യുഎഇയില്‍ സ്വര്‍ണ്ണവില വീണ്ടും കുറഞ്ഞു. ഇരുപത്തിരണ്ട് ക്യാരറ്റ് സ്വര്‍ണ്ണം ഗ്രാമിന് 206.75 ദിര്‍ഹം ആണ് നിലവില്‍ വില. സ്വര്‍ണ്ണവില കുറഞ്ഞതോടെ ആഭരണങ്ങള്‍ വാങ്ങുന്നവരുടെ എണ്ണത്തില്‍ വര്‍ദ്ധന വന്നുവെന്നാണ് ജുവലറികള്‍ വ്യക്തമാക്കുന്നത്.

രാജ്യാന്തര വിപണിയുടെ ചുവടുപിടിച്ചാണ് യുഎഇയുടെ ആഭ്യന്തര വിപണിയിലും സ്വര്‍ണ്ണവില കുറയുന്നത്. ഒരാഴ്ച്ചക്കിടയില്‍ മാത്രം ഗ്രാമിന് അഞ്ച് ദിര്‍ഹത്തിന്റെ കുറവാണ് രേഖപ്പെടുത്തിയിരിക്കുന്നത്.സ്വര്‍ണ്ണവില ഏഴ് മാസത്തിനിടയിലെ താഴ്ന്ന നിലയിലേക്കാണ് എത്തിയിരിക്കുന്നത്. ഒരു ഔണ്‍സ് സ്വര്‍ണ്ണത്തിന്റെ വില 6767.48 ദിര്‍ഹം ആയിട്ടാണ് കുറഞ്ഞിരിക്കുന്നത്. ഇരുപത്തിനാല് ക്യാരറ്റ് സ്വര്‍ണ്ണം ഗ്രാമിന് 223.25 ദിര്‍ഹം ആണ് നിലവില്‍ വില. സ്വര്‍ണ്ണവിലയില്‍ കുറവ് രേഖപ്പെടുത്തിയത് വിപണിയില്‍ ഉണര്‍വ് പകര്‍ന്നിട്ടുണ്ട്. ആഭരണം വാങ്ങാന്‍ എത്തുന്നവരുടെ എണ്ണത്തില്‍ ഇരുപത് മുതല്‍ മുപ്പത് ശതമാനം വരെ വര്‍ദ്ധന രേഖപ്പെടുത്തിയിട്ടുണ്ടെന്നാണ് വ്യാപാരികള്‍ പറയുന്നത്. അമേരിക്കന്‍ ഡോളര്‍ കൂടുതല്‍ ശക്തിപ്പെടുന്നതാണ് സ്വര്‍ണ്ണത്തിന് തിരിച്ചടിയാകുന്നത്.

ദുബൈ ഭരണകൂടത്തിന്റെ ഔദ്യോഗിക ചിഹ്നം ദുരുപയോഗിച്ചാല്‍ അഞ്ച് ലക്ഷം ദിര്‍ഹം പിഴ. ചിഹ്നം ഉപയോഗിക്കാന്‍ സ്വകാര്യസ്ഥാപനങ്ങള്‍ അനുമതി തേടണം. ഔദ്യോഗിക ചിഹ്നത്തിന്റെ ഉപയോഗവുമായി ബന്ധപ്പെട്ട് യുഎഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തും പുതിയ നിയമം പുറപ്പെടുവിച്ചു.

ദുബൈയുടെ മൂല്യങ്ങളും തത്വങ്ങളും പ്രതിഫലിപ്പിക്കുന്നതാണ് ഔദ്യോഗിക ചിഹ്നം എന്ന് ഷെയ്ഖ് മുഹമ്മദ് പുറപ്പെടുവിച്ച പുതിയ നിയമത്തില്‍ പറയുന്നു. എമിറേറ്റിലെമ്പാടുമുള്ള സര്‍ക്കാര്‍ സ്ഥാപനങ്ങളിലും രേഖകളിലും വെബ്‌സൈറ്റുകളിലും ഔദ്യോഗിക ചടങ്ങുകളിലും ചിഹ്നം ഉപയോഗിക്കാം എന്ന് നിയമത്തില്‍ പറയുന്നു. സ്വകാര്യ സ്ഥാപനങ്ങള്‍ക്കും ഔദ്യോഗിക ചിഹ്നം ഉപയോഗിക്കാം. പക്ഷെ മുന്‍കൂട്ടി അനുമതി നേടണം.

ദുബൈ ഭരണാധികാരിയുടെയോ പ്രതിനിധിയുടെയോ പക്കല്‍ നിന്നാണ് അനുമതി നേടേണ്ടതെന്ന് നിയമത്തില്‍ പറയുന്നു.ഔദ്യോഗിക ചിഹ്നത്തിന്റെ അനുചിതമായ ഉപയോഗത്തിന് മൂന്ന് മാസം മുതല്‍ അഞ്ച് മാസം വരെ തടവുശിക്ഷ ലഭിക്കും. കൂടാതെ ഒരു ലക്ഷം ദിര്‍ഹം മുതല്‍ അഞ്ച് ലക്ഷം ദിര്‍ഹം വരെ തടവും ശിക്ഷയായി ലഭിക്കും എന്ന് നിയമത്തില്‍ പറയുന്നു. നിലവില്‍ ഔദ്യോഗിക ചിഹ്നം ഉപയോഗിക്കുന്നവര്‍ മുപ്പത് ദിവസങ്ങള്‍ക്കുള്ളില്‍ അത് ഒഴിവാക്കണം. അല്ലെങ്കില്‍ അനുമതി നേടണം എന്നും നിയമത്തില്‍ പറയുന്നു.

ഒമാന്‍ തലസ്ഥാനമായ മസ്‌ക്കത്തില്‍ നിന്നും തിരിവനന്തപുരത്തേക്ക് ഒമാന്‍ എയര്‍ നേരിട്ട് വിമാനസര്‍വീസ് ആരംഭിക്കുന്നു. മറ്റന്നാള്‍ മുതലാണ് വിമാനസര്‍വീസ്. ആഴ്ച്ചയില്‍ നാല് ദിവസങ്ങളിലാണ് സര്‍വീസ്. ഞായര്‍,ബുധന്‍,വ്യാഴം,ശനി ദിവസങ്ങളിലാണ് ഒമാന്‍ എയര്‍ തിരുവനന്തപുരത്തിനും മസ്‌ക്കത്തിനും ഇടിയില്‍ സര്‍വീസ് നടത്തുക.

ഞായറാഴ്ചയും ബുധനാഴ്ച്ചയും രാവിലെ 7.45-ന് ആണ് വിമാനം മസ്‌കത്തില്‍ നിന്നും തിരുവനന്തപുരത്ത് എത്തുക. 8.45-ന് തിരികെ മസ്‌ക്കത്തിലേക്ക് പറക്കും. വ്യാഴാഴ്ച്ചകളില്‍ 1.55-ന് തിരുവനന്തപുരത്ത് എത്തുന്ന വിമാനം 4.10-ന് തിരികെ പറക്കും. ശനിയാഴ്ചകളില്‍ 2.30-ന് എത്തുന്ന വിമാനം 3.30നും ഒമാനിലേക്ക് തിരിക്കും. നിലവില്‍ എയര്‍ഇന്ത്യ എക്‌സ്പ്രസ് മാത്രമാണ് മസ്‌ക്കത്തില്‍ നിന്നും തിരുവനന്തപുരത്തേക്ക് പ്രതിദിന സര്‍വീസ് നടത്തുന്നത്. ഡിസംബറോട് കൂടി ആഴ്ച്ചയില്‍ അഞ്ച് സര്‍വീസായി വര്‍ദ്ധിപ്പിക്കുമെന്ന് ഒമാന്‍ എയര്‍ അറിയിച്ചു.ബോയിംഗിന്റെ 737 വിമാനത്തില്‍ 162 യാത്രക്കാര്‍ക്ക് സഞ്ചരിക്കാം.

ഇതൊടൊപ്പം തന്നെ ഞായറാഴ്ച മുതല്‍ മസ്‌കത്തില്‍ നിന്നും ലക്‌നൗവിലേക്കും ഒമാന്‍ എയര്‍ നേരിട്ടുള്ള സര്‍വീസ് ആരംഭിക്കും. ഒന്‍പത് സര്‍വീസുകള്‍ ആണ് മസ്‌ക്കത്ത്-ലക്‌നൗ റൂട്ടില്‍ ആഴ്ച്ചയില്‍ നടത്തുക.

..

നൂറ് ഡോളറിലേക്ക് കുതിച്ച അസംസ്‌കൃത എണ്ണവിലയില്‍ ഇടിവ്.എങ്കിലും തൊണ്ണൂറ്റിയഞ്ച് ഡോളറിന് മുകളില്‍ തന്നെയാണ് എണ്ണവില. ഉത്പാദന നിയന്ത്രണത്തില്‍ സൗദിയും റഷ്യയും പുനപരിശോധന നടത്തിയേക്കും എന്ന റിപ്പോര്‍ട്ടുകള്‍ ആണ് വില കുറയാന്‍ കാരണം.

ബ്രെന്റ് ക്രൂഡിന് ബാരലിന് തൊണ്ണൂറ്റിയെട്ട് ഡോളറിലേക്കാണ് കഴിഞ്ഞ ദിവസം വില ഉയര്‍ന്നത്. ആ കുതിപ്പ് വില നൂറുകടക്കുമെന്ന പ്രതീതിയും സൃഷ്ടിച്ചിരുന്നു. എന്നാല്‍ മറിച്ചാണ് സംഭവിച്ചത്. ബ്രെന്റ് ക്രൂഡിന്റെ വില ബാരലിന് തൊണ്ണൂറ്റിയഞ്ച് ഡോളറായി താഴ്ന്നു. അമേരിക്കന്‍ ക്രൂഡായ വെസ്റ്റ് ടെക്‌സസ് ഇന്റര്‍മീഡിയേറ്റിന് തൊണ്ണുറ്റിയൊന്ന് ഡോളറും ആണ് വില. എണ്ണവില പത്ത് മാസത്തിനിടയിലെ ഏറ്റവും ഉയര്‍ന്ന നിലയിലേക്ക് എത്തിയപ്പോള്‍ വ്യാപാരികള്‍ ലാഭമെടുത്തതും അമേരിക്കന്‍ ഫെഡറല്‍ റിസര്‍വ് വീണ്ടും പലിശനിരക്കുകള്‍ വര്‍ദ്ധിപ്പിച്ചേക്കും എന്ന ആശങ്കകളും ആണ് വില കുറയുന്നതിന് കാരണം.

ഇതിനൊപ്പം നിലവിലെ ഉത്പാദനനിയന്ത്രണത്തില്‍ സൗദിയും റഷ്യയും മാറ്റം വരുത്തിയേക്കും എന്ന സൂചനകളും വിപണിയെ ബാധിച്ചിട്ടുണ്ട്. നിലവില്‍ സൗദിയും റഷ്യയും ചേര്‍ന്ന് പതിമൂന്ന് ലക്ഷം ബാരലിന്റെ പ്രതിദിന ഉത്പാദനം ആണ് വെട്ടിക്കുറച്ചിരിക്കുന്നത്. എന്നാല്‍ ഒക്ടോബര്‍ നാലിന് ചേരുന്ന ഒപെക് പ്ലസ് സഖ്യത്തിന്റെ യോഗത്തില്‍ ഉത്പാദന നിയന്ത്രണം പുനപരിശോധിച്ചേക്കും എന്നാണ് സൂചന. ക്രൂഡ് ഓയില്‍ വിതരണം നിയന്ത്രിക്കാനുള്ള ഒപെക് പ്ലസ് സഖ്യത്തിന്റെ തീരുമാനവും അമേരിക്കന്‍ ക്രൂഡ് ഓയില്‍ ശേഖരത്തില്‍ കുറവ് വന്നതുമാണ് എണ്ണവിലതൊണ്ണൂറിന് മുകളിലേക്ക് ഉയര്‍ത്തിയത്. എന്നാല്‍ ഉത്പാദനം വര്‍ദ്ധിപ്പിക്കാന്‍ രാജ്യങ്ങള്‍ തീരുമാനിച്ചാല്‍ വില വീണ്ടും താഴേയ്ക്ക് എത്തും.…..

വലിയ വിമാനങ്ങള്‍ക്കൊപ്പം ചെറിയവിമാനങ്ങള്‍ വാങ്ങുന്നതിനുള്ള ചര്‍ച്ചകളും അന്തിമഘട്ടത്തിലെന്ന് റിയാദ് എയര്‍. നാരോ ബോഡി എയര്‍ക്രാഫ്റ്റുകളുടെ കരാര്‍ നവംബറില്‍ ദുബൈ എയര്‍ഷോയില്‍ ഒപ്പുവെച്ചേക്കും. രണ്ട് വര്‍ഷത്തിനുള്ളില്‍ സര്‍വീസ് ആരംഭിക്കുന്നതിനാണ് റിയാദ് എയറിന്റെ പദ്ധതി

നാരോ ബോഡി എയര്‍ക്രാഫ്റ്റുകള്‍ക്കുള്ള ആദ്യഘട്ട ഓര്‍ഡറുകള്‍ വരും മാസങ്ങളിലുണ്ടാകുമെന്ന് റിയാദ് എയര്‍ സി.ഇ.ഒ ടോണി ഡഗ്ലസ് അറിയിച്ചു. നാരോ ബോഡി എയര്‍ക്രാഫ്റ്റുകള്‍ വാങ്ങുന്നതിന് ബോയിങ്ങുമായും എയര്‍ബസുമായും ചര്‍ച്ചകള്‍ തുടരുകയാണ്. റിയാദ് എയറിനായി നാനൂറ് നാരോ ബോഡി എയര്‍ക്രാഫ്റ്റുകള്‍ ഓര്‍ഡര്‍ ചെയ്യും എന്നാണ് റിപ്പോര്‍ട്ട്. ഇതിന്റെ ആദ്യഘട്ട ഓര്‍ഡറുകള്‍ മേഖലയിലെ ഏറ്റവും വലിയ ഏവിയേഷന്‍ മേളയായ ദുബൈ എയര്‍ഷോയില്‍ ഉണ്ടാകും എന്നാണ് സൂചന. ആദ്യഘട്ടത്തില്‍ 150 ബോയിംഗ് 737 മാക്‌സ് വിമാനങ്ങള്‍ക്കായി റിയാദ് എയര്‍ ചര്‍ച്ച നടത്തുന്നുവെന്ന് ബ്ലൂംബെര്‍ഗ് നേരത്തെ റിപ്പോര്‍ട്ട് ചെയ്തിരുന്നു.

വൈഡ് ബോഡി എയര്‍ക്രാഫ്റ്റുകള്‍ക്കും ബോയിംഗുമായി റിയാദ് എയര്‍ ധാരണയില്‍ എത്തിയിട്ടുണ്ട്. 72 ബോയിംഗ് 787 ഡ്രിം ലൈനര്‍ വിമാനങ്ങളാകും റിയാദ് എയര്‍ ആദ്യഘട്ടത്തില്‍ വാങ്ങുക. പ്രവര്‍ത്തനം ആരംഭിക്കുന്നതിന് മുന്നോടിയായി പൈലറ്റുമാര്‍ക്ക് നിയമനം നല്‍കി വരികയാണ് റിയാദ് എയര്‍. അടുത്ത മൂന്ന് വര്‍ഷത്തിനുള്ളില്‍ എഴുനൂറ് പൈലറ്റുമാര്‍ക്ക് നിയമനം നല്‍കും. 2025ന്റെ തുടക്കത്തില്‍ റിയാദ് എയര്‍ സര്‍വീസ് തുടങ്ങും. 2030ഓട് കൂടി നൂറിലധികം കേന്ദ്രങ്ങളിലേക്ക് റിയാദ് എയര്‍ സര്‍വീസ് നടത്തും.