മുഹമ്മദ് സെല്‍ഫിയ്ക്ക് നിന്നു. മാളില്‍ നിന്നും മാറ്റാരോ പകര്‍ത്തിയ ചിത്രമാണ് ഇപ്പോള്‍ വൈറലായത്.