അബുദാബിയിലെ അല് വത്ബയിലെ ഷെയ്ഖ് സായിദ് ഫെസ്റ്റിവല് പരിപാടിയുടെ ഭാഗമായി അല് വത്ബ പുഷ്പമേളയുടെ രണ്ടാം പതിപ്പ് ഇന്ന് ആരംഭിച്ചു.ജനുവരി 30 വരെ ഫെസ്റ്റിവല് നീണ്ടുനില്ക്കും.3ഡി പ്രത്യേക വര്ക്ക്ഷോപ്പുകള്, പ്രായോഗിക പൊതു വര്ക്ക്ഷോപ്പുകള്, പൂകൃഷിയിലെ മികച്ച ക്രിയേറ്റീവ് പ്രാക്ടീസ്, മികച്ച പുക്കളുടെ ഉല്പ്പന്നം, മരുഭൂമിയിലെ പൂന്തോട്ട രൂപകല്പ്പന, ഏറ്റവും മനോഹരമായ ഹോം ഫ്ലവര് ഗാര്ഡന്, യുഎഇയിലെ ഏറ്റവും മികച്ച ഫ്ലവര് ഫാം, ഫ്ലവര് ഫെസ്റ്റിവലിന്റെ മികച്ച ഫോട്ടോ എന്നിവയുള്പ്പെടെയുള്ള മത്സരങ്ങള് ഈ പരിപാടിയില് ഉള്പ്പെടുന്നു.തത്സമയ ഷോ,കാര്ഷിക യുവജന കൗണ്സിലുമായുള്ള ചര്ച്ചാ സെഷനുകള്, കുടുംബങ്ങള്, കുട്ടികള്, എന്നിവരെ ലക്ഷ്യം വച്ചുള്ള സംവേദനാത്മക പരിപാടികള് എന്നിവയും ഫെസ്റ്റിവലില് ഉണ്ടായിരിക്കും.കഴിഞ്ഞ വര്ഷത്തെ ഉദ്ഘാടന പരിപാടിയെയും അനുബന്ധ പ്രവര്ത്തനങ്ങളെയും അടിസ്ഥാനമാക്കിയാണ് ഈ വര്ഷത്തെ പതിപ്പ് നിര്മ്മിച്ചിരിക്കുന്നത്, 13,000ത്തിലധികം സന്ദര്ശകരെ ആകര്ഷിക്കും തരത്തില് 25ലധികം ഇനങ്ങളും 10 മത്സരങ്ങളും ഇതില് ഉള്പ്പെടുത്തിയിട്ടുണ്ട്.പ്രാദേശിക ഉല്പ്പന്നങ്ങളെയും ദേശീയ ഫാമുകളെയും പിന്തുണയ്ക്കുക, കാര്ഷിക, സാമ്പത്തിക രംഗത്ത് എമിറാത്തി പൂക്കളുടെ സാന്നിധ്യം ശക്തിപ്പെടുത്തുക, ഈ മേഖലയ്ക്ക് പുതിയ വിപണന അവസരങ്ങളും പങ്കാളിത്തങ്ങളും സൃഷ്ടിക്കുക എന്നിവയുമാണ് ഫെസ്റ്റിവലിന്റെ ലക്ഷ്യം.
മൂന്ന് മാസത്തിനുള്ളിൽ സൗദിയിലെ തീവണ്ടിയിൽ സഞ്ചരിച്ചത് 46 ദശലക്ഷം യാത്രക്കാര്
2025 വര്ഷത്തെ നാലാം പാദത്തില് സൗദിയിലെ ട്രെയിനുകളില് സഞ്ചരിച്ചത് 46 ദശലക്ഷം യാത്രക്കാര് എന്ന് കണക്കുകള്. 199 ശതമാനമത്തിന്റെ വളര്ച്ചയാണ് മുന് വര്ഷത്തെ അപേക്ഷിച്ച് രേഖപ്പെടുത്തിയത്.
കഴിഞ്ഞ മൂന്ന് മാസത്തിനുള്ളിലാണ് റെക്കോര്ഡ് യാത്രക്കാര് സൗദിയുടെ തീവണ്ടി സര്വ്വീസിനെ യാത്രക്കായി ഉപയോഗിച്ചത്. 2025 വര്ഷത്തെ നാലാം പാദത്തില് 46 ദശലക്ഷത്തിലധികം യാത്രക്കാരാണ് സൗദിയിലെ തീവണ്ടിയില് യാത്ര ചെയ്തത്. 2024വര്ഷത്തെ ഇതേ പാദവുമായി താരതമ്യപ്പെടുത്തുമ്പോള് 199% വളര്ച്ചയാണ് കൈവരിച്ചത്. അതേസമയം ലോഹ, ചരക്ക് ട്രെയിനുകള് 218,000 കണ്ടൈനറുകളില് 4 ദശലക്ഷം ടണ്ണിലധികം സാധനങ്ങള് കൊണ്ടുപോവുകയും ചെയ്തു. ഇന്റര്സിറ്റി ട്രെയിനുകള് വഴി 2.9 ദശലക്ഷത്തിലധികം യാത്രക്കാര് സഞ്ചരിച്ചതായും പൊതുഗതാഗത അതോറിറ്റി വിശദീകരിച്ചു. ഇതില് മക്ക മദീന പുണ്യ നഗരങ്ങളെ ജിദ്ദ വഴി ബന്ധിപ്പിച്ചുള്ള ഹറമൈന് ഹൈ-സ്പീഡ് റെയില്വേ വഴി 2.3 ദശലക്ഷം യാത്രക്കാരും, ഈസ്റ്റേണ് റെയില്വേ നെറ്റ്വര്ക്കിന് കീഴില് 367,000 യാത്രക്കാരും, ഈസ്റ്റേണ് റെയില്വേയ്ക്ക് കീഴില് 234,000 യാത്രക്കാരും ഉള്പ്പെടുന്നു.നഗരങ്ങള്ക്കുള്ളില് ട്രെയിനുകള് ഉപയോഗിച്ച് 43.8 ദശലക്ഷത്തിലധികം യാത്രക്കാരാണ്. ഇതില് റിയാദ് ട്രെയിനിലെ 32 ദശലക്ഷം യാത്രക്കാര് ഉള്പ്പെടുന്നു, അതേസമയം ജിദ്ദയിലെ കിംഗ് അബ്ദുല് അസീസ് അന്താരാഷ്ട്ര വിമാനത്താവളത്തിലെ ഓട്ടോമേറ്റഡ് ട്രാന്സ്പോര്ട്ട് സിസ്റ്റം 10.6 ദശലക്ഷത്തിലധികം യാത്രക്കാര് ഉപയോഗിച്ചിട്ടുണ്ട്. അതേസമയം റിയാദിലെ പ്രിന്സസ് നൂറ ബിന്ത് അബ്ദുള്റഹ്മാന് യൂണിവേഴ്സിറ്റിയിലെ ഓട്ടോമേറ്റഡ് ട്രാന്സ്പോര്ട്ട് സിസ്റ്റത്തിലെ യാത്രക്കാരുടെ എണ്ണം 982,000-ത്തിലധികം വരും.
സൗദി സമ്പദ്വ്യവസ്ഥയെ പിന്തുണയ്ക്കുന്നതിലും വിതരണ ശൃംഖലകള് ശക്തിപ്പെടുത്തുന്നതിലും, പ്രത്യേകിച്ചും വ്യവസായ, ഖനന മേഖലകളില്, ട്രെയിനുകളുടെ പ്രധാന പങ്ക് വഹിച്ചു. കിഴക്കന് റെയില്വേ ശൃംഖല വഴി കൊണ്ടുപോകുന്ന ചരക്കുകളുടെയും ധാതുക്കളുടെയും അളവ് 218,000 സ്റ്റാന്ഡേര്ഡ് കണ്ടെയ്നറുകളും 439,000 ടണ്ണില് കൂടുതലും, വടക്കന് റെയില്വേ ശൃംഖല വഴി കൊണ്ടുപോകുന്ന 3.5 ദശലക്ഷം ടണ്ണും കവിഞ്ഞതായും കണക്കുകള് വ്യക്തമാക്കുന്നു.
ഇറാന്-അമേരിക്ക പ്രതിസന്ധി; നിലപാട് മയപ്പെടുത്തി ട്രംപ്
ഇറാനെ ആക്രമിക്കുന്നതില് നിന്ന് പിന്മാറി അമേരിക്ക. ഗള്ഫ് രാജ്യങ്ങളും ഇസ്രയേലും നിരന്തരം ആവശ്യപ്പെട്ടതിനെ തുടര്ന്നാണ് തീരുമാനം. ഇറാനിലെ പ്രതിഷേധക്കാര്ക്ക് പ്രഖ്യാപിച്ച പിന്തുണയിലും അമേരിക്ക നിലപാട് മയപ്പെടുത്തി.
യുദ്ധമുണ്ടായാല് ഏറ്റവും വലിയ ദോഷം ചെയ്യുക ഗള്ഫ് രാജ്യങ്ങള്ക്കും ഇസ്രയേലിനുമാണ് എന്നതിനാലാണ് ഈ രാജ്യങ്ങള് കടുത്ത നിലപാടില് നിന്ന് പിന്മാറാന് അമേരിക്കയോട് ആവശ്യപ്പെട്ടത്. ഇക്കാര്യം സൗദി ഉദ്യോഗസ്ഥന് തന്നെ വ്യക്തമാക്കിയതായി കുവൈറ്റ് ടൈംസ് റിപ്പോര്ട്ട് ചെയ്തു.
കഴിഞ്ഞദിവസം വൈററ് ഹൗസില് മാധ്യമങ്ങളെ കാണുന്നതിനിടെയാണ് നിലപാട് മയപ്പെടുത്തി ട്രംപ് രംഗത്തെത്തിയത്. ഇറാനിലെ പ്രതിഷേധക്കാര്ക്ക് നേരത്തെ പിന്തുണ പ്രഖ്യാപിച്ച ട്രംപിന്റെ വാക്കുകള്ക്ക് പഴയ മുര്ച്ചയില്ലായിരുന്നു. മാത്രവുമല്ല, ഇറാന്റെ അഭയാര്ത്ഥിയായ രാജകുമാരന് പെഹ്ലാവിക്ക് വലിയ പിന്തുണ രാജ്യത്ത് ഉണ്ടെന്ന് കരുതുന്നില്ലെന്നും ട്രംപ് തുറന്നടിച്ചു.
ഇറാനെ അമേരിക്ക ആക്രമിച്ചാല് തിരിച്ചടിക്കുമെന്ന് ഇറാന് വ്യക്തമാക്കിയിരുന്നു. ഇറാനുചുറ്റുമുള്ള ഗള്ഫ് രാജ്യങ്ങളിലെ അമേരിക്കന് സൈനിക ക്യാമ്പുകള്ക്ക് നേരെ ഇറാന് ആക്രമണം നടത്താനുള്ള സാധ്യത കൂടി കണക്കിലെടുത്താണ് ട്രംപിനോട് പിന്മാറാന് ഗള്ഫ് രാജ്യങ്ങള് ആവശ്യപ്പെട്ടത്. ഇറാനിലെ ആഭ്യന്തര പ്രശ്നങ്ങളില് ഇടപെടുന്നത് അമേരിക്കയ്ക്ക് നിലവിലെ സാഹചര്യത്തില് ഗുണം ചെയ്യില്ലെന്ന് അമേരിക്കയിലെ തന്നെ സൈനിക ഉദ്യോഗസ്ഥരും ട്രംപിനെ ധരിപ്പിച്ചുവെന്നാണ് റിപ്പോര്ട്ടുകള്. അതേസമയം താല്ക്കാലികമായി പിന്മാറിയെങ്കിലും യുദ്ധമെന്ന സാധ്യത പൂര്ണമായും ഒഴിവാക്കിയിട്ടില്ലെന്ന് വൈറ്റ് ഹൗസ് വക്താവ് കരോലിന ലെവിറ്റ് പറഞ്ഞു. എന്താണ് മനസിലുള്ള പദ്ധതിയെന്ന് ട്രംപിന് മാത്രമേ അറിയൂവെന്നാണ് കരോലിന ഇത് സംബനധിച്ച ചോദ്യത്തിനോട് പ്രതികരിച്ചത്.
സൗദിയ-എയര് ഇന്ത്യ കരാര് ; ഇന്ത്യയ്ക്കും സൗദിക്കും ഇടയിലുള്ള യാത്ര ലളിതമാക്കി
ഇന്ത്യയ്ക്കും സൗദി അറേബ്യയ്ക്കും ഇടയിലുള്ള യാത്ര കൂടുതല് ലളിതമാക്കി സൗദി എയര്ലൈന്സായ സൗദിയയും എയര് ഇന്ത്യയും തമ്മില് കരാറിലെത്തി. ഫെബ്രുവരി മുതല് പുതിയ കോഡ് ഷെയറിങ് പ്രകാരം യാത്രക്കാര്ക്ക് കൂടുതല് വിമാന ഓപ്ഷനുകള് ലഭ്യമാക്കും.
പുതിയ കോഡ്ഷെയര് കരാര് പ്രകാരം ഇരു രാജ്യങ്ങള്ക്കുമിടയില് പറക്കുന്ന യാത്രക്കാര്ക്ക് കൂടുതല് വിമാന ഓപ്ഷനുകള്, സുഗമമായ കണക്ഷനുകള്, മുന്നോട്ടുള്ള യാത്ര എന്നിവ ലഭിക്കും.ജിദ്ദയിലോ റിയാദിലോ എത്തുന്ന എയര് ഇന്ത്യ യാത്രക്കാര്ക്ക് ദമ്മാം, അബഹ, ഖസീം, ജിസാന്, മദീന, തായിഫ് എന്നിവയുള്പ്പെടെയുള്ള നഗരങ്ങളിലേക്ക് സൗദിയ നടത്തുന്ന വിമാനങ്ങളില് തടസ്സമില്ലാതെ കണക്റ്റുചെയ്യാന് കഴിയും. ഇത് ബിസിനസ് യാത്രക്കാര്ക്കും വിനോദസഞ്ചാരികള്ക്കും നേട്ടമാണ്. പോയിന്റ് ടു പോയിന്റ് യാത്രയ്ക്ക് അപ്പുറം പങ്കാളിത്തത്തിന്റെ ഉപയോഗക്ഷമത വികസിപ്പിക്കുന്ന, തിരഞ്ഞെടുത്ത അന്താരാഷ്ട്ര ലക്ഷ്യസ്ഥാനങ്ങളിലേക്കുള്ള കണക്ഷനുകള് ഈ വര്ഷം അവസാനം ചേര്ക്കും. കരാര് പ്രകാരം ഇന്ത്യയിലേക്ക് സൗദിയ വിമാനത്തില് യാത്ര ചെയ്യുന്നവര്ക്ക് മുംബൈ, ഡല്ഹി വഴി അഹമ്മദാബാദ്, ബെംഗളൂരു, കൊല്ക്കത്ത, കൊച്ചി, ഹൈദരാബാദ്, ചെന്നൈ, ലഖ്നൗ, ജയ്പുര് എന്നിവയുള്പ്പെടെ ഇന്ത്യയിലെ വിവിധ നഗരങ്ങളിലേക്ക് സഞ്ചരിക്കാനാകും. ഇന്റര്ലൈന് ക്രമീകരണങ്ങളിലൂടെ 15-ലധികം സ്ഥലങ്ങള് കൂടി ലഭ്യമാണ്. ബിസിനസ്, വിനോദം അല്ലെങ്കില് കുടുംബ സന്ദര്ശനങ്ങള്ക്കായി ഇന്ത്യയിലേക്ക് പോകുന്ന യാത്രക്കാര്ക്ക് ഈ ഓപ്ഷനുകള് തിരഞ്ഞെടുക്കാനാകും. സൗദിയയെ സംബന്ധിച്ചിടത്തോളം, യാത്രകള് ലളിതമാക്കുന്നതിനൊപ്പം രണ്ട് വിപണികള് തമ്മിലുള്ള ദീര്ഘകാല ബന്ധം കൂടുതല് ആഴത്തിലാക്കുന്നതിലാണ് ശ്രദ്ധ കേന്ദ്രീകരിക്കുന്നത്. ഈ കരാര് രാജ്യങ്ങള് തമ്മിലുള്ള പതിറ്റാണ്ടുകളുടെ സേവനത്തെ അടിസ്ഥാനമാക്കിയുള്ള ഒരു തന്ത്രപരമായ ചുവടുവയ്പ്പാണെന്ന് സൗദിയ ഗ്രൂപ്പിന്റെ ഡയറക്ടര് ജനറല് എന്ജിനീയര് ഇബ്രാഹിം അല് ഒമര് പറഞ്ഞു. ആഗോള ശൃംഖല പുനര്നിര്മിക്കുന്നതിനുള്ള എയര് ഇന്ത്യയുടെ വിശാലമായ ശ്രമത്തെയും ഈ കരാര് പ്രതിഫലിപ്പിക്കുന്നു. 2022-ല് സ്വകാര്യവല്ക്കരണത്തിനുശേഷം, എയര്ലൈന് 24 കോഡ്ഷെയര് പങ്കാളിത്തങ്ങളിലേക്കും ഏകദേശം 100 ഇന്റര്ലൈന് കരാറുകളിലേക്കും വികസിച്ചു, ഇത് ലോകമെമ്പാടുമുള്ള 800-ലധികം ലക്ഷ്യസ്ഥാനങ്ങളിലേക്ക് ഉപഭോക്താക്കള്ക്ക് പ്രവേശനം നല്കിയിരുന്നു.
ലോക ഗവണ്മെന്റ് ഉച്ചകോടി; 150 ലോകരാജ്യങ്ങള് പങ്കെടുക്കും
ലോക ഗവണ്മെന്റ് ഉച്ചകോടിയുടെ അടുത്ത പതിപ്പ് 2026 ഫെബ്രുവരി 3 മുതല് 5 വരെ ദുബൈയില് നടക്കും. ‘ഭാവി ഗവണ്മെന്റുകളെ രൂപപ്പെടുത്തല്’ എന്ന വിഷയത്തിലാണ് ഇത്തവണത്തെ ഉച്ചകോടി. 150 ലോകരാജ്യങ്ങള് പങ്കെടുക്കുമെന്നാണ് പ്രതീക്ഷിക്കപ്പെടുന്നത്.
2013 ല് യുഎഇയില് ആരംഭിച്ച ലോക ഗവണ്മെന്റ്സ് ഉച്ചകോടി, വിവിധ വിഷയങ്ങളില് പ്രായോഗിക പരിഹാരങ്ങളും പുതിയ ആശയങ്ങളും സ്വാധീനമുള്ള പങ്കാളിത്തങ്ങളും രൂപപ്പെടുന്ന ഒരു ആഗോള വേദിയായി മാറുക എന്ന നേതൃത്വത്തിന്റെ കാഴ്ചപ്പാടാണ് നയിച്ചത്. ഭരണം, സാങ്കേതികവിദ്യ, വ്യോമയാനം, ലോജിസ്റ്റിക്സ്, ടൂറിസം, ആഗോള വ്യാപാരം, നിക്ഷേപം തുടങ്ങിയ സുപ്രധാന മേഖലകളുടെ ഭാവിയെക്കുറിച്ചുള്ള തന്ത്രപരമായ സംഭാഷണങ്ങള് ഈ വര്ഷത്തെ പതിപ്പില് ഉണ്ടാകും. 35-ലധികം രാഷ്ട്രത്തലവന്മാരും ഗവണ്മെന്റ് തലവന്മാരും നിരവധി സര്ക്കാര് പ്രതിനിധികളും 150-ലധികം ഗവണ്മെന്റുകളും പങ്കെടുക്കുന്ന പരിപാടിയാണിത്. പ്രമുഖ ചിന്താ നേതാക്കളും ആഗോള വിദഗ്ധരും ഉള്പ്പെടെ 6,000-ത്തിലധികം പേര് പങ്കെടുക്കുന്ന സമ്മേളനത്തില് ഈ നേതാക്കളും പങ്കെടുക്കും,’
ലോകത്തെ പ്രമുഖ കോര്പ്പറേഷനുകളും വിജ്ഞാന സ്ഥാപനങ്ങളും ഉള്പ്പെടെ 70-ലധികം തന്ത്രപരമായ പങ്കാളികളുടെ ശക്തമായ ശൃംഖലയാണ് ഈ ദൗത്യത്തിന് കരുത്ത് പകരുന്നത്.
ഉച്ചകോടിയില് പങ്കെടുക്കുന്ന രാഷ്ട്രത്തലവന്മാരില് ഭൂട്ടാന് രാജാവായ ജിഗ്മെ ഖേസര് നാംഗ്യേല് വാങ്ചുക്ക്്, സ്വിസ് പ്രസിഡന്റ് ഗൈ പാര്മെലിന്; ഇക്വഡോര് പ്രസിഡന്റ് ഡാനിയല് നോബോവ; എസ്തോണിയയുടെ പ്രസിഡന്റ് അലര് കാരിസ്; കുവൈറ്റ് കിരീടാവകാശി ഷെയ്ഖ് സബാഹ് അല്-ഖാലിദ് അല്-ഹമദ് അല്-മുബാറക് അല്-സബ, സ്പെയിന് പ്രധാനമന്ത്രി പെഡ്രോ സാഞ്ചസ് , അല്ബേനിയയുടെ പ്രധാനമന്ത്രി എഡി രാമ; തുടങ്ങിയ രാഷ്ട്ര നേതാക്കളും പങ്കാളികളാവും. ഈ വര്ഷം ലോക ഗവണ്മെന്റ് ഉച്ചകോടിക്കൊപ്പം യുഎഇ ലോക സമ്മാന ജേതാക്കളുടെ ഉച്ചകോടിയും നടത്തുന്നു. വേള്ഡ് ലോറേറ്റ്സ് അസോസിയേഷന്റെ സഹകരണത്തോടെ ഫെബ്രുവരി 1, 2 തീയതികളില് നടക്കുന്ന ഇത്തരത്തിലുള്ള ഏറ്റവും വലിയ പരിപാടിയില് നോബല് സമ്മാനം, ട്യൂറിംഗ് അവാര്ഡ്, വുള്ഫ് പ്രൈസ്, ഫീല്ഡ്സ് മെഡല്, ഗ്രേറ്റ് അറബ് മൈന്ഡ്സ്, മറ്റ് പ്രധാന അന്താരാഷ്ട്ര ശാസ്ത്ര ബഹുമതികള് എന്നിവയുള്പ്പെടെ ആഗോള അംഗീകാരങ്ങള് നേടിയ ലോക പ്രമുഖ സമ്മാന ജേതാക്കള് പങ്കെടുക്കും. രണ്ട് ദിവസങ്ങളിലായി, സര്ക്കാരുകള് നേരിടുന്ന പ്രധാന വെല്ലുവിളികള്ക്ക് ശാസ്ത്രീയ പരിഹാരങ്ങള് നല്കുന്നതില് ഈ സമ്മാന ജേതാക്കള് സഹകരിക്കും, അവരുടെ ചര്ച്ചകളുടെ ഫലങ്ങള് ലോക ഗവണ്മെന്റ് ഉച്ചകോടിയില് പ്രഖ്യാപിക്കും.
ആര്ടിഎ; പുതിയ പദ്ധതികള് വെളിപ്പെടുത്തി
ദുബായ് റോഡ്സ് ആന്ഡ് ട്രാന്സ്പോര്ട്ട് അതോറിറ്റി സംഘടിപ്പിച്ച 11-ാമത് ദുബായ് ഇന്റര്നാഷണല് പ്രോജക്ട് മാനേജ്മെന്റ് ഫോറത്തില്, വിവിധങ്ങളായ ഭാവി പദ്ധതികളുടെ വിശദാംശങ്ങള് വെളിപ്പെടുത്തി. ‘ദുബായ് ലൂപ്പ്’ പദ്ധതി, ‘സ്കൈപോഡ്’ സസ്പെന്ഡഡ് ട്രാന്സ്പോര്ട്ട് യൂണിറ്റ് സിസ്റ്റം, ട്രാക്ക്ലെസ് ട്രാം സിസ്റ്റം, സുസ്ഥിര ഗതാഗത വാഹനമായ ‘റെയില്ബസ്’ എന്നിവ ഈ പദ്ധതികളില് ഉള്പ്പെടുന്നു.
‘ദുബായിലെ ഒരു നൂറ്റാണ്ട് മൊബിലിറ്റി’ എന്ന പേരിലുള്ള ഒരു ബുക്ക്ലെറ്റിലൂടെയാണ് ഫോറം സന്ദര്ശകര്ക്ക് പദ്ധതിയുടെ വിശദാംശങ്ങള് ലഭ്യമാക്കിയത്. മണിക്കൂറില് 150,000 യാത്രക്കാരെ ഉള്ക്കൊള്ളാന് പുതിയ പദ്ധതികളിലൂടെ ഇവയ്ക്ക് കഴിയും. ‘ദുബായ് ലൂപ്പ്’ പദ്ധതിയില് 100,000 യാത്രക്കാരും ‘സ്കൈപോഡ്’ സംവിധാനത്തില് 50,000 യാത്രക്കാരും ഉള്പ്പെടുന്നു. തിരക്കേറിയ റോഡുകളില് നിന്ന് മാറി, യാത്ര ആകാശത്തേക്കും ഭൂമിക്കടിയിലേക്കും മാറ്റുന്നു എന്നത് ഇവയുടെ സവിശേഷതയാണ്. ദുബായ് ലൂപ്പ് പ്രോജക്റ്റ്, ദീര്ഘദൂര യാത്രകളെ ഏതാനും മിനിറ്റുകളാക്കി മാറ്റിക്കൊണ്ട് ആളുകള് നഗരത്തിന് ചുറ്റും എങ്ങനെ സഞ്ചരിക്കുന്നുവെന്ന് പുനര് നിര്വചിക്കുന്നു. സസ്പെന്ഡ് ചെയ്ത ട്രെയിനിന്റെയും സ്കീ ലിഫ്റ്റുകളുടെയും സംയോജനമായാണ് സ്കൈപോഡ് സംവിധാനത്തെ വിശേഷിപ്പിച്ചത്. 7.5 മീറ്റര് ഉയരത്തില് സസ്പെന്ഡ് ചെയ്ത കാര്ബണ് കമ്പോസിറ്റ് ട്രാക്കില് സുഗമമായി തെന്നിമാറുന്ന സെല്ഫ്-ഡ്രൈവിംഗ് ഇലക്ട്രിക് കാപ്സ്യൂളുകളെയാണ് ഈ സിസ്റ്റം ആശ്രയിക്കുന്നത്. ഓരോ കാപ്സ്യൂളിനും നാല് മുതല് ആറ് വരെ യാത്രക്കാരെ ഉള്ക്കൊള്ളാന് കഴിയും, ഇത് പരമ്പരാഗത പൊതുഗതാഗതവുമായി താരതമ്യപ്പെടുത്തുമ്പോള് ശാന്തവും വ്യത്യസ്തവുമായ യാത്രാനുഭവം നല്കുന്നു. പ്രാരംഭത്തില് മണിക്കൂറില് 20,000 യാത്രക്കാര് വരെ ശേഷിയുള്ള സകൈപോഡ് , ഭാവിയില് മണിക്കൂറില് 50,000 യാത്രക്കാരില് എത്തുമെന്ന് പ്രതീക്ഷിക്കുന്നു. ‘ദുബായ് ലൂപ്പ്’ പദ്ധതിയും എലോണ് മസ്കിന്റെ ‘ദി ബറോ കമ്പനി’യുമായുള്ള ഭാവി പങ്കാളിത്തവും മണിക്കൂറില് 100,000 യാത്രക്കാരെ വരെ എത്തിക്കാന് കഴിയുന്ന 17 കിലോമീറ്റര് നീളമുള്ള ഒരു ഭൂഗര്ഭ തുരങ്കമായിരിക്കും ഈ പദ്ധതി, മണിക്കൂറില് 160 കിലോമീറ്റര് വരെ വേഗതയില് സഞ്ചരിക്കാമെന്നും ഇത് വാഗ്ദാനം ചെയ്യുന്നു. 2030-ല് 25% യാത്രകളും ഡ്രൈവറില്ലാ യാത്രകളാക്കുക എന്ന ദുബായിയുടെ ലക്ഷ്യം കൈവരിക്കുന്നതിനുള്ള ഒരു ധീരമായ കുതിച്ചുചാട്ടമാണ് ഈ പരിവര്ത്തന ശ്രമം. തിരക്കേറിയ റോഡുകളില് നിന്ന് മാറി, ഗതാഗതം ആകാശത്തേക്ക് കൊണ്ടുവരുന്നതിലൂടെ, സ്കൈപോഡ് നഗര മൊബിലിറ്റിക്ക് ഉപയോഗിക്കുന്ന ഗ്രൗണ്ട് സ്പേസ് ഗണ്യമായി കുറയ്ക്കും. പരമ്പരാഗത ഗതാഗതത്തേക്കാള് 100 മടങ്ങ് കുറവ് ഗ്രൗണ്ട് സ്പേസ് ഉപയോഗിക്കാനും ഇലക്ട്രിക് വാഹനങ്ങളേക്കാള് അഞ്ചിരട്ടി ഉയര്ന്ന ഊര്ജ്ജ കാര്യക്ഷമത കൈവരിക്കാനും സ്കൈപോഡ് നെറ്റ്വര്ക്കിന് കഴിയും.
ലിങ്ക്ഡ്ഇന് സര്വേ ;പുതിയ ജോലി തേടുന്നവര് കൂടുന്നു
യു.എ.ഇയിലെ ഭൂരിഭാഗം ആളുകളും ജോലിക്കാരും പുതുവര്ഷത്തില് പുതിയ ജോലിയിലേയ്ക്ക് മാറാന് ആഗ്രഹിക്കുന്നതായി സര്വെ റിപ്പോര്ട്ട്. പ്രമുഖ പ്രൊഫഷണല് നെറ്റ്വര്ക്കിംഗ് പ്ലാറ്റ്ഫോമായ ലിങ്ക്ഡ്ഇന് നടത്തിയ സര്വേയിലാണ് ഈ കണ്ടെത്തല്. യുഎഇയിലെ തൊഴില് വിപണിയില് ഈ വര്ഷം വലിയ മാറ്റങ്ങള് സംഭവിക്കുമെന്നും റിപ്പോര്ട്ടില് പറയുന്നു.പത്തില് ഏഴ് പേരും പുതിയ അവസരങ്ങള് തേടുന്നതായാണ് ലിങ്ക്ഡ്ഇന് നടത്തിയ സര്വേയില് വ്യക്തമാക്കുന്നത്. നേരത്തെ പുറത്തിറങ്ങിയ ഒരു റിപ്പോര്ട്ട് പ്രകാരം നിലവിലുള്ള ജോലികളില് 74% പേരും സന്തുഷ്ടരാണെന്ന് വ്യക്തമാക്കിയിരുന്നു. പുതിയ ജോലി കണ്ടെത്തുന്നത് കൂടുതല് പ്രശ്നങ്ങള് ഉണ്ടാക്കുമെന്നായിരുന്നു അന്ന് 65% ജീവനക്കാരും അഭിപ്രായപ്പെട്ടിരുന്നത്. എന്നാല് അതില് നിന്ന് വ്യത്യസ്തമായ കണക്കുകളാണ് ഇപ്പോള് പുറത്തുവന്നിരിക്കുന്നത്. യു.എ.ഇയില് നിരവധി തൊഴിലവസരങ്ങള് ഉള്ളതിനാല് ജോലി മാറ്റം എളുപ്പത്തില് സാധ്യമാകുമെന്നാണ് തൊഴിലന്വേഷകര് വിലയിരുത്തുന്നത്. എന്നാല് അനുഭവ പരിചയമുള്ള ജീവനക്കാര് തൊഴില് മാറുമ്പോള് വൈദഗ്ധ്യമുള്ള ഉദ്യോഗാര്ത്ഥികളെ കണ്ടെത്താന് തൊഴിലുടമകള് ബുദ്ധിമുട്ട് നേരിടേണ്ടി വരും. കഴിഞ്ഞ അഞ്ച് വര്ഷത്തിനിടെ പുതുതായി യുഎഇ യിലെത്തെത്തിയത് രണ്ട് ദശലക്ഷത്തോളം ആളുകളാണ് . ഇത് തൊഴില് വിപണിയില് വലിയ മാറ്റങ്ങള് ഉണ്ടാക്കിയതായാണ് വിലയിരുത്തല്. യുഎഇ ഇപ്പോള് ഉയര്ന്ന വൈദഗ്ധ്യമുള്ള ജോലികള്ക്ക് വലിയ പ്രധാന്യമാണ് നല്കുന്നത്. ആര്ട്ടിഫിഷ്യല് ഇന്റലിജന്സ്, ഡിജിറ്റല് മാര്ക്കറ്റിംഗ്, ഡാറ്റ അനലിറ്റിക്സ് തുടങ്ങിയ മേഖലകളില് വരാനിരിക്കുന്നത് വലിയ അവസരങ്ങളാണ് . അതുകൊണ്ട് തന്നെ പുതിയതായി യു.എ.ഇയിലെ തൊഴില് മേഖലയിലേക്ക് കടന്നു വരുന്നവര്ക്കും അവസരങ്ങള്ക്ക് കുറവുണ്ടാകില്ല. ജോബ് മാച്ച്’ പോലുള്ള സൗകര്യങ്ങള് ഉപയോഗിച്ച് ശരിയായ ജോലി വേഗത്തില് കണ്ടെത്താനാകുമെന്നാണ് ഈ മേഖലയിലെ വിദഗ്ധര് ചൂണ്ടികാട്ടുന്നത്.
പുതുവത്സര അവധി ആഘോഷം;കുവൈറ്റ് വിമാനത്താവളത്തില് റെക്കോഡ് യാത്രക്കാര്
കുവൈറ്റ് വിമാനത്താവളം വഴി പുതുവത്സര അവധി ദിനങ്ങളില് സഞ്ചരിച്ച യാത്രക്കാരുടെ എണ്ണത്തില് റെക്കോര്ഡ് വര്ദ്ദന. മൂന്ന് ദിവസത്തിനുള്ളില് ഒന്നര ലക്ഷത്തിലധികം ആളുകളാണ് കുവൈറ്റ് വിമാനത്താവളം വഴി യാത്ര ചെയ്തത്. ഈ ദിവസങ്ങളില് സര്വീസ് നടത്തിയത് ആയിരത്തിലേറെ വിമാനങ്ങളാണ്.ഈ വര്ഷത്തെ പുതുവത്സര അവധിക്കാലത്ത് 1,73,982 പേരാണ് കുവൈറ്റ് വിമാനത്താവളം വഴി യാത്ര ചെയ്തത്. കുവൈറ്റ് സിവില് ഏവിയേഷന് വിഭാഗം പുറത്ത് വിട്ട കണക്കാണ് ഇത്. ജനുവരി 1 മുതല് 3 വരെയുളള മൂന്ന് ദിവസങ്ങളിലെ കാണക്കാണ് ഇത്. ടെര്മിനല് ഒന്ന് വഴി 72,427 പേരും, ടെര്മിനല് നാല് വഴി 54,330 പേരും, ടെര്മിനല് അഞ്ചിലൂടെ 47,225 പേരും യാത്ര ചെയ്തതായി സിവില് ഏവിയേഷന് വിഭാഗത്തിന്റെ കണക്കുകള് വ്യക്തമാക്കുന്നു. അവധി ദിവസങ്ങളില് 1,082 വിമാന സര്വീസുകളാണ് കുവൈത്ത് അന്താരാഷ്ട്ര വിമാനത്താവളം ഓപ്പറേറ്റ് ചെയ്തത്. ഇതില് 540 വിമാനങ്ങള് കുവൈത്തില് നിന്ന് പുറപ്പെട്ടതും 542 വിമാനങ്ങള് രാജ്യത്തേക്ക് എത്തിയതുമാണ്. പുതുവത്സര അവധി ആഘോഷിക്കാന് കുവൈത്തിലെ താമസക്കാര് പ്രധാനമായും തിരഞ്ഞെടുത്തത് ദുബായ്, കെയ്റോ, ജിദ്ദ, ദോഹ, ഇസ്താംബുള് എന്നീ നഗരങ്ങളെയാണെന്നും കണക്കുകള് വ്യക്തമാക്കുന്നു. യാത്രക്കാരുടെ വര്ധിച്ച തിരക്ക് നിയന്ത്രിക്കുന്നതിനായി വിമാനത്താവളത്തിലെ എല്ലാ ടെര്മിനലുകളിലും പ്രത്യേക ക്രമീകരണങ്ങളും സൗകര്യങ്ങളും ഏര്പ്പെടുത്തിയിരുന്നതായും അധികൃതര് വ്യക്തമാക്കി. വിമാനത്താവളത്തിലെ മികച്ച സൗകര്യങ്ങളും വേഗത്തിലുളള നടപടിക്രമങ്ങളുമാണ് യാത്രക്കാരുടെ വര്ദ്ധനവിന് കാരണമെന്നും സിവില് ഏവിയേഷന് വിഭാഗം വ്യക്തമാക്കി.
റിയാദ് മെട്രോ ; കൂടുതല് സ്റ്റേഷനുകള് ഉള്പ്പെടുത്തി വികസിപ്പിക്കുന്നു
റിയാദ് മെട്രോ കൂടുതല് സ്റ്റേഷനുകള് ഉള്പ്പെടുത്തി വികസിപ്പിക്കുന്നു. റെഡ് ലൈന് ശൃംഖല ദിരിയ ഗേറ്റ് വികസന പദ്ധതിയിലേക്ക് നീട്ടുന്നതായി റോയല് കമ്മീഷന് ഫോര് റിയാദ് സിറ്റി പ്രഖ്യാപിച്ചു. കിങ് സൗദ് സര്വകലാശാല മുതല് ദിരിയ ഗേറ്റ് വരെ 8.4 കിലോമീറ്റര് ദൂരത്തിലാണ് പുതിയ പാത നിര്മിക്കുന്നത്. ഇതിന്റെ ഭാഗമായി അഞ്ച് പുതിയ സ്റ്റേഷനുകള് കൂടി സ്ഥാപിക്കും.. ഇതില് രണ്ട് സ്റ്റേഷനുകള് കിങ് സൗദ് സര്വകലാശാലാ കാമ്പസിലും മെഡിക്കല് സിറ്റിയിലുമായിരിക്കും. ദിരിയ മേഖലയിലായിരിക്കും മറ്റ് മൂന്ന് സ്റ്റേഷനുകള് നിര്മ്മിക്കുക. ഇതില് ഒരു സ്റ്റേഷന് ഭാവിയില് വരാനിരിക്കുന്ന ലൈന് 7-മായി ബന്ധിപ്പിക്കുന്ന ഒരു പ്രധാന കേന്ദ്രമായി പ്രവര്ത്തിക്കും. 7.1 കിലോമീറ്റര് ദൈര്ഘ്യമുള്ള ഭൂഗര്ഭ തുരങ്കങ്ങളാണ് ലൈന് 7 ന്റെ പ്രധാന പ്രത്യേകത. 1.3 കിലോമീറ്റര് മേല്പ്പാലവും സജ്ജമാക്കും. 6 വര്ഷത്തിനുള്ളില് പദ്ധതി പൂര്ത്തിയാക്കാനാണ് ലക്ഷ്യമിടുന്നത്.
വികസനം അതിവേഗം;മുഹമ്മദ് ബിന് റാഷിദ് അല് മക്തൂം സോളര് പാര്ക്കിന്റെ ആറാം ഘട്ടം
മുഹമ്മദ് ബിന് റാഷിദ് അല് മക്തൂം സോളര് പാര്ക്കിന്റെ ശേഷി വര്ധിപ്പിച്ച് ആറാം ഘട്ട വികസനം. 1,800 മെഗാവാട്ട് ശേഷിയുള്ള ആറാം ഘട്ടത്തിന്റെ ഭാഗമായി 1,000 മെഗാവാട്ട് ആണ് ഇപ്പോള് പ്രവര്ത്തന സജ്ജമായത്.ലോകത്തിലെ ഏറ്റവും വലിയ ഏക കേന്ദ്ര സൗരോര്ജ പാര്ക്കാണ് മുഹമ്മദ് ബിന് റാഷിദ് അല് മക്തൂം സോളര് പാര്ക്ക്. 2030ഓടെ ഇതിന്റെ ആകെ ശേഷി 5,000 മെഗാവാട്ടില് എത്തുമെന്നാണ് പ്രതീക്ഷിക്കുന്നത്. അധിക ഉല്പാദന ശേഷി വഴി വര്ഷത്തില് ലക്ഷക്കണക്കിന് ടണ് കാര്ബണ് പ്രസരണം കുറയ്ക്കാനും സാധിക്കും.
അബുദാബി ആസ്ഥാനമായ മസ്ദാര് കമ്പനിയുമായി സഹകരിച്ചുള്ള ആറാം ഘട്ടം വികസനം വര്ഷാവസാനത്തോടെ പൂര്ത്തിയാകും. ഇതോടെ ദുബായുടെ ഹരിതാഭയും സുസ്ഥിരതയും വര്ധിപ്പിക്കുന്നതില് സൗരോര്ജ പാര്ക്ക് മുഖ്യ പങ്ക് വഹിക്കുമെന്നാണ് വിലയിരുത്തുന്നത്.1.6 ജിഗാവാട്ട് ശേഷിയില് ഏഴാം ഘട്ട വികസനവും ദുബായ് ഇലക്ട്രിസിറ്റി ആന്ഡ് വാട്ടര് അതോറിറ്റി നേരത്തെ പ്രഖ്യാപിച്ചിരുന്നു.ഇതോടൊപ്പം ഒരു ജിഗാവാട്ട് ബാറ്ററി സ്റ്റോറേജ് സൗകര്യവും വികസിപ്പിക്കും. 2027-2029 കാലഘട്ടത്തിനിടയില് കമ്മിഷന് ചെയ്യാനാണ് പദ്ധതി. സംശുദ്ധ ഊര്ജം ഉല്പാദിപ്പിക്കാനായി എമിറേറ്റില് 24 മണിക്കൂറും പ്രവര്ത്തിക്കുന്ന രണ്ടാമത്തെ പ്ലാന്റാവും ഇത്. പൊതുസ്വകാര്യപങ്കാളിത്തത്തിലൂടെ യുഎഇയുടെ ഊര്ജ സേവന വിപണി വികസിപ്പിക്കുക, ഊര്ജ കാര്യക്ഷമതയിലും പുനരുപയോഗ പദ്ധതികളിലും നിക്ഷേപം പ്രോത്സാഹിപ്പിക്കുക, സുസ്ഥിര സാമ്പത്തിക വികസനം പ്രോത്സാഹിപ്പിക്കുക എന്നിവയാണ് മറ്റു ലക്ഷ്യങ്ങള്.