ആരോഗ്യവകുപ്പിനെതിരെ ഗുരുതര വിമർശനവുമായി പ്രതിപക്ഷനേതാവ് വി ഡി സതീശന്‍. ഗുണനിലവാരമില്ലാത്ത ചാത്തന്‍ മരുന്നുകളാണ് സംസ്ഥാനത്ത് വിറ്റഴിക്കുന്നത്. കാലാവധി കഴിഞ്ഞ മരുന്ന് മെഡിക്കൽ സർവീസ് കോർപ്പറേഷൻ വിതരണം ചെയ്തുവെന്ന സിഎജി റിപ്പോർട്ടിൽ മുഖ്യമന്ത്രി പിണറായി വിജയൻ മറുപടി നൽകണമെന്ന് വിഡി സതീശൻ ആവശ്യപ്പെട്ടു. സിഎജി റിപ്പോര്‍ട്ട് ഞെട്ടിപ്പിക്കുന്നതെന്നും പ്രതിപക്ഷ നേതാവ് വാര്‍ത്താസമ്മേളനത്തില്‍ പറഞ്ഞു.

മെഡിക്കൽ സർവീസ് കോർപ്പറേഷനിലെ സിഎജി റിപ്പോര്‍ട്ട് പ്രകാരം, വിതരണം ചെയ്ത 1610 ബാച്ച് മരുന്നുകള്‍ കാലാവധി കഴിഞ്ഞതാണെന്ന് കണ്ടെത്തി. 26 ആശുപത്രികളില്‍ കാലാവധി കഴിഞ്ഞ മരുന്ന് വിതരണം ചെയ്തു. വിതരണം മരവിപ്പിച്ച മരുന്നുകള്‍ 483 ആശുപത്രികള്‍ക്ക് നല്‍കി. രോഗികൾക്ക് ജീവഹാനി വരുത്തുന്ന രീതിയിൽ പണം തട്ടി. ഗുണനിലവാര പരിശോധനയിൽ ഗുരുതരമായ അലംഭാവമുണ്ടായി എന്നാണ് സിഎജി കണ്ടെത്തലിൽ നിന്നും വ്യക്തമാകുന്നതെന്നും സതീശന്‍ പറഞ്ഞു.

സര്‍ക്കാര്‍ അഴിമതിയില്‍ മുങ്ങിക്കുളിച്ചിരിക്കുകയാണെന്നും പ്രതിപക്ഷ നേതാവ് ആരോപിച്ചു. സപ്ലൈക്കോയില്‍ നിത്യോപയോഗ സാധനങ്ങള്‍ ഇല്ലാത്ത അവസ്ഥയാണ്. കെഎസ്ആര്‍ടിസിയെ പോലെ സപ്ലൈക്കോയും തകരുകയാണ്. ഖജനാവില്‍ പണമില്ലാത്തപ്പോഴാണ് സോഷ്യല്‍ മിഡിയ മാനേജ്‌മെന്റിന് വേണ്ടി ലക്ഷങ്ങള്‍ ചെലവഴിക്കുന്നതെന്നും വി ഡി സതീശൻ കുറ്റപ്പെടുത്തി.

മുഖ്യമന്ത്രിയുടെ മകള്‍ വീണ വിജയനുമായി ബന്ധപ്പെട്ട മാസപ്പടി വിവാദത്തില്‍ മാത്യു കുഴല്‍നാടന് മറുപടിയുമായി ധനമന്ത്രി കെ എന്‍ ബാലഗോപാല്‍. വീണ വിജയന്‍ നികുതി അടച്ചെന്ന വിഷയത്തില്‍ മാത്യു കുഴല്‍നാടന്‍ തെറ്റിദ്ധാരണ പരത്തുകയാണെന്ന് മന്ത്രി ആരോപിച്ചു. നികുതി അടച്ചോ എന്ന് ചോദിച്ച് മാത്യു കുഴല്‍നാടന്‍ നല്‍കിയ കത്തിന് കൃത്യമായ മറുപടി നല്‍കിയിട്ടുണ്ട്. നികുതി അടയ്ക്കാത്ത ആളുകളുടെ വിവരങ്ങള്‍ പുറത്തുവിടാറില്ല. മറുപടി കിട്ടിയിട്ടും തെറ്റിദ്ധാരണ പരത്തുകയാണ്. മാത്യു കുഴല്‍നാടന്‍ ഈ എപ്പിസോഡ് അവസാനിപ്പിച്ച് പുതിയ കാര്യങ്ങളുമായി വരണമെന്നും ധനമന്ത്രി പറഞ്ഞു.

വീണ വിജയന്‍ ഉള്‍പ്പെട്ട മാസപ്പടി വിവാദത്തില്‍ ധനകാര്യ വകുപ്പ് ഇറക്കിയ കത്തിൽ തീയതി സംബന്ധിച്ച് അവ്യക്തത ഉണ്ടെന്നാണ് മാത്യു കുഴൽനാടൻ്റെ വിമർശനം. കത്ത് അല്ല ക്യാപ്‌സ്യൂള്‍ എന്നായിരുന്നു കുഴല്‍നാടൻ ആരോപിച്ചത്. 2017 മുതല്‍ വീണ കരിമണല്‍ കമ്പനിയായ സിഎംആര്‍എല്ലില്‍ നിന്ന് പണം കൈപ്പറ്റുന്നുണ്ട്. ജിഎസ്ടി രജിസ്ട്രേഷന്‍ എടുത്തത് 2018ലാണ്. ഈ ആരോപണങ്ങൾക്ക് ആണ് ധനമന്ത്രിയുടെ മറുപടി.

മാസപ്പടി വിവാദത്തിൽ മാത്യു കുഴൽനാടനെതിരെ കടുത്ത വിമർശനവുമായി സിപിഐഎം കേന്ദ്ര കമ്മിറ്റി അംഗം എ.കെ. ബാലൻ. മുഖ്യമന്ത്രിയുടെ മകൾ വീണ നികുതിയടച്ചു എന്ന രേഖ പുറത്ത് വന്നതോടെ അത് മാസപ്പടി അല്ലെന്ന് തെളിഞ്ഞു. എന്നിട്ടും മാസപ്പടി എന്ന് പറയാൻ തലയിൽ വെളിച്ചമുള്ളവർക്ക് കഴിയില്ല. മാത്യു വീണിടം വിദ്യയാക്കുകയാണെന്നും എ കെ ബാലൻ പറഞ്ഞു.

ജി.എസ്.ടി. കൊടുത്തിട്ടില്ല, സർവീസ് കൊടുക്കാതെ മാസപ്പടി വാങ്ങുന്നു എന്നീ ആരോപണങ്ങളാണ് മാത്യു ഉന്നയിച്ചത്. ജിഎസ്ടി രജിസ്റ്റർ ചെയ്യുന്നതിന് മുൻപ് പണം കൊടുത്തുവെന്നത് അടിസ്ഥാനരഹിതമാണ്. ടാക്സ് കൊടുത്തുവെന്ന് ജിഎസ്ടി കമ്മിഷണർ ധനകാര്യ വകുപ്പിനെ അറിയിച്ചു. കത്തിൽ തെറ്റുണ്ടോ ശരിയുണ്ടോ എന്ന് പറയാൻ തനിക്ക് സാധിക്കില്ലെന്നും മാത്യു ഉന്നയിച്ച ഡേറ്റുകളിലെ വിവരങ്ങൾ ഐജിഎസ്ടിയോടാണ് ചോദിക്കേണ്ടതെന്നും എ കെ ബാലൻ പറഞ്ഞു. വേണമെങ്കിൽ അദ്ദേഹത്തിന് കോടതിയിൽ പോകാമെന്നും അദ്ദേഹം കൂട്ടിച്ചേർത്തു.

വീണയുടെ കമ്പനിയായ എക്സാലോജിക്, കരിമണൽ കമ്പനിയായ സി.എം.ആർ.എല്ലിൽ നിന്ന് വാങ്ങിയ പണത്തിന് ജി.എസ്.ടി. അടച്ചതായി ധനവകുപ്പ് കഴിഞ്ഞ ദിവസം സ്ഥിരീകരിച്ചിരുന്നു. ഇതിന് പിന്നാലെയാണ് മാത്യു കുഴൽനാടനെതിരെ രൂക്ഷവിമർശനവുമായി സി.പി.ഐ.എം. രംഗത്തെത്തിയത്. മാത്യു മാപ്പ് പറയണമെന്നാണ് നേരത്തെ സിപിഐഎം പറഞ്ഞത്. എന്നാൽ ജിഎസ്ടി രജിസ്ട്രേഷൻ എടുക്കും മുൻപാണ് പണം വാങ്ങിയതെന്ന് ആണ് കുഴൽനാടൻ ഇന്ന് ആരോപിച്ചത്.

മാസപ്പടി വിവാദത്തിൽ ധനവകുപ്പിന്റെ റിപ്പോർട്ട് തള്ളി മാത്യു കുഴൽനാടൻ. ധനവകുപ്പിൻ്റെ കത്ത് തനിക്ക് ലഭിച്ചില്ലെന്ന് പറഞ്ഞ മാത്യു മാധ്യമങ്ങളിലൂടെ പുറത്ത് വന്ന കത്തിലെ ചില കാര്യങ്ങൾ ചൂണ്ടിക്കാട്ടിയാണ് സംസാരിച്ചത്. വീണ വിജയൻ ജിഎസ്ടി അടച്ചു എന്ന് സൂചിപ്പിക്കുന്നുണ്ടെങ്കിലും ഏത് കാലയളവിൽ ആണ് ഇത് എന്ന് പറയുന്നില്ല. മാസപ്പടിയായി കിട്ടിയ 1.72 കോടിയുടെ നികുതിയാണ് വീണ അടച്ചതെന്ന് ധനവകുപ്പിന്റെ റിപ്പോർട്ടിൽ എവിടെയും പരാമർശമില്ലെന്നും കുഴൽനാടൻ പറയുന്നു.

നികുതിയടച്ചോ എന്നതല്ല, മുഖ്യമന്ത്രിയുടെ മകൾ മാസപ്പടി വാങ്ങിയതാണ് പ്രധാനം. സേവനം നൽകാതെ മാസപ്പടി വാങ്ങിയത് ഗുരുതര തെറ്റ്. വീണ 2017 മുതൽ കരിമണൽ കമ്പനിയായ സിഎംആർഎല്ലിൽ നിന്ന് പണം കൈപ്പറ്റുന്നുണ്ട്. 2018-ലാണ് വീണ ജിഎസ്ടി രജിസ്ട്രേഷൻ എടുത്തിട്ടുള്ളത്. പിന്നെ എങ്ങനെയാണ് അവർ ജിഎസ്ടി അടച്ചതെന്ന് വ്യക്തമാക്കണമെന്നും കുഴൽനാടൻ ആവശ്യപ്പെട്ടു. ധനവകുപ്പ് ഇപ്പോൾ ഇറക്കിയത് കത്തല്ല, കാപ്സ്യൂളാണെന്നും കുഴൽനാടൻ പറഞ്ഞു.

വീണയുടെ അക്കൗണ്ടില്‍ 60 ലക്ഷം രൂപ വന്നിട്ടുള്ളതായി റിപ്പോര്‍ട്ടില്‍ വ്യക്തമാക്കിയിട്ടുണ്ടെന്നും മാത്യു കുഴല്‍നാടന്‍ വാര്‍ത്താസമ്മേളനത്തില്‍ ആരോപിച്ചു. അച്ഛന് പ്രത്യേക ആക്ഷന്‍ കാണിക്കാനുള്ള വൈഭവം ഉള്ളത് പോലെ വീണാ വിജയന് മാത്രമായി പ്രത്യേക രീതിയില്‍ ജിഎസ്ടി അടയ്ക്കാന്‍ കഴിയുമോ എന്ന് ധനമന്ത്രി വ്യക്തമാക്കണമെന്നും കുഴല്‍നാടന്‍ ആവശ്യപ്പെട്ടു. താന്‍ ആണോ തന്നെ സംശയത്തിന്‍റെ നിഴലിലാക്കുകയും വിഷയം വഴിതിരിച്ചുവിടുകയും ചെയ്യാന്‍ ശ്രമിച്ച ധനമന്ത്രിയാണോ മാപ്പ് പറയേണ്ടതെന്ന് ജനങ്ങള്‍ തീരുമാനിക്കട്ടേയെന്നും അദ്ദേഹം പറഞ്ഞു.