ഇന്‍ഡിഗോ വിമാനങ്ങളിലെ യാത്രയ്ക്ക് ഇനി ചിലവേറും. ഇന്ധന ചാര്‍ജ് എന്ന പേരിലാണ് നിരക്ക് വര്‍ദ്ധന. ടിക്കറ്റുകള്‍ക്ക് ആയിരം രൂപ വരെ അധികമായി ഈടാക്കാനാണ് എയര്‍ലൈന്റെ തീരുമാനം.

വിമാന ഇന്ധനത്തിന്റെ വില വന്‍തോതില്‍ ഉയരുന്നതിന്റെ പശ്ചാത്തലത്തില്‍ ആണ് ടിക്കറ്റുകളില്‍ ഇന്ധന ചാര്‍ജ് കൂടി കൂട്ടിച്ചേര്‍ക്കുന്നതെന്നാണ് ഇന്‍ഡിഗോ എയര്‍ലൈന്‍സിന്റെ വിശദീകരണം. യാത്ര ചെയ്യുന്ന ദൂരത്തിന്റെ അടിസ്ഥാനത്തില്‍ മൂന്ന് രൂപ മുതല്‍ ആയരം രൂപ വരെയായിരിക്കും അധികമായി ഈടാക്കുക.ഇന്ന് മുതല്‍ ടിക്കറ്റ് എടുക്കുന്നവരില്‍ നിന്ന് ഇന്‍ഡിഗോ ഈ നിരക്കുകള്‍ അധികമായി ഈടാക്കും. യാത്ര ചെയ്യുന്ന ദൂരത്തിന്റെ അടിസ്ഥാനത്തില്‍ പല സ്ലാബുകളായി തിരിച്ചാണ് ഇന്ധന ചാര്‍ജ് ഈടാക്കുക.

അഞ്ചൂറ് കിലോമീറ്റര്‍ വരെയുള്ള യാത്രകള്‍ക്ക് മുന്നൂറ് രൂപയായിരിക്കും നിരക്ക്. 1001 മുതല്‍ 1500 കിലോമീറ്റര്‍ വരെയുള്ള യാത്രകള്‍ക്ക് 550 രൂപ ഈടാക്കും. 1501 മുതല്‍ 2500 കിലോമീറ്റര്‍ വരെയുള്ള യാത്രകള്‍ക്ക് 650 രൂപയാണ് ഇന്ധന ചാര്‍ജ്. 2501 മുതല്‍ 3500 കിലോമീറ്റര്‍ എണ്ണൂറ് രൂപയും 3501-ന് മുകളില്‍ ദൂരമുള്ളവര്‍ക്ക് ആയിരം രൂപയും നല്‍കേണ്ടിവരും. ആഭ്യന്തര-രാജ്യാന്തര സര്‍വീസുകള്‍ക്ക് ഇന്ധന ചാര്‍ജ് ബാധകമാണെന്ന് എയര്‍ലൈന്‍ അറിയിച്ചു. കഴിഞ്ഞ മൂന്ന് മാസത്തിലധികമായി ഏവിയേഷന്‍ ടര്‍ബൈന്‍ ഫ്യൂവലിന്റെ നിരക്കില്‍ വന്‍തോതില്‍ വര്‍ദ്ധന രേഖപ്പെടുത്തിയതാണ് നിരക്ക് വര്‍ദ്ധനയ്ക്ക് എയര്‍ലൈനെ പ്രേരിപ്പിച്ചത്

സൗദിയില്‍ സ്വദേശിവല്‍ക്കരണം ശക്തമാകുന്നു. സ്വകാര്യ മേഖലയില്‍ ജോലി ചെയ്യുന്ന സ്വദേശി പൗരന്‍മാരുടെ എണ്ണം 22 ലക്ഷമായി ഉയര്‍ന്നു. നാഷ്ണല്‍ ലേബര്‍ ഒബ്‌സര്‍വേറ്ററി പുറത്ത് വിട്ട കണക്കിലാണ് സ്വകാര്യ മേഖലയില്‍ ജോലി ചെയ്യുന്ന സ്വദേശികളുടെ എണ്ണം വ്യക്തമാക്കുന്നത്.

സ്വകാര്യ മേഖലയില്‍ സ്വദേശിവല്‍ക്കരണം ശക്തമായതോടെ രാജ്യത്തെ തൊഴിലില്ലായ്മ നിരക്ക് വന്‍ തോതില്‍ കുറഞ്ഞിരിക്കുകയാണ്. സ്വകാര്യ മേഖലയില്‍ ഉയര്‍ന്ന ശമ്പളം വാങ്ങുന്ന സൗദി പൗരന്‍മാരുടെ എണ്ണം വലിയ തോതില്‍ കൂടിയതായും നാഷ്ണല്‍ ലേബര്‍ ഒബ്‌സര്‍വേറ്ററി പുറത്തിവിട്ട റിപ്പോര്‍ട്ടില്‍ വ്യക്തമാക്കുന്നുണ്ട്. സ്വകാര്യ മേഖലയിലെ സ്ഥാപനങ്ങളില്‍ ജോലി ചെയ്യുന്ന സ്വദേശി പൗരന്‍മാരുടെ എണ്ണം 22 ലക്ഷമായി ഉയര്‍ന്നു. 2022ലെ ഇതേ കാലയളവുമായി താരതമ്യം ചെയ്യുമ്പോള്‍ ജീവനക്കാരുടെ എണ്ണം 2,10,000 ആയി ഉയര്‍ന്നിട്ടുണ്ട്. ഈ വര്‍ഷം രണ്ടാം പാദത്തിലെ സ്വദേശിവല്‍ക്കരണ റിപ്പോര്ട്ട് പ്രകാരം സ്വദേശികളായ സ്ത്രീപുരുഷ ജീവനക്കാരുടെ എണ്ണത്തില്‍ ഏറ്റവും ഉയര്‍ന്ന നിരക്ക് രേഖപ്പെടുത്തി. മൊത്തം സ്വദേശിവല്‍ക്കരണ നിരക്ക് 22.3 ശതമാനത്തിലെത്തി.

രാജ്യത്തിന്റെ കിഴക്കന്‍ മേഖലയിലാണ് ഉയര്‍ന്ന സ്വദേശിവല്‍ക്കരണം രേഖപ്പെടുത്തിയത്. മക്കയില്‍ 24 ശതമാനവും റിയാദിലും മദീനയിലും 21 ശതമാനവുമാണ് സ്വദേശിവല്‍ക്കരണ തോത്. വിദ്യാഭ്യാസ മേഖലയില്‍ സ്ത്രീകളുടെ എണ്ണം വര്‍ദ്ധിച്ചപ്പോള്‍ ഇന്‍ഫര്‍മേഷന്‍ ആന്റ് കമ്യൂണിക്കേഷന്‍സ് മേഖലയിലാണ് പുരുഷന്‍മാര്‍ കൂടുതലും ജോലിയില്‍ പ്രവേശിച്ചത്. തൊഴില്‍ മന്ത്രാലയത്തിന് കീഴിലെ ഹദ്ഫ വിഭാഹം സ്വദേശികള്‍ക്ക് തൊഴില്‍ കണ്ടെത്താനും പരിശീലനം നല്‍കാനും സഹായം നല്‍കി വരുന്നുണ്ട്.

യുഎഇയിലെ പുതിയ തൊഴിലാളികള്‍ക്ക് തൊഴിലില്ലായ്മ ഇന്‍ഷുറന്‍സില്‍ ചേരാന്‍ നാല് മാസത്തെ സമയം അനുവദിച്ചു. സമയപരിധി കഴിഞ്ഞും ചേരാത്തവര്‍ക്ക് പിഴ ഈടാക്കും. ഇതുവരെ 6.5 ദശലക്ഷം ജീവനക്കാരാണ് തൊഴിലില്ലായ്മ ഇന്‍ഷുറസന്റെ ഭാഗമായത്.

രാജ്യത്ത് ഏര്‍പ്പെടുത്തിയ തൊഴിലില്ലായ്മ ഇന്‍ഷുറന്‍സില്‍ 6.5 ദശലക്ഷം ആളുകളാണ് ഇതുവരെ ചേര്‍ന്നത്. സെപ്റ്റംബര്‍ 30 പദ്ധതിയില്‍ ചേരുന്നതിനുളള സമയപരിധി അവസാനിച്ചിരുന്നു. രാജ്യത്ത് പുതിയതായി എത്തിയ തൊഴിലളികള്‍ക്ക് ഇന്‍ഷുറന്‍സിന്റെ ഭാഗമാകാന്‍ അവസരമൊരുക്കുകയാണ് യുഎഇ മാനവവിഭവശേഷി മന്ത്രാലയം. പുതിയ തൊഴില്‍ വീസ ലഭിക്കുന്നതു മുതല്‍ നാല് മാസത്തേക്കാണ് സമയപരിധി ലഭിച്ചിരിക്കുന്നത്.

ഇതിനുശേഷവും ഇന്‍ഷുറന്‍സിന്റെ ഭാഗമാകാത്തവര്‍ക്ക് 400 ദിര്‍ഹം പിഴ ഈടാക്കും. സ്വകാര്യ മേഖലയിലെയും ഫെഡറല്‍ ഗവണ്‍മെന്റിലെയും എല്ലാ ജീവനക്കാര്‍ക്കും നിയമം ബാധകമാണ്. 16,000 ദിര്‍ഹവും അതില്‍ താഴെയും ശമ്പളമുള്ളവര്‍ക്ക് അവരുടെ ഇന്‍ഷുറന്‍സ് പ്രീമിയം പ്രതിമാസം 5 ദിര്‍ഹമാണ്. 16,000 ദിര്‍ഹത്തില്‍ കൂടുതലുള്ള ശമ്പളമുള്ള ജീവനക്കാര്‍ക്ക് അവരുടെ ഇന്‍ഷുറന്‍സ് പ്രീമിയം പ്രതിമാസം 10 ദിര്‍ഹമായിരിക്കും. പദ്ധതിയില്‍ ചേര്‍ന്ന ശേഷം മൂന്ന് മാസം തുടര്‍ച്ചയായി പ്രീമിയം അടക്കാതിരുന്നാല്‍ 200 ദിര്‍ഹം പിഴ ഈടാക്കും. കമ്പനിയുടെ ഉടമസ്ഥര്‍, ഗാര്‍ഹിക ജീവനക്കാര്‍, താല്‍കാലിക കരാര്‍ തൊഴിലാളികള്‍, 18 വയസ്സിനു താഴെയുള്ളഴര്‍, പെന്‍ഷന്‍ ലഭിച്ച് ജോലിയില്‍ നിന്നും വിരമിച്ചവര്‍ എന്നിവരെ പദ്ധതിയില്‍ നിന്നും ഒഴിവാക്കിയിട്ടുണ്ട്. 12 മാസം തുടര്‍ച്ചയായി ജോലി ചെയ്‌തെങ്കില്‍ മാത്രമേ ഇന്‍ഷുറന്‍സ് ആനുകൂല്യം ലഭിക്കുകയുള്ളു.

രാജ്യാന്തര വിപണിയില്‍ അസംസ്‌കൃത എണ്ണവില കുത്തനെ ഇടിഞ്ഞു. ബ്രെന്റക്രൂഡ് വില ബാരലിന് എണ്‍പത്തിയഞ്ച് ഡോളറിലേക്ക് എത്തി. ഒരു ദിവസത്തിനിടയില്‍ മാത്രം അഞ്ച് ഡോളറിന്റെ ഇടിവാണ് അസംസ്‌കൃത എണ്ണയ്ക്ക് രേഖപ്പെടുത്തിയിരിക്കുന്നത്.
കഴിഞ്ഞ ആഴ്ച്ച ബാരലിന് തൊണ്ണൂറ്റിയെട്ട് ഡോളറിലേക്ക് വരെ ഉയര്‍ന്നതിന് ശേഷം ആണ് ബ്രെന്റ് ക്രൂഡിന്റെ വില എണ്‍പത്തിയഞ്ച് ഡോളറിലേക്ക് താഴ്ന്നിരിക്കുന്നത്. കഴിഞ്ഞ ഒരാഴ്ച്ചക്കിടയില്‍ ബാരലിന് പത്ത് ഡോളറോളം കുറഞ്ഞു.

എണ്ണ ഉത്പാദനത്തില്‍ ഏര്‍പ്പെടുത്തിയിരിക്കുന്ന അധിക നിയന്ത്രണം വര്‍ഷാവസാനം തുടരുമെന്ന് സൗദിയും റഷ്യയും ഇന്നലെ പ്രഖ്യാപിച്ചിരുന്നു. എന്നാല്‍ ഈ പ്രഖ്യാപനത്തിന് എണ്ണയുടെ ആവശ്യകതയില്‍ കുറവുണ്ടായേക്കും എന്ന ആശങ്കയെ മറികടക്കാന്‍ കഴിഞ്ഞിട്ടില്ല. ആഗോളതലത്തില്‍ എണ്ണയ്ക്ക് വരും ആഴ്ച്ചകളില്‍ ആവശ്യകത കുറയും എന്ന റിപ്പോര്‍ട്ടുകള്‍ ആണ് വിലയിടിവിന് കാരണം. അമേരിക്കയിലെ സര്‍വീസ് മേഖലയില്‍ വളര്‍ച്ചാ നിരക്ക് കുറഞ്ഞത് അടക്കമുള്ള കാര്യങ്ങള്‍ എണ്ണവിലയെ ബാധിച്ചിട്ടുണ്ട്.

ഈ വര്‍ഷം മൂന്നാം പാദത്തില്‍ അസംസ്‌കൃത എണ്ണയുടെ വില കുത്തനെ ഉയര്‍ന്നതും എണ്ണയുടെ ഡിമാന്‍ഡ് കുറയ്ക്കുന്നതിന് കാരണമായി. എണ്ണയുടെ വില നൂറ് ഡോളറിലേക്ക് അടുത്തതോടെ ഇന്ത്യ അടക്കമുള്ള പ്രധാനപ്പെട്ട ഇറക്കുമതി രാജ്യങ്ങള്‍ വില കുറയ്ക്കാന്‍ തയ്യാറാകണം എന്ന് സൗദി അടക്കമുള്ള ഉത്പാദക രാജ്യങ്ങളോട് ആവശ്യപ്പെട്ടിരുന്നു. എന്നാല്‍ അത് തളളിക്കൊണ്ടാണ് നിലവിലെ ഉത്പാദത നിയന്ത്രണം തുടരാനുള്ള ഒപെക് പ്ലസ് സഖ്യത്തിന്റെ തീരുമാനം. ഇന്നലെ ചേര്‍ന്ന ഒപെക് പ്ലസ് സഖ്യത്തിന്റെ മന്ത്രിതല സമിതിയാണ് തീരുമാനം പ്രഖ്യാപിച്ചത്.

അടുത്ത വര്‍ഷം മുതല്‍ ഒറ്റത്തവണ ഉപയോഗിക്കാവുന്ന പ്ലാസ്റ്റിക് ബാഗുകള്‍ക്ക് നിരോധനം ഏര്‍പ്പെടുത്താനൊരുങ്ങി റാസല്‍ഖൈമ.യുഎഇ സുപ്രീം കൗണ്‍സില്‍ അംഗവും റാസല്‍ഖൈമ ഭരണാധികാരിയുമായ ഷെയ്ഖ് സൗദ് ബിന്‍ സഖര്‍ അല്‍ ഖാസിമിയുടെ നിര്‍ദേശപ്രകാരമാണ് നിരോധനം ഏര്‍പ്പെടുത്തുന്നത്
അബുദബി, ദുബൈ, ഷാര്‍ഡ, ഉമ്മുല്‍ഖുവൈന്‍, അജ്മാന്‍ എമിറേറ്റുകളില്‍ നിരോധനം ഏര്‍പ്പെടുത്തിയതിന് പിന്നാലെയാണ് റാസല്‍ഖൈമയും നിയന്ത്രണത്തിന് ഒരുങ്ങുന്നത്. പ്ലാസ്റ്റിക് ബാഗ് ഉപയോഗവും പ്രചാരവും അടുത്ത വര്‍ഷം മുതല്‍ എമിറേറ്റില്‍ നിരോധിക്കുമെന്ന് സുപ്രീംകൗണ്‍സില്‍ അംഗവും റാസല്‍ഖൈമ ഭരണാധികാരിയുമായ ഷെയ്ഖ് സൗദി ബിന്‍ സഖര്‍ അല്‍ ഖാസിമിയാണ് അറിയിച്ചത്. എല്ലാ വ്യാപാര സ്ഥാപനങ്ങളും റീട്ടെയില്‍ സ്റ്റോറുകളും ഔട്ട്‌ലെറ്റുകളും അനുയോജ്യമായതും പലതവണ ഉപയോഗിക്കാന്‍ പറ്റുന്നതുമായ ബദല്‍ സംവിധാനം നടപ്പിലാക്കണമെന്ന് റാസല്‍ഖൈമ പരിസ്ഥിതി സംരക്ഷണ അതോറിറ്റിയും വ്യക്തമാക്കി. പ്ലാസ്റ്റിക് ബാഗ് ഉപയോഗം കുറയ്ക്കുന്നതിനായി അഞ്ച് എമിറേറ്റുകളിലും 25 ഫില്‍സ് വീതം ഈടാക്കുന്നുണ്ട്.

അബുദബിയില്‍ കഴിഞ്ഞ വര്‍ഷം ജൂണ്‍ ഒന്ന് മുതലും ദുബൈയില്‍ ജൂലൈ ഒന്ന് മുതലും ഷാര്‍ജയില്‍ ഒക്ടോബര്‍ മുതലുമാണ് പ്ലാസ്റ്റിക് ബാഗ് നിരോധിച്ചത്. ഉമ്മുല്‍ഖുവൈനിലും അജ്മാനിലും ഈ വര്‍ഷം ആദ്യത്തോടെയാണ് പ്ലാസ്റ്റിക് ബാഗ് നിരോധനം നിലവില്‍ വന്നത്. 2024 ജനുവരി ഒന്നോടെ ഒറ്റത്തവണ ഉപയോഗിക്കുന്ന പ്ലാസ്റ്റിക് ബാഗുകളുടെ ഉപയോഗം പൂര്‍ണ്ണമായും നിരോധിക്കാനാണ് യുഎഇ ഭരണകൂടത്തിന്റെ തീരുമാനം. ബാഗുകളുടെ ഇറക്കുമതി, ഉല്‍പ്പാദനം, വിതരണം എന്നിവയ്ക്കാണ് നിരോധനം. 2026ഓടെ പ്ലാസ്റ്റിക് കട്ട്‌ലറി, പ്ലാസ്റ്റിക് കപ്പുകള്‍, ബോക്‌സുകള്‍ എന്നിവ ഇറക്കുമതി ചെയ്യുന്നതും നിരോധിക്കും. ഫുഡ് പാക്കേജിങ്, പ്ലാസ്റ്റിക് കുപ്പികള്‍, കോട്ടണ്‍ സ്റ്റിക്കുകള്‍ , ബലൂണ്‍, ബലൂണ്‍ സ്റ്റിക് എന്നിവയെല്ലാം ഇതില്‍ ഉള്‍പ്പെടും.

2034 ഫിഫ ലോകകപ്പിന് വേദിയാകാന്‍ ആഗ്രഹം പ്രകടിപ്പിച്ച് സൗദി കിരീടവകാശി മുഹമ്മദ് ബിന്‍ സല്‍മാന്‍ രാജകുമാരന്‍. ആഗോള പരിപാടികള്‍ക്ക് ആതിഥേയത്വം വഹിക്കാനുള്ള കേന്ദ്രമാക്കി രാജ്യത്തെ മാറ്റിയെന്നും സല്‍മാന്‍ രാജകുമാരന്‍ പറഞ്ഞു. ഇതിനായി സൗദി നാമനിര്‍ദേശം സമര്‍പ്പിക്കുമെന്ന് ഫുട്‌ബോള്‍ ഫെഡറേഷനും അറിയിച്ചിട്ടുണ്ട്.

2034ല്‍ ലോകകപ്പ് ആതിഥേയത്വം വഹിക്കാനുള്ള അവസരം ഏഷ്യക്കാണ്. ഇത് മുന്നില്‍ കണ്ടാണ് ഫിഫ ലോകകപ്പിന് വേദിയാകാനുള്ള ആഗ്രഹം സൗദി അറേബ്യ അറിയിച്ചിരിക്കുന്നത്. ആഗോള പരിപാടികള്‍ക്ക് ആതിഥേയത്വം വഹിക്കാനുള്ള കേന്ദ്രമാക്കി സൗദിയെ മാറ്റിയെന്നാണ് കിരീടവകാശി മുഹമ്മദ് ബിന്‍ സല്‍മാന്‍ രാജകുമാരന്‍ അറിയിച്ചത്. സമാധാനത്തിന്റെയും സ്‌നേഹത്തിന്റെയും സന്ദേശങ്ങള്‍ പ്രചരിപ്പിക്കുന്ന സാഹചര്യത്തിലും മധ്യസ്ഥ ശ്രമങ്ങള്‍ നടത്തുന്നതിനാലും മറ്റ് രാജ്യങ്ങളുടെ പിന്തുണയും സൗദി പ്രതീക്ഷിക്കുന്നുണ്ട്. വിവിധ സംസ്‌കാരങ്ങളിലുള്ള ആളുകള്‍ക്ക് കൂടിച്ചേരാനുള്ള അവസരമാണ് ലോകകപ്പ് വേദിയെന്നും കിരീടവകാശി അറിയിച്ചു.

കഴിഞ്ഞ അഞ്ച് വര്‍ഷത്തിനുള്ളില്‍ അന്‍പതിലധികം അന്താരാഷ്ട്ര ഇവന്റുകള്‍ സൗദി നടത്തിയിട്ടുണ്ട്. ആതിഥേയത്വം നേടാനായി സൗദി നാമനിര്‍ദ്ദേശം സമര്‍പ്പിക്കുമെന്ന് ഫുട്‌ബോള്‍ ഫെഡറേഷനും അറിയിച്ചിട്ടുണ്ട്. കായിക മേഖലയില്‍ മികച്ച നിക്ഷേപങ്ങള്‍ നടത്താനും സൗദി ആഗ്രഹം പ്രകടിപ്പിച്ചു. ലോകകപ്പിന്റെ നൂറാം വാര്‍ഷികത്തോട് അനുബന്ധിച്ച് മൂന്ന് ഭൂഖണ്ഡങ്ങളിലെ ആറ് രാജ്യങ്ങളിലായി 2030 ഫുട്‌ബോള് ലോകകപ്പ് നടത്താനാണ് ഫിഫ തീരുമാനിച്ചിരിക്കുന്നത്. സ്‌പെയിന്‍, പോര്‍ച്ചുഗല്‍, മൊറോക്കോ എന്നിവര്‍ സംയുക്തമായ ടൂര്‍ണമെന്റിന് ആതിഥേയത്വം വഹിക്കും. ഉറുഗ്വായ്, പരാഗ്വേ, അര്‍ജന്റീന എന്നീ രാജ്യങ്ങള്‍ ഓരോ മത്സരത്തിനും വേദിയാകും.